تاسقىننان ساقتانۋ، قۋاڭشىلىققا قارسى اتتانۋ قىزمەتىن اقىلداسىپ ورنالاستىردى

شينحۋا اگەنتتىگى، 6 - ايدىڭ 30 - كۇنى، بەيجيڭ. جۇڭگو كوممۋنيستىك پارتياسى ورتالىق كوميتەتىنىڭ ساياسي بيۋروسى 6 - ايدىڭ 30 - كۇنى ءماجىلىس اشىپ، تاسقىننان ساقتانۋ، قۋاڭشىلىققا قارسى اتتانۋ قىزمەتىن اقىلداسىپ ورنالاستىردى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ ءماجىلىستى باسقاردى.

ءماجىلىس مىنالاردى اتاپ كورسەتتى: بيىل نەگىزگى تاسقىن مەزگىلىندە ەلىمىزدە ءتيىمسىز اۋا رايى ىستەرى ءالى دە ءبىرشاما كوپ بولادى، قۋاڭشىلىق پەن سۋ اپاتى قاتار كەلەدى، جەر - جەر، قاتىستى تاراۋلار يدەيالىق تانىمدى ونان ارى جوعارىلاتىپ، تومەنگى شەكتە ويلاۋدى، ەڭ جوعارى شەكتە ويلاۋدى بەرىك ورناتىپ، تاسقىننان ساقتانۋدى، اۋىر قۋاڭشىلىققا قارسى اتتانۋدى، كۇشتى تايفىڭ داۋىلىنان ساقتانۋدى تياناق ەتىپ، پارمەندى شارالار قولدانىپ، تاسقىننان ساقتانۋ، قۋاڭشىلىققا قارسى اتتانۋ، قاتەردەن اراشالاۋ، اپاتتان قۇتقارۋ قىزمەتتەرىن ويداعىداي ىستەۋى كەرەك.

ءماجىلىس مىنالاردى باسا دارىپتەدى: حالىقتىڭ ءومىرىنىڭ حاۋىپسىزدىگىن باستان - اياق ماڭداي الدى ورىنعا قويىپ، باقىلاۋ - ولشەۋدىڭ، الدىن الا مالىمەت بەرۋدىڭ دالدىگىن جوعارىلاتىپ، ادامداردى باسقا جەرگە كوشىرۋگە دەر كەزىندە، باتىل ۇيىمداستىرىپ، توپتىق ءولىم - ءجىتىم تۋىلۋدان قاتاڭ ساقتانۋ كەرەك. ۇلكەن داريا، ۇلكەن وزەن، ۇلكەن كولدەردىڭ تاسقىننان ساقتانۋ حاۋىپسىزدىگىنە شىنايى كەپىلدىك ەتىپ، وزەن، كولدەردىڭ تاسقىن ءجۇرۋ كەڭىستىگىن باسقارۋ - مەڭگەرۋدى جاپپاي كۇشەيتۋ كەرەك.

قۋاڭشىلىق پەن سۋ باسۋدىڭ شۇعىل بۇرىلىسىنا باسا ءمان بەرىپ، تاسقىننان ساقتانىپ، قۋاڭشىلىققا قارسى اتتانۋدى قاتار يگەرۋگە تاباندى بولىپ، سۋ قاينارىن ءبىر تۇتاس باسقارۋدى جانە ورنالاستىرۋدى كۇشەيتۋ كەرەك. كەلەلى نەگىزدىك قۇرىلعىلار مەن سالىنىپ جاتقان ينجەنەريالاردىڭ تاسقىننان امان وتۋىنە كەپىلدىك ەتىپ، كومەسكى قاتەرلەردى ءبىر - بىرلەپ تەكسەرۋدى كۇشەيتىپ، اۋىل شارۋاشىلىق نەگىزدىك قۇرىلعىلارىن قورعاۋدى كۇشەيتۋ كەرەك.

ءماجىلىس مىنالاردى اتاپ كورسەتتى: تەز، جوعارى ءونىمدى قاتەردەن اراشالاپ، اپاتتان قۇتقارىپ، كۇش، جابدىق، زاتتىق ماتەريال دايىندىعىن اناعۇرلىم جاقسى ىستەپ، ءبىر تۇتاس جوسپارلاپ ورنالاستىرۋدى جانە الدىن الا ورنالاستىرۋ مەن ساقتانۋدى كۇشەيتىپ، ەرەكشە جاعدايداعى قۇتقارۋ - كومەكتەسۋ قابىلەتىن جوعارىلاتۋ كەرەك. اپاتتان قۇتقارۋ، كومەكتەسۋ قىزمەتىن دەن قويا، سۇيىسپەنشىلىكپەن جاقسى ىستەپ، اپاتقا ۇشىراعان بۇقارانىڭ نەگىزگى تۇرمىسىن شىنايى قامتاماسىز ەتۋ كەرەك. بايلىقتى نەگىزگى ساتىعا بەيىمدەۋگە، كۇش - قۋاتتى ءبىرىنشى شەپكە تۇسىرۋگە تاباندى بولىپ، نەگىزگى ساتىنىڭ تاسقىننان ساقتانۋ، اپات زيانىن ازايتۋ، اپاتتان قۇتقارۋ قابىلەتىن كۇش سالا جوعارىلاتۋ كەرەك.

ءماجىلىس مىنالاردى تالاپ ەتتى: ءار دارەجەلى پارتكومدار مەن ۇكىمەتتەر پارتيا ورتالىق كوميتەتىنىڭ شەشىمدەرىن، ورنالاستىرۋلارىن مۇقيات دايەكتىلەندىرىپ، تياناقتاندىرىپ، تاسقىننان ساقتانۋ، قۋاڭشىلىققا قارسى اتتانۋ جاۋاپكەرشىلىك ءتۇزىمىن قاتاڭ تياناقتاندىرۋى كەرەك. مەملەكەتتىك تاسقىننان ساقتانىپ، قۋاڭشىلىققا قارسى اتتانۋ باس قولباسشىلىق شتابى ءبىر تۇتاس جوسپارلاپ سايكەستىرۋدى جانە قولباسشىلىق ەتۋدى، سەپتەۋدى كۇشەيتۋى، قاتىستى تاراۋلار مىندەت اتقارىپ، جاۋاپكەرشىلىكتى ادا ەتۋى كەرەك. ءار دارەجەلى باسشى كادرلار دۇرىس ساياسي ناتيجە كوزقاراسىن بەرىك ورناتىپ جانە امالياتتا ايگىلەپ، كەزەكشىلىكتى كۇشەيتىپ، الدىڭعى شەپتە تۇرىپ قولباسشىلىق ەتىپ، بۇقارانى اپاتتان ساقتانۋ، اپات زيانىن ازايتۋ، اپاتتان قۇتقارۋ قىزمەتتەرىن بار كۇشپەن ويداعىداي ىستەۋگە ۇيىمداستىرۋى، جۇمىلدىرۋى كەرەك. نەگىزگى ساتى پارتيا ۇيىمدارى مەن قالىڭ پارتيالى كادرلار جاۋىنگەر قامالدىق رولى مەن وزىق ۇلگىلىك رولىن تولىق ساۋلەلەندىرىپ، تاسقىننان ساقتانىپ، قۋاڭشىلىققا قارسى اتتانۋدىڭ، قاتەردەن اراشالاپ، اپاتتان قۇتقارۋدىڭ ءبىرىنشى شەبىندە باتىلدىقپەن اۋىر مىندەت ارقالاپ، اتويلاپ الدا ءجۇرىپ، حالىق بۇقاراسىنىڭ ءومىرى مەن مال - مۇلكىنىڭ حاۋىپسىزدىگىن جانە قوعامدىق جالپى جاعدايدىڭ ورنىقتىلىعىن پارمەندى قورعاۋى كەرەك.

ءماجىلىس باسقا ىستەردى دە اقىلداستى.