شي جينپيڭ چاڭجياڭ ەكونوميكالىق بەلدەۋىنىڭ ساپالى دامۋىن ىشكەرىلەي ىلگەرىلەتۋ اڭگىمە ءماجىلىسىن باسقارىپ اشقاندا بىلاي دەپ دارىپتەدى
چاڭجياڭ ەكونوميكالىق بەلدەۋىنىڭ ساپالى دامۋىن ىشكەرىلەي ىلگەرىلەتىپ، جۇڭگو ۇلگىسىندەگى وسىزامانداندىرۋعا ءتىپتى دە ويداعىداي تىرەك بولۋ جانە قىزمەت وتەۋ كەرەك
لي چياڭ، ساي چي ديڭ شۋەشياڭ قاتىناستى
2023.10.13 16:09 كەلۋ قاينارى : حالىق تورابى
«حالىق گازەتى»، 10 - ايدىڭ 12 - كۇنى، نانچاڭ. ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ 10 - ايدىڭ 12 - كۇنى تۇستەن كەيىن جياڭشي ولكەسىنىڭ نانچاڭ قالاسىندا چاڭجياڭ ەكونوميكالىق بەلدەۋىنىڭ ساپالى دامۋىن ىشكەرىلەي ىلگەرىلەتۋ اڭگىمە ءماجىلىسىن باسقارىپ اشتى ءارى ماڭىزدى ءسوز سويلەدى. ول بىلاي دەپ دارىپتەدى: جاڭا دامۋ ۇستانىمىن تولىق، ءدال، جاپپاي دايەكتىلەندىرىپ، جاپپاي قورعاۋدى بىرگە يگەرۋدە، قاۋىرت اشۋعا سالىنباۋدا تاباندى بولىپ، ەكولوگيانى الدىمەن ويلاستىرۋدا، جاسىل دامۋدا تاباندى بولىپ، عىلىم - تەحنيكادا جاڭالىق اشۋدى جەتەكشى ەتىپ، ەكولوگيالىق ورتانى قورعاۋدى جانە ەكونوميكالىق، قوعامدىق دامۋدى ءبىر تۇتاس جوسپارلاپ ىلگەرىلەتىپ، ساياساتتىق سايكەستىكتى جانە قىزمەت سايكەستىگىن كۇشەيتىپ، ۇزاق بولاشاقتىق اۋقىم قاراستىرىپ، باياندى شارا قولدانىپ، باياندى تىنىشتىق نەگىزىن قالاپ، چاڭجياڭ ەكونوميكالىق بەلدەۋىنىڭ ساپالى دامۋىن ىشكەرىلەي ىلگەرىلەتىپ، جۇڭگو ۇلگىسىندەگى وسىزامانداندىرۋعا ءتىپتى دە ويداعىداي تىرەك بولۋ جانە قىزمەت وتەۋ كەرەك.
ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ زۇڭليى لي چياڭ، ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسە مەڭگەرمەسىنىڭ مەڭگەرۋشىسى ساي چي، ورتالىق كوميتەت ساياسي بيۋروسىنىڭ تۇراقتى مۇشەسى، مەملەكەتتىك كەڭەس زۇڭليىنىڭ ورىنباسارى ديڭ شۋەشياڭ اڭگىمە ماجىلىسىنە قاتىناستى.
شي جينپيڭ جياڭشيدا تەكسەرۋ - زەرتتەۋ جۇرگىزگەن كەزدە وسى رەتكى اڭگىمە ءماجىلىسىن ارنايى اشتى. اڭگىمە ماجىلىسىندە مەملەكەتتىك دامۋ جانە رەفورما كوميتەتىنىڭ مەڭگەرۋشىسى جىڭ شانجيە، چۇڭچيڭ قالالىق پارتكومنىڭ شۋجيى يۋان جياجۇن، جياڭشي ولكەلىك پارتكومنىڭ شۋجيى يىن حۇڭ، شاڭحاي قالالىق پارتكومنىڭ شۋجيى چىن جينيڭ ىلگەرىندى - كەيىندى ءسوز سويلەپ، چاڭجياڭ ەكونوميكالىق بەلدەۋىنىڭ ساپالى دامۋىن ىلگەرىلەتۋ جونىندە قىزمەت جاعدايىنان مالىمەت بەرىپ، ۇسىنىس - پىكىر قويدى. اڭگىمە ماجىلىسىنە قاتىناسقان باسقا ولكەلەردەگى نەگىزگى جاۋاپتى جولداستار جازباشا ءسوز تاپسىردى.
كوپشىلىكتىڭ ءسوزىن تىڭداعان سوڭ شي جينپيڭ ماڭىزدى ءسوز سويلەدى. ول بىلاي دەپ دارىپتەدى: چاڭجياڭ ەكونوميكالىق بەلدەۋىن دامىتۋ ستراتەگياسى اتقارىلعان 8 جىلعا تاياۋ ۋاقىتتان بەرى چاڭجياڭ وزەنى جاعالاۋىنداعى ولكە، قالالار مەن ورتالىقتىڭ قاتىستى تاراۋلارى پارتيا ورتالىق كوميتەتىنىڭ شەشىمدەرىن، ورنالاستىرۋلارىن مۇقيات دايەكتىلەندىرىپ، تياناقتاندىرىپ، جاپپاي قورعاۋدى بىرگە يگەرۋدە، قاۋىرت اشۋعا سالىنباۋدا تاباندى بولىپ، ەكولوگيانى الدىمەن ويلاسۋدا، جاسىل دامۋدا تاباندى بولىپ، چاڭجياڭ وزەنىنىڭ ەكولوگيالىق ورتاسىن قورعاۋدى، قالپىنا كەلتىرۋدى تىڭعىلىقتى ىلگەرىلەتىپ، ەكونوميكالىق، قوعامدىق دامۋدىڭ جاپپاي جاسىل تيپكە بۇرىلىس جاساۋىن بەلسەنە جەبەدى، بەكىمنىڭ پارمەندىلىگى، سەرپىننىڭ مىعىمدىعى بۇرىن بولماعان دارەجەگە جەتتى، چاڭجياڭ ەكونوميكالىق بەلدەۋىنىڭ دامۋىندا كەلەلى وزگەرىستەر تۋىلدى. يدەيالىق تانىمدا كەلەلى بۇرىلىس تۋىلدى، جاپپاي قورعاۋدى بىرگە يگەرۋ، قاۋىرت اشۋمەن اينالىسپاۋ ورتاق تانىمعا اينالدى؛ ەكولوگيالىق ورتانى قورعاۋ جانە قالپىنا كەلتىرۋ كەلەلى جەتىستىككە قول جەتكىزىپ، ”ءبىر وزەننىڭ تۇنىق سۋى شىعىسقا اعۋ“ كوركەم كورىنىسى قايتادان كوز الدىمىزعا كەلدى؛ دامۋ تاسىلىندە كەلەلى وزگەرىس تۋىلىپ، جاڭالىق اشۋ ارقىلى دامۋعا دەم بەرۋ جاپپاي باستالدى؛ وڭىرلىك توعىسۋدا ەلەۋلى جوعارىلاۋ جۇزەگە اسىپ، وڭىرلەردىڭ سايكەسۋى، ىقپالداستىعى ۇزدىكسىز كۇشەيدى؛ رەفورما جاساپ، ەسىك اشۋدا كەلەلى ىلگەرىلەۋشىلىكتەرگە قول جەتىپ، ىشكە، سىرتقا جان - جاقتى ەسىك اشۋ اۋقىمى جەدەل قالىپتاستى. جالپى العاندا، چاڭجياڭ ەكونوميكالىق بەلدەۋىنىڭ دامۋ جەتىستىكتەرى جۇرتقا ايان، دامۋ ساپاسى ورنىقتى جوعارىلاپ، دامۋ اۋقىمى كۇن سايىن جاقسارۋدا. سونىمەن بىرگە، چاڭجياڭ وزەنى الابىنىڭ ەكولوگيالىق ورتاسىن قورعاۋ مەن ساپالى دامۋدىڭ ساننان ساپاعا بۇرىلىس جاساۋدىڭ شەشۋشى كەزەڭىندە تۇرعانىن، قول جەتكىزىلگەن ناتيجەنىڭ ءالى دە ورنىقتى ەمەس ەكەنىن، وبيەكتيۆ جاقتان ءالى دە كوپتەگەن قيىنشىلىق پەن ماسەلەنىڭ ورىن تەۋىپ وتىرعانىن دا كورە ءبىلۋىمىز، ءۇرتىس قۇلشىنىپ، ءتىپتى دە ءمان بەرىپ شەشۋىمىز كەرەك.
شي جينپيڭ بىلاي دەپ اتاپ كورسەتتى: ۇزاق بولاشاقتان قاراعاندا، چاڭجياڭ ەكونوميكالىق بەلدەۋىنىڭ ساپالى دامۋىن ىلگەرىلەتۋ تۇبىرىنەن العاندا، چاڭجياڭ الابىنىڭ ساپالى ەكولوگيالىق ورتاسىنا سۇيەنەدى. جاپپاي قورعاۋدى بىرگە يگەرۋدەن، قاۋىرت اشۋعا سالىنباۋدان تيتتەي دە اۋىتقىماي، جوعارى دەڭگەيدە قورعاۋعا اناعۇرلىم زور كۇش سالۋ كەرەك. وزەن جاعالاۋىنداعى جەرلەردىڭ ەكولوگيالىق قىزىل سىزىعى بەلگىلەنىپ بولدى، ءسوز جوق، ەكولوگيالىق ورتانى رايوندارعا ءبولىپ باسقارۋدى كۇشەيتىپ، رۇقسات ەتۋ تىزىمدىگىن قاتاڭ اتقارۋ كەرەك. ءار دارەجەلى پارتكومدار مەن ۇكىمەتتەر جەرگىلىكتى ورىننىڭ ماڭىزدى ەكولوگيالىق كەڭىستىگى جونىندە كوكەيلەرىندە سان بولىپ، الدىمەن قورعاۋى، قاتاڭ قورعاۋى كەرەك. ەكولوگيالىق ورتانى جان - جاقتى جونگە سالۋدى ۇزدىكسىز كۇشەيتىپ، ءتۇيىندى سالالارداعى لاستانۋدى جونگە سالۋدى ۇزدىكسىز كۇشەيتىپ، سۋ بايلىعىن، سۋ ورتاسىن، سۋ ەكولوگياسىن ءبىر تۇتاس جوسپارلاپ، اتموسفەرانىڭ جانە توپىراقتىڭ لاستانۋىنان ساقتانۋ - جونگە سالۋدى تىڭعىلىقتى ىلگەرىلەتىپ، لاستانۋدى الدىن الا تىزگىندەۋگە اناعۇرلىم ءمان بەرىپ، لاس زاتتاردىڭ شىعارىلۋ جالپى مولشەرىن تۋ باستان تومەندەتۋ كەرەك. چاڭجياڭ وزەنىندە ”10 جىل بالىق اۋلاۋعا تيىم سالۋدى“ تاباندىلىقپەن ىلگەرىلەتىپ، قول جەتكىزگەن تابىستاردى ويداعىداي بەكەمدەۋ كەرەك. كومىر قىشقىل گازىن تومەندەتۋدى، لاستاۋدى ازايتۋدى، جاسىلدانۋدى كەڭەيتۋدى، ارتۋدى سايكەستى ىلگەرىلەتىپ، كاسىپ سالاسىنىڭ جاسىل تيپكە بۇرىلىس جاساۋىن، دارەجەسىن جوعارىلاتۋدى ەڭ ماڭىزدى ورىنعا قويىپ، جاسىل، تومەن كومىرتەكتى كاسىپتەردى جەدەل جەتىلدىرىپ، زورايتىپ، جاسىل تەحنيكانى، جاسىل ونىمدەردى بەلسەنە دامىتىپ، ەكونوميكانىڭ جاسىلدانۋ دەڭگەيىن جوعارىلاتىپ، دامۋدىڭ كومەسكى كۇشى مەن تەبىنىن ارتتىرۋ كەرەك. ەكولوگيالىق ابزالدىققا يە رايونداردىڭ ەكولوگيادان ويداعىداي پايدالانىپ، ەكولوگيالىق بايلىقتى ەكونوميكالىق بايلىققا اينالدىرۋىنا قولداۋ كورسەتۋ كەرەك. ەندىك ەكولوگيانى قورعاۋ جونىنەن تولەم بەرۋ مەحانيزمىن كەمەلدەندىرىپ، تۇتاس الاپتىڭ ەكولوگيانى قورعاۋعا قاتىناسۋ بەلسەندىلىگىن قوزعاۋ كەرەك.
شي جينپيڭ بىلاي دەپ دارىپتەدى: جاڭالىق اشۋ ارقىلى دامۋعا جەتەكشىلىك ەتۋدە تاباندى بولىپ، چاڭجياڭ ەكونوميكالىق بەلدەۋىنىڭ عىلمي زەرتتەۋ ابزالدىعىن، دارىندى ابزالدىعىن دامۋ ابزالدىعىنا اينالدىرىپ، دامۋدىڭ جاڭا سالاسىن، جاڭا جارىس جولىن بەلسەنە اشىپ، دامۋدىڭ جاڭا قوزعاۋشى قۋاتىن، جاڭا باسىمدىعىن قالىپتاستىرۋ كەرەك. عىلىم - تەحنيكا، وقۋ - اعارتۋ بايلىعىن ساپالىلاندىرۋدى، بىرىكتىرۋدى جانە عىلىم - تەحنيكادا جاڭالىق اشۋدى سايكەستىرۋدى كۇشەيتىپ، كاسىپ سالاسى نەگىزىن جوعارى دەڭگەيگە كوتەرۋدى جانە كاسىپ سالاسى تىزبەگىن وسىزامانداندىرۋدى ارقاۋ ەتىپ، جاڭا سالاداعى، جاڭا جارىس جولىنداعى جەتەكشىلىك سيپاتتى تەحنيكالاردان قامال الۋدى بەلسەنە ورنالاستىرىپ، جوعارى دەڭگەيلى عىلىم - تەحنيكادا جاڭالىق اشۋشى دارىندىلاردى باۋراپ، توپتاپ، عىلىم - تەحنيكا الدىڭعى لەك سالاسىنداعى ءتول جاڭالىق اشۋ قابىلەتىن جوعارىلاتىپ، ءبىر توپ شەشۋشى، وزەكتى تەحنيكالاردان قامال الۋدى جەدەلدەتۋ كەرەك. كاسىپ تىزبەگى مەن قامداۋ تىزبەگىنىڭ وسىزاماندانۋىن كۇش سالا ىلگەرىلەتىپ، جاساۋ كاسىبىنىڭ وزەكتى باسەكەلىك قۋاتىن كۇشەيتۋ ارەكەتىن اتقارىپ، وزىق جاساۋ كاسىبىن جەتىلدىرىپ جانە زورايتىپ، ستراتەگيالىق جاڭادان گۇلدەنگەن كاسىپتەر مەن بولاشاق كاسىپتەردى جەدەل دامىتىپ، سيفرلى ەكونوميكا مەن ناقتى ەكونوميكانىڭ ىشكەرىلەي توعىسۋىن جەبەۋ كەرەك. كاسىپ تىزبەگىنىڭ سەلبەسۋىن، سەلبەستىگىن كۇشەيتىپ، ابزال كاسىپ تىزبەگىن، جاڭادان گۇلدەنگەن كاسىپ تىزبەگىن قۇرۋدى ىلگەرىلەتۋ كەرەك.
شي جينپيڭ بىلاي دەپ اتاپ كورسەتتى: چاڭجياڭ ەكونوميكالىق بەلدەۋىنىڭ شىعىس پەن باتىستى ەندەي ءوتۋ، وڭتۇستىك پەن سولتۇستىكتى ۇلاستىرۋ، وزەنمەن، تەڭىزبەن تۇتاسۋ سىندى وزگەشە باسىمدىعىن اناعۇرلىم ويداعىداي ساۋلەلەندىرىپ، ەل ءىشى، حالىقارالىق ەكى بازاردى اناعۇرلىم ويداعىداي تۇتاستىرىپ، ەكى ءتۇرلى بايلىقتان ويداعىداي پايدالانىپ، ەل ءىشى ۇلكەن اينالىمىنىڭ ىشكى قوزعاۋشى كۇشى مەن سەنىمدىلىگىن جوعارىلاتىپ، حالىقارالىق اينالىم جاعىنداعى باۋراۋ قۋاتىن، ىلگەرىلەتۋ قۋاتىن كۇشەيتىپ، جاڭا دامۋ ارناسىن قالىپتاستىرۋعا ستراتەگيالىق تىرەك ازىرلەۋ كەرەك. كاسىپ سالاسىن دامىتۋ جاعىندا، چاڭجياڭ وزەنى جاعالاۋىنداعى ولكە، قالالار ءوز ابزالدىقتارىن كورسەتۋمەن بىرگە، سايكەستى دامۋ، ورىن اۋىستىرىپ دامۋ، ىقپالداسىپ دامۋ كەرەك. چاڭجياڭ وزەنى جاعالاۋىنداعى كاسىپ سالالارىن ورنالاستىرۋ مەن كوشىرۋدى ءبىر تۇتاس جوسپارلاپ ويداعىداي يگەرىپ، كەلەلى وندىرگىش كۇشتەردىڭ ورنالاسۋىن ساپالىلاندىرىپ، قارجى، تەحنيكا، ەڭبەك شوعىرلانعان كاسىپ سالالارىن شىعىس بولىكتەن ورتا، باتىس بولىككە، ورتالىق قالالاردان ىشكى جەرلەرگە تارتىپپەن كوشىرۋگە جەتەكتەۋ كەرەك. جوعارى دەڭگەيدەگى سىرتقا ەسىك اشۋدى بەلسەنە ىلگەرىلەتىپ، حالىقارالىق ەكونوميكالىق سەلبەستىكتىڭ جاڭا سالاسىن، جاڭا ارناسىن بەلسەنە كەڭەيتۋ كەرەك. چاڭجياڭ وزەنى جاعالاۋىنداعى ولكە، قالالاردىڭ ەركىن ساۋدا سىناق رايوندارىنىڭ رولىن اناعۇرلىم ويداعىداي ساۋلەلەندىرىپ، تۇزىمدە جاڭالىق جاراتۋ جاعىندا الدىمەن اتقارىپ، الدىمەن سىناق جۇرگىزىپ، چاڭجياڭ وزەنى جاعالاۋىنداعى ولكە، قالالاردىڭ ەركىن ساۋدا سىناق رايوندارىنىڭ بىرلەسىپ دامۋىن جەبەپ، اناعۇرلىم جوعارى دەڭگەيدەگى اشىق ەكونوميكالىق جاڭا ءتۇزىلىس قۇرۋعا جاڭا تاجىريبەلەر توپتاپ، جاڭا جول قاراستىرۋ كەرەك.
شي جينپيڭ بىلاي دەپ دارىپتەدى: وڭىرلىك سايكەسۋدى، توعىسۋدى كۇشەيتۋدى كۇش سالۋ ءتۇيىنى ەتۋدە تاباندى بولىپ، چاڭجياڭ وزەنى جاعالاۋىنداعى ولكە، قالالار ولكەلەر ارا بىرگە اقىلداسۋدا، ەكولوگيانى بىرگە جونگە سالۋدا، جالپى ءوڭىر بىرگە قۇرۋدا، دامۋدان بىرگە يگىلىكتەنۋدە تاباندى بولىپ، وڭىرلىك قاتىناستىڭ ءوزارا بايلانىسىن، ساياساتتىڭ ءبىر تۇتاستىعىن، ەرەجەنىڭ بىركەلكىلىگىن، اتقارۋدىڭ سايكەسىمدىلىگىن كۇشەيتىپ، ەكولوگيالىق ورتاق تۇلعا مەن مۇددە ورتاق تۇلعا قۇرىلىسىن ورنىقتى قاداممەن ىلگەرىلەتىپ، وڭىرلەردىڭ سايكەستى دامۋىن جەبەۋ كەرەك. وڭىرلىك قاتىناس نەگىزدىك قۇرىلعىلارىن جالپى تۇلعالىق جاقتان جوبالاپ جانە قۇرىپ، جالپىلىق ستەرەولدى قاتىناس ءدالىزىن جەدەل قۇرىپ، قاتىناس تورىنىڭ ءوزارا تۇتاسۋى مەن ”تاس جول، سۋ جولى، تەمىر جول“ سياقتى تاسىمال تاسىلدەرىنىڭ ءوزارا ۇشتاسۋىن كۇشەيتىپ، وڭىرلىك قاتىناستىڭ ءبىر تۇلعالانۋ دەڭگەيىن جوعارىلاتۋ كەرەك. ماڭىزدى فاكتورلاردى بازارلاندىرۋ رەفورماسىن تەرەڭدەتىپ، مال - مۇلىك ۇقىعىن قورعاۋ، بازارعا كىرۋ رۇقساتى، ءادىل باسەكە، قوعامدىق سەنىمدىلىك سياقتى نەگىزدىك تۇزىمدەردى كەمەلدەندىرىپ، ءوڭىر، تاراۋ، دارەجە اتتاعان ساندى مالىمەت ينفورماتسياسىنان ورتاق يگىلىكتەنۋدى جانە ءتارتىپتى ۇلاستىرۋدى، تۇتاستىرۋدى كەمەلدەندىرىپ، اكىمشىلىك قىزمەت وتەۋ سەلبەستىگىن تەرەڭدەتىپ، تيجارات - ساۋدا ورتاسىن ساپالىلاندىرۋ كەرەك. چاڭجياڭ مادەنيەتىنىڭ داۋىرلىك قۇنىن ىشكەرىلەي اشىپ، جاڭا داۋىردەگى چاڭجياڭ مادەنيەتىن ايگىلەيتىن اناعۇرلىم كوپ ادەبيەت - كوركەمونەر سارا تۋىندىلارىن شىعارۋ كەرەك. مادەنيەت پەن ساياحاتتىڭ ىشكەرىلەي توعىسا دامۋىن بەلسەنە ىلگەرىلەتىپ، تابيعي ەرەكشەلىككە جانە تاريحي گۋمانيتارلىق مانگە يە قايراڭ بويى قالالارىن، شاعىن قالا - قالاشىق جانە كورىكتى اۋىل - قىستاق قۇرىپ، چاڭجياڭ وزەنى حالىقارالىق التىن ساياحات بەلدەۋىن قالىپتاستىرۋ كەرەك.
شي جينپيڭ مىنالاردى اتاپ كورسەتتى: چاڭجياڭ ەكونوميكالىق بەلدەۋى بۇكىل ەلدىڭ دامۋ جالپى جاعدايىنا سايادى. دامۋ مەن حاۋىپسىزدىكتى ءبىر تۇتاس جوسپارلاپ، مەملەكەتتىڭ ەنەرگيا حاۋىپسىزدىگىن، ماڭىزدى كاسىپ تىزبەگىنىڭ، قامداۋ تىزبەگىنىڭ حاۋىپسىزدىگىن، سۋ حاۋىپسىزدىگىن قورعاۋ سياقتى جاقتاردا اناعۇرلىم زور رول اتقارىپ، ءبىر ءوڭىردىڭ ورنىقتىلىعى ارقىلى جالپى جاعدايدىڭ حاۋىپسىزدىگىنە ۇلەس قوسۋ كەرەك. چاڭجياڭ وزەنى جاعالاۋىنداعى ولكە، قالالار مەيلى استىق وندىرەتىن نەگىزگى رايوندار بولسىن، الدە نەگىزگى ساتۋ رايوندارى بولسىن، ءوندىرۋ مەن ساتۋدى تەڭگەرەتىن رايوندار بولسىن، بارلىعى جاۋاپكەرلىكتى بەرىك ارقالاۋى كەرەك. ەگىستىك جەردىڭ سانىن، ساپاسىن، ەكولوگياسىن ءبىر تۇلعالاندىرىپ قورعاۋدى كۇشەيتىپ، ماڭگىلىك نەگىزگى ەگىنجايلاردى بىرتىندەپ جوعارى ولشەمدى ەگىنجاي ەتىپ قۇرىپ شىعۋ، اۋىل شارۋاشىلىعىنىڭ تۇقىمدىق زات بايلىعىن قورعاۋدى، ودان پايدالانۋدى كۇشەيتىپ، بيولوگيالىق تۇقىم جەتىلدىرۋ كەلەلى نىساندارىن اتقارىپ، تۇقىم شارۋاشىلىعى كاسىپورىندارىنىڭ دەربەس جاڭالىق اشۋ قابىلەتىن جوعارىلاتۋ كەرەك. استىق ءونىمىن ارتتىرۋدىڭ ءتۇيىنىن بىرلىك ءونىمدى كەڭ كولەمدە جوعارىلاتۋعا اۋدارىپ، قۇنارلى اتىزدا ساپالى تۇقىم ءوسىرۋ، وڭتايلى ساتىندە ەگىپ، باپتاۋ ادىستەرىن شوعىرلى جالپىلاستىرۋدى كۇشەيتىپ، الۋان فورمالى لايىقتى كولەمدەگى شارۋاشىلىق پەن قوعامدانعان قىزمەت وتەۋدى دامىتۋ كەرەك. بۇكىل ەل ءبىر تۇتاس جۇيە دەگەندە تاباندى بولىپ، جوعارعى اعارداعى وڭىرلەر مەن ورتا، تومەنگى اعارداعى وڭىرلەردىڭ ەنەرگيا سەلبەستىگىن ۇزدىكسىز تەرەڭدەتۋ كەرەك. كومىر سياقتى قازبا ەنەرگيالاردىڭ ەڭ تومەنگى شەكتەن تۇسىرمەي قامتاماسىز ەتۋ قۋاتىن كۇشەيتىپ، كومىردى تازا، جوعارى ءونىمدى پايدالانۋدى مىقتى يگەرىپ، سۋ ەلەكترى سياقتى باسىمدىققا يە ءداستۇرلى ەنەرگيالاردىڭ جەل ەلەكتر، فوتوۆولت، سۋتەگى ەنەرگياسى سياقتى جاڭا ەنەرگيالارمەن ءبىرىن - ءبىرى تولىقتاۋىنا، ىشكەرىلەي توعىسۋىنا ءمان بەرىپ، جاڭاشا ەنەرگيا جۇيەسىن جەدەل قۇرىپ، قاينار تورابىنداعى ىقپالداسقان ءبىر تۇلعالانۋدى ىلگەرىلەتۋ كەرەك. تىنىش چاڭجياڭ وزەنىن قۇلشىنا قۇرىپ، چاڭجياڭ وزەنىنىڭ سۋ جاعدايىنىڭ وزگەرىسىن عىلمي يگەرىپ، قۋاڭشىلىق پەن سۋ اپاتىنان بىرگە ساقتانۋدا، بىرگە جونگە سالۋدا تاباندى بولىپ، سۋ جۇيەسىن تۇتاستىرۋدى، سۋ قاينارىن ساقتاۋدى، سۋ مەن توپىراقتى ساقتاۋدى ءبىر تۇتاس جوسپارلاپ ىلگەرىلەتىپ، الاپتىق سۋ ينجەنەرياسىن ءبىر تۇتاس بىرلەسىپ ورنالاستىرۋدى كۇشەيتىپ، ءوڭىر اتتاعان سۋ بايلىعىن رەتتەۋدى كۇشەيتىپ، الاپتاردىڭ اپاتتان ساقتانۋ، اپات زيانىن ازايتۋ قابىلەتىن جوعارىلاتۋ كەرەك.
شي جينپيڭ بىلاي دەپ دارىپتەدى: ورتالىق ءبىر تۇتاس جوسپارلاۋ، ولكە جالپى جاۋاپتى بولۋ، قالا، اۋدان تياناقتاندىرۋدى يگەرۋ قىزمەت مەحانيزمىندە تاباندى بولۋ، ورتالىقتىڭ وڭىرلىك سايكەستى دامۋعا باسشىلىق ەتۋ گرۋپپاسى ءبىر تۇتاس جوسپارلاپ سايكەستىرۋدى جانە قۋزاۋ - تەكسەرۋدى كۇشەيتۋ، ورتالىقتىڭ قاتىستى تاراۋلارى چاڭجياڭ ەكونوميكالىق بەلدەۋىنىڭ ساپالى دامۋ بەتالىسىنا ۇيلەسەتىن نىساندارعا قولداۋ كورسەتۋ، ءتۇيىندى سالالاردا ءبىر توپ كەلەلى رەفورمانى ىلگەرىلەتۋ كەرەك. چاڭجياڭ وزەنى جاعالاۋىنداعى ولكە، قالالاردىڭ ءار دارەجەلى پارتكومدارىنىڭ، ۇكىمەتتەرىنىڭ تۇلعالىق جاۋاپكەرلىگىن ناقتىلاندىرىپ، قىزمەتتىڭ تياناقتانۋىنا كەپىلدىك ەتۋ كەرەك. نەگىزگى تاقىرىپتىق تاربيەنى وراي ەتىپ، قالىڭ كادرلاردى دۇرىس ساياسي ناتيجە كوزقاراسىن ورناتۋعا جانە امالياتتا ايگىلەۋگە تاربيەلەپ جانە جەتەكتەپ، ساپالى دامۋدى ىلگەرىلەتۋ قابىلەتىن جوعارىلاتۋ كەرەك. ءتۇرلى كاسىپورىنداردى، قوعامدىق ۇيىمداردى چاڭجياڭ ەكونوميكالىق بەلدەۋىنىڭ دامۋىنا بەلسەنە ات سالىسۋعا جەتەكتەپ، ادام كۇشى، زات كۇشى، قازىنا كۇشى سياقتى جاقتارداعى ۇسىنىلىمدى ارتتىرىپ، حالىق بۇقاراسىنىڭ بەلسەندىلىگىن، ىرىقتىلىعىن، جاسامپازدىعىن ويداعىداي ساۋلەلەندىرۋ كەرەك. «چاڭجياڭ ەكونوميكالىق بەلدەۋىنىڭ دامۋ پلانى باعدارلاماسىن» تەكسەرۋ، باعالاۋ جانە باقىلاۋدى مەرزىم سايىن ورىستەتىپ، جەر - جەردى ماسەلەلەردى دەر كەزىندە بايقاۋعا جانە تۇزەتۋگە قۋزاۋ كەرەك.
لي چياڭ سوزىندە بىلاي دەدى: باس شۋجي شي جينپيڭنىڭ ماڭىزدى ءسوزىنىڭ رۋحىن مۇقيات ۇيرەنىپ، ءتۇسىنىپ، ىشكەرىلەي دايەكتىلەندىرىپ، تياناقتاندىرىپ، جاپپاي قورعاۋدى بىرگە يگەرۋدىڭ ستراتەگيالىق تۇراقتىلىعىن ساقتاپ، ۇزدىكسىز كۇش سالىپ، ۇزاق ۋاقىت ۇلەس قوسۋ كەرەك. جان - جاقتى جونگە سالۋدى، تۋ باستان جونگە سالۋدى كۇشەيتىپ، ەكولوگيانى قورعاۋعا تولەم بەرۋ سياقتى تۇزىمدەردى كەمەلدەندىرىپ، ەكولوگيالىق ونىمدەردىڭ قۇنىن جۇزەگە اسىرۋدىڭ جولىن ىشكەرىلەي قاراستىرۋ كەرەك. نەگىزگى تۇلعالىق فۋنكتسيالىق رايون ستراتەگياسى ارقىلى ەكونوميكانىڭ ۇيلەسىمدى ورنالاسۋىنا جەتەكشىلىك ەتىپ، سالىستىرمالى باسىمدىقتى تياناق ەتىپ، فۋنكتسيالىق ورنىن ءدال تاۋىپ، چاڭجياڭ اتىراۋىنىڭ جەتەكشىلىك رولىن ويداعىداي ساۋلەلەندىرىپ، ورتا، جوعارى اعارداعى رايونداردىڭ بىرگە دامۋىن جەبەۋ كەرەك. ءبىر تۇتاس ءىرى بازار قۇرىلىسىن ىشكەرىلەي ىلگەرىلەتىپ، ءوڭىر ىشىندەگى ”جۇمساق كۇش“ پەن ”قاتتى قۇرىلعى“ جاقتارىنداعى ۇلاستىرۋ دەڭگەيىن جوعارىلاتىپ، حالىقارالىق اينالىممەن بەلسەنە توعىسىپ، ەكى بازاردىڭ، ەكى بايلىقتىڭ ىقپالداستىق اسەرىن كۇشەيتۋ كەرەك.
ديڭ شۋەشياڭ سوزىندە مىنالاردى ءبىلدىردى: پارتيا 20 - قۇرىلتايىنىڭ رۋحىن جانە باس شۋجي شي جينپيڭنىڭ ماڭىزدى ءسوزىنىڭ رۋحىن ىشكەرىلەي ۇيرەنىپ، دايەكتىلەندىرىپ، جاپپاي قورعاۋدى بىرگە يگەرۋدە، قاۋىرت اشۋعا سالىنباۋدا تاباندى بولىپ، ەكولوگيانى الدىمەن ەسكەرۋدى، جاسىل دامۋدى كورنەكتىلەندىرىپ، جوعارى دەڭگەيدە قورعاۋ ارقىلى ساپالى دامۋعا ماڭىزدى تىرەك ازىرلەۋ؛ كەلەلى جاڭالىق اشۋ تۇعىرى قۇرىلىسىن كۇشەيتىپ، جاڭالىق اشۋ تىزبەگى مەن كاسىپ تىزبەگىنىڭ تەرەڭدەي توعىسۋىن ىلگەرىلەتىپ، جوعارى دەڭگەيلى عىلىم - تەحنيكالىق جاڭالىق اشۋ ارقىلى ساپالى دامۋدىڭ جاڭا قوزعاۋشى كۇشىن جەتىلدىرۋ؛ ”ءبىر تۇتاس جۇيە“ يدەياسىن بەرىك ورناتىپ، فۋنكتسيالىق ورىن مەن دامۋ بەتالىسىن ۇيلەسىمدى بەلگىلەپ، تەڭىز جاعالاۋىن، وزەن جاعالاۋىن، شەكارا بويىن جانە ىشكى قۇرلىقتى اشىق ۇستاۋدى ءبىر تۇتاس جوسپارلاپ، جوعارى دەڭگەيلى سايكەسە بىرلەسىپ ارەكەتتەنۋ ارقىلى ساپالى دامۋدىڭ جالپىلىق بىرىككەن كۇشىن قالىپتاستىرۋ كەرەك.
لي گانجيە، حى ليفىڭ، ۋ جىڭلۇڭ، مۋ حۇڭ، جياڭ شينجى اڭگىمە ماجىلىسىنە قاتىناستى، ورتالىق پەن مەملەكەت ورگاندارىنىڭ قاتىستى تاراۋلارىنداعى، قاتىستى جەرلەردەگى، قاتىستى كاسىپورىندارداعى جاۋاپتى جولداستار اڭگىمە ماجىلىسىنە قاتىناستى.
كەلۋ قاينارى: حالىق تورابى
جاۋاپتى رەداكتورى : مانەپ ەربول ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
