وقۋ - اعارتۋ مينيسترلىگى ساقتىق دابىلىن قاقتى: ”قارالىق ىستەدىڭىز“ دەگەن مازمۇنداعى ينفورماتسيا تاپسىرىپ الساڭىز، جالعانىمدى، استە، اشپاڭىز

جۇڭگو اقپارات تورابىنىڭ 6 - ايدىڭ 23 - كۇنى حابارلاۋىنشا، وقۋ – اعارتۋ مينيسترلىگى اقپارات كەڭسەسىنىڭ ۋيشين تەكشەسى حابارلايدى: 2026 - جىلعى جوعارى مەكتەپ ەمتيحانى اياقتالدى، ناتيجەنى تەكسەرۋ، تالاپ كەستەسىن تولتىرۋ، مەكتەپكە قابىلداۋ قاتارلى باسقىشتار ەمتيحان تاپسىرۋشىلار مەن اتا - انالار نازار اۋداراتىن تۇيىنگە اينالدى، ءبىر ءبولىم قۇرىلىمدار نەمەسە جەكەلەر ەكونوميكالىق جاقتان پايداعا كەنەلۋ ءۇشىن وسى ماڭىزدى مەزگىلدى نىسانا ەتىپ، ءتۇرلى جەلەۋلەر ارقىلى الدامكوستىك ىستەيدى. كوپشىلىككە جالعان ينفورماتسياعا سەنبەۋدى، الدانىپ قالۋدان ساقتانۋدى ەسكەرتەمىز.

دەلو مىسالى

2025 - جىلعى جوعارى مەكتەپ ەمتيحانىنىڭ ناتيجەسى شىعار الدىندا، شياۋ لي ”ولكەلىك وقۋ - اعارتۋ ەمتيحانى مەكەمەسىنىڭ“ اتىن جامىلعان الدامشىلىق مازمۇنىنداعى كەلتە حاتتى تاپسىرىپ العان، مازمۇنى مىناداي: ” AI باقىلاۋ جۇيەسى ارقىلى تەكسەرۋگە قاراعاندا، ءسىز 2025 - جىلعى جوعارى مەكتەپ ەمتيحانىندا قارالىق ىستەگەنسىز، قاتىستى بەلگىلەمەلەرگە ساي، ەمتيحان ناتيجەڭىز كۇشىنەن قالدىرىلادى“. كەلتە حاتتىڭ سوڭىنا ”ارىز - شاعىم ايتۋ جالعانىمى“ قوسىلعان. شياۋ لي جالعانىمدى باسىپ، جالعانىمداعى توراپقا كىرىپ، ەسكەرتۋ بويىنشا ازاماتتىق كۋالىك ءنومىرى، ەمتيحانعا قاتىناسۋ كۋالىگىنىڭ ءنومىرى جانە بانكە كارتۋچكاسىنىڭ ءنومىرى قاتارلى ينفورماتسيالاردى ەنگىزىپ، ”ارىز – شاعىمدى كۋالاندىرۋ“ باسقىشىن ورىنداعان. سالدەن كەيىن، شياۋ لي بانكەدەن كەلگەن ”كارتۋچكاداعى قالدىق سوما اقشا تولەۋگە جەتكىلىكسىز، تولەۋ ءساتسىز بولدى“ دەگەن مازمۇنداعى كەلتە حاتتى الىپ، الدامكوستىككە ۇشىراعان بولۋى مۇمكىن ەكەنىن سەزىپ، دەرەۋ ساقشىعا مالىمدەگەن.

ەسكەرتۋ

ەمتيحان تاپسىرۋشىلار مەن اتا - انالار مىناعان نازار اۋدارۋى كەرەك: جوعارى مەكتەپ ەمتيحانىنا قاتىستى ماڭىزدى ۇقتىرۋلاردىڭ بارلىعى ورتا مەكتەپ، ولكەلىك وقۋ - اعارتۋ ەمتيحانى مەكەمەسى، جوعارى مەكتەپتىڭ رەسمي تورابى قاتارلى تۇراقتى ارنالار ارقىلى جاريالانادى، كەلتە حات جانە ۋيشين ارقىلى جەكە - جەكە ۇقتىرىلمايدى. ەمتيحان تاپسىرۋشىلار مەن اتا - انالار كۇماندى ينفورماتسيانى تاپسىرىپ السا، وقۋ - اعارتۋ تاراۋلارى جاريالاعان رەسمي تەلەفون ارقىلى دەرەۋ انىقتاۋى كەرەك.

كەلۋ قاينارى: حالىق تورابى