شينجياڭنىڭ كوپ جەرىندە وسى اپتادا كۇن جىلى بولادى
2024.02.06 15:46 كەلۋ قاينارى : حالىق تورابى
كوكتەم مەرەكەسىنىڭ جاقىنداۋىمەن تابيعات تا شۋاعىن شاشۋدا. ءتىلشىنىڭ شينجياڭ اۋا رايى ستانسياسىنان ۇعىسۋىنشا، وسى اپتادا شينجياڭعا ىقپال جاسايتىن كۇشتى سۋىق اعىس جوق، تيانشاننىڭ سولتۇستىك بەتكەيى بۇلتتى، تۇماندى، قارلى بولسا، سولتۇستىك شينجياڭنىڭ باتىس سولتۇستىك بولەگى جاۋىن – شاشىندى بولادى. وسى اپتادا كوپتەگەن ادام اۋىلىنا قايتادى، شينجياڭنىڭ كوپ جەرىندە ساپارعا شىققاندار كوبەيەدى. ءۇرىمجى قالاسى مەن سانجى قالاسىنىڭ ەڭ جوعارى تەمپەراتۋراسى نولدەن تومەن 8 دەن 0 سەلتسي گرادۋسقا جوعارىلاپ، مەرەكەلىك زات ساتىپ العاندا دا وتە سۋىق بولمايدى؛ شاۋەشەك قالاسىنىڭ جوعارى تەمپەراتۋراسى 2 سەلتسي گرادۋسقا شىعادى، تۇستە سىرتقا شىققاندا جانعا جايلى بولىپ، جازعىتۇرىمعى جايما شۋاق كۇيگە بولەيدى؛ قۇلجا قالاسى، حوتان قالاسى جانە قاشقار قالاسىندا كۇندىك ەڭ جوعارى اۋا تەمپەراتۋراسى 10 سەلتسي گرادۋسقا كوتەرىلىپ، كوكتەمنىڭ العاشقى لەبىن اڭعارتادى.
2 - ايدىڭ 6 - كۇنى (سەيسەنبى) تۇننەن 7 – كۇنى (سارسەنبى) تۇنگە دەيىن تارباعاتاي ايماعىنىڭ سولتۇستىگى، التاي ايماعىنىڭ باتىس بولەگى، ءۇرىمجى قالاسىنىڭ وڭتۇستىك قالا ماڭى مەن دابانچىڭ ءوڭىرى، سانجى حۇيزۋ اۆتونوميالى وبلىسىنىڭ شىعىس بولەگى قاتارلى جەرلەردىڭ ءبىر ءبولىم وڭىرلەرىندە قيىس شىعىستان 5 تە 6 بال جەل سوعادى، جەل وتتەرىندە 9 دا 10 بال بوران سوعادى، كەي جەرلەردە قارلى بوران سوعادى.
2 – ايدىڭ 8 – كۇنى (بەيسەنبى) كۇندىزدەن 2 – ايدىڭ 9 – كۇنى (جۇما) كۇندىزگە دەيىن، 2 –ايدىڭ 10 – كۇنى (سەنبى) تۇننەن 11 – كۇنى (جەكسەنبى) كۇندىزگە دەيىن سولتۇستىك شينجياڭنىڭ باتىس بولەگى مەن سولتۇستىك بولەگىندە قار جاۋادى، مۇنىڭ ىشىندە ىلە قازاق اۆتونوميالى وبلىسىنىڭ باتىس بولەگى، تارباعاتاي ايماعىنىڭ سولتۇستىگى، التاي ايماعىنىڭ تاۋلى رايونى قاتارلى جەرلەردىڭ ءىشىنارا وڭىرلەرىندە ورتاشادان باستاپ قالىڭ قارعا دەيىن جاۋادى، كەي جەرلەردە ەرەكشە قالىڭ قار جاۋادى، سولتۇستىك شينجياڭنىڭ جەل وتتەرىندە باتىس سولتۇستىكتەن 9 دا 10 بال بوران سوعادى. تاۋلى وڭىرلەردىڭ ءىشىنارا جەرلەرىندە قار جاۋىپ، قارلى بوران سوعۋدىڭ قاتىناس، ءجۇرىس - تۇرىس سياقتىلارعا ءتيىمسىز ىقپال جاساۋىنان ساقتانۋ كەرەك.
ءۇرىمجى قالاسىندا وسى اپتادا قالىڭ قار جاۋىپ، تەمپەراتۋرا تومەندەيدى، 2 – ايدىڭ 6 - كۇنىنەن (سەيسەنبى) 2 – ايدىڭ 8 – كۇنىنە (بەيسەنبى) دەيىن، 2 – ايدىڭ 9 – كۇنىنەن (جۇما) 2 – ايدىڭ 10 – كۇنىنە (سەنبى) دەيىن وڭتۇستىك قالا ماڭى رايونىنان ساياپىلعا دەيىن شىعىس وڭتۇستىكتەن 6 دا 7 بال بوران سوعادى، ۇلانبايدان حۇڭيانچىعا دەيىنگى وڭىردە مەزەتتىك جەل كۇشى 9 بال اينالاسىندا بولادى. وسى اپتانىڭ ىشىندە باسقا ۋاقىتتاردا ءارقايسى رايونداردا كۇن نەگىزىنەن اشىق نەمەسە بۇلتتى بولادى، نەگىزگى قالا رايونى، ميدۇڭ رايونى جانە گانچۋانباۋ وڭىرلەرىندە كەيدە تۇمان تۇسەدى، جەل كۇشى زور بولمايدى، وسى اپتادا نەگىزگى قالا رايونىنىڭ كۇندىك ەڭ تومەن تەمپەراتۋراسى نولدەن تومەن 17 دە نولدەن تومەن 9 سەلتسي گرادۋس اينالاسىندا بولادى، كۇندىك ەڭ جوعارى تەمپەراتۋراسى نولدەن تومەن 8 دە 0 سەلتسي گرادۋس اينالاسىندا بولادى.
شينجياڭ اۋا رايى ورتالىعىنىڭ مەجەسىنە نەگىزدەلگەندە، 2 - ايدا بۇكىل شينجياڭنىڭ باسىم كوپ رايوندارىندا اۋا تەمپەراتۋراسى جىلداعىدان ءسال جوعارى بولادى، جاۋىن – شاشىن مولشەرى جىلداعىمەن سالىستىرعاندا ازىراق نەمەسە ەرەكشە از، تەك سولتۇستىك شينجياڭنىڭ سولتۇستىگى مەن وڭتۇستىك شينجياڭنىڭ باتىس بولەگىندە عانا كوبىرەك بولادى. مەجەمەن 2 ـ ايداعى اۋا رايى شارت ـ جاعدايى بۇكىل شينجياڭنىڭ باسىم كوپ جەرىندەگى دۇمبە ءبيداي مەن جەمىس ورمانىنىڭ قىستان امان وتۋىنە نەگىزىنەن ءتيىمدى بولىپ، سولتۇستىك شينجياڭنىڭ سولتۇستىك بولىگىندەگى مال شارۋاشىلىق وندىرىسىنە ازداپ ىقپال جاسايدى. جەر ـ جەردىڭ دۇمبە ءبيداي ەگىلەتىن وڭىرلەردىڭ قار قاباتىن قورعاۋعا كوڭىل ءبولۋىن، وڭتۇستىك شينجياڭنىڭ ەگىن شارۋاشىلىق رايوندارىنىڭ لايىقتى ۋاقىتتا دۇمبە ءبيداي مەن جەمىس ورمانىنىڭ قىستان ءوتۋىن باقىلاۋ ـ ولشەۋ قىزمەتىن ورىستەتۋىن، سونىمەن بىرگە ەرتە كوكتەمدەگى داقىلدارعا ەگىس دايىندىعىن جانە تۇقىم سەبۋ قىزمەتىن ويداعىداي ىستەۋىن ۇسىنىس ەتەمىز.
كەلۋ قاينارى: حالىق تورابى
جاۋاپتى رەداكتورى : مانەپ ەربول ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
