ورتالىققا قاراستى جاڭا كاسىپورىن قۇرىلىپ، ماڭدايشالىق اسىلدى 

7 – ايدىڭ 29 – كۇنى، جۇڭگو چاڭ – ان اۆتوموبيل توبى شەكتى سەرىكتەستىگى چۇڭچيڭدە قۇرىلىپ، ماڭدايشالىق اسىلدى.

ورتالىققا قاراستى بۇل جاڭا كاسىپورىن اسىلگى اسكەري قارۋ – جاراق توبىنان ءبولىنىپ قۇرىلعان، قاراماعىندا 117 بولىمشە سەرىكتەستىك بار. باستى تيجارات كولەمىندە تۇتاس اۆتوموبيل جانە اۆتوموبيل بولشەكتەرىن جاساۋ، اۆتوموبيل ساۋدالاۋ، فينانس جانە زات تاسىمالى جاعىندا قىزمەت وتەۋ، موتوتسيكل جاساۋ قاتارلىلار قامتىلادى. جۇڭگو چاڭ – ان اۆتوموبيل توبىنىڭ جاۋاپتىسىنىڭ ايتۋىنشا، ورتالىققا قاراستى جاڭا كاسىپورىن بولاشاقتا زەردەلى اۆتوموبيل روبوت، ۇشاتىن اۆتوموبيل، وزدەندىرىلگەن زەردە قاتارلى جاڭا ساپالى وندىرگىش كۇشتەردى كۇش سالا قالىپتاستىرىپ، تەڭىزدە، قۇرلىقتا، اۋەدە كەڭىستىكتىك ءجۇرىس – تۇرىستىڭ جاڭا ەكولوگياسىن قالىپتاستىرۋ جاعىندا ىزدەنىس جاسايدى ءارى جاھاندانۋ باعىتىنداعى دامۋدى جەدەلدەتەدى، شىعىس - وڭتۇستىك ازيا، ورتا شىعىس جانە افريكا، ورتا – وڭتۇستىك امەريكا، ەۆروپا – ازيا، ەۆروپاداعى بەس ءىرى رايون قاتارلىلاردان بازار اشۋدى جەدەلدەتەدى.

وسى رەتكى قايتالاي قۇرۋ — مەملەكەتتىڭ ورتالىققا قاراستى كاسىپورىندار رەفورماسىن ىلگەرىلەتۋ، مەملەكەت مەنشىگىندەگى كاپيتالدى ورنالاستىرۋدى جاقسارتۋ جاعىنداعى ماڭىزدى قادامى، سونىمەن بىرگە، جۇڭگونىڭ اۆتوموبيل كاسىپ سالاسىنىڭ باسەكەلىك قۋاتىن ارتتىرۋىنداعى ماڭىزدى شارا. ەلىمىزدىڭ حالىق شارۋاشىلىعىنداعى تىرەكتى كاسىپ سالاسى بولعان اۆتوموبيل كاسىپ سالاسىن رەتتەۋ قادامى قازىر جەدەلدەتىلۋدە. مەملەكەتتىك كەڭەستىڭ مەملەكەت مەنشىگىندەگى مال – مۇلىكتى باقىلاۋ – باسقارۋ كوميتەتىنىڭ قاتىستى جاۋاپتىسىنىڭ ايتۋىنشا، وسىدان سوڭ، ەلىمىزدە ورتالىققا قاراستى ءۇش ءىرى اۆتوموبيل توبى قالىپتاستىرىلادى، زەردەلى ينتەرنەتكە جالعانعان جاڭا ەنەرگيالى اۆتوموبيل كاسىپ سالاسىن جوعارى ساپالى دامىتۋعا اناعۇرلىم دەم بەرىپ، دۇنيە جۇزىلىك باسەكەلىك قۋاتقا يە الەمدىك ماڭداي الدى ماركانى جەدەل دامىتادى.

كەلۋ قاينارى: حالىق تورابى