8 - ايدا 2 - 3 رەتكى تايفىڭ داۋىلى ەلىمىزدە قۇرلىققا ءىلىنۋى نەمەسە ەلىمىزگە كورنەكتى ىقپال جاساۋى مۇمكىن 

مەملەكەتتىك اپاتتان ساقتانۋ، اپاتتىڭ زاردابىن جەڭىلدەتۋ، اپاتتان قۇتقارۋ كوميتەتى حيلۇڭجياڭدا مەملەكەتتىك 4 - دارەجەلى اپاتتان قۇتقارۋ جانە شۇعىل جاعدايعا توتەپ بەرۋ شاراسىن ىسكە قوستى

حالىق گازەتىنىڭ ءتىلشىسى جياڭ شۇەحۇڭ 8 – ايدىڭ 4 – كۇنى بەيجيڭنەن حابارلايدى. ءتىلشىنىڭ 8 – ايدىڭ 4 – كۇنى جۇڭگو اۋا رايى مەڭگەرمەسى وتكىزگەن اقپار جاريالاۋ ماجىلىسىنەن ۇعىسۋىنشا، 8 – ايدا 2 - 3 رەتكى تايفىڭ داۋىلىنىڭ ەلىمىزدە قۇرلىققا ءىلىنۋىنىڭ نەمەسە ەلىمىزگە كورنەكتى ىقپال جاساۋىنىڭ ىقتيمالدىعى بار، بۇل بۇرىنعى جىلدارداعى وسى مەزگىلدەگى مولشەرگە جۋىق بولادى، داۋىل قۋاتى جالپى جاقتان ءبىرشاما كۇشتى بولادى، ءبىرشاما كۇشتى تايفىڭ داۋىلىنىڭ سولتۇستىككە قاراي ويىسىپ، ەلىمىزدىڭ سولتۇستىك وڭىرلەرىنە ىقپال جاساۋ حاۋپى بار. 8 – ايدىڭ 9 – كۇنىنىڭ الدى - ارتىندا، بيىلعى 13 – ءنومىرلى ”اق دولفين“ تايفىڭ داۋىلى چاڭجياڭ ساعاسىنان فۋجياننىڭ سولتۇستىك بولىگىنە دەيىنگى ارالىقتاعى تەڭىز جاعالاۋىنان قۇرلىققا ءىلىنىپ، چاڭجياڭنىڭ وڭتۇستىگىندەگى وڭىرلەردە نوسەر جاۋۋ ىقتيمالدىعى بار؛ داۋىل 8 - ايدىڭ 10 – كۇنىنەن 11 – كۇنىنە دەيىن تەڭىز جاعالاۋىندا باعىتىن قيىس سولتۇستىككە قاراي ويىستىرىپ، چاڭجياڭ ساعاسىنان شاندۇڭ تۇبەگىندەگى تەڭىز جاعالاۋىنا دەيىنگى وڭىرلەردە قۇرلىققا ءىلىنۋى نەمەسە جاناسا ءوتۋى، شاڭحاي، جياڭسۋ، انحۇي، شاندۇڭ، لياۋنيڭ قاتارلى جەرلەرگە ىقپال جاساۋى دا مۇمكىن.

حالىق گازەتىنىڭ ءتىلشىسى دىڭ جيانياڭ 8 – ايدىڭ 4 – كۇنى بەيجيڭنەن حابارلايدى. ءتىلشىنىڭ سۋ يگىلىگى مينيسترلىگىنەن ۇعىسۋىنشا، سۋ يگىلىگى مينيسترلىگى مەن جۇڭگو اۋا رايى مەڭگەرمەسى 8 – ايدىڭ 4 – كۇنى ساعات 18 دە تاسقىن اپاتى جونىندەگى قىزعىلت سارى ءتۇستى اۋا رايىندىق ساقتىق دابىلىن بىرگە جاريالاعان.

8 - ايدىڭ 4 – كۇنى 24 ساعات ىشىندەگى جاۋىن – شاشىن جونىندەگى بولجامعا نەگىزدەلە وتىرىپ، سۋ يگىلىگى مينيسترلىگى سانشي، حيلۇڭجياڭ، حىنان، حۋبەي، حۋنان، گۋاڭدۇڭ، گۋاڭشي، حاينان، چۇڭچيڭ، سىچۋان، گۇيجوۋ، يۇننان، شانشي، شينجياڭ قاتارلى 14 ولكەگە (اۆتونوميالى رايون) ”ءار ولكەگە ارنايى جولداۋ“ بويىنشا باعىتتامالى تۇردە ساقتىق دابىلىن قاعىپ، قالىڭ جاڭبىر جاۋاتىن رايونداردىڭ كولەمى، سۋ قويمالارىنىڭ تىزىمدىگى، تاسقىن اپاتى تۋىلۋ حاۋپى بار رايوندار مەن تۇيىندەر جونىندە حابارلاندىرۋ جولداپ، تاسقىن مەزگىلىن حاۋىپسىز وتكىزۋ جانە اپاتتان ساقتانۋ قاتارلى قىزمەتتەردى ويداعىداي ىستەۋدى ەسكەرتكەن.

8 - ايدىڭ 4 – كۇنى، حيلۇڭجياڭدا 2026 – جىلعى 1 – ءنومىرلى تاسقىن تۋىلدى، حيلۇڭجياڭ ولكەسىندەگى حۋلان وزەنىندە 2026 – جىلعى 1 – ءنومىرلى تاسقىن تۋىلدى.

حالىق گازەتىنىڭ ءتىلشىسى ليۋ ۋىنپيڭ 8 – ايدىڭ 4 – كۇنى بەيجيڭنەن حابارلايدى. 8 – ايدىڭ 4 – كۇنى، مەملەكەتتىك اپاتتان ساقتانۋ، اپاتتىڭ زاردابىن جەڭىلدەتۋ، اپاتتان قۇتقارۋ كوميتەتى حيلۇڭجياڭ ولكەسىندەگى جۋىرداعى اۋىر تاسقىن اپاتىنا باعىتتاي وتىرىپ، مەملەكەتتىك 4 - دارەجەلى شۇعىل جاعدايعا توتەپ بەرۋ شارالارىن ىسكە قوستى، شۇعىل جاعدايلارعا توتەپ بەرۋدى باسقارۋ مينيسترلىگى اپاتتان قۇتقارۋ قىزمەتىنە جاۋاپتى گرۋپپانى اپات تۋىلعان وڭىردەگى ءبىرىنشى شەپكە جىبەرىپ، اپاتتىڭ ناقتى جاعدايىن تەكسەردى. 8 – ايدىڭ 4 – كۇنى، مەملەكەتتىك تاسقىننان ساقتانىپ، قۋاڭشىلىقپەن كۇرەسۋ باس قولباسشىلىق شتابىنىڭ كەڭسەسى مەن شۇعىل جاعدايلارعا توتەپ بەرۋدى باسقارۋ مينيسترلىگى كوپتەگەن تاراۋلاردى ۇيىمداستىرىپ، ۇزدىكسىز بىرلەسىپ كەڭەس وتكىزىپ، ءتۇيىندى وڭىرلەردەگى تاسقىننان ساقتانۋ قىزمەتى جونىندە ورنالاستىرۋ جاسادى.

كەلۋ قاينارى: حالىق تورابى