شي جينپيڭ جۇڭگو - فرانسيا كاسىپورىنشىلار كوميتەتىنىڭ 7 - ءماجىلىسىنىڭ جابىلۋ سالتىنا قاتىناستى ءارى ارناۋ ءسوز سويلەدى

12 - ايدىڭ 4 - كۇنى تۇستە مەملەكەت ءتوراعاسى شي جينپيڭ بەيجيڭدە فرانسيانىڭ زۇڭتۇڭى ماكرونمەن بىرگە جۇڭگو - فرانسيا كاسىپورىنشىلار كوميتەتىنىڭ 7 - ءماجىلىسىنىڭ جابىلۋ سالتىنا قاتىناستى ءارى ارناۋ ءسوز سويلەدى.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

شينحۋا اگەنتتىگى، 12 - ايدىڭ 4 - كۇنى، بەيجيڭ (تىلشىلەر دۇڭ شۋە، فىڭ شينران). 12 - ايدىڭ 4 - كۇنى تۇستە مەملەكەت ءتوراعاسى شي جينپيڭ بەيجيڭدە فرانسيانىڭ زۇڭتۇڭى ماكرونمەن بىرگە جۇڭگو - فرانسيا كاسىپورىنشىلار كوميتەتىنىڭ 7 - ءماجىلىسىنىڭ جابىلۋ سالتىنا قاتىناستى ءارى ارناۋ ءسوز سويلەدى.

شي جينپيڭ بىلاي دەپ اتاپ كورسەتتى: بيىل − جۇڭگو - فرانسيا قارىم - قاتىناسىنداعى ”جاڭا الپىس جىلدىقتىڭ“ باستالعان جىلى. ەكى ەلدىڭ ەكونوميكا - ساۋدا سەلبەستىك سالاسى ۇزدىكسىز كەڭەيىپ، ۇزدىكسىز كۇشەيدى. الدىڭعى 10 ايدا ەكى جاقتىڭ ساۋدا سوماسى 68 ميلليارد 750 ميلليون دوللارعا جەتىپ، قوس باعىتتا قوسىلعان قارجى سوماسى 27 ميلليارد دوللاردان استى. ەكى جاق ديپلوماتيالىق قارىم - قاتىناس ورناتۋ اۋەلگى ماقساتىن ۇستانىپ، ورايدى مىقتى يگەرىپ، سەلبەستىكتى تەرەڭدەتىپ، ەكى ەل قارىم - قاتىناسىنىڭ ورنىقتى قاداممەن الىسقا جەتۋىن ىلگەرىلەتىپ، جۇڭگو - فرانسيا سەلبەستىگىنىڭ اناعۇرلىم كوركەم داستانىن بىرگە جازىپ، جۇڭگو - فرانسيا قارىم - قاتىناسىنىڭ ورنىقتىلىعى ارقىلى قازىرگى دۇنيە ءجۇزىنىڭ تۇراقسىزدىعىنا توتەپ بەرۋى كەرەك.

ءبىرىنشى، ەكى جاق ەكونوميكا - ساۋدا سەلبەستىگىنىڭ جاڭا سالاسىن ۇزدىكسىز كەڭەيتۋى كەرەك.

جۇڭگو جاق فرانسيا جاقتى ماڭىزدى، كەم بولسا بولمايتىن ەكونوميكا - ساۋدا سەلبەستىك سەرىگى دەپ قارايدى، فرانسيا جاقتىڭ جۇڭگو ۇلگىسىندەگى وسىزامانداندىرۋ ۇردىسىنە بەلسەنە ات سالىسۋىن قارسى الادى، قۋاتتى، قالاۋى بار جۇڭگو جاق كاسىپورىندارىنىڭ فرانسياعا بارىپ قارجى قوسىپ، شارۋاشىلىق قۇرۋىن قولدايدى. ەكى جاق جاساندى زەردە، جاسىل جانە سيفرلى ەكونوميكا، بيولوگيالىق ءدارى - دارمەك، قارتتار ەكونوميكاسى سياقتى جاڭادان گۇلدەنگەن سالالارداعى سەلبەستىك كومەسكى كۇشىن اشىپ، كاسىپ سالاسى تىزبەگىنىڭ، قامداۋ تىزبەگىنىڭ اشىق سەلبەستىگىن ۇزدىكسىز ىلگەرىلەتىپ، ەكى ەل كاسىپورىندارىنا ءادىل، جاريالى، كەمسىتپەيتىن، مەجەلەۋگە بولاتىن شارۋاشىلىق - ساۋدا ورتاسىن ازىرلەۋى كەرەك.

ەكىنشى، جۇڭگو مەن ەۆروپانىڭ ءوزارا ءتيىمدى سەلبەستىگىنىڭ جاڭا دامۋىن ۇزدىكسىز ىلگەرىلەتۋ كەرەك.

بيىل − جۇڭگو مەن ەۆروپانىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعى. جۇڭگو مەن ەۆروپانىڭ ەكونوميكا - ساۋدا قارىم - قاتىناسىنىڭ ءمانى − ارتىقشىلىقتارىمەن ءبىرىن - ءبىرى تولىقتاۋ، ءوزارا پايدا جەتكىزىپ، تەڭ يگىلىككە كەنەلۋ، دامۋ بارىسىندا ديناميكالىق تەپە - تەڭدىكتى بۇكىلدەي جۇزەگە اسىرا الادى. ءوزارا ارقا سۇيەۋ حاۋىپ - قاتەر ەمەس، مۇددەنىڭ توعىسۋى حاۋىپ - قاتەر ەمەس.

جۇڭگو مەن فرانسيا ەكى جاق جۇڭگو مەن ەۆروپانىڭ جان - جاقتى ستراتەگيالىق سەرىكتەستىك قارىم - قاتىناس ورنىنا تاباندى بولۋدى ىلگەرىلەتىپ، جۇڭگو - ەۆروپا قارىم - قاتىناسىنىڭ اناعۇرلىم نۇرلى كەلەسى 50 جىلدىعىن بىرگە اشۋى كەرەك.

ءۇشىنشى، الەمدىك جونگە سالۋدى رەفورمالاۋعا، كەمەلدەندىرۋگە بىرگە تىڭ ۇلەس قوسۋ كەرەك. بيىل − دۇنيە جۇزىلىك فاشيزمگە قارسى سوعىس جەڭىسىنىڭ جانە بىرلەسكەن مەملەكەتتەر ۇيىمى قۇرىلعاندىعىنىڭ 80 جىلدىعى. اناعۇرلىم ءادىل، ۇيلەسىمدى الەمدىك جونگە سالۋ جۇيەسىن ورناتۋدى ىلگەرىلەتۋ ءۇشىن، الەمدىك دامۋ باستاماسىنان، الەمدىك حاۋىپسىزدىك باستاماسىنان، الەمدىك وركەنيەت باستاماسىنان كەيىن، بيىل 9 - ايدا مەن الەمدىك جونگە سالۋ باستاماسىن العا قويدىم. جۇڭگو مەن فرانسيا ناعىز كوپ جاقتىلىقتى امالياتتا ايگىلەپ، بىرلەسكەن مەملەكەتتەر ۇيىمىنىڭ ورنى مەن بەدەلىن بىرگە قورعاپ، الەمدىك ساۋدا ۇيىمىن وزەك، ەرەجەنى نەگىز ەتكەن كوپ جاقتى ساۋدا ءتۇزىلىسىن قورعاپ، الەمدىك جونگە سالۋدى رەفورمالاۋعا، كەمەلدەندىرۋگە وڭ ەنەرگيا ۇستەۋى كەرەك.

شي جينپيڭ بىلاي دەپ باسا دارىپتەدى: جۇڭگو كوممۋنيستىك پارتياسى 20 - كەزەكتى ورتالىق كوميتەتىنىڭ ءتورتىنشى جالپى ءماجىلىسى ”15 - بەسجىلدىق“ جوبا ۇسىنىسىن قاراپ ماقۇلدادى. جۇڭگو جۇڭگو ۇلگىسىندەگى وسىزامانداندىرۋدى جاپپاي ىلگەرىلەتىپ، جوعارى دەڭگەيدەگى سىرتقا ەسىك اشۋدى كەڭەيتەدى. فرانسيا كاسىپورىنشىلارىنىڭ جۇڭگونىڭ دامۋ پايداسىنان ۇزدىكسىز بىرگە يگىلىكتەنۋىن قارسى الامىز.

جۇڭگو مەن فرانسيا ۇكىمەتتەرىنىڭ، كاسىپورىندارىنىڭ ءار سالا ۋاكىلدەرىنەن 150 دەي ادام جابىلۋ سالتىنا قاتىناستى.

ۋاڭ ي جوعارىداعى قيمىلدارعا قاتىناستى.