كارتوپتىڭ كەلۋ تەگى تۋرالى تىڭ بايقاۋ 

حالىق گازەتىنىڭ ءتىلشىسى چاڭ چين 8 – ايدىڭ 6 – كۇنى بەيجيڭنەن حابارلايدى. كارتوپ — دۇنيە ءجۇزى بويىنشا ماڭىزدى داقىل ءتۇرى. جۋىردا جۇڭگو اۋىل شارۋاشىلىعى عىلىم اكادەمياسىنىڭ شىنجىن اۋىل شارۋاشىلىعى گەندەر جيىنتىعىن زەرتتەۋ بولىمشەسىندەگى حۋاڭ سانۋىننىڭ ۇجىمى جۇڭگولىق – شەتەلدىك عىلىمي زەرتتەۋ قىزمەتكەرلەرىمەن بىرگە عىلىمي ماقالا جاريالاپ، كارتوپتىڭ كەلۋ تەگىن، كوپ تۇرلىلىگىنىڭ قالىپتاسۋىن جانە تۇقىم قۋالاۋ مەحانيزمىن تۇسىندىرگەن: كارتوپتار گرۋپپاسى 9 ميلليون جىلدىڭ الدىندا پاميدورلار گرۋپپاسى مەن كارتوپ تەكتەستەر گرۋپپاسىنىڭ ەجەلگى بۋدانداسۋى بارىسىندا پايدا بولعان، بۋدانداسۋ بارىسىندا كارتوپ ءتىلىمى سىندى جاڭا ورگان پايدا بولعان.

اتالعان زەرتتەۋ ”كارتوپتى ساپالىلاندىرۋ جوسپارىنىڭ“ ماڭىزدى جەتىستىگى. ۇزاق ۋاقىتتان بەرى، ادامدار كارتوپتى تۇقىمىن جەتىلدىرۋ مەن وندىرۋدە كارتوپ ءتىلىمى ارقىلى جىنىسسىز ءوربىتۋ تاسىلىنە سۇيەنىپ كەلگەن، حۋاڭ سانۋىننىڭ ۇجىمى ەل ءىشى – سىرتىنداعى ۇزدىك ورىندارمەن بىرگە ”كارتوپتى ساپالىلاندىرۋ“ جوسپارىن باستاعان، مۇنداعى ماقسات — گەندەر جيىنتىعى ارقىلى جەتىلدىرۋ ءتاسىلىن پايدالانىپ، ءداستۇرلى كارتوپ ءتىلىمى ارقىلى جىنىسسىز ءوربىتۋدى تۇقىم ارقىلى جىنىستىق جولمەن وربىتۋگە وزگەرتۋ. بۇل جوسپار ءوندىرىس ونىمدىلىگىن كورنەكتى جوعارىلاتىپ، كارتوپ ەگۋ بارىسىندا اسىلگى ءار مۋىنا 200 كيلوگرام تۇقىمدىق كارتوپتى قاجەت ەتۋدى تەك 2 گرام تۇقىمدى قاجەت ەتۋگە وزگەرتەدى.

كەلۋ قاينارى: حالىق تورابى