شي جينپيڭ يسپانيانىڭ پاتشاسى فيليپ Ⅵ مەن كەزدەستى

11 - ايدىڭ 12 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن يسپانيانىڭ پاتشاسى فيليپ Ⅵ مەن كەزدەستى. سۋرەتتە: شي جينپيڭ مەن حانىمى پىڭ لييۋان فيليپ Ⅵ جانە حانىمى لەتيزيامەن بىرگە سۋرەتكە تۇسۋدە.

سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

11 - ايدىڭ 12 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن يسپانيانىڭ پاتشاسى فيليپ Ⅵ مەن كەزدەستى. سۋرەتتە: كەزدەسۋدەن بۇرىن شي جينپيڭ حالىق سارايىنىڭ شىعىس قاقپاسىنىڭ سىرتىنداعى الاڭدا فيليپ Ⅵ نى قارسى الۋ سالتىن وتكىزدى.

سۋرەتتى شينحۋا اگەنتتىگىنىڭ ءتىلشىسى ديڭ حايتاۋ تۇسىرگەن

شينحۋا اگەنتتىگى، 11 - ايدىڭ 12 - كۇنى، بەيجيڭ (ءتىلشى شين ران). 11 - ايدىڭ 12 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن يسپانيانىڭ پاتشاسى فيليپ Ⅵ مەن كەزدەستى.

شي جينپيڭ پاتشا فيليپ Ⅵ نىڭ جۇڭگوعا ساپارلاي كەلگەندىگىن قارسى الىپ، بىلاي دەپ اتاپ كورسەتتى: جۇڭگو مەن يسپانيانىڭ تەرەڭ تاريحي مادەنيەت استارى بار. ديپلوماتيالىق قارىم - قاتىناس ورناتقان 50 نەشە جىلدان بەرى ەكى ەل ەكى جاقتى قارىم - قاتىناسقا ستراتەگيالىق جانە ۇزاق بولاشاقتىق تۇرعىدان قاراۋعا جانە ونى دامىتۋعا تاباندى بولىپ، ءوزارا قۇرمەت ەتىپ، ءوزارا قولداپ، ءوزارا تابىسقا جەتىپ، تۇرلىشە تاريحي مادەنيەتتىڭ، تۇرلىشە قوعامدىق تۇزىمدەگى ەلدەردىڭ تاتۋ - ءتاتتى ءوتىپ، دامۋدى بىرگە جوسپارلاۋىنىڭ ۇلگىسىن ورناتتى، سونداي - اق دۇنيە ءجۇزىنىڭ اشىق سەلبەستىگىن ىلگەرىلەتۋدە، حالىقارالىق ادىلدىك پەن ادىلەتتىلىكتى قورعاۋدا ماڭىزدى رول اتقاردى. يسپانيا پاتشا اۋلەتى جۇڭگو - يسپانيا قارىم - قاتىناسىنىڭ دامۋىنا كورنەكتى ۇلەس قوستى. ەكى ەل جاپپاي ستراتەگيالىق سەرىكتەستىك قارىم - قاتىناس ورناتۋدىڭ 20 جىلدىعىن قارسى الۋ قارساڭىندا، پاتشا فيليپ Ⅵ جۇڭگودا مەملەكەتتىك ساپاردا بولدى، بۇل ەكى ەلدىڭ دوستىق سەلبەستىگىنىڭ ۇزدىكسىز العا دامۋىن ىلگەرىلەتۋدە ماڭىزدى مانگە يە.

شي جينپيڭ بىلاي دەپ باسا دارىپتەدى: جۇڭگو جاق يسپانيامەن ءداستۇرلى دوستىعىن قاستەرلەيدى، يسپانيانىڭ حالىقارالىق جانە وڭىرلىك ىستەردەگى وزگەشە رولىنا ءمان بەرەدى، يسپانيامەن بىرگە اناعۇرلىم ستراتەگيالىق تۇراقتىلىققا يە، اناعۇرلىم دامۋ ومىرشەڭدىگىنە يە، اناعۇرلىم حالىقارالىق ىقپالعا يە جالپى بەتتىك ستراتەگيالىق سەرىكتەستىك قارىم - قاتىناستى قول ۇستاسا سومداۋدى قالايدى. ەكى جاق ءوزارا قولداۋدى ونان ارى بەكەمدەپ، جوعارى جىكتەگىلەردىڭ بارىس - كەلىس جاعدايىن ساقتاپ، ستراتەگيالىق جەتەكشىلىكتى كۇشەيتىپ، ەكى ەل قارىم - قاتىناسىنىڭ باستان - اياق دۇرىس جولمەن جۇرۋىنە كەپىلدىك ەتۋى كەرەك. ناقتى سەلبەستىكتى اناعۇرلىم ىلگەرىلەتۋ كەرەك، جۇڭگو جاق يسپانيانىڭ اناعۇرلىم كوپ ساپالى ونىمدەرىن يمپورت ەتىپ، جاڭا ەنەرگيا، سيفرلى ەكونوميكا، جاساندى زەردە سياقتى جاڭادان گۇلدەنگەن سالالارداعى سەلبەستىكتىڭ كومەسكى كۇشىن اشىپ، ءوزارا قارجى قوسۋدى كەڭەيتىپ، اناعۇرلىم كوپ بوگەنايلىق نىسانداردى تۇلعالاۋدى قالايدى. ەكى جاقتىڭ ابزالدىقتارىمەن ءبىرىن - ءبىرى تولىقتاپ، لاتىن امەريكاسى سياقتى ءۇشىنشى جاق بازارىن بىرگە اشۋىنا بولادى. حالىق تىلەگىنىڭ توعىسۋىن ونان ارى جەبەپ، مادەنيەت، وقۋ - اعارتۋ سالاسىنداعى اۋىس - كۇيىستى كۇشەيتىپ، ءوز ەلدەرىنىڭ مادەنيەت جانە ءتىل قۇرىلىمدارىن ويداعىداي قۇرۋدى ءوزارا قولداۋ كەرەك. جۇڭگو جاق باتىس ەلدەرىنە ۆيزاسىز وتكىزۋ ساياساتىن ۇزدىكسىز ۇزارتىپ، ادامداردىڭ بارىس - كەلىسىنە قولايلىلىق جاساپ، ەكى ەل بۇقاراسىنىڭ بارعان سايىن جاقىنداسۋىنا مۇمكىندىك جاسايدى.

شي جينپيڭ بىلاي دەپ اتاپ كورسەتتى: بيىل − بىرلەسكەن مەملەكەتتەر ۇيىمى قۇرىلعاندىعىنىڭ 80 جىلدىعى. بۇگىنگى دۇنيە ءجۇزى جاڭا اۋمالى - توكپەلى وزگەرىس كەزەڭىنە ءوتتى، بەيبىتشىلىك پەن دامۋ ىستەرىنىڭ مىندەتى ءالى دە اۋىر، جولى ۇزاق. مەن ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى العا قويعاندا، ءار ەلدىڭ قوعامدىق ءتۇزىم پارقى مەن يدەولوگيا الاۋىزدىعىنان اتتاپ ءوتىپ، پىكىرلەسۋ جانە كەڭەسۋ ارقىلى ورتاق تانىم ۇيىستىرىپ، ءار ەل حالقىنىڭ تاماشا تۇرمىسقا دەگەن تالپىنىسىن بىرگە رەالدىققا اينالدىرۋىن ءۇمىت ەتكەن بولاتىنمىن. جۇڭگو جاق يسپانيامەن بىرگە بىرلەسكەن مەملەكەتتەر ۇيىمىنىڭ حالىقارالىق ىستەردە ۇيىتقىلىق رولىن ساۋلەلەندىرۋىن قولداپ، ەركىن ساۋدا ەرەجەسىن جانە حالىقارالىق ەكونوميكا - ساۋدا ءتارتىبىن قورعاپ، اناعۇرلىم ءادىل، ۇيلەسىمدى دۇنيە جۇزىلىك جونگە سالۋ جۇيەسىن ورناتىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.

فيليپ Ⅵ مىنالاردى ءبىلدىردى: يسپانيا مەن جۇڭگونىڭ جان - جاقتى ستراتەگيالىق سەرىكتەستىك قارىم - قاتىناسىنىڭ 20 جىلدىعى قارساڭىندا جۇڭگودا مەملەكەتتىك ساپاردا بولعانىما توتەنشە قۋانىشتامىن. يسپانيا مەن جۇڭگونىڭ دوستىق بارىس - كەلىسى ارىدان باستاۋ العان، ديپلوماتيالىق قارىم - قاتىناس ورناتقاننان بەرى ەكى ەل باستان - اياق ءبىر - بىرىنە سەنىپ، ءبىر - بىرىنە قۇرمەت ەتىپ، بىرگە دامۋعا، گۇلدەنۋگە كۇش سالدى. جۇڭگونىڭ دامۋ جەتىستىكتەرى دۇنيە ءجۇزىن جالت قاراتتى، ادامدى سۇيىندىرەدى، اسىرەسە، كەدەيلىكتەن ارىلتۋ جانە جاسىل، تومەن كومىرتەكتى دامۋ جاعىنداعى تابىستى تاجىريبەلەر ۇلگى الۋعا تاتيدى. يسپانيا ۇكىمەتى ءبىر جۇڭگو ساياساتىن تاباندىلىقپەن اتقارىپ، مەملەكەتتىڭ تەرريتوريا تۇتاستىعىن قورعاۋدى قولدايدى، جۇڭگو جاقپەن ەكى ەلدىڭ جان - جاقتى ستراتەگيالىق سەرىكتەستىك قارىم - قاتىناسىنىڭ ۇزدىكسىز العا دامۋىن ىلگەرىلەتىپ، ەكى ەل حالقىنا اناعۇرلىم كوپ ىرىس - قۇت اكەلۋدى، دۇنيە ءجۇزىنىڭ بەيبىتشىلىگى مەن ورنىقتىلىعىنا اناعۇرلىم زور ۇلەس قوسۋدى قالايدى. جۇڭگو كاسىپورىندارىنىڭ قارجى قوسۋى يسپانيا ەكونوميكاسىنىڭ دامۋى مەن جاسىل تيپكە بۇرىلىس جاساۋىن پارمەندى جەبەدى. يسپانيا جاق جۇڭگو جاقپەن تىعىز بارىس - كەلىستى ساقتاپ، جۇڭگو جاقتىڭ ”15 - بەسجىلدىق“ جوبانى اتقارۋى اكەلگەن ماڭىزدى ورايدى يگەرىپ، ەكونوميكا - ساۋدا، ونەركاسىپ، عىلىم - تەحنيكا، جاسىل ەنەرگيا سياقتى سالالارداعى سەلبەستىكتى كۇشەيتۋدى قالايدى. جۇڭگو جاقتىڭ يسپانياعا ۆيزاسىز كىرگىزۋ ساياساتىن اتقارعاندىعىنا العىس ايتامىز، مادەنيەت، ءتىل، ساياحات سالالارىنداعى اۋىس - كۇيىستى جيىلەتىپ، حالىقتار دوستىعىن نىعايتۋدى قالايمىز. تاريح تەك العا جىلجيدى، كەرى قايتپايدى. يسپانيا مەن جۇڭگونىڭ كوپتەگەن حالىقارالىق ماسەلەدەگى ۇستانىمى وسكەلەڭ بىردەي، ەكەۋى دە كوپ جاقتىلىقتى قولدايدى، تالاس - تارتىستى پىكىرلەسۋ، كەڭەسۋ ارقىلى شەشۋدى قولدايدى. يسپانيا ءتوراعا شي جينپيڭ العا قويعان 4 ءىرى دۇنيە جۇزىلىك باستامانى ايرىقشا القايدى، جۇڭگو جاقپەن بىرگە حالىقارالىق جاعدايداعى تۇراقسىزدىققا توتەپ بەرىپ، حالىقارالىق ساۋدا ءتارتىبىن قورعاپ، دۇنيە ءجۇزى ەكونوميكاسىنىڭ ورنىقتى دامۋىن جەبەۋدى قالايدى.

كەزدەسۋدەن كەيىن ەكى ەلدىڭ مەملەكەت باسشىلارى ەكونوميكا - ساۋدا، عىلىم - تەحنيكا، وقۋ - اعارتۋ سياقتى سالالارداعى 10 سەلبەستىك قۇجاتىنا قول قويۋعا بىرگە كۋا بولدى.

كەزدەسۋدەن بۇرىن شي جينپيڭ مەن حانىمى پىڭ لييۋان حالىق سارايىنىڭ شىعىس قاقپاسىنىڭ سىرتىنداعى الاڭدا فيليپ Ⅵ مەن حانىمى لەتيزيانى قارسى الۋ سالتىن وتكىزدى.

فيليپ Ⅵ كەلگەن كەزدە قۇرمەت قاراۋىلى ساپ تۇزەپ قۇرمەت ءبىلدىردى. شي جينپيڭ فيليپ Ⅵ مەن بىرگە كوزدەن كەشىرۋ مىنبەسىنە شىقتى، اسكەري وركەستر جۇڭگو مەن يسپانيانىڭ مەملەكەت اندەرىن ورىندادى، تيان - انمىن الاڭىندا 21 رەت قۇرمەت ساليۋت اتىلدى. فيليپ Ⅵ شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن كوردى.

سول كۇنى كەشتە شي جينپيڭ مەن پىڭ لييۋان فيليپ Ⅵ مەن حانىمىنا ارناپ قارسى الۋ قوناعاسىن بەردى.

ۋاڭ ي جوعارىداعى قيمىلدارعا قاتىناستى.