شي جينپيڭ شاڭحاي سەلبەستىك ۇيىمىنا مۇشە ەلدەر سىرتقى ىستەر مينيسترلەرى القالار كەڭەسى ماجىلىسىنە قاتىناسقان سىرت جاق ۋاكىلدەر ۇيىرمەلەرىنىڭ باستىقتارىمەن توپتىق كەزدەستى

7 - ايدىڭ 15 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا شاڭحاي ىنتىماقتاستىق ۇيىمىنا مۇشە ەلدەردىڭ سىرتقى ىستەر مينيسترلەرى القالار كەڭەسىنىڭ ماجىلىسىنە قاتىناسۋ ءۇشىن جۇڭگوعا كەلگەن ءار ەلدىڭ سىرتقى ىستەر مينيسترلەرىمەن جانە تۇراقتى قۇرىلىمدارىنىڭ جاۋاپتىلارىمەن توپتىق كەزدەستى.

سۋرەتتى شينحۋا اگەنتتىگىنىڭ ءتىلشىسى يىن بوگۋ تۇسىرگەن

شينحۋا اگەنتتىگى، 7 - ايدىڭ 15 - كۇنى، بەيجيڭ (تىلشىلەر سۇن ي، جۋ چاۋ). 7 - ايدىڭ 15 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا شاڭحاي سەلبەستىك ۇيىمىنا مۇشە ەلدەر سىرتقى ىستەر مينيسترلەرى القالار كەڭەسىنىڭ ماجىلىسىنە قاتىناسۋ ءۇشىن جۇڭگوعا كەلگەن ءار ەلدىڭ سىرتقى ىستەر مينيسترلەرىمەن جانە تۇراقتى قۇرىلىمدارىنىڭ جاۋاپتىلارىمەن توپتىق كەزدەستى.

شي جينپيڭ بىلاي دەپ اتاپ كورسەتتى: شاڭحاي سەلبەستىك ۇيىمى قۇرىلعان 24 جىلدان بەرى باستان - اياق ”شاڭحاي رۋحىن“ ۇستانىپ، ۇزدىكسىز تولىسىپ، زورايىپ، قۇدىرەتتى ومىرشەڭدىك كۇشىن قاۋلاتتى. مۇشە ەلدەردىڭ ساياسي سەنىمدىلىگى ۇزدىكسىز تەرەڭدەپ، ءار سالاداعى سەلبەستىگىندە سۇبەلى تابىستارعا قول جەتىپ، ءداۋىر اعىمىنا ۇيلەسەتىن، ءار جاقتىڭ قاجەتىنە ۇيلەسەتىن وڭىرلىك سەلبەستىك جولىمەن ءساتتى ءجۇرىپ، جاڭاشا حالىقارالىق قارىم - قاتىناستىڭ ۇلگىسىن ورناتتى. جۇڭگو جاق شاڭحاي ىنتىماقتاستىق ۇيىمىن باستان - اياق توڭىرەكتىك ديپلوماتياداعى ماڭداي الدى ءىس رەتىندە قاراپ، شاڭحاي ىنتىماقتاستىق ۇيىمىن ناقتىلاندىرۋعا، كۇشەيتۋگە كۇش سالىپ، ءوڭىردىڭ حاۋىپسىزدىگى مەن ورنىقتىلىعىن ويداعىداي قورعاپ، مۇشە ەلدەردىڭ دامۋىن، گۇلدەنۋىن جەبەپ، تىعىز تاعدىرلاس ورتاق تۇلعا قالىپتاستىرادى. بىلتىر 7 - ايدا جۇڭگو جاق كەزەكتى ءتوراعا ەل مىندەتىن ۇستىنە العاننان بەرى قيمىلدى بەلسەنە ورىستەتىپ، سەلبەستىكتى ىلگەرىلەتتى، ءار جاق شاڭحاي سەلبەستىك ۇيىمىنىڭ كورىكتى مەكەنىن بىرگە قۇرۋعا نىق قادام تاستادى. بيىل شاڭحاي ىنتىماقتاستىق ۇيىمىنىڭ تيانجين باسشىلار ءماجىلىسى وتكىزىلەدى، مەن تيانجيندە مۇشە ەلدەردىڭ باسشىلارىمەن كەزدەسىپ، شاڭحاي ىنتىماقتاستىق ۇيىمىنىڭ دامۋ ۇلى جوسپارىن بىرگە اقىلداسۋدى كۇتەمىن.

شي جينپيڭ بىلاي دەپ باسا دارىپتەدى: قىم - قۋىت كۇردەلى حالىقارالىق جاعداي الدىندا شاڭحاي سەلبەستىك ۇيىمى باعداردى ءدال باعامداپ، سەنىمدى بەكەمدەپ، جوعارى ونىمدىلىكپەن ارەكەتتەنىپ، اناعۇرلىم ناتيجەلى جۇمىس جۇرگىزىپ، دۇنيە جۇزىنە اناعۇرلىم كوپ ورنىقتىلىق پەن وڭ ەنەرگيا ۇستەۋى كەرەك. ءبىرىنشى، اۋەلگى ماقساتتى ەستە بەرىك ساقتاپ، ”شاڭحاي رۋحىنىڭ“ الاۋشىسى بولۋ كەرەك. ءوزارا سەنىمدىلىكتى، ءوزارا پايدا جەتكىزۋدى سەلبەستىكتىڭ نەگىزى، تەڭدىكتى، كەڭەسۋدى تاتۋ - ءتاتتى ءوتۋدىڭ جولى ەتىپ، الۋان ءتۇرلى وركەنيەتكە قۇرمەت ەتۋ ارقىلى جاراسىمدىلىقتى، سيىسىمدىلىقتى جەبەپ، بىرگە دامۋعا تالپىنۋ ارقىلى تەڭ يگىلىككە كەنەلۋدى، گۇلدەنۋدى جۇزەگە اسىرىپ، ”شاڭحاي رۋحىنىڭ“ شاڭحاي سەلبەستىك ۇيىمىنىڭ تاعدىرلاس ورتاق تۇلعاسىن قۇرۋ جولىن ۇزدىكسىز نۇرلاندىرۋىنا مۇمكىندىك جاساۋ كەرەك. ەكىنشى، حالىقتىڭ تىلەگىنە جاۋاپ قايتارىپ، سەلبەستىكتى تەرەڭدەتۋدىڭ ارەكەت جاساۋشىلارى بولۋ كەرەك. حاۋىپسىزدىك قاتەرى مەن سىن - سايىسقا توتەپ بەرۋ مەحانيزمىن كەمەلدەندىرىپ، حاۋىپسىزدىك قالتقىسىن بەكەمدەپ، حالىقتىڭ بەيبىت، تىنىش تۇرمىسقا دەگەن تىلەگىنە جاۋاپ قايتارۋ؛ مۇشە ەلدەردىڭ دامۋ ستراتەگياسى مەن ”ءبىر بەلدەۋ، ءبىر جولدى“ بىرگە قۇرۋ سياقتى سەلبەستىك باستامالارىن ۇشتاستىرىپ، اناعۇرلىم جوعارى ساپالى، اناعۇرلىم باياندى دامۋدى جۇزەگە اسىرىپ، حالىقتىڭ باي، باقىتتى تۇرمىسقا دەگەن تىلەگىنە جاۋاپ قايتارۋ؛ ادامداردىڭ بارىس - كەلىسىنە قولايلىلىق جاساپ، حالىقتىق اۋىس - كۇيىستى جەبەپ، ءار ەلدىڭ ەرەكشەلىگىن ايگىلەيتىن گۋمانيتارلىق قيمىلداردى كوبىرەك وتكىزىپ، حالىقتىڭ رۋحاني تۇرمىستى بايىتۋ تىلەگىنە جاۋاپ قايتارۋ كەرەك. ءۇشىنشى، ءداۋىر بورىشىن ارقالاپ، ادامزاتتىڭ تاعدىرلاس ورتاق تۇلعاسىن قۇرۋدىڭ ادال اتقارۋشىسى بولۋ كەرەك. زورەكەرلىككە، وكتەمدىككە باتىل قارسى تۇرىپ، دۇنيە ءجۇزىنىڭ كوپ ۇيەكتەنۋىنىڭ اناعۇرلىم تەڭ، ءتارتىپتى بولۋىنا مۇمكىندىك جاساۋ؛ بىرگە اقىلداسۋعا، بىرگە قۇرۋعا، بىرگە يگىلىكتەنۋگە تاباندى بولىپ، ەكونوميكانىڭ جاھاندانۋىنىڭ اناعۇرلىم جالپىعا ءتيىمدى، سيىسىمدى بولۋىنا مۇمكىندىك جاساۋ؛ دۇنيە ءجۇزىنىڭ وڭتۇستىگىن ىنتىماقتاستىرىپ جانە وعان جەتەكشىلىك ەتىپ، اناعۇرلىم ءادىل، ۇيلەسىمدى دۇنيە جۇزىلىك جونگە سالۋ جۇيەسىن ورناتۋدى ىلگەرىلەتىپ، ادامزاتتىڭ تاعدىرلاس ورتاق تۇلعاسىن قۇرۋعا جويقىن كۇش توپتاۋ كەرەك.

ۋاڭ ي شاڭحاي سەلبەستىك ۇيىمىنا مۇشە ەلدەر سىرتقى ىستەر مينيسترلەرى القالار كەڭەسىنىڭ ءتوراعاسى رەتىندە جۇڭگونىڭ كەزەكتى ءتوراعا ەل مىندەتىن ۇستىنە العاننان بەرگى ءار جاقتاعى قىزمەتتەردىڭ اياق الىسى مەن تيانجين باسشىلار ءماجىلىسىنىڭ دايىندىق جاعدايىنان مالىمەت بەردى.

رەسەيدىڭ سىرتقى ىستەر مينيسترى لاۆروۆ سىرت جاق اتىنان ءسوز سويلەپ، مىنالاردى ءبىلدىردى: شاڭحاي سەلبەستىك ۇيىمى ءوزارا سەنۋ، ءوزارا پايدا جەتكىزۋ، تەپە - تەڭ بولۋ، كەڭەسۋ، الۋان ءتۇرلى وركەنيەتكە قۇرمەت ەتۋ، بىرگە دامۋعا ۇمتىلۋ سىندى ”شاڭحاي رۋحىنا“ تاباندى بولىپ، دۇنيە ءجۇزى كوز تىككەن سەلبەستىك جەتىستىكتەرىنە قول جەتكىزىپ، حالىقارالىق باۋراۋ قۋاتىن ۇزدىكسىز كۇشەيتەدى. اماليات ”شاڭحاي رۋحىنىڭ“ مۇشە ەلدەردىڭ ورتاق مۇددەسىنە ۇيلەسەتىندىگىن، قۇدىرەتتى ومىرشەڭدىك كۇشكە يە ەكەندىگىن دالەلدەدى. جۇڭگو كەزەكتى ءتوراعا ەل مىندەتىن ۇستىنە العاننان بەرى قىرۋار قيمىل وتكىزىپ، شاڭحاي ىنتىماقتاستىق ۇيىمىنىڭ تىڭ دامۋعا قول جەتكىزۋىن ىلگەرىلەتتى. كۇردەلى حالىقارالىق جاعداي الدىندا شاڭحاي ىنتىماقتاستىق ۇيىمى كوپ جاقتىلىققا تاباندى بولىپ، حالىقارالىق ءتارتىپتىڭ اناعۇرلىم ءادىل، ۇيلەسىمدى باعىتقا قاراي دامۋىن ىلگەرىلەتۋى كەرەك. ءارقايسى جاق جۇڭگو جاقتىڭ ءتوراعا ەل قىزمەتىن بەلسەنە قولداپ، ورتاق تانىم ۇيىستىرىپ، تيانجين باسشىلار ءماجىلىسىنىڭ تابىستى بولۋىنا كەپىلدىك ەتۋدى قالايدى.