2023 - جىلعى شينجياڭ ”جىل قۇستارىن ايالاۋ اپتالىعى“ قيمىلى باستالدى
2023.05.09 16:41 كەلۋ قاينارى : شينجياڭ گازەتى
سۋرەتتە: ەرىكتىلەر جاساپ بولعان سۇيىسپەنشىلىك قۇس ۇياسىن كورسەتۋدە (4 - ايدىڭ 27 - كۇنى تۇسىرىلگەن). سول كۇنى ساۋان قالاسى كونە ساۋان قالاشىعىنىڭ ورگانىنداعى 20 جاس ەرىكتى ”قورشاعان ورتانى قورعاۋ جاستىق كوكتەمىمىزبەن ساپارلاس“ − بالاپان قۇسقا ۇيا جاسايمىن قيمىلىن ورىستەتىپ، ءىس جۇزىندىك ارەكەتتەرىمەن قورشاعان ورتانى ايالاپ، ەكولوگيالىق ورتانى قورعادى.
□ سۋرەتتى زىڭ جاۋمەي تۇسىرگەن
اناربۇلت \ شينجياڭ گازەتىنىڭ ءتىلشىسى ساۋ حۋا 5 - ايدىڭ 6 - كۇنى ۇرىمجىدەن حابارلايدى. 5 - ايدىڭ 6 - كۇنى تۇستەن بۇرىن 2023 - جىلعى شينجياڭ جابايى حايۋاناتتار مەن وسىمدىكتەردى قورعاۋ ۇگىت ايى جانە ”جىل قۇستارىن ايالاۋ اپتالىعى“ قيمىلىنىڭ باستالۋ سالتى ءۇرىمجى قالاسى حۇڭشان باقشاسىندا وتكىزىلدى. بيىلعى ”جىل قۇستارىن ايالاۋ اپتالىعى“ قيمىلىنىڭ نەگىزگى تاقىرىبى ”جىل قۇستارىنىڭ اۋۋ جولىن قورعاپ، ەكولوگيالىق وركەنيەت قۇرىلىسىن ىلگەرىلەتۋ“.
سول كۇنى باستالۋ سالتىندا جىل قۇستارىن قورعاۋ جونىندەگى ۇگىت فيلمى ۇستىندە قويىلىپ، قوعامنىڭ ءار سالاسىنان كەلگەن ەرىكتىلەر ءبي بيلەۋ، ولەڭ وقۋ، فوتوسۋرەت كورمەسى، ۇندەۋ حات وقۋ، قاپاستان شىعارىپ قويا بەرۋ، قۇستار جونىندە ءبىلىم جالپىلاستىرۋ ۇگىت لەكسياسى سياقتى باي مازمۇندى، الۋان ءتۇرلى فورمالار ارقىلى قيمىلعا قاتىناسقان قالا تۇرعىندارىنا قۇستاردى قورعاۋ جونىندە ۇگىت جۇرگىزدى.
اۆتونوميالى رايوندىق ورمان شارۋاشىلىعى جانە جايلىم مەكەمەسى جابايى حايۋاناتتار مەن وسىمدىكتەردى قورعاۋ، باسقارۋ باسقارماسىنىڭ باستىعى، 2 - دارەجەلى شارلاۋشى مامەتجان ابدۇل بىلاي دەدى: جاقىنعى جىلداردان بەرى شينجياڭ ەكولوگيالىق قورشاعان ورتانى قورعاۋ، وڭاۋ تەبىنىن ۇزدىكسىز ارتتىرىپ، 28 جاراتىلىستىق قورىقتى، 57 ورمان باقشاسىن جانە 51 سازدىق باقشاسىن بەلگىلەپ، قۇس سىقىلدى جابايى حايۋاناتتاردىڭ ءوسىپ - ونۋىنە، مەكەندەۋىنە تاماشا ورتا ازىرلەدى. جاقىنعى 10 جىلدان بەرى شينجياڭداعى قۇس تۇرىنە 60 نەشە ءتۇر قوسىلىپ، بۇكىل رايوندا مەملەكەتتىك ءتۇيىندى جابايى حايۋاناتتاردىڭ ءتۇر سانىنىڭ قورعالۋ مولشەرى ％70تەن استى.
”’جىل قۇستارىن ايالاۋ اپتالىعى‘ قيمىلى جۇرتىشىلىقتىڭ قۇستاردى تاماشالاۋ، قۇستاردى ايالاۋ، قۇستاردى قورعاۋ ىنتاسىن قوزعادى“. شينجياڭ جابايى حايۋاناتتار مەن وسىمدىكتەردى قورعاۋ قوعامىنىڭ باستىعى تيان جيانميڭ بىلاي دەدى: قازىر قورشاعان ورتانى قورعاۋ ىسىنە ات سالىساتىن ادامدار بارعان سايىن كوبەيىپ، قۇستاردىڭ مەكەندەۋى مەن اۋۋىندا قورعاۋ رولىن اتقاردى.
ۇعىسۋعا قاراعاندا، شينجياڭنىڭ ”جىل قۇستارىن ايالاۋ اپتالىعى“ قيمىلى مەزگىلىندە، ءۇنحات الەۋمەتتىك ءنومىرىنىڭ ”شينجياڭ ورمان شارۋاشىلىعى جانە جايلىمى“، ”شينجياڭنىڭ جابايى حايۋاناتتار مەن وسىمدىكتەردى قورعاۋى“، شينلاڭ ميكرو بلوگىنىڭ ”شينجياڭنىڭ اتكەزشىلىككە قارسى تۇرۋى“ قاتارلى تۇعىرلاردا ينتەرنەت جەلىسىندە قۇستاردى قورعاۋ بويىنشا ءبىلىم جالپىلاستىرۋ سيلىقتى جاۋاپ بەرۋ قيمىلىن وتكىزەدى ەكەن.
شينجياڭ − ەلىمىزدەگى قۇستاردىڭ اۋۋىنداعى ماڭىزدى جول جانە ارالىق ايالداما، قۇستاردىڭ ءتۇرى 490عا جەتەدى، شامامەن، بۇكىل مەملەكەتتەگى قۇستار جالپى سانىنىڭ ۇشتەن ءبىر بولىگىن ۇستايدى. ءار جىلعى كوكتەم، كۇز ماۋسىمدارىندا 300 تۇردەن استام قۇس اۋعاندا شينجياڭدى باسىپ ءوتىپ، ەداۋىر بولىگى شينجياڭدا تۇراقتاپ ءوسىپ - ونەدى.
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
