ءۇش ادام زاڭسىز تۇردە يۇيجۋ شىڭىنا شىعامىن دەپ قامالىپ قالعان 

5 - ايدىڭ 24 - كۇنى تاڭعى ساعات 2 دە 30 مينۋت وتكەندە، چيڭحاي ولكەسى حايشي وبلىسى گولمۋد قالاسىنداعى 119 قولباسشىلىق ورتالىعى ساقشىعا مالىمدەۋدى قابىلداعان، ايتۋعا قاراعاندا، شىڭعا شىعۋ اۋەسكەرلەرىنەن 3 ادام يۇيجۋ شىڭىنىڭ سولتۇستىك جاعىنان تاۋعا زاڭسىز شىققاندا، ونىڭ ىشىندەگى ەكى ەر جوتادان تايعاناپ حابار - وشارسىز كەتكەن، ءبىر ايەل تەڭىز دەڭگەيىنەن 5900 مەتر بيىكتىكتەگى جەردە قامالىپ قالعان. حابارلاۋدى قابىلداعاننان كەيىن، جەرگىلىكتى ءورت ءوشىرۋ تاراۋى قاتارلى تاراۋلار دەرەۋ قۇتقارۋعا اتتانعان.

گولمۋد ءورت ءوشىرۋ - قۇتقارۋ اترەتىنىڭ قىزمەتكەرلەرى تاۋعا شىعۋدا قولدانىلاتىن كاسىپتىك جابدىقتارىن، ۇشقىشسىز ۇشاقتى، جاساندى سەرىك حابارلاسۋ جابدىقتارىن، سونداي - اق جىلىنۋ، قامتاماسىزداندىرۋ بۇيىمدارىن الىپ قۇتقارۋعا شىققان ءارى كوپ تاراۋمەن بىرلەسىپ قۇتقارۋ قولباسشىلىق شتابىن قۇرىپ، ءبولىنىپ ىزدەستىرۋ، كوپ تۇيىندە سايكەسۋ ءتاسىلىن قولدانىپ قۇتقارۋدى ورىستەتكەن.

5 - ايدىڭ 24 - كۇنى ساعات 13 تە، قۇتقارۋشى قىزمەتكەرلەرى حابار - وشارسىز كەتكەن ەكى ەر اداممەن حابارلاسقان ءارى سول كۇنى ساعات 17 دە، ەكەۋىن ءساتتى تۇردە قۇتقارۋ قولباسشىلىق شتابىنا جەتكىزگەن. العاشقى تەكسەرۋدەن كەيىن، ەكەۋىنىڭ جەڭىل جارالانعانى انىقتالعان.

سونىمەن بىرگە، تاعى ءبىر توپتاعى ءورت ءوشىرۋ - قۇتقارۋ قىزمەتكەرلەرى يۇيجۋ شىڭىنىڭ سولتۇستىك بوكتەرىنەن جوعارىعا قاراي جۇرگەن، قامتاماسىزداندىرۋ بۇيىمدارىن الا بارىپ، قامالىپ قالعان ايەل ادامدى تاپقان. 5 - ايدىڭ 25 - كۇنى تاڭەرتەڭ، قۇتقارۋشى قىزمەتكەرلەر بۇل ايەلدى تاۋدان تۇسىرگەن. سول جەردەگى ەمدەۋ قىزمەتكەرلەرىنىڭ تەكسەرۋىنە قاراعاندا، ونىڭ دەنەسىندە ايقىن جاراقات بايقالماعان.

جەرگىلىكتى مادەنيەت - ساياحات تاراۋلارىنىڭ تانىستىرۋىنشا، وسىدان بۇرىن ولار ”ەلسىز دالا“، ”جاراتىلىستىق قورىق“ قاتارلى يگەرىلمەگەن، اشىق ۇستالماعان رايونداردا ساياحاتشىلاردىڭ شارلاۋ، كەسىپ ءوتۋ، شىڭعا شىعۋ قاتارلى ساياحات قيمىلدارىن ورىستەتۋىنە قاتاڭ تيم سالۋ جونىندە حاۋىپسىزدىك ەسكەرتۋىن كوپ رەت جاريالاعان. تەكسەرۋ ارقىلى، بۇل ءۇش تاۋعا شىعۋ اۋەسكەرىنىڭ بەكىتۋدەن وتكىزبەستەن، ءوز بىلگەنىنشە يۇيجۋ شىڭىنا شىعۋى زاڭسىز تاۋعا شىعۋعا جاتاتىندىعى راستالعان. جەرگىلىكتى مادەنيەت - ساياحات تاراۋلارى قاتىستى زاڭ - ەرەجەلەرگە نەگىزدەلىپ، بۇل جولعى شىڭعا شىعۋ قيمىلىن ۇيىمداستىرۋشىعا اقشالاي ايىپ سالۋ قاتارلى ءبىرجاقتى ەتۋ شاراسىن اتقارعان. سونىمەن بىرگە، دەلوعا قاتىستى ءۇش ادامدى وسى رەت بەلگىلەمەگە قايشىلىق جاساۋ بارىسىندا تۋىنداعان ءتۇرلى شىعىندار مەن قۇتقارۋعا كەتكەن قاراجات ءۇشىن شىڭعا شىعۋشىلاردى قۇتقارۋ كاسىپتىك توبىنا سايكەستى ەكونوميكالىق تولەم تولەۋگە بۇيىرعان.

كەلۋ قاينارى: حالىق تورابى