ەلىمىز جالپى بەتتىك تاسقىن مەزگىلىنە ءوتتى

شينحۋا اگەنتتىگىنىڭ ءتىلشىسى ۋەي حۇڭ – ي 6 - ايدىڭ 1 – كۇنى بەيجيڭنەن حابارلايدى. ءتىلشىنىڭ سۋ ىستەرى مينيسترلىگىنەن ۇعىسۋىنشا، ەلىمىز 6 - ايدىڭ 1 - كۇنىنەن باستاپ جالپى بەتتىك تاسقىن مەزگىلىنە وتكەن، وڭتۇستىكتەگى رايوندار نەگىزگى تاسقىن مەزگىلىنە وتكەن.

بولجاماعا نەگىزدەلگەندە، 6 - ايدا، شىعىس – سولتۇستىك جۇڭگونىڭ سولتۇستىك بولىگى، چاڭجياڭنىڭ وڭتۇستىگىندەگى وڭىرلەردىڭ شىعىس بولىگى، وڭتۇستىك جۇڭگو، باتىس – وڭتۇستىك جۇڭگونىڭ شىعىس – وڭتۇستىك بولىگى قاتارلى جەرلەردە جاۋىن – شاشىن بۇرىنعىدان %10 - %20 كوپ بولادى؛ سولتۇستىك جۇڭگونىڭ وڭتۇستىك بولىگى، باتىس - سولتۇستىك جۇڭگونىڭ سولتۇستىك بولىگى جانە ورتا – شىعىس بولىگى، حۋاڭحى – حۋايحى الابى، چاڭجياڭ – حۋايحى الابىنىڭ كوپ ءبولىمى قاتارلى جەرلەردە جاۋىن - شاشىن بۇرىنعىدان %10 - %20 از بولادى؛ قالعان جەرلەردە جاۋىن - شاشىن ادەتتەگى جىلدارداعىمەن ۇقساس بولادى. چاڭجياڭ وزەنىنىڭ ورتا اعارىنداعى دۇڭتيڭحۋ، پوياڭحۋ سۋ جۇيەسىندەگى ءىشىنارا نەگىزگى وزەندەر، جۋجياڭ وزەنى الابىنداعى شيجياڭ، حانجياڭ، جىجياڭداعى چيانتاڭجياڭ جانە فۋجيانداعى مينجياڭ قاتارلى وزەندەردە ساقتىق دەڭگەيىنەن اساتىن تاسقىن تۋىلۋى مۇمكىن.

جالپى بەتتىك تاسقىن مەزگىلىنە وتكەندىكتەن، ەلىمىزدە تاسقىن اپاتى تۋىلۋ حاۋىپ - قاتەرى اناعۇرلىم ارتتى، تاسقىننان ساقتانۋ جاعدايى اۋىر جانە كۇردەلى. ءتىلشىنىڭ ۇعىسۋىنشا، سۋ ىستەر مينيسترلىگى ”ادامداردىڭ ءولىم – ءجىتىمى جانە جارالانۋى سىندى جاعدايدى بولعىزباۋ، سۋ قويماسى بوگەتىنىڭ بۇزىلماۋى، ماڭىزدى بوگەتتەردى سۋدىڭ ورىپ كەتپەۋى، ماڭىزدى نەگىزدىك قۇرىلعىلاردىڭ بۇلىنبەۋى“ جانە ”قالا – اۋىلداردا سۋمەن قامداۋ حاۋىپسىزدىگىنە كەپىلدىك ەتۋ، سۋارمالى اۋماقتارداعى ەگىس داقىلدارىن سۋارۋ مەزگىلىندە سۋمەن قامداۋعا كەپىلدىك ەتۋ، كولەمدى باعىمشىلىق الاڭدارى جانە ءىرى مال شارۋاشىلىق الاڭدارىن سۋمەن قامداۋ حاۋىپسىزدىگىنە كەپىلدىك ەتۋ“ نىساناسىن كوزدەپ، نەگىزگى تاسقىن مەزگىلىندەگى جۇمىس ىستەۋ كۇيىنە دەرەۋ ءوتىپ، ءتۇرلى ساقتانۋ شارالارىن مۇقيات، ەگجەي – تەگجەيلى تياناقتاندىردى.

كەلۋ قاينارى: حالىق تورابى