”شاعالانىڭ“ شەكارادان وتۋىنەن كەم دەگەندە 142 ادام قازا بولدى، فيليپپين بۇكىل ەل بويىنشا اپات جاعدايىنا وتكەندىگىن جاريالادى

شينحۋا اگەنتتىگىنىڭ 11 – ايدىڭ 6 – كۇنى مانيلادان بەرگەن حابارى. فيليپپين اقپارات اگەنتتىگىنىڭ حابارىنا قاراعاندا، تايفىڭ داۋىلى ”شاعالانىڭ“ ىقپالىنان فيليپپيننىڭ زۇڭتۇڭى ماركوس 11 – ايدىڭ 6 – كۇنى بۇكىل ەلدىڭ اپات جاعدايىنا وتكەنىن جاريالاعان.

ماركوس اقپارات قۇرالدارىنا بىلاي دەدى: ”تايفىڭ داۋىلى ’شاعالا‘ جانە الدا قۇرلىققا شىعۋ الدىندا تۇرعان تايفىڭ داۋىلى ’سامۇرىقتىڭ‘ ىقپال اۋماعى كەڭ بولعاندىقتان، مەملەكەتتىك اپات زيانىن ازايتۋدى باسقارۋ كوميتەتى بۇكىل ەلدىڭ اپات جاعدايىنا وتكەندىگىن جاريالاۋدى ۇسىنىس ەتتى، مەن بۇل ۇسىنىستى بەكىتتىم“.

فيلليپپيننىڭ حالىقتىق قورعانىس كەڭسەسى مەن جەرگىلىكتى اقپارات قۇرالدارىنىڭ 11 –ايدىڭ 6 – كۇنگى ساندى مالىمەتىنە نەگىزدەلگەندە، ”شاعالا“تايفىڭ داۋىلى بىرنەشە كۇننەن بەرى فيليپپيندى قيداي سىپىرعاندىقتان، كەم دەگەندە 142 ادام قازا بولىپ، 127 ادام دەرەكسىز كەتكەن، مۇنان تىس 82 ادام جارالانعان.

فيلليپپين حالىقتىق قورعانىس كەڭسەسى ءمانساپتىلارىنىڭ حابارىنا قاراعاندا، تايفىڭ داۋىلىنان قازا بولعان، ءىز - توزسىز كەتكەن ادامداردى ىزدەۋ - قۇتقارۋ قىزمەتى ءالى جالعاسۋدا. جەرگىلىكتى اقپارات قۇرالدارىنىڭ 11 – ايدىڭ 6 - كۇنگى حابارىنا قاراعاندا، سۋۋ ولكەسىنەن قازا بولعان 28 ادام حالىقتىق قورعانىس كەڭسەسىنىڭ ەڭ جاڭا ساناق مالىمەتىنە ەنگىزىلمەگەن. 11 – ايدىڭ 5 – كۇنگى ساناققا قاراعاندا، ”شاعالانىڭ“ كەسىرىنەن سۋۋ ولكەسىندە قازا بولعاندار ەڭ كوپ بولعان.

فيلليپپين مەملەكەتتىك اپات زيانىن ازايتۋدى باسقارۋ كوميتەتىنىڭ ەڭ جاڭا حابارلاندىرۋىندا بىلاي دەلىنگەن: ”شاعالانىڭ“ كۇشتى نوسەرىنەن فيلليپپيننىڭ ورتا بولەگى مەن وڭتۇستىك بولەگىندەگى كوپتەگەن جەرلەردە سەل ءجۇرىپ، اعاشتار قوپارىلىپ، اپات تۋىلىپ، بۇكىل ەل بويىنشا اپاتقا ۇشىراعان ادام سانى ءبىر ميلليون 900 مىڭنان اسقان.

”شاعالا“تايفىڭ داۋىلى 11 – ايدىڭ 4 - كۇنى ساعات 6 دا فيليپپيندە قۇرلىققا شىعىپ، 11 – ايدىڭ 6 – كۇنى تاڭ سارىدە شەكارادان ءوتىپ كەتكەن. وسىدان كەيىن، ەرەكشە كۇشتى تايفىڭ داۋىلىنا اينالعان ”سامۇرىق“ الداعى بىرنەشە كۇندە فيليپپينگە جەتۋى مۇمكىن.

كەلۋ قاينارى: حالىق تورابى