وقۋشىلاردى جارىسقا قاتىناسقان ۇلىنا داۋىس بەرۋگە ۇيىمداستىرعان مەكتەپ باستىعى مىندەتىنەن قالدىرىلدى 

12 – ايدىڭ 10 – كۇنى تاڭ سارىدە، حىنان ولكەسى جىڭجوۋ ەلەكتر قۋاتى ورتا دارەجەلى كاسىپتىك مەكتەبى جاعداي تۋرالى تۇسىنىكتەمە جاريالاپ، مەكتەپ باستىعىنىڭ وقۋشىلاردى ءوزىنىڭ جارىسقا قاتىناسقان پەرزەنتىنە داۋىس بەرۋگە ۇيىمداستىرعانى جونىندە جاۋاپ قايتارعان، بۇل ىسكە قاتىستى مەكتەپ باستىعى مىندەتىنەن قالدىرىلعان ءارى كەشىرىم سۇراۋعا بۇيىرىلعان، مەكتەپ جاق تا قوعامداعىلاردان شىنايى كەشىرىم سۇراعان ءارى جالپى بەتتىك تۇزەتۋگە ۋادە بەرگەن.

جاعداي جونىندەگى تۇسىنىكتەمەگە قاراعاندا، جۋىردا اقپارات قۇرالدارى اتالعان مەكتەپتە «وقۋشىلاردى مەكتەپ باستىعىنىڭ جارىسقا قاتىناسقان پەرزەنتىنە داۋىس بەرۋگە ۇيىمداستىرعانىنا» قاتىستى جايتتىڭ بارلىعىن حابارلاپ، توراپتاستار بۇل ءىستى كەڭىنەن تالقىلاعان. ءىس تۋىلعان سوڭ، مەكتەپتىڭ باسقارۋ القاسى بۇل ىسكە بارىنشا ءمان بەرىپ، دەرەۋ ارناۋلى تەكسەرۋ گرۋپپاسىن ۇيىمداستىرىپ، تەكسەرىپ راستاۋ قىزمەتىن ورىستەتكەن.

تەكسەرىپ راستاۋعا قاراعاندا، 12 – ايدىڭ 7 – كۇنى، اتالعان مەكتەپتىڭ باسشىلىق قۇرامىنىڭ مۇشەسى جوۋ X تىڭ ۇلى مەكتەبىندە ءان جارىسىنا قاتىناسادى، داۋىس بەرۋ كەزەڭىندە ول ۇلىنىڭ اناعۇرلىم جوعارى قولداۋعا يە بولۋىنا كومەكتەسۋ ءۇشىن، ءبىر ءبولىم وقۋشىلاردى وعان داۋىس بەرۋگە ءوز بەتىمەن ورنالاستىرادى. «حالىق باسقارۋىنداعى وقۋ – اعارتۋدى ىلگەرىلەتۋ زاڭىنىڭ اتقارىلاتىن ەرەجەسىندەگى» قاتىستى بەلگىلەمەلەرگە ساي، مەكتەپتىڭ باسقارۋ القاسى جوۋ X تى مىندەتىنەن قالدىرادى ءارى وعان وسى ىسكە قاتىستى وقىتۋشى – وقۋشىلاردان كەشىرىم سۇراۋدى بۇيىرادى.

مەكتەپ جاق تۇسىندىرمەسىندە بۇل ءىس مەكتەپتىڭ ۇستازدىق ءمورال جانە ۇستازدىق ستيل قۇرىلىسى، مەكتەپتى باسقارۋ جاقتارىندا كورنەكتى جەتەرسىزدىكتەر مەن ولقىلىقتار ساقتالىپ وتىرعانىن اشىققا شىعارعانىن مويىنداعان. وسى جونىندە مەكتەپ جاق قوعامداعى ءار سالاداعىلاردان شىنايى كەشىرىم سۇراعان ءارى كەلەسى قادامدا بىرەۋى ارقىلى باسقالارىن تۇسپالداپ، ۇستازدىق ءمورال جانە ۇستازدىق ستيل قۇرىلىسىن ويداعىداي قاتاڭ ۇستاپ، مەكتەپتى باسقارۋ مەحانيزمىن كەمەلدەندىرىپ، وسى تەكتەس وقيعانىڭ قايتالاي تۋىلۋىنان باتىل ساقتاناتىنىن ايقىن تۇراقتاندىرعان، سونىمەن بىرگە، قوعامنىڭ ءار سالاسىنداعىلاردىڭ مەكتەپتىڭ ءتۇرلى قىزمەتتەرىن جالعاستى باقىلاۋىن شىنايى قارسى الاتىنىن بىلدىرگەن.

كەلۋ قاينارى: حالىق تورابى