14 - كەزەكتى مەملەكەتتىك حالىق قۇرىلتايىنىڭ 4 - ءماجىلىسى بەيجيڭدە جابىلدى

3 - ايدىڭ 12 - كۇنى تۇستەن كەيىن 14 - كەزەكتى مەملەكەتتىك حالىق قۇرىلتايىنىڭ 4 - ءماجىلىسى بەيجيڭدەگى حالىق سارايىندا جابىلدى. پارتيا مەن مەملەكەت باسشىلارىنان شي جينپيڭ، لي چياڭ، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ ءتوراعالار مىنبەسىنەن ورىن الدى.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

3 - ايدىڭ 12 - كۇنى 14 - كەزەكتى مەملەكەتتىك حالىق قۇرىلتايىنىڭ 4 - ءماجىلىسى بەيجيڭدەگى حالىق سارايىندا جابىلۋ جينالىسىن وتكىزدى. ءماجىلىس ءتوراعالار القاسىنىڭ ءتوراعاسى، اتقارۋشى ءتوراعاسى جاۋ لىجي جابىلۋ ءماجىلىسىن باسقاردى ءارى ءسوز سويلەدى.

سۋرەتتى شينحۋا اگەنتتىگىنىڭ ءتىلشىسى شىن حۇڭ تۇسىرگەن

شينحۋا اگەنتتىگى، بەيجيڭ، 3 - ايدىڭ 12 - كۇنى. 14 - كەزەكتى مەملەكەتتىك حالىق قۇرىلتايىنىڭ 4 - ءماجىلىسى ءتۇرلى كەڭەستىك تارتىپتەرىن تابىسپەن ورىنداعاننان كەيىن، 3 - ايدىڭ 12 - كۇنى تۇستەن كەيىن بەيجيڭدەگى حالىق سارايىندا جابىلدى. ءماجىلىس ۇكىمەت قىزمەتىنەن بايانداما، ”15 - بەسجىلدىق“ جوبا باعدارلاماسى، مەملەكەتتىك حالىق قۇرىلتايى تۇراقتى كوميتەتىنىڭ قىزمەت بايانداماسى سياقتىلاردى بەكىتتى. ءماجىلىس ەكولوگيالىق ورتا زاڭناماسىن، ۇلتتار ىنتىماعى العاباسارلىعىن جەبەۋ زاڭىن، مەملەكەتتىڭ دامۋ جوباسى زاڭىن، مەملەكەتتىك حالىق قۇرىلتايى تۇراقتى كوميتەتىنىڭ زاڭدى اداقتاۋ قىزمەتىنىڭ جاعدايى جانە قاتىستى زاڭدار مەن قاۋلىلاردى ءبىر جاقتى ەتۋ پىكىرى جونىندەگى بايانداماسىن بەكىتۋ جونىندەگى قاراردى ماقۇلدادى، مەملەكەت ءتوراعاسى شي جينپيڭ 70 -، 71 -، 72 -، 73 - ءنومىرلى ءتوراعا بۇيرىعىنا قول قويدى.

جابىلۋ جيىنىن ءماجىلىس ءتوراعالار القاسىنىڭ تۇراقتى ءتوراعاسى، اتقارۋشى ءتوراعاسى جاۋ لىجي باسقاردى. ءماجىلىس ءتوراعالار القاسىنىڭ تۇراقتى ءتوراعالارى، اتقارۋشى ءتوراعالارى لي حۇڭجۇڭ، ۋاڭ دۇڭميڭ، شياۋ جيە، جىڭ جيانباڭ، ديڭ جۇڭلي، ساي دافىڭ، حى ۋەي، ۋ ۋەيحۋا، تيە نيڭ، پىڭ چيڭحۋا، جاڭ چيڭ - ۋەي، لوساڭجياڭسۇن، شوكىرات زاكىر، ليۋ چي ءتوراعالار مىنبەسىندەگى اتقارۋشى ءتوراعالار ورنىنا جايعاستى.

شي جينپيڭ، لي چياڭ، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ جانە ءماجىلىس ءتوراعالار القاسىنىڭ قۇرامىنداعىلار ءتوراعالار مىنبەسىنەن ورىن الدى.

جيىنعا قاتىناسۋعا ءتيىستى ۋاكىل 2878 ادام، قاتىناسقانى 2762 ادام، قاتىناسا الماعانى 116 ادام، قاتىناسقان ۋاكىل سانى زاڭدا بەلگىلەنگەن ادام سانىنا ۇيلەسەدى.

تۇستەن كەيىن ساعات 3 تە جاۋ لىجي ءماجىلىستىڭ باستالعاندىعىن جاريالادى.

جيىن داۋىسقا سالۋ ارقىلى 14 - كەزەكتى مەملەكەتتىك حالىق قۇرىلتايى 4 - ءماجىلىسىنىڭ ۇكىمەت قىزمەتىنەن بايانداما جونىندەگى قارارىن ماقۇلدادى. قاراردا مىنالار اتاپ كورسەتىلدى: ءماجىلىس ”14 - بەسجىلدىق“ مەزگىلىندەگى ەلىمىزدىڭ ەكونوميكالىق، قوعامدىق دامۋدا قول جەتكىزگەن كەلەلى جەتىستىكتەرىن جوعارى باعالاپ، مەملەكەتتىك كەڭەستىڭ وتكەن ءبىر جىلداعى قىزمەتتەرىن تولىق تۇراقتاندىرىپ، باياندامادا العا قويىلعان ”15 - بەسجىلدىق“ مەزگىلىندەگى باستى نىسانالارعا، كەلەلى مىندەتتەرگە جانە 2026 - جىلعى قىزمەت ورنالاستىرۋلارىنا قوسىلىپ، وسى باياندامانى بەكىتۋدى ۇيعاردى.

جيىن حالىق شارۋاشىلىعى جانە قوعامدىق دامۋدىڭ 15 - بەسجىلدىق جوسپار باعدارلاماسى جونىندەگى قاراردى ماقۇلدادى. قاراردا مىنالار اتاپ كورسەتىلدى: ءماجىلىس مەملەكەتتىك حالىق قۇرىلتايى قازىنا - ەكونوميكا كوميتەتىنىڭ تەكسەرۋ ناتيجەسى جونىندەگى بايانداماسىنا قوسىلىپ، وسى جوبا باعدارلاماسىن بەكىتۋدى ۇيعاردى. ءماجىلىس مىنالاردى تالاپ ەتتى: ”15 - بەسجىلدىق“ كەزىندە شي جينپيڭ جاڭا ءداۋىر جۇڭگوشا سوتسياليزم يدەياسىن جاپپاي دايەكتىلەندىرىپ، ”بەستى ءبىر تۇلعالاندىرۋ“ جالپىلىق ورنالاستىرۋىن ءبىر تۇتاس ىلگەرىلەتىپ، ” ءتورتتى جاپپاي ورىنداۋ“ ستراتەگيالىق ورنالاستىرۋىن سايكەستى ىلگەرىلەتىپ، ەل ءىشى جانە حالىقارا سىندى ەكى جالپى جاعدايدى ءبىر تۇتاس جوسپارلاپ، جاڭا دامۋ ۇستانىمىن تولىق، دۇرىس، جان - جاقتى دايەكتىلەندىرىپ، جاڭا دامۋ جاعدايىن جەدەل قالىپتاستىرىپ، ورنىقتىلىق بارىسىندا ىلگەرىلەۋ قىزمەت جالپى ارناسىنا، ەكونوميكالىق قۇرىلىستى وزەك ەتۋگە تاباندى بولىپ، جوعارى ساپالى دامۋدى ىلگەرىلەتۋدى نەگىزگى تاقىرىپ، رەفورما جاساپ، جاڭالىق اشۋدى ءتۇبىرلى قوزعاۋشى كۇش ەتىپ، حالىقتىڭ كۇن سايىن ارتىپ وتىرعان تاماشا تۇرمىس قاجەتىن قاناعاتتاندىرۋدى ءتۇبىرلى ماقسات، پارتيانى جاپپاي قاتاڭ جونگە سالۋدى ءتۇبىرلى كەپىل ەتىپ، ەكونوميكانىڭ ساپاسىنىڭ ءونىمدى جوعارىلاۋىن جانە مولشەرىنىڭ ۇيلەسىمدى ارتۋىن ىلگەرىلەتىپ، ادامنىڭ جان - جاقتى دامۋىن، جالپى حالىقتىڭ بىرگە اۋقاتتانۋىن ىلگەرىلەتۋدە نىق قادام تاستاپ، سوتسياليستىك وسىزامانداندىرۋدى نەگىزىنەن جۇزەگە اسىرۋدا شەشۋشى ىلگەرىلەۋشىلىككە قول جەتكىزۋگە كەپىلدىك ەتۋ كەرەك.

جيىن داۋىسقا سالۋ ارقىلى ەكولوگيالىق ورتا زاڭناماسىن، ۇلتتار ىنتىماعى العاباسارلىعىن جەبەۋ زاڭىن، مەملەكەتتىڭ دامۋ جوباسى زاڭىن ماقۇلدادى. ەكولوگيالىق ورتا زاڭناماسى 2026 - جىلى 8 - ايدىڭ 15 - كۇنىنەن باستاپ اتقارىلادى، ۇلتتار ىنتىماعى العاباسارلىعىن جەبەۋ زاڭى 2026 - جىلى 7 - ايدىڭ 1 - كۇنىنەن باستاپ اتقارىلادى، مەملەكەتتىڭ دامۋ جوباسى زاڭى جاريالانعان كۇننەن باستاپ اتقارىلادى.

جيىن 14 - كەزەكتى مەملەكەتتىك حالىق قۇرىلتايى 4 - ءماجىلىسىنىڭ 2025 - جىلعى حالىق شارۋاشىلىعى مەن قوعامدىق دامۋ جوسپارىنىڭ اتقارىلۋ احۋالى جانە 2026 - جىلعى حالىق شارۋاشىلىعى مەن قوعامدىق دامۋ جوسپارى جونىندەگى قارارىن داۋىسقا سالىپ ماقۇلداپ، 2025 - جىلعى حالىق شارۋاشىلىعى مەن قوعامدىق دامۋ جوسپارىنىڭ اتقارىلۋ احۋالى جانە 2026 - جىلعى حالىق شارۋاشىلىعى مەن قوعامدىق دامۋ جوسپار جوباسى جونىندەگى باياندامانى بەكىتۋدى ۇيعاردى. 2026 - جىلعى حالىق شارۋاشىلىعى مەن قوعامدىق دامۋ جوسپارىن بەكىتتى؛ 14 - كەزەكتى مەملەكەتتىك حالىق قۇرىلتايى 4 - ءماجىلىسىنىڭ 2025 - جىلعى ورتالىق پەن جەرگىلىكتى ورىنداردىڭ مەجە ەسەبىنىڭ اتقارىلۋ احۋالى جانە 2026 - جىلعى ورتالىق پەن جەرگىلىكتى ورىنداردىڭ مەجە ەسەبى جونىندەگى قارارىن داۋىسقا سالىپ ماقۇلداپ، 2025 - جىلعى ورتالىق مەن جەرگىلىكتى ورىنداردىڭ مەجە ەسەبىن اتقارۋ احۋالى جانە 2026 - جىلعى ورتالىقتىڭ مەجە ەسەپ جوباسى جونىندەگى باياندامانى بەكىتۋدى ۇيعاردى، 2026 - جىلعى ورتالىقتىڭ مەجە ەسەبىن بەكىتتى.

جيىن 14 - كەزەكتى مەملەكەتتىك حالىق قۇرىلتايى 4 - ءماجىلىسىنىڭ مەملەكەتتىك حالىق قۇرىلتايى تۇراقتى كوميتەتىنىڭ قىزمەت بايانداماسى جونىندەگى قارارىن داۋىسقا سالىپ ماقۇلدادى. قاراردا مىنالار اتاپ كورسەتىلدى: ءماجىلىس مەملەكەتتىك حالىق قۇرىلتايى تۇراقتى كوميتەتىنىڭ وتكەن ءبىر جىلداعى قىزمەتتەرىن تولىق تۇراقتاندىرىپ، باياندامادا العا قويىلعان بۇدان بىلايعى ءبىر جىلداعى مىندەتتەرگە قوسىلىپ، وسى باياندامانى بەكىتۋدى ۇيعاردى.

جيىن داۋىسقا سالۋ ارقىلى 14 - كەزەكتى مەملەكەتتىك حالىق قۇرىلتايى 4 - ءماجىلىسىنىڭ ەڭ جوعارى حالىق سوتى مەكەمەسىنىڭ قىزمەت بايانداماسى جونىندەگى قارارىن، ەڭ جوعارى حالىق پروكۋراتۋراسىنىڭ قىزمەت بايانداماسى جونىندەگى قارارىن ماقۇلداپ، وسى ەكى باياندامانى بەكىتۋدى ۇيعاردى.

جيىن 14 - كەزەكتى مەملەكەتتىك حالىق قۇرىلتايى 4 - ءماجىلىسىنىڭ مەملەكەتتىك حالىق قۇرىلتايى تۇراقتى كوميتەتىنىڭ زاڭدى اداقتاۋ قىزمەتىنىڭ جاعدايى جانە قاتىستى زاڭدار مەن قاۋلىلاردى ءبىر جاقتى ەتۋ پىكىرى جونىندەگى بايانداماسىن بەكىتۋ جونىندەگى قارارىن داۋىسقا سالىپ ماقۇلدادى.

وسىدان كەيىن جاۋ لىجي ءسوز سويلەدى. ول بىلاي دەدى: 14 - كەزەكتى مەملەكەتتىك حالىق قۇرىلتايىنىڭ 4 - ءماجىلىسى ءتۇرلى كەڭەستىك تارتىپتەرىن تابىسپەن ورىندادى. ءماجىلىس دەموكراتيانى ساۋلەلەندىرۋگە، كوپتىڭ اقىل - پاراساتىن شوعىرلاندىرۋعا تاباندى بولىپ، ءىستى زاڭ بويىنشا قاتاڭ ىستەپ، كەڭ كولەمدى ورتاق تانىم قالىپتاستىردى، بۇل زەيىن - زەردەنى، كۇش - قۋاتتى شوعىرلاندىرعان، شىنايى يگەرىپ، ناقتى ىستەگەن، ىنتىماقتاسا العا باسقان ءماجىلىس بولدى.

جاۋ لىجي مىنالاردى اتاپ كورسەتتى: ۋاكىلدەر پارتيا مەن حالىقتىڭ ماڭىزدى تاپسىرماسىن ارقالاپ، زاڭدا بەلگىلەنگەن قىزمەت جاۋاپكەرشىلىكتەرىن مۇقيات اتقارىپ، ۇكىمەت قىزمەتىنەن بايانداما سياقتى باياندامالاردى قاراپ بەكىتتى، حالىق شارۋاشىلىعى مەن قوعامدىق دامۋدىڭ 15 - بەسجىلدىق جوبا باعدارلاماسىن جانە جىلدىق جوسپارىن، مەجە ەسەبىن تەكسەرىپ بەكىتتى، ەكولوگيالىق ورتا زاڭناماسىن، ۇلتتار ىنتىماعى العاباسارلىعىن جەبەۋ زاڭىن، مەملەكەتتىڭ دامۋ جوباسى زاڭىن قاراپ ماقۇلدادى. ءماجىلىس جەتىستىكتەرى پارتيانىڭ دارىپتەمەسى مەن حالىق ەركىنىڭ وسكەلەڭ بىرلىگىن ايگىلەدى، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا ىنتىماقتاسا كۇرەس جۇرگىزىپ، داۋىرمەن بىرگە العا باسىپ، مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ءىسىن ۇزدىكسىز العا ىلگەرىلەتەتىن بەرىك سەنىم مەن كۇش - قۋاتتى ايگىلەدى.

جاۋ لىجي بىلاي دەدى: 5 جىلدىق جوبانى جاساۋ جانە اتقارۋ _ جۇڭگو كوممۋنيستىك پارتياسىنىڭ ەل باسقارۋداعى ماڭىزدى تاجىريبەسى، جۇڭگوشا سوتسياليستىك ءتۇزىمنىڭ ماڭىزدى ساياسي ابزالدىعى. ”15 - بەسجىلدىق“ جوبا مەزگىلى − سوتسياليستىك وسىزامانداندىرۋدى نەگىزىنەن جۇزەگە اسىرۋعا بەرىك نەگىز قالايتىن، جاپپاي كۇش سالاتىن شەشۋشى مەزگىل، ”15 - بەسجىلدىق“ جوبا باعدارلاماسىن ويداعىداي اتقارۋ كەلەلى ماڭىز الادى.

جاۋ لىجي بىلاي دەپ اتاپ كورسەتتى: ءبىز پارتيا 20 - قۇرىلتايىنىڭ جانە 20 - كەزەكتى ورتالىق كوميتەتتىڭ ءار رەتكى جالپى ءماجىلىسىنىڭ رۋحىن ىشكەرىلەي ۇيرەنىپ، دايەكتىلەندىرىپ، ءتورتىنشى جالپى ءماجىلىستىڭ ورنالاستىرۋلارىن مۇقيات تياناقتاندىرىپ، پارتيا ورتالىق كوميتەتىنىڭ ”15 - بەسجىلدىق“ مەزگىلى جونىندەگى ستراتەگيالىق ورنىن تەرەڭ تانىپ، ”15 - بەسجىلدىق“ مەزگىلىندەگى ەكونوميكالىق، قوعامدىق دامۋدىڭ جەتەكشى يدەياسىن، ماڭىزدى پرينسيبىن، نىسانا - مىندەتتەرىن، ساياسات - شارالارىن دۇرىس يگەرىپ، وسى رەتكى ءماجىلىستىڭ ورنالاستىرۋى بويىنشا ءتۇرلى قىزمەتتەردى تىڭعىلىقتى، ءونىمدى تۇردە ويداعىداي ىستەپ، ءوز ءىسىمىزدى تاباندىلىقپەن ويداعىداي ىستەپ، ”15 - بەسجىلدىقتاعى“ تاماشا باستامانى قۇلشىنا جۇزەگە اسىرىپ، ۇلى ارماندى بىرتىندەپ تاماشا رەالدىققا اينالدىرۋىمىز كەرەك.

جاۋ لىجي بىلاي دەدى: ءبىز حالىق قۇرىلتايىنىڭ فۋنكتسياسى مەن قىزمەت جاۋاپكەرشىلىگىن تياناق ەتىپ، پارتيا باسشىلىعىنىڭ، حالىقتىڭ وزىنە - ءوزى قوجايىن بولۋىنىڭ، مەملەكەتتى زاڭمەن جونگە سالۋدىڭ ورگانيكالى بىرلىگىنە تاباندى بولىپ، جالپى بارىستىق حالىق دەموكراتياسىن امالياتتا ايگىلەپ، حالىق قۇرىلتايى تۇزىمىنە ويداعىداي تاباندى بولىپ، ونى ويداعىداي كەمەلدەندىرىپ، ويداعىداي جۇرگىزىپ، مەملەكەتتىڭ ءتۇبىرلى ساياسي ءتۇزىمىنىڭ ابزالدىعىن شىنايى ساۋلەلەندىرىپ، نەگىزگى زاڭ مەن زاڭداردا جۇكتەلگەن قىزمەت جاۋاپكەرشىلىگىمىزدى مۇقيات اتقارىپ، ”15 - بەسجىلدىق“ نىسانا - مىندەتتەردى جۇزەگە اسىرۋدى زاڭمەن جونگە سالۋ جاعىنان قامتاماسىز ەتۋىمىز؛ حالىق قۇرىلتايى ۋاكىلدەرى حالىقتىڭ مۇددەسى مەن ەركىنە ادالدىقپەن ۋاكىلدىك ەتىپ، مىندەتىن زاڭ بويىنشا اتقارىپ، جاۋاپكەرشىلىگىن ادا ەتىپ، بۇقارامەن تىعىز بايلانىس جاساپ، ءوز قىزمەت ورنىندا ەڭبەك ءسىڭىرىپ، ۇلەس قوسۋى كەرەك.

جاۋ لىجي بىلاي دەپ اتاپ كورسەتتى: ءبىز شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، شي جينپيڭ جاڭا ءداۋىر جۇڭگوشا سوتسياليزم يدەياسىمەن وي - سانانى قارۋلاندىرۋعا، امالياتقا جەتەكشىلىك ەتۋگە، قىزمەتتەردى ىلگەرىلەتۋگە تاباندى بولىپ، ”ءتورت تانىمدى“ ونان ارى كۇشەيتىپ، ”ءتورت سەنىمدى“ بەكەمدەپ، ”ەكىنى قورعاۋدى“ ورىنداپ، ءبىر نيەت، ءبىر تىلەكتە بولىپ، قايراتتانا العا ۇمتىلىپ، شىندىققا جۇگىنىپ، ناقتى ءىس ىستەپ، حالىق ءۇشىن ناتيجە جاراتۋعا، ناقتى ءىس ىستەۋ ارقىلى ناتيجە جاراتۋعا قۇلشىنىپ، جۇڭگو ۇلگىسىندەگى وسىزامانداندىرۋ قۇرىلىسىنىڭ جاڭا جاعدايىن ۇزدىكسىز اشۋىمىز كەرەك. (ءسوزدىڭ تولىق مازمۇنى بولەك جاريالاندى).

تۇستەن كەيىن ساعات 3 تەن 40 مينۋت وتكەندە جاۋ لىجي جۇڭحۋا حالىق رەسپۋبليكاسى 14 - كەزەكتى مەملەكەتتىك حالىق قۇرىلتايى 4 - ءماجىلىسىنىڭ جابىلعاندىعىن جاريالادى. ءماجىلىس ايبىندى مەملەكەت ءانى ىشىندە اياقتادى.

ۋاڭ ي، يىن لي، شى تايفىڭ، ليۋ گوجۇڭ، لي گانجيە، لي شۋلەي، حى ليفىڭ، جاڭ گوچيڭ، چىن ۋىنچيڭ، چىن جينيڭ، چىن مين - ىر، يۋان جياجۇن، حۋاڭ كۇنميڭ، ليۋ جينگو، ۋاڭ شياۋحۇڭ، جاڭ شىڭمين، ۋ جىڭلۇڭ، چىن ي - چين، جاڭ جۇن، يىڭ يۇڭ، حۋ چۇنحۋا، شىن يۋەيۋە، ۋاڭ يۇڭ، جوۋ چياڭ، حى حوۋحۋا، لياڭ جىنيىڭ، باتىر، سۋ حۇي، شاۋ حۇڭ، گاۋ يۇنلۇڭ، مۋ حۇڭ، شيان حۇي، ۋاڭ دۇڭفىڭ، جياڭ شينجى، جياڭ زوجۇن، حى باۋشياڭ، ۋاڭ گۋاڭچيان، چين بويۇڭ، جۋ يۇڭشين، ياڭ جىن قاتارلىلار دا ءتوراعالار مىنبەسىنەن ورىن الدى.

ورتالىق پەن مەملەكەت ورگاندارىنىڭ قاتىستى تاراۋلارىنىڭ، ازاتتىق ارميانىڭ قاتىستى ورىندارىنىڭ جانە قارۋلى ساقشى بولىمدەرىنىڭ، حالىقتىق ۇيىمداردىڭ قاتىستى جاۋاپتىلارى ماجىلىسكە سىرتتاي قاتىناستى ءماجىلىستى نەمەسە سىرتتاي تىڭدادى.

شەتەلدىڭ جۇڭگودا تۇراتىن ەلشىلەرى ءماجىلىستى سىرتتاي تىڭدادى.