شي جينپيڭ اۆستريانىڭ زۇڭتۇڭى ۆان دەر بەللەنمەن جۇڭگو مەن اۆستريانىڭ ديپلوماتيالىق قاتىناس ورناتقاندىعىنىڭ 55 جىلدىعى بايلانىسىمەن ءوزارا قۇتتىقتاۋ تەلەگرامماسىن جولدادى

شينحۋا اگەنتتىگى، 5 - ايدىڭ 28 - كۇنى، بەيجيڭ. 5 - ايدىڭ 28 - كۇنى مەملەكەت ءتوراعاسى شي جينپيڭ اۆستريانىڭ زۇڭتۇڭى ۆان دەر بەللەنمەن ءوزارا قۇتتىقتاۋ تەلەگرامماسىن جولداپ، ەكى ەلدىڭ ديپلوماتيالىق قاتىناس ورناتقاندىعىنىڭ 55 جىلدىعىن قۇتتىقتادى.

شي جينپيڭ بىلاي دەپ اتاپ كورسەتتى: ديپلوماتيالىق قاتىناس ورناتقان 55 جىلدان بەرى جۇڭگو - اۆستريا قاتىناسى بوران - شاشىندى باستان كەشىرىپ، اقاۋسىز، ورنىقتى دامۋدى ساقتادى. 2018 - جىلى مەن ۆان دەر بەللەن زۇڭتۇڭمەن بىرگە جۇڭگو مەن اۆستريانىڭ دوستىق ستراتەگيالىق سەرىكتەستىك قاتىناسىنىڭ جاڭا ورنىن تۇراقتاندىرىپ، ەكى جاقتى قاتىناس دامۋىنىڭ جاڭا كەزەڭىن باستادىق. بىلتىر 5 - ايدا جاڭا ءبىر جۇپ ”مىسىق ايۋ ەلشىسى“ ۆەنادا بوي كورسەتىپ، ەكى ەل حالقىنىڭ دوستىق سۇيىسپەنشىلىگىن ونان ارى تەرەڭدەتتى. قازىر حالىقارالىق جاعدايدا وزگەرىس پەن بىلىقپالىق قاباتتاسىپ وتىر، جۇڭگو مەن اۆستريا دۇنيە ءجۇزى بەيبىتشىلىگىنىڭ جەبەۋشىسى، كوپ جاقتىلىقتىڭ قولداۋشىسى، ەركىن ساۋدانىڭ قورعاۋشىسى رەتىندە ءوزارا قۇرمەت ەتۋگە، ءوزارا سەنىم ارتۋعا، اشىق، سيىسىمدى بولۋعا، سەلبەسىپ تەڭ يگىلىككە كەنەلۋگە ءتىپتى دە بىرگە تاباندى بولۋى كەرەك. مەن جۇڭگو - اۆستريا قاتىناسىنىڭ دامۋىنا ايرىقشا ءمان بەرەمىن، ۆان دەر بەللەن زۇڭتۇڭمەن بىرگە قۇلشىنىپ، ديپلوماتيالىق قاتىناس ورناتۋدىڭ 55 جىلدىعىن قۇتتىقتاۋدى وراي ەتىپ، جۇڭگو - اۆستريا قاتىناسىنىڭ تىڭ ساتىعا كوتەرىلۋىن ىلگەرىلەتىپ، دۇنيە ءجۇزىنىڭ بەيبىتشىلىگى مەن دامۋىنا اناعۇرلىم زور ۇلەس قوسۋدى قالايمىن.

ۆان دەر بەللەن مىنالاردى ءبىلدىردى: 2018 - جىلى جۇڭگودا مەملەكەتتىك ساپاردا بولىپ، ءتوراعا مىرزامەن بىرگە ەكى ەل قاتىناسىن دوستىق ستراتەگيالىق سەرىكتەستىك قاتىناس دەڭگەيىنە كوتەردىك، بۇل ەكى جاقتى قاتىناس جونىنەن كەلەلى بەلەستىك مانگە يە. وتكەن 55 جىلدا اۆستريا مەن جۇڭگونىڭ سەلبەستىگى ۇزدىكسىز تەرەڭدەپ، گۋمانيتارلىق، وقۋ - اعارتۋ، عىلمي زەرتتەۋ، مادەنيەت، ەكونوميكا سياقتى سالالارداعى بارىس - كەلىسى جيىلەپ، ەكى جاقتى دوستىق نەگىزى ۇزدىكسىز بەكەمدەلدى. قازىر حالىقارالىق جاعداي اۋمالى - توكپەلى بولىپ وتىر، اۆستريا مەن جۇڭگونىڭ كەڭ كولەمدى بايلانىستى ساقتاۋى، ورنىقتىلىقتى بىرگە قورعاۋى، ءتۇسىنىسۋدى كۇشەيتۋى ەرەكشە ماڭىزدى. ەكى جاقتىڭ بىرگە قۇلشىنىپ، ەكى جاقتى قاتىناستىڭ ۇزدىكسىز ىشكەرىلەي دامۋىن، ساپاسىن جوعارىلاتىپ، دارەجەسىن جوعارىلاتۋىن ءۇمىت ەتەمىن.

كەلۋ قاينارى: حالىق تورابى