توي اۆتوموبيلىنىڭ الدىن بوگەپ، 50 قاپ تەمەكى سۇراۋ ءىسى جونىندە حىبەي ولكەسى لاڭفاڭ قالاسى حابارلاندىرۋ شىعاردى 

11 – ايدىڭ 11 – كۇنى، لاڭفاڭ قالاسىنداعى ينتەرنەت ينفورماتسياسى ىستەرى تاراۋىنىڭ ۋيشين تەكشەسىندە ”توي اۆتوموبيلىنىڭ الدىن بوگەپ، 50 قاپ تەمەكى سۇراۋ“ ءىسى جونىندە حابارلاندىرۋ شىعارىلدى، مازمۇنى مىناداي:

جاعداي جونىندە حابارلاندىرۋ

جۋىردا اۋدانىمىزدا تۋىلعان ”توي اۆتوموبيلىنىڭ الدىن بوگەپ، 50 قاپ تەمەكى سۇراۋ“ ءىسى ينتەرنەتتە تارالدى، اۋداندىق پارتكوم مەن ۇكىمەت بۇل ىسكە وسكەلەڭ ءمان بەرىپ، دەرەۋ تەكسەرۋ جۇرگىزدى، قازىر مىناداي حابارلاندىرۋ شىعارامىز:

تەكسەرۋگە قاراعاندا، 2025 – جىلى 11 – ايدىڭ 5 – كۇنى حۋ XX، يىن XX قاتارلى 6 ادام ”تويعا قۇتتى بولسىن ايتۋ“ دەگەندى جەلەۋ ەتىپ، توي اۆتوموبيىلىنىڭ الدىن بوگەپ، 9 قاپ تەمەكى سۇراعان (تەمەكىنىڭ ماركاسىن ايتپاعان). ەكى جاق 20 مينۋتتاي داۋلاسىپ، بۇدان ءونىم بولماعان سوڭ، توي جاساعان قىز بەن جىگىت ءوز ءۇيىنىڭ اۆتوموبيلىنە وتىرىپ ول جەردەن كەتكەن، حۋ XX قاتارلىلار تەمەكى الا الماعان سوڭ وزدىكتەرىنەن تاراعان. وسى ىسكە قاتىستى جاقتاردان سالىستىرىپ تەكسەرۋگە قاراعاندا، ءىس تۋىلعان جەردە ولار 9 قاپ تەمەكى سۇراعان، ينتەرنەتتە تاراعان 50 قاپ تەمەكى سۇرادى دەگەن ءسوزدى كەلىن اكەلۋگە بارعان اۆتوموبيلدىڭ شوفەرى قاتە تاراتقان، قوعام حاۋىپسىزدىگى ورگاندارى وعان سوگىس ايتىپ، تاربيە بەرگەن. قوعام حاۋىپسىزدىگى ورگاندارى ءىستىڭ اۋىر – جەڭىلدىگىنە قاراي وتىرىپ، توي اۆتوموبيلىنىڭ الدىن بوگەگەن حۋ XX، يىن XX قاتارلى 6 ادامعا اكىمشىلىك جاقتان جازا بەرىپ، سوگىس ايتىپ، تاربيە بەرگەن.

كەلەسى قادامدا، اۋدانىمىز تۇرپايى توي سالتى قاتارلى ناشار جاعدايلار مەن زاڭعا قايشى ارەكەتتەردى باتىل تەجەيدى ءارى وعان سوققى بەرەدى، ەسكى عۇرىپ – ادەتتى وزگەرتۋ تۋرالى ۇگىت – تاربيە قيمىلىن ىشكەرىلەي ورىستەتىپ، وركەنيەتتى دە تاڭداۋلى جاڭاشا توي سالتىن بەلسەنە دارىپتەيدى. وسى ارادا بارشا جۇرتشىلىققا ەسكەرتەرىمىز، وسى تەكتەس جاعدايعا جولىقساڭىز، دەرەۋ ساقشىعا مالىمدەڭىز، ساقشى جاق زاڭ بويىنشا قاتاڭ ءبىر جاقتى ەتەدى.

شياڭحى اۋداندىق حالىق ۇكىمەتى

2025 - جىلى 11 - ايدىڭ 11 - كۇنى

كەلۋ قاينارى: حالىق تورابى