”تەمىر جول + ساياحات“ شينجياڭنىڭ كوركەم كورىنىستەرىن جىپكە تىزگەن مارجانداي جالعاستىردى
□ انار بۇلت \ شينجياڭ گازەتىنىڭ ءتىلشىسى لۋ فىڭباۋ
2023.03.21 15:33 كەلۋ قاينارى : شينجياڭ گازەتى
3 - ايدىڭ 17 - كۇنى تۇستەن بۇرىن جولاۋشىعا تولعان D9372 رەتكى ”ورىك گۇلى“ اتتى جوعارى جىلدامدىقتى پويەز ءۇرىمجى ۆوگزالىنان تۇرپانعا بەت الدى. بۇل شينجياڭ تەمىر جولى بيىل جۇرگىزگەن العاشقى گۇل تاماشالاۋ ارناۋلى پويەزى بولىپ، بيىلعى كوكتەمدەگى شينجياڭ ەرەكشەلىگىنە يە ساياحات ارناۋلى پويەزىنىڭ شىمىلدىعىن اشتى.
سوڭعى جىلدارى شينجياڭنىڭ تەمىر جول تاراۋلارى تەمىر جول تاسىمال باسىمدىعى مەن شينجياڭنىڭ ساياحات بايلىعىن ۇشتاستىرىپ، ”تەمىر جول + ساياحات“ جاڭا ۇلگىسىن تۇلعالاپ، شينجياڭ ساياحاتىنىڭ دامۋىن جەدەل ىلگەرىلەتتى.
تەمىر جولدار ۇلاسىپ، كوركەم كورىنىستەردى جالعاستىردى
”قىزمەتكەرلەرىمىز بەن زاتتىق ماتەريالدار تياناقتاندىرىلىپ، جۇمىستى جاپپاي قالپىنا كەلتىرۋدىڭ دايىندىعى جاسالىپ بولدى“، - دەدى جۇڭگو تەمىر جولى 1 - مەكەمەسى شينجياڭ قولباسشىلىق شتابىنىڭ باس قولباسشىسى لي جيگاڭ.
اۋا رايىنىڭ جىلىنۋىنا بايلانىستى، لانجوۋ − شينجياڭ تەمىر جولىنىڭ جىڭ − الاتاۋ بولىگىنە 2 - جەلىنى كوبەيتىپ سالۋ ينجەنەرياسى جۇمىستى قالپىنا كەلتىرۋ شارتىن ازىرلەپ بولدى، وسى ينجەنەريانىڭ قۇرىلىسىنا قاتىناسقان ورىنداردىڭ ءبىرى رەتىندە، بيىل جىل باسىنان بەرى، جۇڭگو تەمىر جولى 1 - مەكەمەسى توبى شەكتى سەرىكتەستىگى قىزمەتكەرلەردىڭ جۇمىس الاڭىنا كىرۋى، ماتەريال قورىن جيناۋ، جابدىق اكەلۋ سياقتىلاردى بەلسەنە ۇيىمداستىرىپ، نىسانداردىڭ جۇمىستى قالپىنا كەلتىرىپ سالىنۋىنا بار كۇشپەن دايىندالدى.
بۇل تاياۋ جىلداردان بەرى، شينجياڭ تەمىر جول قۇرىلىسىنىڭ قارقىنىن جەدەل ارتتىرۋىنىڭ جاندى كورىنىسى. تالاي جىلدىق دامۋ ارقىلى شينجياڭنىڭ تەمىر جولى ”ءۇش تاۋدى“ بايلانىستىرىپ، ”ەكى ويپاتتى“ اينالىپ، ايقاسپالى تور قالىپتاستىردى.
2014 - جىلى لانجوۋ − شينجياڭ جوعارى جىلدامدىقتى تەمىر جولى ىسكە قوسىلىپ، شينجياڭدا العاشقى جوعارى جىلدامدىقتى تەمىر جول بار بولدى. 2015 - جىلى لينحى − قۇمىل تەمىر جولىنىڭ ىجينا − قۇمىل بولىگى اشىلىپ ىسكە قوسىلىپ، شينجياڭدا شينجياڭعا كىرىپ - شىعاتىن جاڭا ءبىر تەمىر جول ارناسى كوبەيدى، بۇل شينجياڭ تەمىر جولىنىڭ سولتۇستىك ارناسى. 2020 - جىلى شينجياڭ تەمىر جولىنىڭ وڭتۇستىك ارناسى − گولمۋد − كورلا تەمىر جولى رەسمي اشىلىپ ىسكە قوسىلدى. شينجياڭعا كىرىپ - شىعاتىن 3 ۇلكەن تەمىر جول ارناسى قالىپتاسىپ، لانجوۋ − شينجياڭ تەمىر جولى مەن لانجوۋ − شينجياڭ جوعارى جىلدامدىقتى تەمىر جولىن نەگىزگى ارنا، لينحى − قۇمىل تەمىر جولىن سولتۇستىك ارنا، گولمۋد − كورلا تەمىر جولىن وڭتۇستىك ارنا ەتكەن ”ءبىر نەگىزگى، ەكى قوسىمشا“ قاتىناس جۇلگەسى قالىپتاستى.
2022 - جىلى حوتان − چارقىلىق تەمىر جولى اشىلىپ ىسكە قوسىلدى، وسىلايشا جوڭعار ويپاتىن اينالعان سولتۇستىك شينجياڭ تەمىر جولى اينالما جەلىسى مەن تارىم ويپاتىن اينالعان وڭتۇستىك شينجياڭ تەمىر جولى اينالما جەلىسى تۇگەلدەي رەسمي تۇتاستىرىلىپ، ءبىر وڭتۇستىك، ءبىر سولتۇستىك ەكى تەمىر جول اينالما جەلىسى شينجياڭنىڭ تەمىر جول تورىن ونان ارى جيىلەتتى.
بيىل شينجياڭ تاعى لوپنۇر − چارقىلىق تەمىر جولى، توقسۋ − باي تەمىر جولى سياقتى نىسانداردىڭ قۇرىلىسىن باستاپ، ”شينجياڭ ىشىندە شەڭبەر قالىپتاستىرۋ، شينجياڭعا كىرىپ - شىعۋدى تەزدەتۋ، وڭتۇستىك شينجياڭ مەن سولتۇستىك شينجياڭدى ىركىلىسسىزدەندىرۋ، شەكارادان كىرىپ - شىعۋدى ۇلاستىرۋ“ سىندى جوسپار بىرتىندەپ رەالدىققا اينالۋدا.
”تەمىر جولدار تۇتاسىپ تور قالىپتاستىرىپ، كوركەم كورىنىستەر’مارجانداي ءتىزىلىپ، تىزبەك قالىپتاستىرىپ‘، جولاۋشىلاردىڭ ءجۇرىس - تۇرىسىنا قولايلىلىق جاراتىپ، شينجياڭنىڭ ساياحاتىنىڭ جەدەل دامۋىنىڭ نەگىزىن بەكەمدەدى“، - دەدى جۇڭگو تەمىر جولى ءۇرىمجى مەكەمەسى توبى شەكتى سەرىكتەستىگى جولاۋشى تاسىمال ءبولىمىنىڭ ورىنباسار مەڭگەرۋشىسى سۇڭ چياڭ.
پويەزدەر ”الەۋمەتتىك كولىككە اينالدى“، جولاۋشىلار قالاعان كەزدە ءجۇرىپ كەتەتىن بولدى
”ۇشقىر پويەز ءبىر ساعات 4 مينۋتتا ءپىشانعا جەتىپ قويدى، پويەزدەن تۇسە سالىپ نىسانالى جەرگە بەتتەدىك، ورىك گۇلىن تاماشالاپ بولعان سوڭ، سول كۇنى ۇرىمجىگە قايتىپ كەتتىك، وتە قولايلى بولدى“، - دەدى D9372 كەزەكتى ۇشقىر پويەزدىڭ ۆاگونىندا ۇرىمجىدەن كەلگەن ساياحاتشى چي حۇيشين.
سۇڭ چياڭ بىلاي دەدى: شينجياڭ تەمىر جولى بۇگىنگى تاڭدا لانجوۋ − شينجياڭ جوعارى جىلدامدىقتى تەمىر جولى نەگىزگى ارنا، وڭتۇستىك، سولتۇستىك شينجياڭ تەمىر جولىن قوس قانات ەتكەن شينجياڭنىڭ جىلدام قاتىناس تورىن قالىپتاستىردى. تەمىر جول تورى تۇرپان، ءپىشان، قۇمىل، كورلا، شىحىزى، كۇيتۇن، قارامايلى، قۇلجا سياقتى ءۇرىمجىنىڭ توڭىرەگىندەگى نەگىزگى قالالاردى تۇتاستىرىپ، پويەزدەردىڭ جوعارى تىعىزدىقپەن الەۋمەتتىك كولىكتەي قاتىناۋى ءۇرىمجىنى ورتالىق ەتكەن ءبىر ساعاتتا 5 ساعاتقا دەيىنگى تەمىر جول قاتىناس شەڭبەرىن قالىپتاستىردى. قاتىناعان پويەزدەردىڭ ءتۇرى دە مولايدى، ۇشقىر پويەز، توتە باراتىن جۇردەك پويەز، تەز پويەز بار بولىپ قانا قويماي، تەز پويەز، ادەتتەگى جىلدامدىقتاعى پويەز دە بار، ءبىر ۆوگزالدان توتە قاتىنايتىن ”تۇيىننەن - تۇيىنگە دەيىنگى“ پويەز بار بولىپ قانا قويماي، بەكەتتەردىڭ بارىنە توقتايتىن جاسىل جاي پويەز دە بار بولىپ، جولاۋشىلاردىڭ تاڭداۋى ءتىپتى دە تۇرلەنە ءتۇستى.
”توقتايتىن بەكەت كوپ بولۋ، بەكەت ارالىعى قىسقا بولۋ، كەزەك - رەتى تىعىز بولۋ“ شينجياڭ تەمىر جولىنىڭ ەرەكشەلىگىنە اينالىپ، ءارقايسى قالالار اراسىنداعى ۋاقىت - كەڭىستىك ارالىعى بارعان سايىن قىسقاردى. ۇرىمجىدەن تۇرپان سولتۇستىك ۆوگزالىنا دەيىن ورتا ەسەپپەن 30 مينۋتتا ءبىر پويەز قاتىناۋ، جەتۋ نەمەسە باسىپ ءوتۋ جۇزەگە اسىپ، شىحىزى ۆوگزالىنان كۇندىز ءار نەگىزگى ۋاقىت بولىگىنىڭ بارىندە كوپتەگەن پويەز جولعا شىعىپ، قاۋىرت كەزدە ءار 10 مينۋتتا ءبىر پويەز جۇرەتىن بولدى.
”پويەزعا وتىرۋ الەۋمەتتىك اۆتوبۋزعا وتىرعانداي قولايلى، جىلدام بولىپ، ساياحاتشىلاردى كوركەم شينجياڭدى اناعۇرلىم ويداعىداي سەزىنۋگە باۋرادى“، - دەدى سۇڭ چياڭ.
ەرەكشە ارناۋلى پويەزدەر جۇرتتى وزىنە باۋرادى
”گۇل تاماشالاۋ ارناۋلى پويەزى شىعارىلعاننان كەيىن، پويەز بەلەتى جىلدام ساتىلىپ كەتتى“، - دەدى شينجياڭ تەمىر جولى ساياحاتتى دامىتۋ توبى شەكتى سەرىكتەستىگىنىڭ ورىنباسار باس ديرەكتورى حۋاڭ تيڭفىن.
بيىل جىل باسىنان بەرى، شينجياڭعا كەلەتىن جولاۋشىلار كورنەكتى كوبەيىپ، ساياحاتقا ۇشاق جالداۋ، ءوز كولىگىمەن ساياحاتتاۋ ۇيىرمەسى، ەرەكشە بەلگىلەنگەن ۇيىرمە سياقتىلار ۇزدىكسىز كەلىپ، شينجياڭنىڭ ساياحات بازارى جىلدام قالپىنا كەلە باستادى. ”بۇرىنعى جىلدارى ءبىز 4 - ايدا عانا ساياحات ارناۋلى پويەزىن جۇرگىزۋشى ەدىك، بيىل ساياحاتشى كوپ بولعاندىقتان، ءبىر اي بۇرىن قاتىناتتىق“، - دەدى حۋاڭ تيڭفىن.
سوڭعى جىلدارى شينجياڭ تەمىر جولى ”پويەزگە وتىرىپ شينجياڭدى ساياحاتتاۋدى“ نەگىزگى ماركا ەتىپ تۇلعالاپ، سولتۇستىك شينجياڭدى اينالا ساياحاتتاۋ، وڭتۇستىك شينجياڭدى ەمىن - ەركىن تاماشالاۋ، قىزىل ساياحات ارناۋلى پويەزىن قاتىناتۋ، اۆياتسيا مەن تەمىر جول بىرلەسىپ تاسىمالداۋ سياقتى كوپتەگەن تيجارات ۇلگىلەرىن ۇسىندى، ساياحات ارناۋلى پويەزى تەمىر جول تاراۋلارىنىڭ شينجياڭنىڭ ساياحاتىنىڭ دامۋىنا دەم بەرۋىنىڭ ەڭ تىكە بەينەسىنە اينالدى.
اسىرەسە، شينجياڭنىڭ تەمىر جول تاراۋلارى ۇسىنعان ”قاشقار“ اتتى، ”جۇڭگونىڭ قار قالاسى · التاي“ اتتى سياقتى ەرەكشەلىگى بار ساياحات ارناۋلى پويەزدەرى جولاۋشىلاردى باۋرايتىن ”اعىن دوكەيلەرىنە“ اينالدى.
”قاشقار“ اتتى − شينجياڭنىڭ تەمىر جول تاراۋلارى كۇش سالا تۇلعالاعان توتە باراتىن ەرەكشە تەز جولاۋشىلار پويەزى ماركاسى، ۇرىمجىدەن شىعىپ 1400 كيلومەتردەن استام جول باسىپ قاشقارعا جەتەدى، جول ورتادا ايالدامايدى، ”كەشتە شىعىپ، تاڭەرتەڭ جەتەتىن“ تاسىمال ءتاسىلىن قولدانادى، 11 ساعات 30 مينۋت جول باسادى، كۇن باتقاندا جولعا شىعىپ، پويەزدە ءبىر ۇيىقتاپ تۇرساڭىز، تاڭەرتەڭ كوزىڭىزدى اشقاندا نىسانالى جەرگە جەتكەنىڭىزدى كورەسىز.
”’قاشقار‘اتتى توتە باراتىن ساياحات تەز پويەزى قاتىناعاننان كەيىن، ءار كەزەگىندە پويەز جولاۋشىعا تولاتىن بولدى“، - دەدى سۇڭ چياڭ.
ال باتىس سولتۇستىكتەگى تۇڭعىش جۇپ قار - مۇز ساياحاتى ارناۋلى پويەزى − ”جۇڭگونىڭ قار قالاسى · التاي“ اتتى ساياحاتشىلاردىڭ شينجياڭنىڭ ەرەكشە ساياحاتىنىڭ ساپار قاجەتىن بارىنشا قاناعاتتاندىرىپ، جوعارى ساپالى پويەز قىزمەت وتەۋى ساياحاتشىلاردى باۋرادى، قاتىناعاننان بەرى، پويەزگە وتىرۋدىڭ ورتاشا سالىستىرماسى ％95تەن اسىپ، قىسقى التايدىڭ ”قارىن“ دۋماننىڭ قاينارىنا اينالدىردى.
”بيىل ءبىز ساياحاتشىلاردىڭ قاجەتىنە قاراي، ساياحات ارناۋلى پويەزىن جانە ءتىپتى دە ەرەكشەلىككە يە ساياحات پويەزىن ۇزدىكسىز قاتىناتىپ، ساياحات ارقىلى شينجياڭدى گۇلدەندىرۋ ستراتەگياسىن اتقارۋعا ءتىپتى دە كوپ كۇش قوسامىز“، - دەدى سۇڭ چياڭ.
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
