شي جينپيڭ گانسۋ لينشيا وبلىسى جيشىشان اۋدانىندا 6.2 بال جەر سىلكىنىسى تۋىلۋىنا بايلانىستى ماڭىزدى نۇسقاۋ بەردى
ىزدەۋ - قۇتقارۋ قىزمەتىن بار كۇشپەن ورىستەتىپ، اپاتقا ۇشىراعان بۇقارانى لايىقتى ورنالاستىرىپ، حالىق بۇقاراسىنىڭ ءومىرى مەن مال – مۇلكىنىڭ اماندىعىن ەڭ زور قۇلشىنىسپەن قامتاماسىزداندىرۋدى تالاپ ەتتى
لي چياڭ بەكىتۋ جاسادى
2023.12.19 15:16 كەلۋ قاينارى : حالىق تورابى
شينحۋا اگەنتتىگى، 12 – ايدىڭ 19 – كۇنى، بەيجيڭ. بەيجيڭ ۋاقىتى 12 - ايدىڭ 18 - كۇنى ساعات 23 تەن 59 مينۋت وتكەندە گانسۋ لينشيا وبلىسىنىڭ جيشىشان اۋدانىندا 6.2 بال جەر سىلكىنىسى تۋىلدى، سىلكىنىس كوزىنىڭ تەرەڭدىگى 10 كيلومەتر. قازىرگە دەيىن جەر سىلكىنىسىندە گانسۋدا 100 ادام، چيڭحايدا 11 ادام قازا بولدى، ءىشىنارا سۋ، ەلەكتر، قاتىناس، حابارلاسۋ سياقتى نەگىزدىك قۇرىلعىلار ءبۇلىندى.
جەر سىلكىنىسى تۋىلعاننان كەيىن ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ايرىقشا كوڭىل ءبولدى ءارى بىلاي دەپ ماڭىزدى نۇسقاۋ بەردى: گانسۋ لينشيا وبلىسى جيشىشان اۋدانىنداعى 6.2 بال جەر سىلكىنىسىندە اۋىر ءولىم - ءجىتىم بولدى، ىزدەۋ - قۇتقارۋ قىزمەتىن بار كۇشپەن ورىستەتىپ، جارالانعانداردى دەر كەزىندە قۇتقارىپ، ەمدەپ، ءولىم - ءجىتىمدى بارىنشا ازايتۋ كەرەك. اپات تۋىلعان رايون تەڭىز دەڭگەيىنەن بيىك وڭىرگە ورنالاسقان، كۇن سۋىق، جەر سىلكىنىسى جاعدايى مەن اۋا رايى وزگەرىسىن قاداعالاي باقىلاپ، قوسالقى اپاتتاردىڭ تۋىلۋىنان ساقتانۋ كەرەك. قاتەردەن اراشالاۋ، قۇتقارۋ - كومەكتەسۋ زاتتىق ماتەريالدارىن دايىنداۋدى جەدەل ۇيىمداستىرىپ، بۇلىنگەن ەلەكتر، حابارلاسۋ، قاتىناس، جىلۋمەن قامداۋ سياقتى نەگىزدىك قۇرىلعىلاردى جەدەل جوندەپ، اپاتقا ۇشىراعان بۇقارانى ۇيلەسىمدى ورنالاستىرىپ، بۇقارانىڭ نەگىزگى تۇرمىسىن قامتاماسىز ەتۋ ءارى قازا بولعانداردىڭ وتباسىنداعىلاردى جۇباتۋ سياقتى قىزمەتتەردى ويداعىداي ىستەۋ كەرەك. مەملەكەتتىك كەڭەس اپات تۋىلعان رايونعا قىزمەت گرۋپپاسىن جىبەرىپ، اپاتقا قارسى اتتانۋ، اپاتتان قۇتقارۋ قىزمەتىنە جەتەكشىلىك ەتۋى كەرەك، ازاتتىق ارميا، قارۋلى ساقشى بولىمدەرى جەرگىلىكتى ورىنداردىڭ حاۋىپتەن اراشالاۋ، اپاتتان قۇتقارۋ قىزمەتىنە بەلسەنە سايكەسىپ، حالىق بۇقاراسىنىڭ ءومىرى مەن مال – مۇلكىنىڭ اماندىعىن ەڭ زور قۇلشىنىسپەن قامتاماسىزداندىرۋى كەرەك.
ج ك پ ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ زۇڭليى لي چياڭ بەكىتۋ جاساپ، حاۋىپتەن اراشالاۋ، اپاتتان قۇتقارۋدى بار كۇشپەن ۇيىمداستىرىپ، قامالىپ قالعانداردى ىزدەستىرىپ، جارالىلاردى ەمدەپ، ءولىم - ءجىتىمدى ەڭ زور قۇلشىنىسپەن ازايتۋدى تالاپ ەتتى. قازىر قىس مەزگىلى، اپات احۋالىن تەزدەن انىقتاپ، بۇلىنگەن نەگىزدىك قۇرىلعىلاردى جەدەل جوندەپ، اپاتقا ۇشىراعان بۇقارانى جوتكەپ ورنالاستىرۋ قىزمەتىن ۇيلەسىمدى جاقسى ىستەپ، ينفورماتسيانى ۋاعىندا تاراتىپ، اپات تۋىلعان رايوننىڭ قوعام ورنىقتىلىعىن قورعاۋ كەرەك. جەر سىلكىنىسى جاعدايىن باقىلاۋ - ولشەۋدى كۇشەيتىپ، ءتۇرلى قوسالقى اپاتتاردىڭ تۋىلۋىنان ساقتانىپ، بۇقارانىڭ ءومىرىنىڭ، مال - مۇلكىنىڭ حاۋىپسىزدىگىن شىنايى قامتاماسىز ەتۋ كەرەك.
شي جينپيڭنىڭ نۇسقاۋى مەن لي چياڭنىڭ تالابىنا ساي، مەملەكەتتىك كەڭەس اپات تۋىلعان رايونعا قىزمەت گرۋپپاسىن جىبەرىپ، قۇتقارۋ، كومەكتەسۋ، ءبىر جاقتى ەتۋ سياقتى قىزمەتتەرگە جەتەكشىلىك ەتتى. گانسۋ، چيڭحاي كۇش ۇيىمداستىرىپ قاتەردەن قۇتقارۋ قىزمەتىن ورىستەتتى ءارى شاتىر، بۇكتەمەلى توسەك، ماقتا كورپە سياقتى اپاتتان قۇتقارۋ بۇيىمدارىن اپات تۋىلعان رايونعا شۇعىل جوتكەپ، اپاتقا ۇشىراعان بۇقارانى قۇتقارۋ، كومەكتەسۋ جۇمىسىن بار كۇشپەن ويداعىداي ىستەدى. قازىر جەر سىلكىنىسىنە قارسى اتتانىپ، اپاتتان قۇتقارۋدىڭ ءتۇرلى قىزمەتتەرى شۇعىل، ءتارتىپتى جۇرگىزىلۋدە.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
