ا ق ش مەن يزرايل يرانعا اسكەري سوققى بەرگەننەن بەرى 700 دەن استام جۇڭگو ازاماتى يراننان شەگىنىپ شىقتى

شينحۋا اگەنتتىگىنىڭ ءتىلشىسى ساداتتىڭ 3 – ايدىڭ 12 - كۇنى تەھران قالاسىنان بەرگەن حابارى: شينحۋا اگەنتتىگى ءتىلشىسىنىڭ جۇڭگونىڭ يراندا تۇراتىن باس ەلشىحاناسىنان ۇعىسۋىنشا، 2 – ايدىڭ 28 - كۇنى ا ق ش مەن يزرايل يرانعا اسكەري قيمىل ورىستەتكەننەن بەرى، بەيجيڭ ۋاقىتى 3 – ايدىڭ 12 – كۇنىنە دەيىن 700 دەن استام جۇڭگو ازاماتى يراننان حاۋىپسىز شەگىنىپ شىققان.

ا ق ش مەن يزرايل يرانعا اسكەري قيمىل جۇرگىزگەننەن بەرى، جۇڭگونىڭ يرانداعى باس ەلشىحاناسى مەن جەرگىلىكتى حۋاچيالار توبى تۇرعان جەردىڭ ماڭايىندا كوپ رەت قوپارىلىس تۋىلدى. جۇڭگونىڭ يراندا تۇراتىن باس ەلشىحاناسىنىڭ ءبىرتۇتاس جەتەكشىلىگىندە، يران حۋاچياۋ حۋارىن بىرلەستىگى مەن جەر – جەردەگى حۋاچياۋلار كەۋدە كەرىپ العا شىعىپ، يرانداعى جۇڭگو ازاماتتارىنىڭ جوتكەلۋىن، شەگىنۋىن ۇزدىكسىز بار كۇشپەن ىلگەرىلەتتى.

جاعدايدىڭ ۋشىعۋىنا بايلانىستى، استانا تەھران قالاسىندا كوپتەگەن مۇناي قويمالارى 3 – ايدىڭ 8 - كۇنى شابۋىلعا ۇشىرادى، قوپارىلىستان پايدا بولعان قويۋ ءتۇتىن كۇنى بۇگىنگە دەيىن تولىق تاراي قويعان جوق. جۇڭگونىڭ يرانداعى باس ەلشىحاناسىنىڭ تانىستىرۋىنا قاراعاندا، جۇڭگو ازاماتتارىنىڭ توپ - توبىمەن كەتۋىنە بايلانىستى، قالعان شەگىنۋشىلەر ءتىپتى دە بىتىراپ، جوتكەلىپ شەگىنۋ بارعان سايىن قيىنداسقان. جۇڭگو ازاماتتارىنىڭ حاۋىپسىز شەگىنۋى كوپتەگەن ادامداردىڭ پەردە ارتىنداعى سەلبەستىگى مەن ءۇن – ءتۇنسىز بوداۋ بەرگەن بىرلىگىنىڭ جەمىسى.

شەگىنىپ شىعۋ قىزمەتىنە كومەكتەسكەن جۇڭگو ازاماتى مىن حاييان: ”نە ءۇشىن جۇڭگو ىستەي الدى؟ ءوز باسىنان وتكىزگەندەردىڭ ءبارى امان - ەسەن شەگىنىپ شىعۋدىڭ استارىندا قۇدىرەتتى وتاننىڭ بار بولعاندىعى دەدى.“

ءبىر جۇڭگو ازاماتى شەگىنىپ شىعۋ بارىسىن اڭگىمەلەگەندە بىلاي دەدى: ۇزاق جول باسىپ، اقىرى شەكارا وتكەلىنە جەتىپ، سول جەردە كۇتىپ تۇرعان جۇڭگو ەلشىحاناسىنىڭ قىزمەتكەرلەرىمەن كەزدەسكەندە، ”تۋىستارىمدى كورگەندەي سەزىمدە بولدىم“، شەكارا وتكەلى ارقىلى شەكارادان شىققاننان كەيىن، توڭىرەكتەگى ەلدەردەگى جۇڭگو ەلشىحاناسىنىڭ قىزمەتكەرلەرى كۇش جالعاپ كۇتىپ تۇردى، ”مۇنداي قۇرمەت پەن قورعاۋ ماڭگى ەستەن كەتپەيدى.“

كەلۋ قاينارى: حالىق تورابى