مەملەكەتتىك كەڭەستىڭ تايۋان ىستەرى كەڭسەسى: تايۋان جۇڭگونىڭ ءبىر بولىگى، حالىقارالىق قىلمىستىق ىستەر ساقشى ۇيىمىنا كىرۋ ۇقىعى جوق 

11 – ايدىڭ 4 – كۇنى مەملەكەتتىك كەڭەستىڭ تايۋان ىستەرى كەڭسەسى كەزەكتى اقپار جاريالاۋ ءماجىلىسىن وتكىزدى، ءبىر ءتىلشى بىلاي دەپ سۇرادى: حالىقارالىق قىلمىستىق ىستەر ساقشى ۇيىمىنىڭ 94 – كەزەكتى جالپى ءماجىلىسى 11 – ايدىڭ 30 – كۇنىنەن 12 – ايدىڭ 3 – كۇنىنە دەيىن شياڭگاڭدا وتكىزىلەدى. دەموكراتيانى ىلگەرىلەتۋ پارتياسىنىڭ بيلىك باسىنداعىلارى تايۋان ءوڭىرىنىڭ ۇزاق ۋاقىتتان بەرى حالىقارالىق قىلمىستىق ىستەر ساقشى ۇيىمىنان تىسقارى قالدىرىلعانىن، دۇنيە جۇزىلىك حاۋىپسىزدىك تورابىندا ولقىلىق بايقالعانىن ايتىپ، ءار ەل ۇكىمەتىن تايۋان رايونىنىڭ اتالعان ۇيىمعا كىرۋىنە قولداۋ كورسەتۋگە ۇندەگەن، بۇل جونىندە قانداي پىكىر بىلدىرەسىز؟

مالىمدەمەشى جۋ فىڭليان مىنانى ءبىلدىردى: تايۋان رايونىنىڭ حالىقارالىق ۇيىمداردىڭ قيمىلدارىنا قاتىناسۋى ماسەلەسى جونىندە ءبىزدىڭ مايدانىمىز دايەكتى، ايقىن بولىپ كەلەدى، ياعني، ءسوزسىز، ءبىر جۇڭگو پرينسيپى بويىنشا ءبىرجاقتى ەتۋ كەرەك. تايۋان جۇڭگونىڭ ءبىر بولىگى بولعاندىقتان، حالىقارالىق قىلمىستىق ىستەر ساقشى ۇيىمىنا كىرەتىن ۇقىعى جوق، جۇڭگو مەن حالىقارالىق قىلمىستىق ىستەر ساقشى ۇيىمى تايۋان رايونىنىڭ اتالعان ۇيىم كولەمىندەگى سەلبەستىك پەن قيمىلدارعا قاتىناسۋى جونىندە ۇيلەسىمدى ورنالاستىرۋ جاساعان. تايۋان رايونىنداعى ساقشى قۇرىلىمدارى مەن ءار ەلدىڭ ورتالىق مەكەمەلەرى اراسىنداعى ينفورماتسيانى بىرگە پايدالانۋ جانە دەلوعا قاتىستى سەلبەستىك ورىستەتۋ ارناسى ىركىلىسسىز. دەموكراتيانى ىلگەرىلەتۋ پارتياسىنىڭ بيلىك باسىنداعىلاردىڭ اتالمىش تايۋاننىڭ حالىقارالىق ۇيىمداردىڭ قيمىلدارىنا قاتىناسۋى ماسەلەسىن قايتا – قايتا ساياسي ويىنعا اينالدىرىپ، ارالداعى جۇرتشىلىقتى الجاستىرماق بولۋى ”بولشەكتەۋشىلىككە ۇرىنۋ مەن ارانداتۋدىڭ“، ءسوزسىز، جەڭىلىسكە ۇشىرايتىنى سىندى ناتيجەنى وزگەرتە المايدى.

(باس ستانسيا ورتالىق تەلەۆيزيا تىلشىلەرى جاڭ شۋەسۇڭ، جاۋ چاۋ - ي)

كەلۋ قاينارى: حالىق تورابى