شي جينپيڭ اۆستراليانىڭ زۇڭليى البانيسپەن كەزدەستى

7 - ايدىڭ 15 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا رەسمي ساپارمەن كەلگەن اۆستراليانىڭ زۇڭليى البانيسپەن كەزدەستى.

سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

شينحۋا اگەنتتىگى، 7 - ايدىڭ 15 - كۇنى، بەيجيڭ (تىلشىلەر سۇن ي، شۇي كى). 7 - ايدىڭ 15 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا رەسمي ساپارمەن كەلگەن اۆستراليانىڭ زۇڭليى البانيسپەن كەزدەستى.

شي جينپيڭ البانيستىڭ تاعى دا سايلانعاندىعىن قۇتتىقتادى. شي جينپيڭ بىلاي دەپ اتاپ كورسەتتى: ەكى جاقتىڭ بىرگە قۇلشىنۋىندا، جۇڭگو - اۆستراليا قارىم - قاتىناسى تاياۋ جىلداردان بەرى قۇلدىراۋدان قۇتىلىپ، راقايلاسۋدى جۇزەگە اسىرىپ، ەكى ەل حالقىنا ناقتى باقىت اكەلدى. بۇل بىزگە تەڭ تۇرعىدا مامىلە جاساۋعا، پارىقتاردى ساقتاپ، ورتاقتىققا ۇمتىلۋعا، ءوزارا ءتيىمدى سەلبەستىككە تاباندى بولۋ جۇڭگو مەن اۆستراليا ەكى ەلدىڭ جانە ەكى ەل حالقىنىڭ ءتۇبىرلى مۇددەسىنە ۇيلەسەدى، حالىقارالىق جاعداي قالاي وزگەرسە دە، وسى ۇلكەن بەتالىستان اۋىتقىماۋ كەرەك دەگەن ەڭ ۇلكەن وي سالدى. جۇڭگو مەن اۆستراليانىڭ جالپى بەتتىك ستراتەگيالىق ارىپتەستىك قارىم - قاتىناسىنىڭ باستالعانىنا ەكىنشى 10 جىل بولدى، جۇڭگو جاق اۆستراليا جاقپەن بىرگە جۇڭگو - اۆستراليا قارىم - قاتىناسىنىڭ ونان ارى العا باسۋىن، جاقسى دامۋىن ىلگەرىلەتىپ، ەكى ەل حالقىنا ءتىپتى دە زور باقىت جاراتۋدى قالايدى.

شي جينپيڭ بىلاي دەپ باسا دارىپتەدى: جۇڭگو مەن اۆستراليا ەكى جاق الدىمەن ستراتەگيالىق ءوزارا سەنىمدىلىكتى ۇزدىكسىز كۇشەيتۋى كەرەك. جۇڭگو بەيبىت دامۋعا تاباندى بولۋ بەكىمىنەن اۋىتقىمايدى، بىرگە دامۋ ۇستانىمىنان اۋىتقىمايدى، ازيا - تىنىق مۇحيت ءوڭىرىنىڭ سەلبەسىپ دامۋىن جەبەۋ ساياساتىنان اۋىتقىمايدى، ءار ەلدىڭ ىنتىماقتاسا سەلبەسىپ، ازيا - تىنىق مۇحيت ەركىن ساۋدا رايونى قۇرىلىسىن، ساۋدا مەن قارجى قوسۋدىڭ ەركىن، قولايلى بولۋىن ىلگەرىلەتىپ، ءوڭىردىڭ بەيبىتشىلىگىن، دامۋىن، گۇلدەنۋىن جەبەۋدى دارىپتەيدى. ەكى جاق دۇرىس ءوزارا تانىمعا تاباندى بولىپ، ءوزارا سەنىمدىلىك نەگىزىن بەكەمدەۋى كەرەك. ەكىنشى، ءوزارا ءتيىمدى سەلبەستىكتى تەرەڭدەتۋ، كەڭەيتۋ كەرەك. جۇڭگو 16 جىلدان بەرى اۆستراليانىڭ ەڭ ۇلكەن ساۋدا سەرىگى بولىپ كەلەدى، جۇڭگومەن اراداعى ساۋدا اۆسترالياعا ناقتى پايدا جەتكىزدى. ەكى جاق دامۋ ستراتەگياسىن ۇشتاستىرۋدى ىلگەرىلەتىپ، ەكى ەل كاسىپورىندارىنا تاماشا شارۋاشىلىق - ساۋدا ورتاسىن شىن مانىندە جاراتىپ، مۇددەلەردىڭ توعىسۋ ءتۇيىنى مەن سەلبەستىكتىڭ ارتۋ ءتۇيىنىن اناعۇرلىم كوپ قالىپتاستىرىپ، سەلبەستىكتىڭ ساتىسى مەن دەڭگەيىن ۇزدىكسىز جوعارىلاتۋى كەرەك. ءۇشىنشى، حالىق دوستىعىن كەڭ كولەمدە جەتىلدىرۋ كەرەك. ەكى ەل حالقىنىڭ جان دۇنيەسى توعىسقان، دوستىعى ادال، جۇڭگو جاق اۆستراليانىڭ ءار سالا قايراتكەرلەرىنىڭ جۇڭگوعا كەلىپ ارالاپ كورۋىن قارسى الادى، اۆستراليا جاستارى مەن ورەندەرىن جۇڭگوعا كەلىپ اۋىس - كۇيىس جاساۋعا، ءبىلىم الۋعا ۇسىنىس ەتىپ، جۇڭگو مەن اۆستراليانىڭ دوستىق اعاشىنىڭ ءتىپتى دە قاۋلاپ وسۋىنە مۇمكىندىك جاساۋدى قالايدى. ءتورتىنشى، حاۋىپ - قاتەر مەن سىن - سايىسقا بىرگە توتەپ بەرۋ كەرەك. قىم - قۋىت حالىقارالىق جاعداي الدىندا، ءار ەل حالىقارالىق ادىلدىك پەن ادىلەتتىلىكتى، كوپ جاقتىلىق پەن ەركىن ساۋدانى، بىرلەسكەن مەملەكەتتەر ۇيىمىن ۇيىتقى ەتكەن حالىقارالىق جۇيە مەن حالىقارالىق زاڭدى نەگىز ەتكەن حالىقارالىق ءتارتىپتى بىرگە قورعاپ، حالىقارالىق ءتارتىپتىڭ اناعۇرلىم ءادىل، ۇيلەسىمدى باعىتقا قاراي دامۋىن ىلگەرىلەتۋى كەرەك.

البانيس مىنالاردى ءبىلدىردى: تاياۋ جىلداردان بەرى اۆستراليا - جۇڭگو قارىم - قاتىناسىندا بەلسەندى ىلگەرىلەۋشىلىككە قول جەتتى. اۆستراليا جاق جۇڭگومەن قارىم - قاتىناسىن توتەنشە قاستەرلەيدى، جۇڭگو جاقپەن بىرگە تەڭ تۇرعىدا مامىلە جاساپ، پارىقتاردى ساقتاپ، ورتاقتىققا ۇمتىلىپ، ءوزارا ءتيىمدى سەلبەستىك جاساپ، اۆستراليا - جۇڭگو قارىم - قاتىناسىنىڭ دامۋىن ىلگەرىلەتۋدى ءۇمىت ەتەدى، بۇل ەكى ەلدىڭ ورتاق مۇددەسىنە ۇيلەسەدى ءارى ءوڭىردىڭ ورنىقتىلىعى مەن گۇلدەنۋىنە دە ءتيىمدى. اۆستراليا جاق ءبىر جۇڭگو ساياساتىنا تاباندى بولادى، ”تايۋان دەربەستىگىن“ قولدامايدى. اۆستراليا جاق جۇڭگو جاقپەن ءار دارەجەلى بارىس - كەلىس پەن تىلدەسۋدى ساقتاپ، ءوزارا سەنىمدىلىكتى كۇشەيتۋدى قالايدى. جۇڭگونىڭ دامۋى اۆستراليا جونىنەن توتەنشە ماڭىزدى، اۆستراليا ەجەلدەن جۇڭگو ەكونوميكاسىنان قول ءۇزۋدى قاراستىرىپ كورگەن ەمەس، ەكى جاقتى ساۋدانىڭ ىركىلىسسىزدىگىن ساقتاپ، جاسىل كاسىپ سالاسى، كليمات وزگەرىسىنە توتەپ بەرۋ، ەمدەۋ تەحنيكاسى سياقتى سالالارداعى ناقتى سەلبەستىكتى ىلگەرىلەتىپ، ءوزارا پايدا جەتكىزىپ، تەڭ يگىلىككە كەنەلۋدى قالايدى. ساياحات، وقۋ - اعارتۋ، دەنە تاربيە سياقتى گۋمانيتارلىق اۋىس - كۇيىستى كۇشەيتىپ، حالىقتىڭ ءوزارا ءتۇسىنىسۋىن جەبەۋدى قالايدى. الاساپىراندىق قاباتتاسقان دۇنيە ءجۇزى الدىندا اۆستراليا جاق جۇڭگو جاقپەن كوپ جاقتىلىققا تاباندى بولىپ، بىرلەسكەن مەملەكەتتەر ۇيىمىنىڭ ماڭىزدى رولىن ساۋلەلەندىرۋىن قولداپ، ەركىن ساۋدا مەن دۇنيە جۇزىلىك ساۋدا ۇيىمىنىڭ ەرەجەسىن بىرگە قورعاپ، حالىقارالىق قوعامعا اناعۇرلىم كوپ ورنىقتىلىق، تۇراقتىلىق ازىرلەۋدى قالايدى. اۆستراليا جاق جۇڭگونىڭ 2026 - جىلعى ازيا - تىنىق مۇحيت ەكونوميكالىق سەلبەستىك ۇيىمىنىڭ وتاعاسى بولۋىن قولدايدى.

ۋاڭ ي كەزدەسۋدە بىرگە بولدى.