ۇشقىشسىز ۇشاقپەن تەكسەرۋ بارىسىندا 500 تۇپتەن استام جابايى ماريحۋانا وسىمدىگى بايقالدى

جۋىردا، يۇننان ولكەسى لينساڭ شەكارانى باسقارۋ بولىمشە اترەتى نۋلياڭ شەكارالىق باسقارماسى ۇشقىشسىز ۇشاق ارقىلى جۇڭگو - بيرما شەكاراسىنداعى ءبىرىنشى شەپتە تەكسەرۋ جۇرگىزگەن كەزدە، 500 تۇپتەي جابايى ماريحۋانا وسىمدىگىن ءساتتى بايقايدى.

وسى رەتكى ارەكەتتە تۇڭعىش رەت ۇشقىشسىز ۇشاقتى پايدالانىپ، بۇرىن ادام كۇشىمەن شارلاۋ قيىن بولعان تاۋلى ورمان مەن شاتقالدار اۋماعىنا اۋەدەن تەكسەرۋ جۇرگىزىلدى، وسى بارىستا شوعىرلى وسكەن 500 ءتۇپ شاماسىنداعى جابايى ماريحۋانا وسىمدىگى ءساتتى بايقالعان.

دەرەك بايقالعان سوڭ، اتالعان شەكارالىق باسقارما دەرەۋ حالىق ساقشىلارى مەن شەكارا قورعاۋشىلاردى اسپاپتارمەن قارۋلاندىرىپ سول جەرگە اتتاندىرىپ، اۋماقتاعى جابايى ماريحۋانا وسىمدىگىن ءبىر ءتۇبىن قالدىرماي ساناپ، تۇگەل وتادى ءارى شوعىرلى تۇردە زالالسىزداندىرىپ جويدى، سونىمەن بىرگە ماڭايداعى اۋماقتا ەكىنشى رەت تور جايۋ فورماسىندا تەكسەرۋ جۇرگىزىپ، بايقالماي قالىپ قويماۋىنا كەپىلدىك ەتتى.

ماريحۋاناعا ۇقسايتىن وسىمدىك بايقالسا، بىلاي ىستەگەن دۇرىس:

· ۇستاماۋ، جۇلماۋ، ءوز بەتىمەن وتاماۋ، وسىمدىككە تىكەلەي جاناسپاۋ؛

· ءوز اماندىعىنا كەپىلدىك ەتكەن العى شارتتا، وسى وسىمدىك پەن ول وسكەن ورىندى سۋرەتكە ءتۇسىرىپ ساقتاپ قالۋ؛

· بايقالسا دەرەۋ 110 نومىرىنە تەلەفون سوعىپ ساقشىعا مالىمدەپ، قوعام حاۋىپسىزدىگى ورگاندارىنا ناقتى ورنىن ايتىپ، كاسىپتىك قىزمەتكەرلەردىڭ ناق مايدانعا كەلىپ ءبىرجايلى ەتۋىنە تاپسىرۋ.

ەسىرتكىگە تيىم سالۋ جانە ەسىرتكى جاسالاتىن وسىمدىكتى الاستاۋدا ءاربىر ادامنىڭ جاۋاپكەرشىلىگى بار.

بارشا جۇرتشىلىقتىڭ ەگەر زاڭسىز ەگىلگەن، جابايى وسكەن ماريحۋانا وسىمدىگى قاتارلى ەسىرتكى قاينارىنا قاتىستى دەرەكتى بايقاسا، بەلسەندى تۇردە مالىمدەۋىن ءۇمىت ەتەمىز.

كەلۋ قاينارى: حالىق تورابى