شي جينپيڭ ۆەنگريانىڭ زۇڭليى وربانمەن كەڭەس وتكىزدى
2024.05.10 16:49 كەلۋ قاينارى : حالىق تورابى
 |
سول جەر ۋاقىتى 5 - ايدىڭ 9 - كۇنى تۇستەن كەيىن مەملەكەت ءتوراعاسى شي جينپيڭ بۋداپەشت زۇڭلي سارايىندا ۆەنگريانىڭ زۇڭليى وربانمەن كەڭەس وتكىزدى.
سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن
|
«حالىق گازەتى»، 5 - ايدىڭ 9 - كۇنى، بۋداپەشت (تىلشىلەر جياڭ يۇن، ليۋ شاۋحۋا). سول جەر ۋاقىتى 5 - ايدىڭ 9 - كۇنى تۇستەن كەيىن مەملەكەت ءتوراعاسى شي جينپيڭ بۋداپەشت زۇڭلي سارايىندا ۆەنگريانىڭ زۇڭليى وربانمەن كەڭەس وتكىزدى. ەكى ەل باسشىلارى جۇڭگو - ۆەنگريا قارىم - قاتىناسىن جاڭا داۋىردەگى بارلىق جاعدايدا بىردەي جاپپاي ستراتەگيالىق سەرىكتەستىك قارىم - قاتىناس دەڭگەيىنە كوتەرەتىندەرىن جاريالادى.
شي جينپيڭ بىلاي دەپ اتاپ كورسەتتى: قازىر جۇڭگو - ۆەنگريا قارىم - قاتىناسى تاريحتاعى ەڭ جاقسى مەزگىلدە تۇر. جۇڭگو مەن ۆەنگريانىڭ جاپپاي ستراتەگيالىق سەرىكتەستىك قارىم - قاتىناسى جوعارى دەڭگەيدە دامىپ، ەكى ەل ساياسي سەنىمدىلىكتى ۇزدىكسىز تەرەڭدەتىپ، ءار سالاداعى سەلبەستىكتە سۇبەلى تابىستارعا قول جەتكىزىپ، جاڭاشا حالىقارالىق قارىم - قاتىناس ورناتۋدىڭ ۇلگىسىن ورناتتى. بيىل − جۇڭگو مەن ۆەنگريا ديپلوماتيالىق قارىم - قاتىناس ورناتقانىنىڭ 75 جىلدىعى، جۇڭگو - ۆەنگريا قارىم - قاتىناسىنىڭ دامۋى جاڭا ماڭىزدى ورايدى قارسى الدى. ەكى ەل ۇزدىكسىز ءوزارا سەنىمدى، ءوزارا كومەكتەسەتىن جاقسى دوس، سەلبەسىپ تەڭ يگىلىككە كەنەلەتىن جاقسى سەرىك بولىپ، جاڭا داۋىردەگى بارلىق جاعدايدا بىردەي جاپپاي ستراتەگيالىق سەرىكتەستىك قارىم - قاتىناس ورناتۋدى وراي ەتىپ، ەكى ەلدىڭ سەلبەستىگىنە تىڭ دا قۇدىرەتتى قوزعاۋشى كۇش قوسىپ، ەكى ەل حالىقتارىنا اناعۇرلىم كوركەم بولاشاق جاراتۋى كەرەك.
شي جينپيڭ بىلاي دەپ باسا دارىپتەدى: جۇڭگو جاق ۆەنگريا جاقتىڭ ۇزاق ۋاقىتتان بەرى جۇڭگوعا دوستىق ساياسات ۇستانىپ، تايۋانعا، شياڭگاڭعا، ادامدىق ۇقىققا ساياتىن ماسەلەلەردە تۋدى ايقىن ۇستاي وتىرىپ جۇڭگونى باتىل قولداعانىن القايدى. جۇڭگو جاق ۆەنگريانىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىمەن ءجۇرۋىن باتىل قولدايدى، ۆەنگريا جاقپەن ساياسي سەنىمدىلىكتى بەكەمدەپ، ەكى ەل ۇكىمەتتەرىنىڭ، زاڭ شىعارۋ قۇرىلىمدارىنىڭ، ساياسي پارتيالارىنىڭ اۋىس - كۇيىسىن كۇشەيتىپ، ءبىر - ءبىرىنىڭ وزەكتى مۇددەسى مەن كوڭىل ءبولىپ وتىرعان كەلەلى ماسەلەلەرىن ۇزدىكسىز باتىل قولداۋدى قالايدى. جۇڭگو ۇلگىسىندەگى وسىزامانداندىرۋ، ءسوز جوق، ۆەنگريانى قامتىعان دۇنيە جۇزىندەگى ەلدەرگە اناعۇرلىم كوپ وراي اكەلەدى، ۆەنگريانىڭ جۇڭگو ۇلگىسىندەگى وسىزامانداندىرۋ جولىنداعى ساپارلاسىنا اينالۋىن قارسى الادى. جۇڭگو جاق ۆەنگريا جاقپەن ەكى ەلدىڭ دامۋ ستراتەگياسىن ۇشتاستىرۋدى كۇشەيتىپ، جۇڭگو - ۆەنگريا ۇكىمەتتەرى اراسىنداعى ”ءبىر بەلدەۋ، ءبىر جول“ سەلبەستىك كوميتەتى سياقتى مەحانيزمدەردىڭ رولىن ويداعىداي ساۋلەلەندىرىپ، نەگىزدىك قۇرىلعى، جاسىل ەنەرگيا سياقتى سالالارداعى سەلبەستىكتى تارتىپپەن ىلگەرىلەتىپ، ۆەنگريا - سەربيا تەمىر جول قۇرىلىسىن ۋاعىندا ورىنداۋدى ءۇمىت ەتەدى. تازا ەنەرگيا، جاساندى زەردە سياقتى جاڭادان گۇلدەنگەن سالالارداعى سەلبەستىكتى بەلسەنە كەڭەيتۋ كەرەك.
شي جينپيڭ بىلاي دەدى: بىلتىر جىل باسىندا مەن ۆەنگريا - جۇڭگو قوس ءتىل مەكتەبىنىڭ وقۋشىلارىنا جاۋاپ حات جازىپ، ەكى ەل جاستارى مەن ورەندەرىن جۇڭگو - ۆەنگريا دوستىق ىستەرىن بىرگە جالعاستىرۋعا، دامىتۋعا شابىتتاندىردىم. ەكى جاق ەكى ەلدىڭ ءتىل وقىتۋىن ۇزدىكسىز قولداپ، گۋمانيتارلىق اۋىس - كۇيىستى كۇشەيتۋى كەرەك. جۇڭگو ۆەنگريامەن كوپ جاقتى قارىم - قاتىناستى، سەلبەستىكتى كۇشەيتىپ، تەڭ، ءتارتىپتى دۇنيە ءجۇزىنىڭ كوپ ۇيەكتەنۋى مەن جالپىعا ءتيىمدى، سيىسىمدى ەكونوميكانىڭ جاھاندانۋىن دارىپتەپ، حالىقارالىق ادىلدىك پەن ادىلەتتىلىكتى قورعاپ، دۇنيە جۇزىلىك جونگە سالۋدىڭ اناعۇرلىم ءادىل، ۇيلەسىمدى باعىتقا قاراي دامۋىن ىلگەرىلەتىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋگە بەلسەندى قۇلشىنىس جاساۋدى قالايدى.
شي جينپيڭ مىنالاردى اتاپ كورسەتتى: ەۆروپا − كوپ ۇيەكتى دۇنيە جۇزىندەگى ماڭىزدى ۇيەك، جۇڭگو ۇلگىسىندەگى وسىزامانداندىرۋدى جۇزەگە اسىرۋداعى ماڭىزدى سەرىك. ۆەنگريانىڭ بيىل سوڭعى جارتى جىلدا ەۆروپا وداعىنىڭ كەزەكتى ءتوراعا ەلى رەتىندە جۇڭگو - ەۆروپا قارىم - قاتىناسىنىڭ اقاۋسىز، ورنىقتى دامۋىن ىلگەرىلەتۋدە بەلسەندى رول اتقارۋىن ءۇمىت ەتەمىن. جۇڭگو - ورتا، شىعىس ەۆروپا ەلدەرى سەلبەستىگى قۇدىرەتتى ىشكى قوزعاۋشى كۇشكە يە، ۆەنگريانىڭ ماڭىزدى رولىن ۇزدىكسىز ساۋلەلەندىرىپ، جۇڭگو - ورتا، شىعىس ەۆروپا ەلدەرى سەلبەستىگى ارقىلى ءار ەل حالقىنا ءتىپتى دە زور باقىت جاراتۋدى ىلگەرىلەتۋىن ءۇمىت ەتەمىن.
وربان مىنالاردى ءبىلدىردى: ءتوراعا شي جينپيڭنىڭ ۆەنگريادا مەملەكەتتىك ساپاردا بولعانىن قىزۋ قارسى الامىز. 15 جىلدىڭ الدىندا ءسىزدىڭ ۆەنگرياعا ساپارلاي كەلگەنىڭىز كۇنى كەشەگىدەي كوكەيىمدە سايراپ تۇر، 15 جىلدان بەرى ءوز ەلدەرىمىز بەن ۆەنگريا – جۇڭگو قارىم - قاتىناسىنىڭ وراسان زور ىلگەرىلەۋشىلىككە قول جەتكىزگەنىنە قاتتى قۋاندىم. ۆەنگريا - جۇڭگو قارىم - قاتىناسىنىڭ تابىستى بولۋى ۇلكەندى - كىشىلى ەلدەردىڭ ءوزارا قۇرمەت ەتىپ، ءوزارا پايدا جەتكىزىپ، سەلبەستىك جاساۋىنا بولاتىنىن دالەلدەدى. ءسىزدىڭ ساپارىڭىز ۆەنگريا مەن جۇڭگو اراسىنداعى تەرەڭ دوستىق پەن وراسان زور كومەسكى كۇشتى تاعى ءبىر رەت ايگىلەدى، بۇل ۆەنگريا مەن ۆەنگريا - جۇڭگو قارىم - قاتىناسى جونىنەن ماڭىزدى تاريحي مانگە يە. ءبىز ۆەنگريا - جۇڭگو قارىم - قاتىناسىنىڭ ورنىن جاڭا داۋىردەگى جاپپاي ستراتەگيالىق سەرىكتەستىك قارىم - قاتىناس دەڭگەيىنە كوتەرۋدى جاريالاپ، بولاشاقتاعى ۆەنگريا - جۇڭگو قارىم - قاتىناسىنىڭ دامۋىنا ايقىن باعدار كورسەتتىك. مەن ۆەنگريا - جۇڭگو قارىم - قاتىناسىنىڭ بولاشاعىنا كامىل سەنەمىن.
وربان مىنالاردى ءبىلدىردى: ۆەنگريا جاق جۇڭگو جاقتىڭ ۆەنگريا قيىنشىلىققا تاپ بولعاندا دەر كەزىندە قاستەرلى قولداۋ كورسەتكەنىن ۇمىتپايدى، جۇڭگونىڭ مىزعىماس دوسى بولا بەرەدى، جۇڭگونىڭ ءوزىنىڭ وزەكتى مۇددەسى مەن ورىندى ۇقىعىن قورعاۋىن قولدايدى. ۆەنگريا جاق بۇرىن دا ءبىر جۇڭگو پرينسيبىندە تاباندى بولعان، قازىر دە، بولاشاقتا دا سولاي بولا بەرەدى. ۆەنگريا مەن جۇڭگونىڭ ”ءبىر بەلدەۋ، ءبىر جولدى“ بىرگە قۇرۋى وراسان زور تابىسقا قول جەتكىزىپ، ۆەنگرياعا جۇمىستانۋ ورايىن جاراتىپ، حالىق تۇرمىسىن جاقسارتتى. ۆەنگريا جاق جۇڭگو جاقپەن ”ءبىر بەلدەۋ، ءبىر جول“ اياسىندا ۆەنگريا - سەربيا تەمىر جولى سياقتى ءىرى نەگىزدىك قۇرىلعى نىساندارى سەلبەستىگىن ۇزدىكسىز ىلگەرىلەتىپ، ەكونوميكا - ساۋدا، جاڭا ەنەرگيا سياقتى سالالارداعى سەلبەستىكتى كۇشەيتۋدى ءۇمىت ەتەدى، اناعۇرلىم كوپ جۇڭگو كاسىپورىندارىنىڭ ۆەنگرياعا بارىپ قارجى قوسىپ، سەلبەستىك جاساۋىن قارسى الادى. ۆەنگريا جاق ايتىلمىس ”ءوندىرىس قۋاتى ارتىپ قالدى“ نەمەسە ”حاۋىپ – قاتەردى جوعالتۋ“ دەگەن سياقتى ايتىلىمداردى قۇپتامايدى. ۆەنگريا جاقتىڭ جۇڭگومەن سەلبەستىكتى تەرەڭدەتۋ بەكىمى مىزعىمايدى، ەشقانداي كۇشتىڭ كەدەرگىسىنە ۇشىرامايدى. ۆەنگريا جاق ءتوراعا شي جينپيڭ العا قويعان جەلىلەس دۇنيە جۇزىلىك باستامالاردى قولدايدى، جۇڭگونىڭ دۇنيە ءجۇزىنىڭ بەيبىتشىلىگىن جەبەۋدە اتقارعان ماڭىزدى رولىن القايدى. جۇڭگونىڭ دامۋى ەۆروپا جونىنەن حاۋىپ - قاتەر ەمەس، وراي. ۆەنگريا جاق جۇڭگو جاقپەن كوپ جاقتى قارىم - قاتىناستى، سەلبەستىكتى كۇشەيتىپ، دۇنيە ءجۇزىنىڭ بەيبىتشىلىگى مەن ورنىقتىلىعىن بىرگە قورعاۋدى قالايدى. سوڭعى جارتى جىلداعى ەۆروپا وداعىنىڭ كەزەكتى ءتوراعا ەلى رەتىندە ۆەنگريا ەۆروپا - جۇڭگو قارىم - قاتىناسىنىڭ اقاۋسىز دامۋىن جانە ورتا، شىعىس ەۆروپا ەلدەرىنىڭ جۇڭگومەن سەلبەستىگىن ىلگەرىلەتۋ جولىندا بەلسەندى قۇلشىنىستار جاساۋدى قالايدى.
ەكى ەل باسشىلارى ۋكراينا داعدارىسى جونىندە ىشكەرىلەي پىكىر اۋىستىردى. شي جينپيڭ بىلاي دەپ باسا دارىپتەدى: جۇڭگو جاق باستان - اياق تاتۋلاسۋعا ءناسيحاتتاپ، كەلىسسوزدى جەبەۋگە كۇش سالىپ كەلەدى، قاتىستى جاقتارمەن بىرگە بەيبىتشىلىكتى ەرتەرەك جۇزەگە اسىرۋ ءۇشىن ۇزدىكسىز بەلسەندى قۇلشىنىس جاساۋدى قالايدى.
كەڭەستەن كەيىن ەكى ەل باسشىلارى ”ءبىر بەلدەۋ، ءبىر جولدى“ بىرگە قۇرۋ، ەكونوميكا - ساۋدا، قارجى قوسۋ، عىلىم - تەحنيكا، مادەنيەت، اۋىل شارۋاشىلىعى سياقتى سالالارداعى كوپ ءتۇرلى ەكى جاقتى سەلبەستىك قۇجاتتارىن اۋىستىرۋعا بىرگە كۋا بولدى.
ەكى ەل باسشىلارى تاعى تىلشىلەرمەن كەزدەستى (بولەك جاريالاندى).
ەكى جاق «جۇڭحۋا حالىق رەسپۋبليكاسى مەن ۆەنگريانىڭ جاڭا داۋىردەگى جاپپاي ستراتەگيالىق سەرىكتەستىك قارىم - قاتىناس ورناتۋ جونىندەگى بىرلەسكەن مالىمدەمەسىن» جانە ساپار جەتىستىكتەرى قۇجاتتارىنىڭ ءتىزىمىن جاريالادى.
سول كۇنى كەشتە وربان مەن حانىمى رەۆوي كاستلە بايىرعى قالاسىندا شي جينپيڭ مەن پىڭ لييۋانعا ارناپ سالتاناتتى قارسى الۋ قوناعاسىن بەردى.
ساي چي، ۋاڭ ي قاتارلىلار جوعارىداعى قيمىلدارعا قاتىناستى.
كەلۋ قاينارى: حالىق تورابى
جاۋاپتى رەداكتورى : مانەپ ەربول ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2024 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
