ازيا سپورت جارىسىنىڭ اعا جۇلدەگەرى توقتاربەك داڭقپەن اۋىلىنا قايتتى، اۋىلداستارى وعان ات مىنگىزدى
2023.10.11 13:40 كەلۋ قاينارى : حالىق تورابى
10 – ايدىڭ 9 – كۇنى، حاڭجوۋ ازيا سپورت جارىسى ەرلەر بوكس جارىسىنىڭ 80 كيلوگرامدىق دارەجەسى بويىنشا التىن مەدالدى قانجىعالاعان توقتاربەك تاڭاتقان ۇلى ۇرىمجىگە قايتىپ باردى، ءار ۇلت بۇقاراسى ەڭ جوعارى قۇرمەتپەن قارسى الدى، ادامدار ءان ايتىپ، بيگە باسىپ، شاشۋ شاشتى، سونىمەن بىرگە توقتاربەككە اق تۇلپار مىنگىزدى. ورتا دۋمانعا بولەنىپ، كوپشىلىك قۋانىشى مەن تەبىرەنىستى كوڭىل كۇيىن جەتكىزدى.
10 – ايدىڭ 5 – كۇنى كەشتە، توقتاربەك تاڭاتقان ۇلى حاڭجوۋ ازيا سپورت جارىسى ەرلەر بوكس جارىسىنىڭ 80 كيلوگرامدىق دارەجەلى جارىسىندا التىن مەدال الدى.
1996 – جىلى 11 – ايدا شينجياڭ التاي قالاسى الاعاق قالاشىعىندا دۇنيەگە كەلگەن توقتاربەك بالا كەزىنەن باستاپ ۇزدىك سپورتشى بولۋعا دەگەن تالانتىن بايقاتقان. بوكسقا قىزىعاتىن اعاسىنىڭ ىقپالىنان ول 10 جاسىنان باستاپ بوكسپەن اينالىسقان.
2017 ـ جىلى 21 جاستاعى ول مەملەكەتتىك 13 ـ كەزەكتى سپورت جارىسىندا سول كەزدەگى ”جۇڭگو بوكس پاتشاسى“ اتانعان ۋىن يىنحاڭمەن 75 كيلوگرامدىق سالماق دارەجەسى بويىنشا قيانكەسكى شەشۋشى جارىسقا ءتۇسىپ، وسى ءبىر جارىسپەن اتاعى شىققان. مەملەكەتتىك كومانداعا كىرگەننەن كەيىن، اسقان تەزدىكپەن العا باسىپ، اتالعان سالماق دارەجەسى بويىنشا ابدەن ورىن تەپتى.
2021 – جىلى توكيو وليمپيادا سپورت جارىسىندا توقتاربەك ”تالەيى كەلمەي“، ەكىنشى اينالىمداعى جارىستا سوڭىندا اعا جۇلدەگەر بولعان برازيليا سپورتشىسى سوسا حاببوتپەن كەزدەسىپ، سوڭىندا 2:3 ۇپايمەن جەڭىلىپ، 9 – ورىنعا يە بولدى. ەلگە ورالعاننان كەيىن، ول 14 – كەزەكتى مەملەكەتتىك دەنە تاربيە جارىسىندا جانە جۇڭگو بوكس پاتشاسى باسەكەلى جارىسىندا قاتارىنان اعا جۇلدەگەر بولادى ءارى ”جۇڭگو بوكس پاتشاسى“ اتاعىن الدى.
2022 ـ جىلى مەملەكەتتىك كومانداعا ورالعاننان كەيىن، پاريج وليمپيادا سپورت جارىسىنىڭ بوكس نىسانىنىڭ دارەجەسى رەتتەلگەندىكتەن، توقتاربەكتىڭ دارەجەسى 75 كيلوگرامنان 80 كيلوگرامعا جوعارىلاتىلدى.
2022 ـ جىلى ولار مەملەكەت كومانداسىمەن بىرگە ۇزاق ۋاقىت سىرتتا جاتتىعۋ جاساپ، جارىس وتكىزەدى، قازاقستان، كۆەيت، اراب بىرىككەن امىرلىگى، ا ق ش قاتارلى جەرلەرگە بارىپ، سول جەردىڭ سپورتشىلارمەن اۋىس ـ كۇيىس جاساپ، بىرگە جاتتىعۋ جۇرگىزەدى. وسى مەزگىلدە قىرۋار ناقتى شايقاس تاجىريبەلەرىن توپتايدى ءارى ەكى رەتكى حالىقارالىق ۇسىنىس جارىسىندا ءبىر رەت اعا جۇلدەگەرلىكتى، ءبىر رەت جۇلدەگەرلىكتى قولعا كەلتىرەدى.
بيىل 4 – ايدا توقتاربەك الدىمەن چۇڭچيڭدە وتكىزىلگەن مەملەكەتتىك بوكس جۇلدەلى جارىسىندا اعا جۇلدەگەر بولدى، ىلە ـ شالا تاعى دا مەملەكەتتىك كومانداعا ىلەسىپ، وزبەكستاننىڭ استاناسى تاشكەنتتە وتكىزىلگەن دۇنيە جۇزىلىك بوكس جۇلدەلى جارىسىنا قاتىناستى. ول زوۋ شىميڭنان كەيىنگى جۇڭگو ەرلەر بوكسىنان ەكىنشى رەتكى دۇنيە جۇزىلىك بوكس جۇلدەلى جارىسىندا شەشۋشى جارىسقا كىرگەن ءارى كۇمىس مەدەل العان سپورتىشى بولدى. (جالپىلىق انار بۇلت، بيڭتۋان گازەتى)
كەلۋ قاينارى: حالىق تورابى
جاۋاپتى رەداكتورى : مانەپ ەربول ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
