شي جينپيڭ ۋرۋگۆايدىڭ زۇڭتۇڭى ورسيمەن كەڭەس وتكىزدى

2 - ايدىڭ 3 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن ۋرۋگۆايدىڭ زۇڭتۇڭى ورسيمەن كەڭەس وتكىزدى.

سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

2 - ايدىڭ 3 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن ۋرۋگۆايدىڭ زۇڭتۇڭى ورسيمەن كەڭەس وتكىزدى. سۋرەتتە: كەڭەستەن بۇرىن شي جينپيڭ حالىق سارايىنىڭ سولتۇستىك زالىندا ورسيدى قارسى الۋ سالتىن وتكىزۋدە.

سۋرەتتى شينحۋا اگەنتتىگىنىڭ ءتىلشىسى ديڭ حايتاۋ تۇسىرگەن

شينحۋا اگەنتتىگى، 2 - ايدىڭ 3 - كۇنى، بەيجيڭ (ءتىلشى دۇڭ شۋە). 2 - ايدىڭ 3 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا مەملەكەتتىك ساپارمەن كەلگەن ۋرۋگۆايدىڭ زۇڭتۇڭى ورسيمەن كەڭەس وتكىزدى.

شي جينپيڭ مىنالاردى اتاپ كورسەتتى: جۇڭگو مەن ۋرۋگۆايدىڭ اراسى شالعاي بولعانىمەن، ەكى جاقتىڭ ۇستانىمى قارايلاس، دوستىعى تەرەڭ. 38 جىلدىڭ الدىنداعى بۇگىنگى كۇنى جۇڭگو مەن ۋرۋگۆاي ديپلوماتيالىق قارىم - قاتىناس ورناتتى. 38 جىلدان بەرى، حالىقارالىق جاعداي قالاي وزگەرسە دە، ەكى ەل باستان - اياق ءوزارا قۇرمەت ەتۋ، ءوزارا پايدا جەتكىزىپ سەلبەسۋ سىندى قارىم - قاتىناس جولىنا تاباندى بولدى. جاڭا جاعدايدا ەكى جاق داستۇرگە مۇراگەرلىك ەتىپ، جالپى بەتتىك ستراتەگيالىق سەرىكتەستىك قارىم - قاتىناستى تەرەڭدەتىپ، ەكى ەلدىڭ دوستىق بايتەرەگىنىڭ بارعان سايىن قاۋلاي تۇسۋىنە مۇمكىندىك جاساۋى كەرەك.

شي جينپيڭ مىنالاردى باسا دارىپتەدى: جۇڭگو مەن ۋرۋگۆاي ءبىر - ءبىرىنىڭ وزەكتى مۇددەسى مەن ءجىتى قاداعالاپ وتىرعان كەلەلى ىستەرىنە ۇزدىكسىز باتىل قولداۋ كورسەتىپ، ءار جىكتەگى، جان - جاقتى دوستىق بارىس - كەلىستى جيىلەتىپ، ەل باسقارۋ تاجىريبەلەرىن اۋىستىرۋدى كۇشەيتىپ، ستراتەگيالىق ءوزارا سەنىمدىلىكتى ۇزدىكسىز تەرەڭدەتۋى كەرەك. جۇڭگو كوممۋنيستىك پارتياسى 20 - كەزەكتى ورتالىق كوميتەتىنىڭ ءتورتىنشى جالپى ءماجىلىسى ”15 - بەسجىلدىق“ جوبا ۇسىنىسىن ماقۇلداپ، الداعى 5 جىلداعى جۇڭگونىڭ ەكونوميكالىق، قوعامدىق دامۋىنا جوبا جاسادى، سونداي - اق ۋرۋگۆايدى قامتىعان ءار ەلگە ءتىپتى دە كوپ وراي ازىرلەدى. ەكى جاق دامۋ ستراتەگياسىن ۇشتاستىرۋدى كۇشەيتىپ، ەكونوميكا - ساۋدا، فينانس، ەگىن، مال شارۋاشىلىعى، نەگىزدىك قۇرىلعى قۇرىلىسى، ينفورماتسيا، حابارلاسۋ سياقتى سەلبەستىكتەردى تەرەڭدەتىپ، جاسىل دامۋ، سيفرلى ەكونوميكا، جاساندى زەردە، تازا ەنەرگيا سياقتى جاڭادان گۇلدەنگەن سالالارداعى سەلبەستىكتىڭ كومەسكى كۇشىن اشىپ، ەكونوميكالىق ارتۋدىڭ تيپىن وزگەرتىپ، دارەجەسىن جوعارىلاتۋدى ىلگەرىلەتۋى كەرەك. جۇڭگو مەن ۋرۋگۆاي حالقى تابيعي جاقىندىق سەزىمگە يە، ەكى جاق مادەنيەت، وقۋ - اعارتۋ، دەنە تاربيە، اقپارات قۇرالدارى، جەرگىلىكتى ورىندار سياقتى اۋىس - كۇيىستى ۇزدىكسىز تەرەڭدەتىپ، ادامداردىڭ بارىس - كەلىسىنە قولايلىلىق جاساپ، حالىق تىلەگىنىڭ توعىسۋىن جەبەۋى كەرەك.

شي جينپيڭ مىنالاردى اتاپ كورسەتتى: قازىر دۇنيە ءجۇزى 100 جىلدا بولماعان زور وزگەرىس جاعدايىندا تۇر، حالىقارالىق جاعداي قىم - قۋىت وزگەرىپ، سىڭار جاقتى زورەكەرلىك بارعان سايىن اسقىنۋدا، جۇڭگو ۋرۋگۆايدىڭ ”77 ەل توبى جانە جۇڭگونىڭ“ كەزەكتى ءتوراعا ەلى مىندەتىن وتكىزىپ الۋىن قولدايدى، ۋرۋگۆاي جاقپەن دۇنيە ءجۇزىنىڭ وڭتۇستىگىنىڭ ىنتىماعىن، سەلبەستىگىن كۇشەيتىپ، تەپە - تەڭ، ءتارتىپتى دۇنيە ءجۇزىنىڭ كوپ ۇيەكتەنۋىن، جالپىعا ءتيىمدى، سيىسىمدى ەكونوميكانىڭ جاھاندانۋىن بىرگە ىلگەرىلەتىپ، قول ۇستاسا العا باسىپ، دامۋعا بىرگە تالپىنىپ، ادامزاتتىڭ تاعدىرلاس ورتاق تۇلعاسىن قۇرۋعا اناعۇرلىم زور ۇلەس قوسۋدى قالايدى. جۇڭگو جاق جۇڭگو - لاتىن امەريكاسى قارىم - قاتىناسىنا باستان - اياق ءمان بەرەدى، لاتىن امەريكاسى مەن كارايب ەلدەرىنىڭ ءوز يەلىك ۇقىعىن، حاۋىپسىزدىگىن، دامۋ مۇددەسىن قورعاۋىن قولدايدى، ۋرۋگۆايدىڭ لاتىن امەريكاسى جانە كارايب ەلدەرى ورتاق تۇلعاسىنىڭ، سونداي - اق وڭتۇستىك ورتاق بازارىنىڭ كەزەكتى ءتوراعا ەلى مىندەتىن وتكىزىپ الۋىن قولدايدى، ۋرۋگۆاي جاقپەن جانە وڭىردەگى ەلدەرمەن جۇڭگو - لاتىن امەريكا تاعدىرلاس ورتاق تۇلعاسىن بىرگە قۇرۋدىڭ تەرەڭدەۋىن، ناقتىلانۋىن ىلگەرىلەتۋدى قالايدى.

ورسي مىنالاردى ءبىلدىردى: جۇڭگونىڭ ءتوراعا شي جينپيڭنىڭ باسشىلىعىندا ۇلى تابىستارعا قول جەتكىزۋى ادامدى سۇيىندىرەدى، ”15 - بەسجىلدىق“ جوبانىڭ دۇنيە جۇزىنە اناعۇرلىم زور وراي اكەلۋىن ءۇمىت ەتەدى. بۇگىن ۋرۋگۆاي مەن جۇڭگونىڭ ديپلوماتيالىق قارىم - قاتىناس ورناتقاندىعىنىڭ 38 جىلدىعى، ەكى ەلدىڭ جالپى بەتتىك ستراتەگيالىق سەرىكتەستىك قارىم - قاتىناسى تاريحتاعى ەڭ جاقسى مەزگىلدە تۇر. جۇڭگو _ ۋرۋگۆايدىڭ ماڭىزدى سەلبەستىك سەرىگى، ۋرۋگۆايدىڭ ەكونوميكالىق، قوعامدىق دامۋىنا قالتقىسىز كومەك كورسەتتى. جۇڭگومەن قارىم - قاتىناستى دامىتۋ ۋرۋگۆايدىڭ مەملەكەت ساياساتىنا اينالىپ، پارتيا - توپتار مەن قوعامداعى ءار سالانىڭ ءبىر اۋىزدان قولداۋىنا يە بولدى. ۋرۋگۆاي جاق ءبىر جۇڭگو پرينسيبىن باتىل قولدايدى، ”ءبىر ەل، ەكى ءتۇزىم“ باعىتىن قولدايدى. ۋرۋگۆاي جاق جۇڭگو جاقپەن جالپى بەتتىك ستراتەگيالىق سەرىكتەستىك قارىم - قاتىناستى تەرەڭدەتىپ، ەكى جاقتى سەلبەستىكتى اناعۇرلىم جوعارى دەڭگەيگە كوتەرۋدى ءۇمىت ەتەدى. ەكى جاق دامۋ ستراتەگياسىن ۇشتاستىرۋدى كۇشەيتىپ، ساۋدا، قارجى قوسۋ، عىلىم - تەحنيكا، كەدەيلىكتى ازايتۋ، جاسىل ەكونوميكا، سيفرلى ەكونوميكا سياقتى سالالاردا سەلبەستىكتى تەرەڭدەتىپ، وقۋ - اعارتۋ، دەنە تاربيە، ساياحات سياقتى سالالارداعى گۋمانيتارلىق اۋىس - كۇيىستى جەبەپ، ەكى ەل قارىم - قاتىناسىنا اناعۇرلىم پارمەندى قوزعاۋشى كۇش قوسىپ، ەكى ەل حالقىنا اناعۇرلىم كوپ ىرىس - قۇت جاراتۋى كەرەك. ۋرۋگۆاي جاق ءتوراعا شي جينپيڭ العا قويعان ادامزاتتىڭ تاعدىرلاس ورتاق تۇلعاسى ۇستانىمىن ايرىقشا القايدى، سىن - سايىسقا تولى حالىقارالىق، وڭىرلىك جاعداي الدىندا، جۇڭگو جاقپەن قول ۇستاسا سەلبەسىپ، بىرلەسكەن مەملەكەتتەر ۇيىمى ەرەجەسىنىڭ ماقساتى مەن پرينسيبىنە قۇرمەت ەتىپ، كوپ جاقتىلىققا تاباندى بولىپ، حالىقارالىق ساۋدا ءتۇزىلىسىن قورعاپ، لاتىن امەريكاسى مەن جۇڭگونىڭ قارىم - قاتىناسىنىڭ ۇزدىكسىز دامۋىن ىلگەرىلەتىپ، دۇنيە ءجۇزىنىڭ وڭتۇستىگىنىڭ ورتاق مۇددەسىن قورعاۋدى قالايدى.

كەڭەستەن كەيىن ەكى ەلدىڭ مەملەكەت باسشىلارى قارجى قوسۋدى جەبەۋ، ساۋدا سياقتى سالالارداعى 10 نەشە سەلبەستىك قۇجاتىنا قول قويۋعا بىرگە كۋا بولدى.

كەڭەستەن بۇرىن شي جينپيڭ حالىق سارايىنىڭ سولتۇستىك زالىندا ورسيدى قارسى الۋ سالتىن وتكىزدى.

ورسي كەلگەندە قۇرمەت قاراۋىلى ساپ تۇزەپ قۇرمەت ءبىلدىردى. ەكى ەلدىڭ مەملەكەت باسشىلارى كوزدەن كەشىرۋ مىنبەسىنە شىقتى، اسكەري وركەستر جۇڭگو مەن ۋرۋگۆايدىڭ مەملەكەت اندەرىن ورىندادى، تيان - انمىن الاڭىندا 21 قۇرمەت ساليۋت اتىلدى. ورسي شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن كوردى.

سول كۇنى تۇستە شي جينپيڭ حالىق سارايىنىڭ التىن ءتۇستى زالىندا ورسيدى قارسى الۋ قوناعاسىن وتكىزدى.

ۋاڭ ي جوعارىداعى قيمىلدارعا قاتىناستى.

ساپار كەزىندە ەكى جاق «جۇڭحۋا حالىق رەسپۋبليكاسى مەن ۋرۋگۆاي شىعىس جاعالاۋ رەسپۋبليكاسىنىڭ جۇڭگو مەن ۋرۋگۆايدىڭ جالپى بەتتىك ستراتەگيالىق سەرىكتەستىك قارىم - قاتىناسىن تەرەڭدەتۋ جونىندەگى بىرلەسكەن مالىمدەمەسىن» جاريالادى.

كەلۋ قاينارى: حالىق تورابى