بۇكىل ەلدەگى ءار ۇلت حالقىنا كوكتەم مەرەكەسى بايلانىسىمەن ىزگى تىلەك جولدادى
ءار ۇلت حالقىنىڭ باقىتتى، الاڭسىز بولۋىن، ۇلى وتاننىڭ گۇلدەنىپ - كوركەيۋىن تىلەدى

2 - ايدىڭ 9 - كۇنىنەن 10 - كۇنىنە دەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ بەيجيڭدە قىزمەت تەكسەردى ءارى نەگىزگى ساتىداعى كادرلار مەن بۇقاراعا امانداسىپ، ولاردان حال سۇرادى. سۋرەتتە: 2 - ايدىڭ 10 - كۇنى تۇستەن بۇرىن شي جينپيڭ دۇڭچىڭ رايونى لۇڭفۋسى كوشە اۋماعىندا قىزمەت تەكسەرگەندە، بۇكىل ەلدەگى ءار ۇلت حالقىنا جانە شياڭگاڭدىق، اۋمىندىق، تايۋاندىق باۋىرلاستارعا، شەتەلدەگى چياۋمين باۋىرلاستارعا كوكتەم مەرەكەسى بايلانىسىمەن ىزگى تىلەك جولدادى.

سۋرەتتى شينحۋا اگەنتتىگىنىڭ ءتىلشىسى يان يان تۇسىرگەن

2 - ايدىڭ 9 - كۇنىنەن 10 - كۇنىنە دەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ بەيجيڭدە قىزمەت تەكسەردى ءارى نەگىزگى ساتىداعى كادرلار مەن بۇقاراعا امانداسىپ، ولاردان حال سۇرادى. سۋرەتتە: 9 - ايدىڭ 10 - كۇنى تۇستەن بۇرىن شي جينپيڭ شيچىڭ رايونى ”ۋ - لاۋ . جاڭا كوشەسىندەگى“ قارتتاردى كۇتىمدەۋگە قىزمەت وتەۋ كوشە اۋماعىنداعى اق سامايلىلار قارتتار جاتاقحاناسىندا قىزمەت تەكسەرگەندە، قارتتارمەن ىقىلاسپەن اڭگىمەلەسۋدە.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

«حالىق گازەتى»، 2 - ايدىڭ 10 - كۇنى، بەيجيڭ. جۇڭحۋا ۇلتىنىڭ ءداستۇرلى مەرەكەسى − كوكتەم مەرەكەسى كەلۋ قارساڭىندا، جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ بەيجيڭدە قىزمەت تەكسەردى ءارى نەگىزگى ساتىداعى كادرلار مەن بۇقاراعا امانداسىپ، ولاردان حال سۇرادى، بۇكىل ەلدەگى ءار ۇلت حالقىنا جانە شياڭگاڭدىق، اۋمىندىق، تايۋاندىق باۋىرلاستارعا، شەتەلدەگى چياۋمين باۋىرلاستارعا كوكتەم مەرەكەسى بايلانىسىمەن قۇتتى بولسىن ايتتى! ەل ءىشى - سىرتىنداعى جۇڭحۋا ۇلاندارىنىڭ ەگىنشىلىك كۇنتىزبەسى بويىنشا جىلقى جىلىندا رۋحتارىنىڭ اسقاق، دەنساۋلىقتارىنىڭ مىقتى بولۋىن، كاسىپتە تابىسقا جەتىپ، وتباسىلارىنىڭ باقىتتى بولۋىن تىلەدى! ۇلى وتانىمىزدىڭ تاۋ - وزەندەرىنىڭ كوركەم بولۋىن، جاۋىن - شاشىننىڭ ەگىنشىلىككە جايلى بولۋىن، مەملەكەتىمىزدىڭ گۇلدەنىپ - كوركەيۋىن، ەل امان، جۇرت تىنىش بولۋىن تىلەدى!

2 - ايدىڭ 9 - كۇنىنەن 10 - كۇنىنە دەيىن شي جينپيڭ جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، بەيجيڭ قالالىق پارتكومنىڭ شۋجيى يىن لي مەن قالا باستىعى يىن يۇڭنىڭ سەرىك بولۋىندا عىلىم - تەحنيكادا جاڭالىق اشۋ باقشا رايونىنا، زەينەتكەرلىككە قىزمەت وتەۋ كوشە اۋماعىنا، مەرەكەلىك بۇيىمدار بازارىنا بارىپ قىزمەت تەكسەرىپ، نەگىزگى ساتىداعى كادرلار مەن بۇقاراعا پارتيا ورتالىق كوميتەتىنىڭ قامقورلىعى مەن تىلەگىن جەتكىزدى.

2 - ايدىڭ 9 - كۇنى تۇستەن بۇرىن شي جينپيڭ بەيجيڭنىڭ ي - جۋاڭ دەگەن جەرىنە ورنالاسقان مەملەكەتتىك ينفورماتسيا جاسامپازدىعى باقشاسىنا كەلىپ، ينفورماتسيا تەحنيكاسىندا جاڭالىق اشۋ، قولدانۋ سياقتى جاعدايلاردى ەگجەي - تەگجەيلى ۇعىسىپ، جاساندى زەردە، قۇلتەمىر سياقتى عىلىم - تەحنيكادا جاڭالىق اشۋ جەتىستىكتەرى كورمەسىن مۇقيات كورىپ، عىلىمي زەرتتەۋ قىزمەتكەرلەرىمەن جانە عىلىم - تەحنيكا كاسىپورىندارىنىڭ جاۋاپتىلارىمەن ءالسىن - ءالى پىكىر اۋىستىردى. ول بىلاي دەدى: بۇگىن وسى اراعا كەلىپ ناق مايداندا ۇيرەنىپ، كوز ايامدى كەڭەيتتىم، كورگەننەن كەيىن مەملەكەتتىڭ عىلىم - تەحنيكادا جاڭالىق اشۋىنا دەگەن سەنىمىم ارتا ءتۇستى. ول مىنانى باسا دارىپتەدى: سوتسياليستىك وسىزاماندانعان قۇدىرەتتى ەل قۇرۋدىڭ تەتىگى عىلىم - تەحنيكادا ءوز كۇشىنە سۇيەنىپ ءوزىن الۋەتتەندىرۋدە، بەيجيڭ ءوز ابزالدىعىن ساۋلەلەندىرىپ، وسى جاعىندا اناعۇرلىم زور ۇلەس قوسۋى كەرەك. ول قالىڭ عىلىم - تەحنيكا قىزمەتكەرلەرىن وتان ءۇمىتىن اقتاۋ سۇيىسپەنشىلىگىن نىعايتىپ، كۇرەس رۋحىن ساۋلەلەندىرىپ، جۇڭگو ۇلگىسىندەگى وسىزامانداندىرۋ ساپارىندا ەڭبەك ءسىڭىرىپ، ۇلەس قوسۋعا شابىتتاندىردى.

شيچىڭ رايونى بەيساۋچاڭ حۋتۇڭىنا ورنالاسقان ”ۋ - لاۋ . جاڭا كوشەسىندەگى“ قارتتاردى كۇتىمدەۋگە قىزمەت وتەۋ كوشە اۋماعى تاياۋ جىلداردان بەرى كەدەرگىسىز بولۋ جانە قارتتارعا ۇيلەسىمدى ەتىپ وزگەرتۋدى ىلگەرىلەتىپ، قارتتاردى كوپ نەگىزدى زەينەتكەرلىك قىزمەت وتەۋىمەن قامدادى. 2 - ايدىڭ 10 - كۇنى تۇستەن بۇرىن شي جينپيڭ وسى اراعا كەلىپ، شينجيەكوۋ ءمالى باسقارماسىنداعى فۋمۋ اسحاناسىنا كىرىپ، كوكونىس ونىمدەرىن، باعاسىن جانە تاماقتانۋ ورتاسىن كورىپ، اسحانانىڭ قارتتاردى كۇتىمدەۋ، تاماقتانۋعا كومەكتەسۋ قىزمەت وتەۋ جاعدايىن ەگجەي - تەگجەيلى ۇعىستى. وسى ارادا دەمالىپ وتىرعان جەدەل جەتكىزۋشىلەردى كورگەن شي جينپيڭ ولاردىڭ قىزمەت، تۇرمىس جاعدايىن ىقىلاسپەن سۇراپ، ولاردىڭ قاجىرلى ەڭبەگى مەن قوسقان ۇلەسىن القادى. ول مىنالاردى اتاپ كورسەتتى: قارتتاردى قۇرمەتتەۋ _ جۇڭحۋا ۇلتىنىڭ ءداستۇرلى تاماشا ءمورالى، قارتتاردى ايالاۋ، قارتتارعا كومەكتەسۋ _ تۇتاس قوعامنىڭ ورتاق جاۋاپكەرشىلىگى. ءار دارەجەلى پارتكومدار مەن ۇكىمەتتەر ءتۇرلى بايلىقتاردى ءبىر تۇتاس جوسپارلاپ، زەينەتكەرلىككە قىزمەت وتەۋدىڭ كولەمىن كەڭەيتىپ، ساپاسىن جوعارىلاتۋدى، باياندى دامۋىن ىلگەرىلەتىپ، قارتتاردىڭ سوڭعى ءومىرىن الاڭسىز وتكىزۋىنە اناعۇرلىم جاقسى شارت - جاعداي جاراتۋعا قۇلشىنۋى كەرەك.

اق سامايلىلار قارتتار جاتاقحاناسىندا شي جينپيڭ قارتتاردىڭ دەنساۋلىعىن تەكسەرۋ، ساۋىقتىرۋ جاتتىعۋى، كۇندەلىكتى تۇرمىسىنا قارايلاسۋ سياقتى جاعدايلاردى ەگجەي - تەگجەيلى ۇعىستى. زالدا كەيبىر قارتتار كوكتەم بوساعالىعى مەن باقىت دەگەن جازۋدى جازىپ جاتىر، شي جينپيڭ ولاردىڭ اراسىنا كەلىپ، جاسامپازدىعىنان ءلاززات الىپ، ولاردى قارتايسا دا ارتىقشىلىقتارىن ساۋلەلەندىرىپ، ناتيجە جاراتۋعا شابىتتاندىرىپ، ولاردىڭ دەندەرىنىڭ ساۋ، عۇمىرلارىنىڭ ۇزاق، كوكتەم مەرەكەلەرىنىڭ كوڭىلدى بولۋىن تىلەدى.

دۇڭچىڭ رايونى لۇڭفۋسى كوشە اۋماعى بەت - بەينەنى قورعاۋ جانە جاڭالاۋ، قايتا قۇرۋ ارقىلى كوپ ءتۇرلى كاسىپ كۇيىندەگى جاياۋلار كوشە اۋماعىنا اينالدى. شي جينپيڭ كوشە اۋماعىنىڭ كەلبەتىن كورىپ، قالانىڭ جاڭالانۋ جاعدايى جونىندەگى تانىستىرۋدى تىڭدادى. ول داۋشياڭسۇن بالكۇلشە دۇكەنىنە باس سۇعىپ، بالكۇلشەنىڭ ءتۇرى مەن ەرەكشەلىگىن ۇعىسىپ، بالكۇلشەنىڭ ناق مايداندا جاسالۋىن كورىپ، دۇكەن قوجايىنىنىڭ بەيجيڭدەگى وسى كونە ماركانى ويداعىداي جالعاستىرۋىن، دامىتۋىن ءۇمىت ەتتى.

ءدال ەگىنشىلىك كۇنتىزبەسى بويىنشا كىشى كوكتەم مەرەكەسى، لۇڭفۋ سارايىنىڭ الدىندا مەرەكەلىك بۇيىمدار بازارى قىرۋار قالا تۇرعىندارى مەن ساياحاتشىلاردى باۋرادى. شي جينپيڭ مەرەكەلىك بۇيىمدار جايماسىن قىزىعا كورىپ، سول جەردەگى بۇقارامەن ىقىلاسپەن اڭگىمەلەستى. ول كوپشىلىككە جاس كەزىندە لۇڭفۋ بۇتحاناسىنا تالاي رەت بارعانىن قۋانا اڭگىمەلەدى، بىرنەشە قوراپ ەرەكشەلىككە يە ازىق - تۇلىك جانە مادەنيەت جاسامپازدىعى ءونىمىن ساتىپ الدى.

كوشەدە جيڭشي تايپيڭ بارابانى دۋماندى بەينەمەن سوعىلىپ جاتتى. باس شۋجيدىڭ كەلگەنىن كورگەن ناق مايدانداعى بۇقارا قىزۋ مەرەيمەن امانداستى. شي جينپيڭ بەيجيڭ قالاسىنىڭ تۇرعىندارىنا، بۇكىل ەلدەگى ءار ۇلت حالقىنا مەرەكەلىك سالەم جولدادى. ول بىلاي دەدى: بۇگىن _ سولتۇستىكتىڭ ”كىشى كوكتەم مەرەكەسى“، مەن كوپشىلىكپەن بىرگە ”كىشى كوكتەم مەرەكەسىن وتكىزىپ، جاڭا جىلدى قارسى الماقپىن“. بۇل ارادا جۇرگىنشىلەر قايشالىسىپ، شاتتىققا شومىپ، مەرەكەلىك تۇسكە ەنىپ، مەرەكەلىك بۇيىمداردىڭ جەتكىلىكتى ەكەنىن كورىپ قاتتى قۋاندىم. كوكتەم مەرەكەسىن وتكىزۋ بۇقارا ءۇشىن ءىرى ءىس سانالادى، ءار دارەجەلى پارتكومدار مەن ۇكىمەتتەر حالىق تۇرمىسىن قامتاماسىزداندىرۋ مەن ءوندىرىس حاۋىپسىزدىگىن شىنايى مىقتى يگەرىپ، قالىڭ حالىق بۇقاراسىنىڭ كوكتەم مەرەكەسىن شات مەرەيمەن كوڭىلدى وتكىزۋىنە كەپىلدىك ەتۋى كەرەك.

قىزمەت تەكسەرۋ كەزىندە شي جينپيڭ بەيجيڭ قالالىق پارتكوم مەن قالالىق ۇكىمەتتىڭ قىزمەت مالىمەتىن تىڭداپ، بەيجيڭنىڭ ءتۇرلى قىزمەتتەردە قول جەتكىزگەن ناتيجەلەرىن تۇراقتاندىردى.

شي جينپيڭ مىنالاردى اتاپ كورسەتتى: ”15 - بەسجىلدىق“ مەزگىلى − سوتسياليستىك وسىزامانداندىرۋدى نەگىزىنەن جۇزەگە اسىرۋعا بەرىك نەگىز قالايتىن، جاپپاي كۇش سالاتىن شەشۋشى مەزگىل. بەيجيڭ پارتيا 20 - كەزەكتى ورتالىق كوميتەتى ءتورتىنشى جالپى ءماجىلىسىنىڭ رۋحىن ىشكەرىلەي دايەكتىلەندىرىپ، پارتيا ورتالىق كوميتەتى بەلگىلەگەن قالانىڭ ستراتەگيالىق ورنىن تياناقتاندىرىپ، ەكونوميكالىق، قوعامدىق دامۋدى دالمە - ءدال، ناقتى ىلگەرىلەتىپ، سوتسياليستىك وسىزامانداندىرۋدى الدىمەن نەگىزىنەن جۇزەگە اسىرۋدا شەشۋشى ىلگەرىلەۋشىلىككە قول جەتكىزۋگە كەپىلدىك ەتىپ، بۇكىل ەل كولەمىندە ۇلگىلىك رولىن ساۋلەلەندىرۋگە قۇلشىنۋى كەرەك.

شي جينپيڭ بىلاي دەپ باسا دارىپتەدى: بەيجيڭ قالانىڭ ستراتەگيالىق ورنىن تۇراقتاندىرۋدى جانە بەيجيڭ - تيانجين - حىبەيدىڭ سايكەستى دامۋىن تياناق ەتىپ، جوعارى ساپالى دامۋ باعدارىن اناعۇرلىم بەرىك ورناتىپ، كوبەيتۋ، ازايتۋ، قامتاماسىز ەتۋ، سالماقتى سەزىنۋ بارىسىندا ەكونوميكانىڭ ساپاسىنىڭ ءونىمدى جوعارىلاۋىن جانە مولشەرىنىڭ ۇيلەسىمدى ارتۋىن ىلگەرىلەتۋى كەرەك. بەيجيڭنىڭ استاناعا جاتپايتىن فۋنكتسيالارىن سەيىلتۋ سىندى بەيجيڭ - تيانجين - حىبەيدىڭ سايكەستى دامۋىن ىلگەرىلەتۋدىڭ ”بۇيداسىن“ مىقتى يگەرىپ، ارتۋ مولشەرىن تىزگىندەۋ مەن ىركىندى قوردى سەيىلتۋدى ءوزارا ۇشتاستىرۋعا، ەكى جاعىن دا يگەرۋگە تاباندى بولىپ، سەيىلتۋ مەن جوعارىلاتۋدىڭ ورگانيكالى بىرلىگىن، ءبىرىن - ءبىرى جەبەۋىن جۇزەگە اسىرۋ كەرەك. بەيجيڭ (بەيجيڭ - تيانجين - حىبەي) حالىقارالىق عىلىم - تەحنيكادا جاڭالىق اشۋ ورتالىعىنىڭ قورشاۋدى كەڭەيتۋ ورايىن مىقتى يگەرىپ، تيانجينمەن، حىبەيمەن سەلبەسىپ جاڭالىق اشۋدى جانە كاسىپ سالاسى سەلبەستىگىن كۇشەيتىپ، بەيجيڭ - تيانجين - حىبەيدىڭ سايكەستى دامۋىنىڭ ۇزدىكسىز تەرەڭدەۋىن، ناقتىلانۋىن ىلگەرىلەتۋ كەرەك. وقۋ - اعارتۋ، عىلىم - تەحنيكا دارىندىلارىن ءبىر تۇلعالاندىرىپ دامىتۋدى ءبىر تۇتاس جوسپارلاپ، عىلىم - تەحنيكادا جاڭالىق اشۋ مەن كاسىپ سالاسىندا جاڭالىق اشۋدىڭ ىشكەرىلەي توعىسۋىن كۇشەيتىپ، جاڭاشا وندىرگىش كۇشتەردى كۇش سالا دامىتۋ كەرەك. وسى زامانعى قىزمەت وتەۋ كاسىبىن بەلسەنە دامىتىپ، مول مادەنيەت بايلىعىنان ويداعىداي پايدالانىپ، مادەنيەت، ساۋدا، ساياحات، دەنەتاربيە، كورمە ىستەرىنىڭ توعىسپالى دامۋىن جەبەۋ كەرەك. ءىرى قالالاردىڭ ءىرى بەيجيڭ قالا ماڭىنا باستاماشىلىق ەتۋىنە، ءىرى بەيجيڭ قالا ماڭىنىڭ ءىرى قالالارعا قىزمەت وتەۋىنە تاباندى بولىپ، قالا مەن اۋىلدىڭ ءبىر تۇلعالانۋ جوباسىن كۇشەيتىپ، قالا مەن اۋىلدىڭ ىقپالداسىپ دامۋىن، توعىسپالى دامۋىن، سايكەستى دامۋىن جەبەۋ كەرەك. رەفورمانى ونان ارى جاپپاي تەرەڭدەتىپ، تۇزىمدىك ەسىك اشۋدى كەڭەيتىپ، بۇكىل ەلدى كوشىرىپ قولدانۋعا، جالپىلاستىرۋعا بولاتىن تاجىريبەلەرمەن قامداۋعا قۇلشىنۋ كەرەك.

شي جينپيڭ بىلاي دەپ اتاپ كورسەتتى: بەيجيڭ حالىقارادا بىرەگەي جاراسىمدى، قونىسقا قولايلى قالا قۇرۋدا، ءسوز جوق، قالانى جونگە سالۋدى ەڭ جاقسى ولشەممەن ىلگەرىلەتۋى كەرەك. قالا، اۋىل نەگىزگى ساتىلارىنىڭ اپاتتان ساقتانۋ، اپات زيانىن ازايتۋ، اپاتتان قۇتقارۋ جانە شۇعىل جاعدايعا توتەپ بەرۋ قابىلەتى قۇرىلىسىن كۇشەيتىپ، قالانىڭ الەۋمەتتىك حاۋىپسىزدىك دەڭگەيىن ۇزدىكسىز جوعارىلاتۋ كەرەك. حالىق قالاسى ۇستانىمىنا تاباندى بولىپ، نەگىزگى الەۋمەتتىك قىزمەت وتەۋ جۇيەسىن كۇش سالا اقاۋسىزداندىرىپ، ”ارىزدى تاپسىرىپ العان زامان ءبىتىرۋ“ سياقتى مەحانيزمدەردەن ويداعىداي پايدالانىپ، حالىق بۇقاراسىنىڭ شۇعىل، قيىن، ۋايىمداعان، ءزارۋ ماسەلەلەرىن تىڭعىلىقتى شەشۋ كەرەك. اتموسفەرا، سۋ، توپىراق ورتاسىن جونگە سالۋدىڭ ونىمدىلىگىن بەكەمدەپ، جاڭا لاس زاتتاردى جونگە سالۋدى جانە تۇرمىستىق قوقىر - قوقسىقتى تۇرگە ءبولىپ ءبىر جاقتى ەتۋدى ىلگەرىلەتىپ، جاسىل، تومەن كومىرتەكتى قونىسقا قولايلى مەكەن قۇرۋ كەرەك. پارتيا قۇرىلىسىمەن جەتەكشىلىك ەتۋگە تاباندى بولىپ، عىلىم - تەحنيكا ارقىلى قۋات ۇستەۋدى كۇشەيتىپ، قالانى جونگە سالۋدىڭ اناعۇرلىم ءونىمدى، ەگجەي - تەگجەيلى بولۋىنا مۇمكىندىك جاساۋ كەرەك.

شي جينپيڭ مىنالاردى باسا دارىپتەدى: پارتيانى جاپپاي قاتاڭ جونگە سالۋدى، ءسوز جوق، اناعۇرلىم جوعارى ولشەممەن جانە اناعۇرلىم ناقتى شارامەن ىلگەرىلەتۋ كەرەك. پارتيانىڭ ساياسي قۇرىلىسىن كورنەكتى تۇردە مىقتى يگەرىپ، ىسىلعان ساياسي قابىلەت سومداۋ كەرەك. ادام تاڭداۋ، ادام ىستەتۋ وتكەلىن قاتاڭ يگەرىپ، ءار دارەجەلى باسشىلىق القالارىنا تاڭداۋلىلارىن تاڭداپ، مىقتىلارىن سەپتەۋ كەرەك. ۇيرەنۋ تاربيەسىن كۇشەيتىپ، كادرلار قوسىنىنىڭ وسىزاماندانۋ قۇرىلىسى قابىلەتىن جاپپاي جوعارىلاتۋ كەرەك. پارتيالى كادرلاردى دۇرىس ساياسي ناتيجە كوزقاراسىن ورناتىپ جانە امالياتتا ايگىلەپ، امالياتتىڭ، حالىقتىڭ، تاريحتىڭ سىنىنان وتە الاتىن ناقتى ناتيجە جاراتۋ ءۇشىن قۇلشىنۋعا باستاۋ كەرەك. ستيلدى دۇرىستاپ، ءتارتىپتى قاتايتىپ، شىرىكتەسۋگە قارسى تۇرۋدى ۇزدىكسىز تەرەڭدەتىپ، شىرىكتەسۋگە باتىلدىق ەتپەۋدى، شىرىكتەسۋگە مۇمكىندىك بەرمەۋدى، شىرىكتەسۋدى ويىنا الماۋدى ءبىر تۇتاس ىلگەرىلەتىپ، شىرىكتەسۋدىڭ ءوسىپ - ءوربيتىن ورتاسى مەن شارت - جاعدايىن كۇش سالا الاستاپ، ستيلى پاك، سالتى دۇرىس ساياسي ەكولوگيانى قۇلشىنا قالىپتاستىرۋ كەرەك.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسە مەڭگەرمەسىنىڭ مەڭگەرۋشىسى ساي چي قىزمەت تەكسەرۋدە بىرگە بولدى.

حى ليفىڭ جانە ورتالىق پەن مەملەكەت ورگاندارىنىڭ قاتىستى تاراۋلارىنداعى جاۋاپتى جولداستار قىزمەت تەكسەرۋدە بىرگە بولدى.

كەلۋ قاينارى: حالىق تورابى