شي جينپيڭ رەسەيدىڭ زۇڭتۇڭى پۋتينمەن بەينە ەكران ارقىلى ديدارلاسۋ وتكىزدى

2 - ايدىڭ 4 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا رەسەيدىڭ زۇڭتۇڭى پۋتينمەن بەينە ەكران ارقىلى ديدارلاسۋ وتكىزدى.

سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

2 - ايدىڭ 4 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا رەسەيدىڭ زۇڭتۇڭى پۋتينمەن بەينە ەكران ارقىلى ديدارلاسۋ وتكىزدى.

سۋرەتتى شينحۋا اگەنتتىگىنىڭ ءتىلشىسى ليۋ بين تۇسىرگەن

شينحۋا اگەنتتىگى، 2 - ايدىڭ 4 - كۇنى بەيجيڭ (تىلشىلەر ياڭ ي - جۇن، سۇن ي). 2 - ايدىڭ 4 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدەگى حالىق سارايىندا رەسەيدىڭ زۇڭتۇڭى پۋتينمەن بەينە ەكران ارقىلى ديدارلاسۋ وتكىزدى.

شي جينپيڭ پۋتين زۇڭتۇڭعا جانە رەسەي حالقىنا كوكتەم مەرەكەسى بايلانىسىمەن ىزگى تىلەك تىلەپ، مىنانى ءبىلدىردى: بۇگىن _ جۇڭگونىڭ ەسكىشە كالەندارى بويىنشا وتامالى، بۇل كوكتەمنىڭ بايتاق دالاعا قايتا ورالۋىنىڭ سيمۆولى، جاڭا باستاماعا ۋاكىلدىك ەتەدى. مەن پۋتين زۇڭتۇڭمەن بىرگە وسى تاماشا مانگە تولى كۇنى جۇڭگو - رەسەي قارىم - قاتىناسىنىڭ جاڭا جوباسىن بىرگە جاساۋدى قالايمىن. پۋتين مىنانى ءبىلدىردى: وتامالى كەزىندە كۇللى تىرشىلىك جاندانادى، رەسەي - جۇڭگو قارىم - قاتىناسى دا قارىشتاپ دامىپ، تەبىندى ىلگەرىلەۋدە. ءتوراعا شي جينپيڭ مەن جۇڭگو حالقىنىڭ كوكتەم مەرەكەسىنىڭ قۇتتى، جىگەرلەرىنىڭ جالىندى، جىلقى جىلىنىڭ تولاعاي تابىسقا تولى بولۋىن تىلەيمىن.

شي جينپيڭ مىنالاردى اتاپ كورسەتتى: وتكەن ءبىر جىلدا ءبىز ەكى رەت ديدارلاسىپ، جۇڭگو - رەسەي قارىم - قاتىناسىنىڭ جاڭا دامۋ كەزەڭىنە وتۋىنە جەتەكشىلىك ەتتىك. ەكى ەل دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن سالتاناتپەن ەسكە ءتۇسىرىپ، ەكى جاقتىڭ دۇنيە جۇزىلىك ەكىنشى سوعىستىڭ جەڭىس جەتىستىكتەرىن جانە حالىقارالىق ادىلدىك پەن ادىلەتتىلىكتى قورعاۋداعى بەرىك بەكىمىن ايگىلەدى. ەكى جاقتى ەكونوميكا - ساۋدا بارىس - كەلىسىنىڭ بەتالىسى ورنىقتى بولدى. ”جۇڭگو - رەسەي مادەنيەت جىلى“ تابىسپەن اياقتاپ، ەكى ەلدىڭ گۋمانيتارلىق اۋىس - كۇيىسى مەن سەلبەستىگى تىڭ ساتىعا كوتەرىلىپ، ادامداردىڭ بارىس - كەلىسى اناعۇرلىم جيىلەي ءتۇستى. ەكى جاق شاڭحاي سەلبەستىك ۇيىمىنىڭ تيانجين باسشىلار ءماجىلىسى مەن ماسكەۋ زۇڭليلەر ءماجىلىسىن ىركەس - تىركەس ءساتتى وتكىزىپ، كوپ جاقتى سەلبەستىكتى كۇشەيتىپ، اناعۇرلىم ءادىل، ۇيلەسىمدى دۇنيە جۇزىلىك جونگە سالۋ جۇيەسىن ورناتۋعا ۇزدىكسىز كۇش سالدى.

شي جينپيڭ مىنالاردى باسا دارىپتەدى: بيىل _ جۇڭگونىڭ ”15 - بەسجىلدىق“ جوباسىنىڭ باستالعان جىلى، جۇڭگو جاق جوعارى دەڭگەيدەگى سىرتقا ەسىك اشۋدى اناعۇرلىم بەلسەندى، ىرىقتى تۇردە كەڭەيتىپ، رەسەيدى قامتىعان دۇنيە جۇزىندەگى ءار ەلمەن دامۋدىڭ جاڭا ورايىنان بىرگە يگىلىكتەنەدى. بيىل _ سونداي - اق جۇڭگو مەن رەسەيدىڭ ستراتەگيالىق سەلبەستىك سەرىكتەستىك قارىم - قاتىناسى ورناتىلعاندىعىنىڭ 30 جىلدىعى، «جۇڭگو مەن رەسەيدىڭ تاتۋ كورشىلىك، دوستىق سەلبەستىك شارتىنا» قول قويىلعاندىعىنىڭ 25 جىلدىعى جانە ”جۇڭگو مەن رەسەيدىڭ وقۋ - اعارتۋ جىلى“ باستالعان جىل. ەكى جاق تاريحي ورايدى يگەرىپ، جوعارى جىكتەگىلەردىڭ بارىس - كەلىسىن جيىلەتىپ، ءار سالاداعى ناقتى سەلبەستىكتى كۇشەيتىپ، اناعۇرلىم تەرەڭ قاتپارلى ستراتەگيالىق سەلبەستىك جانە اناعۇرلىم بەلسەندى، ۇتىمدى ءىرى ەلدىك جاۋاپكەرشىلىك ارقىلى جۇڭگو - رەسەي قارىم - قاتىناسىنىڭ دۇرىس ارنامەن ۇزدىكسىز دامۋىنا كەپىلدىك ەتۋى كەرەك.

شي جينپيڭ مىنالاردى ءبىلدىردى: جىل باسىنان بەرى حالىقارالىق جاعداي بارعان سايىن اۋمالى - توكپەلى بولا ءتۇستى. جاۋاپكەرشىلىك ارقالايتىن ءىرى ەل جانە بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ تۇراقتى القا ەلى رەتىندە، جۇڭگو مەن رەسەي حالىقارالىق قوعامنىڭ ادىلدىك پەن ادىلەتتىلىككە تاباندى بولۋىن ىلگەرىلەتىپ، دۇنيە جۇزىلىك ەكىنشى سوعىستىڭ جەڭىس جەتىستىكتەرىن باتىل قورعاپ، بىرلەسكەن مەملەكەتتەر ۇيىمىن وزەك ەتكەن حالىقارالىق جۇيە مەن نەگىزگى ولشەمدى باتىل قورعاپ، دۇنيە ءجۇزىنىڭ ستراتەگيالىق ورنىقتىلىعىن قول ۇستاسا قورعاۋعا مىندەتتى.

پۋتين مىنالاردى ءبىلدىردى: وتكەن ءبىر جىلدا رەسەي مەن جۇڭگو دۇنيە جۇزىلىك ەكىنشى سوعىس جەڭىسىنىڭ 80 جىلدىعىن بىرگە ەسكە ءتۇسىرىپ، رەسەي مەن جۇڭگو حالقى زور قۇرباندىقتار بەرىپ قول جەتكىزگەن دۇنيە ءجۇزى بەيبىتشىلىگىن باتىل قورعاپ، تاريحتىڭ شىنايى بولمىسىن قورعادى. ەكى ەلدىڭ ساۋدا، ەنەرگيا، عىلىم - تەحنيكا، اۋىل شارۋاشىلىعى سياقتى سالالارداعى سەلبەستىگى تەرەڭدەپ، ناقتىلانىپ، گۋمانيتارلىق اۋىس - كۇيىس كۇن سايىن جيىلەپ، مادەنيەت جىلى تابىستى بولىپ، ءوزارا ۆيزاسىز ءوتۋ ساياساتى ەكى ەل حالقىنىڭ بارىس - كەلىسىنە اناعۇرلىم قولايلىلىق تۋدىردى. جاڭا جىلعا كوز جىبەرسەك، رەسەي جاق رەسەي - جۇڭگو قارىم - قاتىناسىنا تولىق سەنىم ارتادى. ەكى جاق ءبىر - ءبىرىنىڭ مەملەكەتتىڭ يەلىك ۇقىعىن، حاۋىپسىزدىگىن قورعاۋىن ۇزدىكسىز تاباندىلىقپەن قولداپ، ەكونوميكانىڭ، قوعامنىڭ دامۋىن، گۇلدەنۋىن جۇزەگە اسىرىپ، وقۋ - اعارتۋ، مادەنيەت سياقتى سالالارداعى گۋمانيتارلىق اۋىس - كۇيىستى جەبەپ، ەكى ەل حالقىنا باقىت جاراتۋى كەرەك. كۇردەلى دە قۇبىلمالى حالىقارالىق جاعداي الدىندا، رەسەي جاق جۇڭگو جاقپەن بىرلەسكەن مەملەكەتتەر ۇيىمى، شاڭحاي سەلبەستىك ۇيىمى، بريكس ەلدەرى سياقتى كوپ جاقتى تۇعىرلاردا ستراتەگيالىق سەلبەستىكتى ۇزدىكسىز كۇشەيتىپ، حالىقارالىق ىستەرگە وڭ ەنەرگيا ۇستەۋدى قالايدى. رەسەي جاق جۇڭگونىڭ شىنجىندە ازيا - تىنىق مۇحيت ەكونوميكالىق سەلبەستىك ۇيىمى باسشىلارىنىڭ بەيرەسمي ءماجىلىسىن وتكىزۋىن بەلسەنە قولدايدى.

ەكى ەل مەملەكەت باسشىلارى ورتاق كوڭىل ءبولىپ وتىرعان حالىقارالىق جانە وڭىرلىك قولامتالى ماسەلەلەر جونىندە ىشكەرىلەي پىكىر اۋىستىردى.

ۋاڭ ي قيمىلعا قاتىناستى.

كەلۋ قاينارى: حالىق تورابى