شي جينپيڭ ا ق ش - نىڭ زۇڭتۇڭى ترامپپەن تەلەفوندا سويلەستى

شينحۋا اگەنتتىگى، 2 - ايدىڭ 4 - كۇنى، بەيجيڭ. 2 - ايدىڭ 4 - كۇنى كەشتە مەملەكەت ءتوراعاسى شي جينپيڭ ا ق ش - نىڭ زۇڭتۇڭى ترامپپەن تەلەفوندا سويلەستى.

شي جينپيڭ مىنالاردى اتاپ كورسەتتى: وتكەن ءبىر جىلدا ءبىز تاماشا قارىم - قاتىناستى ساقتاپ، پۋساندا ءساتتى ديدارلاسىپ، جۇڭگو - ا ق ش قارىم - قاتىناسىنا جول باستاۋشى بولىپ، ەكى ەل حالقى مەن حالىقارالىق قوعامنىڭ قارسى الۋىنا يە بولدىق. مەن جۇڭگو - ا ق ش قارىم - قاتىناسىنا ايرىقشا ءمان بەرەمىن. جاڭا ءبىر جىلدا مەن سىزبەن بىرگە جۇڭگو - ا ق ش قارىم - قاتىناسى سىندى الىپ كەمەنى بوران - شاشىننان ءوتىپ، ورنىقتى ىلگەرىلەۋگە باستاپ، ءىرى ىستەردى، يگى ىستەردى كوبىرەك ىستەۋدى قالايمىن. ا ق ش - نىڭ دا، جۇڭگونىڭ دا وزىندىك كوڭىل ءبولىپ وتىرعان ىستەرى بار. جۇڭگو جاق ءسوز بەن ارەكەتتە بىردەي بولىپ، ارەكەتتەن ناتيجە شىعارىپ، ايتقانىن ورىندايدى. ەكى جاق تەڭدىك، قۇرمەت ەتۋ، ءوزارا تيىمدىلىك جاساۋ پوزيتسياسىن ۇستانسا بولعانى، ءوزارا كوڭىل ءبولىپ وتىرعان ماسەلەلەردى شەشۋدىڭ ءادىسىن تابۋعا بولادى. بيىل جۇڭگو مەن ا ق ش - نىڭ ءارقايسىسىنىڭ كوپتەگەن ماڭىزدى كۇن ءتارتىبى بار، جۇڭگونىڭ ”15 بەسجىلدىق“ جوباسى باستالدى، ا ق ش مەملەكەت قۇرىلعاندىعىنىڭ 250 جىلدىعىن قارسى الادى، ەكى ەل ازيا - تىنىق مۇحيت ەكونوميكالىق سەلبەستىك ۇيىمى باسشىلارىنىڭ بەيرەسمي ءماجىلىسىن، 20 ەل توبى باسشىلارىنىڭ ءماجىلىسىن جەكە - جەكە وتكىزەدى. ەكى جاق ءبىز كەلىسكەن ورتاق تانىم بويىنشا، پىكىرلەسۋدى، تىلدەسۋدى كۇشەيتىپ، الاۋىزدىقتاردى ۇيلەسىمدى تىزگىندەپ، ناقتى سەلبەستىكتى كەڭەيتىپ، جاقسى ىستە تاتىمسىز ەكەن دەپ ەرەنسىز بولماي، ءتيىمسىز ىسكە سالدارى بولماشى ەكەن دەپ بوي ۇرماي، ءبىر - بىرلەپ ىستەپ، ءوزارا سەنىمدىلىكتى ۇزدىكسىز توپتاپ، دۇرىس قارىم - قاتىناس جولىن اشىپ، 2026 - جىلدى جۇڭگو مەن ا ق ش سىندى ەكى ءىرى ەلدىڭ ءوزارا قۇرمەت ەتەتىن، بەيبىت قاتار تۇراتىن، سەلبەسىپ تەڭ يگىلىككە كەنەلەتىن جىلىنا اينالدىرۋ كەرەك.

شي جينپيڭ مىنالاردى باسا دارىپتەدى: تايۋان ماسەلەسى − جۇڭگو - ا ق ش قارىم- قاتىناسىنداعى ەڭ ماڭىزدى ماسەلە. تايۋان _ جۇڭگونىڭ تەرريتورياسى، جۇڭگو مەملەكەتتىڭ يەلىك ۇقىعى مەن تەرريتوريا تۇتاستىعىن قورعاۋى كەرەك، تايۋاندى بولشەكتەۋگە ماڭگى جول بەرمەيدى. ا ق ش تايۋانعا اسكەري قارۋ - جاراق ساتۋ ماسەلەسىن، ءسوز جوق، بايىپتىلىقپەن ءبىر جاقتى ەتۋى كەرەك.

ترامپ مىنالاردى ءبىلدىردى: ا ق ش پەن جۇڭگو _ ۇلى ەلدەر، ا ق ش - جۇڭگو قارىم - قاتىناسى _ دۇنيە جۇزىندەگى ەڭ ماڭىزدى ەكى جاقتى قارىم - قاتىناس. مەنىڭ ءتوراعا شي جينپيڭمەن ۇلى قارىم - قاتىناسىم بار، مەن ءتوراعا شي جينپيڭدى ەرەكشە قۇرمەتتەيمىن. ءتوراعا شي جينپيڭ ەكەۋىمىزدىڭ جەتەكشىلىگىمىزدە، ا ق ش مەن جۇڭگو ەكونوميكا - ساۋدا سياقتى سالالاردا تاماشا ىقپالداستىق جاسادى. مەن جۇڭگونىڭ تابىسقا جەتكەنىن قۋانا كورىپ وتىرمىن، ا ق ش جاق جۇڭگو جاقپەن سەلبەستىكتى كۇشەيتىپ، ەكى ەل قارىم - قاتىناسىنىڭ تىڭ دامۋعا قول جەتكىزۋىن ىلگەرىلەتۋدى قالايدى. مەن جۇڭگونىڭ تايۋان ماسەلەسىندەگى كوڭىل ءبولىپ وتىرعان ماسەلەلەرىنە ءمان بەرەمىن، جۇڭگو جاقپەن قارىم - قاتىناستى ساقتاپ، ءوزىم مىندەت اتقارعان مەزگىلدە ا ق ش - جۇڭگو قارىم - قاتىناسىنىڭ تاماشا ورنىقتىلىعىن ساقتاۋدى قالايمىن.

كەلۋ قاينارى: حالىق تورابى