شي جينپيڭ ”بىرگە شارىقتاۋ: جۇڭگو - ا ق ش جاستارىنىڭ دوستىق ساپارى“ قيمىلىنا قاتىناسقان ەكى ەلدىڭ وقۋشىلارىنا جاۋاپ حات جازدى

شينحۋا اگەنتتىگى، 5 - ايدىڭ 28 - كۇنى، بەيجيڭ. 5 - ايدىڭ 23 - كۇنى مەملەكەت ءتوراعاسى شي جينپيڭ ”بىرگە شارىقتاۋ: جۇڭگو - ا ق ش جاستارىنىڭ دوستىق ساپارى“ قيمىلىنا قاتىناسقان ەكى ەلدىڭ وقۋشىلارىنا جاۋاپ حات جازدى.

شي جينپيڭ مىنالاردى ءبىلدىردى: ەكى ەل وقۋشىلارىنىڭ ”جۇڭگو - ا ق ش جاستارى دوستىق كەمەسىنە“ وتىرىپ، ۇمىتىلماس دوستىق ساپارىن بىرگە باستان كەشىرگەنىن ەستىپ قاباعات قۋاندىم. جۇڭگو - ا ق ش دوستىعىنىڭ حيكاياسىن حالىق جازادى، جۇڭگو - ا ق ش قاتىناسىنىڭ بولاشاعىن جاستار جاراتادى. 2023 - جىلى 11 - ايدا مەن ”5 جىلدا ا ق ش - لىق جاستار مەن ورەندەردەن 50 مىڭ ادامدى جۇڭگوعا كەلىپ اۋىس - كۇيىس جاساۋعا، ۇيرەنۋگە ۇسىنىس ەتۋ“ باستاماسىن ورتاعا قويعاننان بەرى، ا ق ش - لىق جاستار مەن ورەندەردەن 50 مىڭنان استام ادام جۇڭگوعا كەلىپ ەكسكۋرسيادا، ساپاردا بولىپ، مەجەلى نىسانا 2 جارىم جىل بۇرىن ورىندالدى. بارىس - كەلىس، اۋىس - كۇيىس بارىسىندا جۇڭگو، ا ق ش ەكى ەلدىڭ جاستارى مەن ورەندەرى قوس باعىتتا اتتانىپ، ءوزارا ءتۇسىنىسۋدى جانە ۇعىنۋدى تەرەڭدەتىپ، تەرەڭ دوستىق ورناتىپ، ەكى ەل حالقىنىڭ دوستىق اۋىس - كۇيىسىنىڭ شىت جاڭا تاراۋىن جازدى.

شي جينپيڭ بىلاي دەپ اتاپ كورسەتتى: جاستار مەن ورەندەر ەڭ جالىندى، ەڭ ارمانشىل، جۇڭگو - ا ق ش قاتىناسىنىڭ بولاشاعى جانە ءۇمىتى، سونداي - اق دۇنيە ءجۇزىنىڭ بولاشاعى جانە ءۇمىتى.

ءتىپتى دە كوپ جۇڭگو - ا ق ش جاستارى مەن ورەندەرىنىڭ ەكى ەلدىڭ دوستىق ىستەرىنىڭ اماناتىن ارقالاپ، ءوزارا ۇيرەنىپ، بىرگە العا باسىپ، تىنىق مۇحيتتى ەندەي وتكەن ”دوستىق ەلشىسىنە“ اينالىپ، جۇڭگو - ا ق ش قاتىناسىنىڭ ورنىقتى، اقاۋسىز، باياندى دامۋىنا تىڭ ۇلەس قوسۋىن ءۇمىت ەتەمىن.

تاياۋدا ”بىرگە شارىقتاۋ: جۇڭگو - ا ق ش جاستارىنىڭ دوستىق ساپارى“ قيمىلىنا قاتىناسقان جۇڭگو، ا ق ش ەكى ەل وقۋشىلارى ءتوراعا شي جينپيڭگە حات جولداپ، ”5 جىلدا 50 مىڭ“ باستاماسىنىڭ ەكى ەل جاستارى مەن ورەندەرىنىڭ ۇيرەنۋىنە، اۋىس - كۇيىس جاساۋىنا قاستەرلى وراي ازىرلەگەندىگىنە العىس ايتقان بولاتىن.

كەلۋ قاينارى: حالىق تورابى