كورەيا 9 – ايدىڭ سوڭىنان باستاپ جۇڭگودان بارعان توپتىق ساياحاتشىلاردان ۆيزا تالاپ ەتپەيتىنىن جاريالادى 

حالىق گازەتىنىڭ ءتىلشىسى ماڭ جيۋچىن 8 – ايدىڭ 6 – كۇنى سەۋلدەن حابارلايدى. كورەيانىڭ مەملەكەت ىستەرى زۇڭليى جين مينشيدىڭ 8 – ايدىڭ 6 – كۇنى ايتۋىنشا، بيىل 9 – ايدىڭ 29 – كۇنىنەن كەلەسى جىلى 6 – ايدىڭ 30 – كۇنىنە دەيىن، كورەيا ۇكىمەتى جۇڭگودان بارعان توپتىق ساياحاتشىلاردى شەكارادان ۆيزاسىز كىرگىزۋ ساياساتىن ۋاقىتتىق اتقاراتىنىن جاريالاعان.

كورەيا ۇكىمەتى جاريالاعان اقپاراتقا قاراعاندا، جين مينشي سول كۇنى ساياحاتتى كوركەيتۋ تۋرالى ساياساتتىق ءماجىلىستى باسقارىپ اشقان ءارى وسى ۇيعارىمدى جاريالاعان. كورەيا ۇكىمەتىنىڭ ايتۋىنشا، وسى رەتكى ۆيزا تالاپ ەتپەۋ ساياساتى اتقارىلعان سوڭ، ساياحاتشىلاردىڭ كورەياعا بارىپ ساياحاتتاۋ قىزعىندىلىعىن ارتتىرىپ، جەرگىلىكتى ورىننىڭ ەكونوميكاسىن جەبەپ، ىشكى سۇرانىستى شىنايى ارتتىراتىن بولادى.

جۇڭگونىڭ كورەيادا تۇراتىن باس ەلشىسى داي بيڭ سول كۇنى الەۋمەتتىك جەلىدەگى پاراقشاسىندا بىلاي دەگەن: كورەيا جاق 9 – ايدىڭ سوڭىنان باستاپ جۇڭگودان بارعان توپتىق ساياحاتشىلاردان ۆيزا تالاپ ەتپەيتىنىن جاريالادى، بۇل كورەياعا بارماقشى بولعان جۇڭگولىق ساياحاتشىلار جونىنەن ايتقاندا جاقسى حابار. جۇڭگو جاق بىلتىر 11 – ايدان باستاپ كورەيادان كەلگەندەرگە ءوز تاراپىنان ۆيزا تالاپ ەتپەۋ ساياساتىن اتقارعان، ساناققا قاراعاندا، وسىدان سوڭ جۇڭگو مەن كورەيا اراسىندا ادامداردىڭ بارىس – كەلىسى جيىلەگەن. جۇڭگو مەن كورەيا كورشىلەس ەلدەر، ەكى ەل حالقىنىڭ ۇنەمى بارىس – كەلىس جاساۋى ءوزارا تۇسىنىستىكتى ىلگەرىلەتۋگە، دوستىقتى تەرەڭدەتۋگە ءتيىمدى.

كەلۋ قاينارى: حالىق تورابى