ءسىزدىڭ ءجۇرىس – تۇرىسىڭىزبەن قاتىستى! مىناداي مەملەكەتتىك ءماجبۇرلى سيپاتتاعى ولشەم رەسمي جاريالاندى
2024.05.08 15:24 كەلۋ قاينارى : حالىق تورابى
ەلەكترلى ۆەلوسيپەتتىڭ ليتي يوندى اككۋمۋلياتورىنىڭ ساپالىق حاۋىپسىزدىك ورەسىن اناعۇرلىم جوعارىلاتىپ، كاسىپ سالاسىنىڭ حاۋىپسىز، اقاۋسىز دامۋىن ىلگەرىلەتۋ ءۇشىن، ونەركاسىپ جانە ينفورماتسيالاندىرۋ مينيسترلىگى جاۋاپتى بولىپ دايىنداعان «ەلەكترلى ۆەلوسيپەتكە پايدالاناتىن ليتي يوندى اككۋمۋلياتوردىڭ حاۋىپسىزدىگى جونىندەگى تەحنيكالىق ولشەم» (GB 43854—2024، تومەندە قىسقارتىلىپ «تەحنيكالىق ولشەم» دەلىنەدى) اتتى مەملەكەتتىك ءماجبۇرلى سيپاتتاعى ولشەمدى جۋىردا مەملەكەتتىك بازاردى باقىلاۋ – باسقارۋ باس مەكەمەسى (مەملەكەتتىك ولشەم كوميتەتى) رەسمي جاريالادى.
قازىر ەلەكترلى ۆەلوسيپەت تۇتىنۋشىلاردىڭ كۇندەلىكتى تۇرمىسىنداعى ماڭىزدى قاتىناس قۇرالىنا اينالدى، ەلىمىز ەلەكترلى ۆەلوسيپەتتى وندىرەتىن ءىرى ەل بولۋمەن بىرگە، ەلەكترلى ۆەلوسيپەتتى پايدالانۋ جاعىندا دا ءىرى ەل سانالادى. قازىر ەلىمىزدە ەلەكترلى ۆەلوسيپەتتىڭ قوعامداعى مولشەرى 350 ميلليوننان استى، 2023 – جىلى ەلىمىز بويىنشا بەلگىلەنگەن كولەمنەن جوعارى كاسىپورىندار وندىرگەن ەلەكترلى ۆەلوسيپەتتەردىڭ سانى جيىنى 42 ميلليون 280 مىڭ ۆەلوسيپەت بولعان. ەلەكترلى ۆەلوسيپەتكە پايدالانعان اككۋمۋلياتور، باستىسى، قورعاسىندى اككۋمۋلياتور جانە ليتي يوندى اككۋمۋلياتور بولىپ ەكى تۇرگە بولىنەدى. ەلىمىزدە، باستىسى، ەلەكترلى ۆەلوسيپەتتىڭ تانىمالى ماركالارىن وندىرەتىن كاسىپورىنداردىڭ ەلەكترلى ۆەلوسيپەتتەرىنىڭ ەڭ جاڭا تيپىندە ليتي يوندى اككۋمۋلياتوردىڭ سالىستىرماسى قازىرگە دەيىن %20 تەن اسقان.
«تەحنيكالىق ولشەمدە» دارا تۇلعالى باتەريا مەن باتەريالار قۇراماسى سىندى ەكى ءتۇرلى دەڭگەيدەن «ەلەكترلى ۆەلوسيپەتتىڭ حاۋىپسىزدىگى جونىندەگى تەحنيكالىق ولشەمگە» (GB 17761) ۇيلەسەتىن ەلەكترلى ۆەلوسيپەتكە پايدالاناتىن ليتي يوندى باتەريانىڭ حاۋىپسىزدىگى جونىندەگى تالاپتار مەن سىناقتان وتكىزۋ تاسىلدەرى بەلگىلەنگەن. مۇندا دارا تۇلعالى باتەريا جاعىندا، باستىسى، شەكتەن تىس زاريادتاۋ، شەكتەن تىس زاريادسىزداندىرۋ، سىرتقى جاقتاعى قىسقا تۇيىقتالۋ، بەتالدى پايدالانۋدان تەمپەراتۋراسى جوعارىلاۋ، ينەمەن ءپىسۋ، بەلگىلەر قاتارلى 6 ءتۇرلى جاقتاعى حاۋىپسىزدىككە قويىلاتىن تالاپتار ويلاستىرىلعان؛ باتەريا قۇراماسى جاعىندا ەلەكتر حاۋىپسىزدىگى، مەحانيكا حاۋىپسىزدىگى، ورتا حاۋىپسىزدىگى، جىلۋدى تاراتۋ، زاريادتاۋ جاعىندا ءوزارا مويىنداۋ جانە سايكەسۋ، ساندى مالىمەتتەردى جيناقتاۋ، ولشەم قاتارلى 7 ءتۇرلى جاقتاعى حاۋىپسىزدىككە قويىلاتىن 22 ءتۇرلى تالاپ ويلاستىرىلعان.
«تەحنيكالىق ولشەم» ەلەكترلى ۆەلوسيپەتكە ليتي يوندى اككۋمۋلياتور قولدانۋدىڭ حاۋىپسىزدىگى جونىندەگى مەملەكەتتىك ءماجبۇرلى ولشەم بولىپ، ەلەكترلى ۆەلوسيپەتكە پايدالانىلاتىن ليتي يوندى اككۋمۋلياتوردى جوبالاۋدى، ءوندىرۋدى، ساتۋدى جۇيەگە ءتۇسىرىپ، ءونىمنىڭ ساپالىق حاۋىپسىزدىگىنىڭ ورەسىن جوعارىلاتۋدا ماڭىزدى ءمان الادى، ەلەكترلى ۆەلوسيپەت سالاسىنىڭ اقاۋسىز، ءتارتىپتى دامۋىن ىلگەرىلەتەدى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2024 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
