30 ميلليون يۋان ارناۋلى سيلىق قاراجات جانە قوسىمشا قاراجات ورنالاستىرىلدى! شينجياڭدا ءۇي ساتىپ الۋعا قاتىستى كوپتەگەن ءتيىمدى شارالار اتقارىلدى 

6 - ايدىڭ 15 - كۇنى، ءتىلشىنىڭ اۆتونوميالى رايوندىق حالىق ۇكىمەتى اقپارات كەڭسەسى «ەكونوميكانىڭ ورنىقتىلىق بارىسىندا جاقسارۋىن ىلگەرىلەتۋگە قاتىستى ءبىرقىدىرۋ شارالار» جونىندە تۇسىنىك بەرۋ تۋرالى وتكىزگەن اقپارات جاريالاۋ ماجىلىسىنەن ۇعىسۋىنشا، جۋىردا اۆتونوميالى رايون 30 ميلليون يۋان ارناۋلى سيلىق قاراجات پەن قوسىمشا قاراجاتتى ءبىرتۇتاس ورنالاستىرىپ، «جەرگىلىكتى ورىننىڭ قوسىمشا قاراجاتى + اۆتونوميالى رايوننىڭ سيلىق قاراجاتى + كاسىپورىنداردىڭ تيىمدىلىك جاساۋى» سىندى ساياساتتى ۇشتاستىرۋ ۇلگىسىن قولدانىپ، بۇكىل اۆتونوميالى رايونداعى تۇرعىن ۇيگە قاتىستى تۇتىنۋدى اناعۇرلىم جەبەيدى.

اۆتونوميالى رايوندىق تۇرعىن ءۇي جانە قالا - اۋىل قۇرىلىسى مەڭگەرمەسى پارتگرۋپپاسىنىڭ مۇشەسى، ورىنباسار مەڭگەرۋشى ۋاڭ سى بىلاي دەپ تانىستىردى: اۆتونوميالى رايون جەر - جەردى ءۇي ساتىپ الۋشىلارعا قوسىمشا قاراجات بەرۋ، تۇتىنۋ بەلەتىن تاراتۋ قاتارلى تاسىلدەر ارقىلى ءۇي ساتىپ الۋ قيمىلىنا بايلانىستى قاراجات بەرۋگە شابىتتاندىرادى ءارى جەر - جەردىڭ قاراجات ءبولۋ جاعدايىنا نەگىزدەلىپ، جەر - جەرگە ارناۋلى سيلىق قاراجات جانە قوسىمشا قاراجات بەرەدى، سونداي - اق قورا – جاي سالاسىنداعى كاسىپورىنداردى ارزانداتىپ ساتۋ، اۆتوموبيل تۇراعىن تارتۋ ەتۋ، ءۇي جيھازدارىن سيلاۋ قاتارلى تاسىلدەر ارقىلى تيىمدىلىك جاساۋعا جەتەلەپ، جۇرتشىلىققا ءتيىمدى شارالاردى ساتى سايىن تياناقتاندىرىپ، ءۇي ساتىپ العانداردىڭ تيىمدىلىكتەن تىكەلەي يگىلىكتەنۋىنە كەپىلدىك ەتەدى. مۇنان سىرت، تاراۋلار ارا سەلبەستىكتى كۇشەيتىپ، تۇرعىن ءۇي ساتۋدى جەبەۋ جانە ءۇي جيھازدارىنىڭ كونەسىن جاڭاسىنا الماستىرۋ قيمىلىن ۇدايى ورىستەتىپ، جۇرتشىلىقتىڭ ءۇي ساتىپ الۋ وزىندىك قۇنىن اناعۇرلىم تومەندەتەدى.

كەلۋ قاينارى: حالىق تورابى