2026 - جىلعى ستۋدەنتتەردىڭ باتىس بولىكتە ەرىكتى قىزمەت وتەۋ جوسپارىنا تىزىمدەلۋ باستالدى 

شينحۋا اگەنتتىگىنىڭ ءتىلشىسى يۇي جان - ي 3 – ايدىڭ 1 – كۇنى بەيجيڭنەن حابارلايدى. 3 – ايدىڭ 1 – كۇنى كوممۋنيستىك جاستار وداعى ورتالىق كوميتەتىنەن ۇعىسۋعا قاراعاندا، 2026 - جىلعى ستۋدەنتتەردىڭ باتىس بولىكتە ەرىكتى قىزمەت وتەۋ جوسپارىنا تىزىمدەلۋ سول كۇنى باستالعان. سول كۇننەن 5 – ايدىڭ 10 – كۇنىنە دەيىن، جاي جوعارى مەكتەپتەن بيىل وقۋ تاۋىساتىندار نەمەسە مەكتەپتەگى اسپيرانتتار ”باتىس بولىك ەرىكتىلەر بىرلەستىگى“ ۋيشين تەكشەسى نەمەسە باتىس بولىك جوسپارىنىڭ رەسمي تورابى (https://xibu.youth.cn) ارقىلى باتىس بولىك جوسپارىنىڭ ينفورماتسيالىق جۇيەسىنە تىركەلىپ تىزىمدەلۋىنە بولادى.

ۇعىسۋعا قاراعاندا، باتىس بولىك جوسپارى — كوممۋنيستىك جاستار وداعى ورتالىق كوميتەتى، وقۋ – اعارتۋ مينيسترلىگى، قازىنا مينيسترلىگى، ادام كۇشى بايلىعى جانە قوعامدىق قامتاماسىزداندىرۋ مينيسترلىگى بىرگە ۇيىمداستىرىپ اتقارعان دارىندىلار ينجەنەرياسى. بيىل مەملەكەت بويىنشا باتىس بولىك جوسپارىنا جاڭادان قابىلداناتىن ەرىكتىلەر سانى شامامەن 60 مىڭ ادام بولىپ، قىزمەت وتەۋ ورىندارىنىڭ %90 تەن استامى اۋىل – قالاشىق جانە ودان تومەن دارەجەلى جەرلەردە بولادى، اۋىل – قىستاق وقۋ – اعارتۋى، اۋىل – قىستاقتى كوركەيتۋگە قىزمەت وتەۋ، سالاماتتى اۋىل – قىستاق قۇرۋ، نەگىزگى ساتىدا قوعامدىق جونگە سالۋ، وتاندى قورعاپ، شەكارانى كۇزەتۋ، نەگىزگى ساتىداعى جاستار قىزمەتى، شينجياڭعا قىزمەت وتەۋ، شيزاڭعا قىزمەت وتەۋ قاتارلى 8 ارناۋلى نىسان بەلگىلەنگەن. باتىس بولىك جوسپارىنا قابىلدانعان ەرىكتىلەردىڭ قىزمەت وتەۋ مەرزىمى 1 – 3 جىل بولىپ، قىزمەت وتەۋ كەلىسىمشارتىنا جىل سايىن قول قويىلادى.

ۇعىسۋعا قاراعاندا، باتىس بولىك جوسپارى اتقارىلعان 23 جىلدان بەرى، جوعارى مەكتەپتەن وقۋ تاۋىسقان جاستاردان جيىنى 600 مىڭعا جۋىق جاس پارتيا مەن مەملەكەتتىڭ ۇندەۋىنە بەلسەنە ءۇن قوسىپ، باتىس بولىككە، اۋىل – قىستاققا، نەگىزگى ساتىعا بارىپ ەرىكتى قىزمەت وتەپ، جەرگىلىكتى ورىننىڭ ەكونوميكاسى مەن قوعامىنىڭ دامۋىن جەبەۋ، ۇلتتار ىنتىماعىن جەبەۋ، شەكارانى كوركەيتىپ، حالىقتى اۋقاتتاندىرۋ جانە شەكارانى نىعايتۋ جاعىندا بەلسەندى رول اتقاردى.

كەلۋ قاينارى: حالىق تورابى