جوعارى دەڭگەيدەگى سىرتقا ەسىك اشۋدى تاباندىلىقپەن ىلگەرىلەتەيىك

شينحۋا اگەنتتىگى، 7 - ايدىڭ 15 - كۇنى، بەيجيڭ. 7 - ايدىڭ 16 - كۇنى باسپادان شىعاتىن «ىزدەنۋ» جۋرنالىنىڭ 14 - سانىندا جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭنىڭ «جوعارى دەڭگەيدە سىرتقا ەسىك اشۋدى تاباندىلىقپەن ىلگەرىلەتەيىك» اتتى ماڭىزدى ماقالاسى جاريالانادى. بۇل − باس شۋجي شي جينپيڭنىڭ 2012 - جىلى 12 - ايدان 2025 - جىلى 4 - ايعا دەيىنگى قاتىستى ماڭىزدى بايىمداۋلارىنان ۇزىندىلەر.

ماقالادا بىلاي دەپ باسا دارىپتەلدى: ەسىك اشۋ العا باستىرادى، توماعا - تۇيىقتىق، ءسوز جوق، ارتتا قالدىرادى. جۇڭگونىڭ دامۋى دۇنيە جۇزىنەن قول ۇزە المايدى، دۇنيە ءجۇزىنىڭ گۇلدەنۋى دە جۇڭگوعا مۇقتاج. سىرتقا ەسىك اشۋدى ۇزدىكسىز كەڭەيتىپ، سىرتقا ەسىك اشۋ دەڭگەيىن جوعارىلاتىپ، ەسىك اشۋ ارقىلى رەفورمانى، دامۋدى جەبەۋ − ەلىمىز دامۋىنىڭ ۇزدىكسىز تىڭ تابىستارعا قول جەتكىزۋىندەگى ماڭىزدى اسىل. جۇڭگونىڭ اشىق ەسىگى جابىلمايدى، بارعان سايىن ايقارا اشىلادى.

ماقالادا بىلاي دەپ اتاپ كورسەتىلدى: جوعارى دەڭگەيدەگى سىرتقا ەسىك اشۋدى ۇزدىكسىز كەڭەيتۋ كەرەك. بۇرىن جۇڭگو ەكونوميكاسىنىڭ دامۋى ەسىك اشۋ شارت - جاعدايىندا قولعا كەلگەن، بولاشاقتا جۇڭگو ەكونوميكاسىنىڭ جوعارى ساپالى دامۋىن جۇزەگە اسىرۋدى، ءسوز جوق، اناعۇرلىم ەسىك اشۋ شارت - جاعدايىندا جۇرگىزۋ كەرەك. ەل ىشىندەگى ۇلكەن اينالىم ارقىلى دۇنيە جۇزىلىك بايلىق فاكتورلارىن باۋراپ، ەل ءىشى جانە حالىقارا سىندى ەكى بازاردىڭ، ەكى ءتۇرلى بايلىقتىڭ ىقپالداستىق اسەرىن كۇشەيتۋ كەرەك. ەرەجە، ءتۇزىم، باسقارۋ، ولشەم سياقتى تۇزىمدىك ەسىك اشۋدى ورنىقتى كەڭەيتىپ، حالىقارالىق جوعارى ولشەمدى ەكونوميكا - ساۋدا ەرەجەسىمەن ىرىقتىلىقپەن ۇشتاستىرىپ، سىرتقى ساۋدا، شەتەل ساۋداگەرلەرىنىڭ قارجى قوسۋى جانە سىرتقا قارجى قوسۋدى باسقارۋ ءتۇزىلىسى رەفورماسىن تەرەڭدەتىپ، بازارلانعان، زاڭمەن جونگە سالىناتىن، حالىقارالانعان ماڭداي الدى ساۋدا ورتاسىن قالىپتاستىرۋ كەرەك. ەركىن ساۋدا سىناق رايونىن جوعارىلاتۋ ستراتەگياسىن اتقارىپ، العاشقى جاسامپازدىق، شوعىرلى ىزدەنىس جاساۋعا دەم بەرىپ، ەسىك اشۋ دەڭگەيى اناعۇرلىم جوعارى، ىقپال جاساۋ رولى اناعۇرلىم كۇشتى رەفورما جاساپ، ەسىك اشۋدىڭ جاڭا بيىگىن قالىپتاستىرۋ كەرەك. ”ءبىر بەلدەۋ، ءبىر جولدى“ جوعارى ساپامەن بىرگە قۇرۋدى ىلگەرىلەتۋ مەحانيزمىن كەمەلدەندىرۋ كەرەك. ەسىك اشقان سايىن حاۋىپسىزدىككە ءمان بەرۋ، دامۋ مەن حاۋىپسىزدىكتى اناعۇرلىم ويداعىداي ءبىر تۇتاس جوسپارلاپ، ءوزىنىڭ باسەكەلىك قابىلەتىن، ەسىك اشۋدى باقىلاۋ - باسقارۋ قابىلەتىن، حاۋىپ - قاتەردەن ساقتانۋ جانە ونى تىزگىندەۋ قابىلەتىن كۇش سالا نىعايتۋ كەرەك. زاڭمەن جونگە سالۋ نەگىزىندە جوعارى دەڭگەيدە سىرتقا ەسىك اشۋدى ىلگەرىلەتۋگە تاباندى بولىپ، جوعارى دەڭگەيدە ەسىك اشۋدىڭ زاڭمەن جونگە سالۋ نەگىزىن ۇزدىكسىز بەكەمدەۋ كەرەك.

ماقالادا مىنالار اتاپ كورسەتىلدى: جۇڭگونىڭ شەتەل قارجىسىنان پايدالانۋ ساياساتى وزگەرگەن جوق، وزگەرمەيدى دە. جۇڭگو − دۇنيە جۇزىندەگى ەكىنشى ۇلكەن تۇتىنۋ بازارى، دۇنيە جۇزىندەگى ەڭ كولەمدى ورتاشا كىرىستەگى قاۋىمعا يە، وندا وراسان زور قارجى قوسۋ جانە تۇتىنۋ كومەسكى كۇشى بار؛ شەتەل قارجىسىنان پايدالانۋدىڭ ءبىرشاما كەمەلدى زاڭ - ەرەجە، ساياسات جۇيەسى مەن قىزمەت جۇيەسى قالىپتاسقان؛ ساياسي جاعدايدىڭ ورنىقتىلىعىن، قوعامنىڭ تىنىشتىعىن ۇزاق ۋاقىت ساقتادى، دۇنيە ءجۇزى مويىنداعان ەڭ حاۋىپسىز ەلدەردىڭ ءبىرى. جۇڭگو بۇرىن شەتەل ساۋداگەرلەرىنىڭ ارمانداعانىنداي، حاۋىپسىز، ىسكەر قارجى قوسۋ نىسانالى جەرى بولعان، قازىر دە، بولاشاقتا دا سولاي بولادى، جۇڭگومەن بىرگە بولۋ − ورايمەن بىرگە بولعاندىق، جۇڭگوعا سەنۋ − ەرتەڭگە سەنگەندىك، جۇڭگوعا قارجى قوسۋ − بولاشاققا قارجى قوسقاندىق.

ماقالادا بىلاي دەپ باسا دارىپتەلدى: ەكونوميكانىڭ جاھاندانۋى − قوعامدىق وندىرگىش كۇشتەر دامۋىنىڭ وبيەكتيۆ تالابى جانە عىلىم - تەحنيكا العاباسارلىعىنىڭ تابيعي ناتيجەسى، دۇنيە ءجۇزى ەكونوميكاسىنىڭ ارتۋىنا پارمەندى قوزعاۋشى كۇش ازىرلەپ، تاۋار مەن كاپيتالدىڭ اينالىمىن، عىلىم - تەحنيكا مەن وركەنيەتتىڭ العا باسۋىن، ءار ەل حالقىنىڭ بارىس - كەلىسىن جەبەدى. قازىر سىڭار جاقتىلىق، قورعانىمپازدىق اسقىنىپ، كوپ جاقتىلىق، ەركىن ساۋدا قاتاڭ سايىسقا ءدوپ كەلدى. جۇڭگو ەكونوميكا جاھاندانۋىنىڭ دۇرىس بەتالىسىنا تاباندى بولىپ، ساۋدا مەن قارجى قوسۋدىڭ ەركىندەنۋىن، قولايلىلانۋىن ىلگەرىلەتىپ، قورعانىمپازدىققا قارسى تۇرادى، ”داۋال تۇرعىزۋعا“، ”قول ۇزۋگە، تىزبەكتى ۇزۋگە“ قارسى تۇرادى، سىڭار جاقتى جازالاۋعا، قالىپتان تىس قىسىم تۇسىرۋگە قارسى تۇرادى. ناعىز كوپ جاقتىلىققا تاباندى بولىپ، جالپىعا ءتيىمدى، سيىسىمدى ەكونوميكانىڭ جاھاندانۋىن ىلگەرىلەتىپ، دۇنيە جۇزىلىك ەكونوميكانى جونگە سالۋعا بەلسەنە ات سالىسىپ، اشىق دۇنيە ءجۇزى ەكونوميكاسىن قۇرۋعا كۇش سالادى.