قازاقستاننىڭ جۇڭگودا تۇراتىن باس ەلشىسى ارناۋلى سۇحباتتا بولدى: جۇڭگو 70 جىلدا جۇرتتى جالت قاراتقان كەرەمەت تابىستارعا قول جەتكىزدى
2019.03.12 16:49 كەلۋ قاينارى : حالىق تورابى
شينحۋا تورابى، 3 – ايدىڭ 9 – كۇنى، بەيجيڭ (حۋاڭ سىلۋ، ۋ چاڭحۇڭ، حو يان) «وتكەن 70 جىلدا، جۇڭگو جۇرتتى جالت قاراتقان كەرەمەت تابىستارعا قول جەتكىزدى. ءبىز جۇڭگو ەكونوميكاسىنىڭ دۇنيە ءجۇزى ەكونوميكاسىنىڭ اۋمالى – توكپەلى جاعدايىندا ورنىقتى دامىپ، دامۋدىڭ كەڭ كومەسكى كۇشكە يە بولاتىنىنا سەنەمىز»، — دەدى قازاقستاننىڭ جۇڭگودا تۇراتىن باس ەلشىسى شاحرات نۇرىشەۆ جۇڭگونىڭ ەكى ءماجىلىسى اشىلىپ جاتقان مەزگىلدە شينحۋا تورابىنىڭ ارناۋلى سۇحباتىن قابىلداعاندا.
ارناۋلى سۇحباتتىڭ ماڭىزدى مازمۇندارى مىناداي:
ءتىلشى: بيىل جاڭا جۇڭگو قۇرىلعاندىعىنىڭ 70 جىلدىعى، سونىمەن بىرگە جاپپاي دوڭگەلەك داۋلەتتى قوعام قۇرىپ شىعۋدىڭ شەشۋشى جىلى. بيىلعى جۇڭگونىڭ ەكى ءماجىلىسى جونىندە قانداي تاقىرىپتارعا باسا نازار اۋداراسىز؟
نۇرىشەۆ: بيىل جاڭا جۇڭگو قۇرىلعاندىعىنىڭ 70 جىلدىعى، سونىمەن بىرگە، جۇڭگونىڭ جاپپاي دوڭگەلەك داۋلەتتى قوعام قۇرىپ شىعۋ ۇلى نىساناسىن جۇزەگە اسىراتىن بەلەستىك مانگە يە جىل. كوپشىلىك جۇڭگونىڭ ساياسي جانە قوعامدىق، ەكونوميكالىق سالالارىندا تۋىلعان ءارقانداي ءىستىڭ تۇتاس حالىقارالىق قوعامنىڭ نازارىن اۋداراتىنىن انىق كوردى، ويتكەنى جۇڭگو ەكونوميكاسىنىڭ ۇزدىكسىز دامۋى بۇكىل جەر شارى ەكونوميكاسىنىڭ ارتۋىندا بەلسەندى ىقپالعا يە.
جۇڭگونىڭ كورشىلەس جانە ستراتەگيالىق سەرىگى بولعان قازاقستان جۇڭگونىڭ قوعامدىق يگىلىكتى جوعارىلاتۋ، حالىق تۇرمىسىنىڭ ساپاسىن جاقسارتۋ، كەدەيلىكتى جويۋ جانە لاستانۋدىڭ الدىن الۋ قاتارلى جاقتاردا قولعا كەلتىرگەن تابىستارىن جوعارى باعالايدى. وسى جاقتاردا قازاقستان - جۇڭگو ەكى ەل باسشىلارىنىڭ ستراتەگيالىق باعىتى ۇقساستىققا يە. قازاقستان پرەزيدەنتى نۇرسۇلتان نازاربايەۆ ايتقانداي، ەگەر ءارقانداي ەكونوميكالىق جەتىستىك پەن وڭىرلىك ساياسي سايىستاعى جەڭىس ءاربىر ادامعا باقىت اكەلمەيتىن بولسا، وندا ونىڭ ەشقانداي ءمانى بولمايدى. بۇل 21 – عاسىرداعى مەملەكەتتىڭ گۇلدەنىپ – كوركەيۋىنىڭ جان تامىرى، سونداي – اق، ءبىر مەملەكەتتىڭ ءۇرتىس دامۋىنىڭ زاڭدىلىعى.
جاقىندا، قازاقستاننىڭ «نۇر وتان» پارتياسى استانا قالاسىندا 18 – كەزەكتى ۋاكىلدەر قۇرىلتايىن وتكىزىپ، «‹نۇر وتان› پارتياسىنىڭ 2030 - جىلعا دەيىنگى دامۋ جوباسى» ماقۇلداندى. جوبادا جاڭا جەتەكشى باعىت پەن الدىمەن ىستەۋگە ءتيىستى ىستەردى تۇراقتاندىردى، مىسالى، حالىقتىڭ جوعارى تۇرمىس ورەسىن كەپىلدەندىرۋ، كىرىستى ارتتىرۋ جانە تومەن كىرىستى بۇقاراعا جاردەم بەرۋ، تومەن كىرىستى بۇقارانىڭ تۇرار جاي ماسەلەسىن شەشىم ەتۋ، سونداي – اق، وقۋ – اعارتۋ جانە ەمدەۋ – دەنساۋلىق ساقتاۋ جاعىنداعى قىزمەتتەردى جاقسارتۋ قاتارلىلار. جۇڭگو وسى ماسەلەلەردى شەشىم ەتۋ بارىسىندا مول ءارى تابىستى تاجىريبەلەر توپتادى. سوندىقتان، بيىلعى ەكى ماجىلىستە وسى جاقتارعا قاتىستى «جۇڭگو جوباسىنا» نازار اۋدارىپ وتىرمىز.
ءتىلشى: بيىل جۇڭگو ەكىنشى كەزەكتى «ءبىر بەلدەۋ، ءبىر جول» حالىقارالىق سەلبەستىك فورۋمىن وتكىزبەكشى. سىزشە، «ءبىر بەلدەۋ، ءبىر جول» دارىپتەمەسى دۇنيە جۇزىنە قانداي ىقپال كورسەتتى دەپ قارايسىز؟ «ءبىر بەلدەۋ، ءبىر جول» دارىپتەمەسى مەن قازاقستان ورتاعا قويعان «نۇرلى جول» جاڭا ەكونوميكالىق ساياساتىن ۇشتاستىرۋ سەلبەستىگىنىڭ اياق الىسى مەن بولاشاعىنا قانداي باعا بەرەسىز؟
نۇرىشەۆ: جۇڭگو ورتاعا قويعان «ءبىر بەلدەۋ، ءبىر جول» دارىپتەمەسى كەلەلى ماڭىزعا يە، ول ورتاق دامۋ ۇستانىمىنا ۇيلەسەدى، دۇنيە ءجۇزى ساۋداسى مەن قارجىلاندىرۋىنىڭ ەركىندەنۋ ورەسىن كورنەكتى جوعارىلاتتى. قازىر «ءبىر بەلدەۋ، ءبىر جول» دارىپتەمەسى بەس قۇرلىقتاعى كوپتەگەن ەلدەردىڭ قولداۋىنا يە بولدى، جۇڭگو 150 دەن ارتىق مەملەكەتپەن جانە حالىقارالىق ۇيىمدارمەن سەلبەستىك كەلسىمىنە قول قويدى، جۇڭگونىڭ «ءبىر بەلدەۋ، ءبىر جول» بويىنداعى ەلدەرمەن زات ساۋداسىنىڭ جالپى سوماسى 6 تريلليون دوللارعا جەتتى. بۇل جەلى بويىنداعى ەلدەردىڭ دامۋى مەن حالىقتىڭ باقىتقا كەنەلۋىنە ءتيىمدى ەكەنىندە داۋ جوق.
قازاقستان ەۆروپا – ازيا ۇلى قۇرلىعىنىڭ تۇيىلىسكەن جەرىنە ورنالاسقان. بۇل جاعراپيالىق ورىن ەلىمىزدى ۇقساماعان ۇلى قۇرلىق، رايون جانە مەملەكەتتەر اراسىنداعى ماڭىزدى كوپىرگە اينالدىردى. قازىر ەلباسى نازاربايەۆ ورتاعا قويعان «نۇرلى جول» جاڭا ەكونوميكالىق ساياساتىن جۇڭگونىڭ «ءبىر بەلدەۋ، ءبىر جول» دارىپتەمەسىمەن ۇشتاستىرۋ قىزمەتى ويداعىداي جۇرگىزىلۋدە. قازىر جالپى 55 نىسان اتقارىلۋ ۇستىندە، جالپى قۇنى 27 ميلليارد امەريكا دوللارىنان اسادى. دۇنيە ءجۇزى ەكونوميكاسىنىڭ ارتۋ قارقىنى باياۋلاعان جاعدايدا، وسى نىساندار ۇستەمە قۇنى جوعارى ونىمدەردى وندىرەتىن كاسىپورىنداردى قۇرىپ، جاڭا جۇمىس ورنىن كوبەيتۋگە سەپتىگىن تيگىزەدى.
مەنىڭشە، «نۇرلى جول» جاڭا ەكونوميكالىق ساياساتى مەن «ءبىر بەلدەۋ، ءبىر جول» دارىپتەمەسىنىڭ ۇشتاستىرىلۋى، ەكى ەل اراسىنداعى ەكونوميكا – ساۋدا بايلانىسىن كەڭەيتۋگە ءتيىمدى بولىپ قالماستان، ەۆروپا – ازيا ەكى قۇرلىق اراسىنداعى ەكونوميكا – ساۋدا بايلانىسىنىڭ جاندانا دامۋىن جەبەيدى.
ءتىلشى: ءسىز ەكى ەلدىڭ ءوزارا اۋىس – كۇيىس جاساسۋ بارىسىندا قول جەتكىزگەن جەتىستىكتەرىن قالاي باعالايسىز؟ ءسىز ەكى ەلدىڭ 2019 -جىلعى سەلبەستىگى جونىندە قانداي بولجام جاساي الاسىز جانە قانداي ءۇمىت كۇتەسىز؟
نۇرىشەۆ: قازاقستان - جۇڭگو ەكى ەل حالقىنىڭ دوستىق بارىس – كەلىسىنىڭ تاريحى وتە ۇزاق. كەزەكتە، ەكى ەل «جالپى بەتتىك ستراتەگيالىق ارىپتەستىك قاتىناسىنىڭ» جاڭا ساتىسىندا تۇر. وتكەن 5 جىلدان ارتىق ۋاقىتتا، ەكى ەل باسشىلارى كوپ رەت كەزدەسىپ، ەكى جاقتى جانە كوپ جاقتى قاتىناستا شەشۋگە ءتيىستى بولىپ وتىرعان ماسەلەلەر جونىندە ىشكەرىلەي پىكىر اۋىستىردى. 2019 – جىلى ەكى ەلدىڭ جوعارى ساتىداعىلار ارا بارىس – كەلىسى ۇزدىكسىز جيىلەي جالعاسا بەرەدى.
ەكى ەلدىڭ ەكونوميكا – ساۋدا سەلبەستىگى دە قارىشتاپ دامىدى. جۇڭگو قازاقستاننىڭ ەڭ ۇلكەن ساۋدا سەرىكتەرىنىڭ ءبىرى. جۇڭگو كەدەن باس مەكەمەسىنىڭ ساناق مالىمەتىنە نەگىزدەلگەندە، 2018 – جىلى قازاقستان مەن جۇڭگونىڭ ساۋدا سوماسى شامامەن 20 ميلليارد دوللار بولدى. جاقىنعى جىلداردان بەرى، ەكى ەل اراسىنداعى ساۋدا سوماسى ورنىقتى ارتىپ، ءداستۇرلى مەتال، تەمىر قورىتپاسى جانە مۇناي ونىمدەرىمەن قامداۋدان سىرت، تابيعي گاز، اۋىل شارۋاشىلىق ونىمدەرى جانە مال شارۋاشىلىق ونىمدەرىمەن قامداۋ مولشەرى دە ۇزدىكسىز ارتۋدا.
جۇڭگونىڭ تۇتىنۋ بازارىنىڭ ىشكەرىلەي اشىلۋىنا، جۇڭگو حالقىنىڭ جوعارى ساپالى، ەكولوگيالىق جاسىل ونىمدەرگە بولعان قاجەتىنىڭ ارتۋىنا ىلەسە، قازاقستان جۇڭگومەن ەكونوميكا – ساۋدا بارىس – كەلىسىن ونان ارى قويۋلاتىپ، ەكى ەل اراسىنداعى ساۋدا سوماسىن ۇزدىكسىز كەڭەيتەدى.
بۇدان سىرت، قاتىناس - زات اينالىمى سالاسى دا ەكى ەلدىڭ ماڭىزدى سەلبەستىك باعدارىنا اينالدى. جۇڭگو - قازاقستان ليانيۇنگاڭ زات اينالىمى بازاسىنىڭ دامۋ كومەسكى قۋاتىنىڭ ۇزدىكسىز اشىلۋىنا بايلانىستى، جۇڭگونىڭ تەڭىز - مۇحيت تاسىمالى سىياقتى كاسىپورىندارى قازاقستان « قورعاس— شىعىس قاقپا» ەكونوميكالىق ەرەكشە رايونى قۇرعاق پورتىنىڭ جارناسىن ۇستادى، جۇڭگونىڭ قازاقستان ارقىلى رەسەيگە جانە باسقا دا ەۆروپا ەلدەرىنە، ورتا ازياداعى ەلدەرگە جۇك قوراپتارىن تاسۋ مولشەرى دە ۇزدىكسىز ارتتى. 2018 – جىلى قازاقستان – جۇڭگو شەكاراسىنداعى ەكى تەمىر جول وتكەلى ارقىلى تاسىمالداناتىن قوراپتى جۇك تاسىمالى مولشەرى 13 ميلليون 900 مىڭ تونناعا جەتىپ، الدىڭعى جىلداعىمەن سالىستىرعاندا %38 ارتتى.
ەكى ەلدىڭ گۋمانيتارلىق سالاداعى اۋىس – كۇيىسى جىل سايىن تەرەڭدەدى. ەكى جاق توعىسپالى مۋزيكا ۇيىرمەلەرى، جاسامپازدىق توپتارىنىڭ كونسەرتتەرى، سونداي – اق، وپەرا، بالەت ءبيى سياقتى ورتاقتاسۋ ويىن - ساۋىقتارىن ۇنەمى وتكىزىپ تۇرادى. قازاقستاندىق كينوشىلاردا جۇڭگودا وتكىزىلگەن ءتۇرلى كينو مەرەكەلەرىنە بەلسەنە قاتىناسىپ، ۇنەمى سيلىققا يە بولىپ تۇرادى.
جاقىنعى جىلداردان بەرى، جۇڭگو حالقىنىڭ ءبىزدىڭ ەلدىڭ تىلىنە، مادەنيەتىنە جانە تاريحىنا دەگەن ىنتاسى كۇننەن – كۇنگە ارتا تۇسۋدە. جۇڭگوداعى كوپتەگەن جوعارى وقۋ ورىندارىنىڭ شەتەل ءتىلى ينستيتۋتتارى قازاقستان ورتالىعى جانە قازاق ءتىلى كاسىبىن اشتى. جىجياڭ ساۋدا – ەكونوميكا ۋنيۆەرسيتەتى قازاقستان ەكونوميكاسىن زەرتتەۋ ورتالىعىن اشتى.
ءتىلشى: ءسىز جۇڭگونىڭ كەدەيلەردى سۇيەمەلدەۋ جاعىندا قول جەتكىزگەن جەتىستىكتەرىن قالاي باعالايسىز؟
نۇرىشەۆ: ءبىز جۇڭگونىڭ كەدەيلىكتەن ارىلتۋ جاعىندا قاجىماي - تالماي جاساعان قۇلشىنستارىنا جوعارى باعا بەرەمىز. اسىرەسە، جاقىنعى بىرنەشە جىلدان بەرى، جۇڭگودا جىلىنا 10 ميلليوننان استام ادام كەدەيلىكتەن ءساتتى قۇتىلۋدا.
جۇڭگو جونىنەن الىپ ايتقاندا، كەدەيلىكتى جويۋ ماڭىزدى تاريحي مانگە يە بولىپ قالماستان، ونان دا ماڭىزدىسى رەال مانگە يە، ويتكەنى جۇڭگو 2020 – جىلعا بارعاندا جاپپاي دوڭگەلەك داۋلەتتى قوعام قۇرىپ شىعادى. بۇل عانا ەمەس، جۇڭگو كەدەيلىكتى جويۋدىڭ جەڭىس جەمىسىنەن دارا يگىلىكتەنىپ قالماستان، قايتا دۇنيە جۇزىندەگى ءار ەلمەن جۋىرداعى جىلداردان بەرى توپتاعان تاجىريبەلەرى مەن تابىستى ادىستەرىن تەڭ يگىلىكتەنىپ، دۇنيە جۇزىندەگى ءار ەلدىڭ كەدەيلىك ماسەلەسىن شەشۋىنە جۇڭگو پاراساتى مەن كۇش – قۋاتىن ارناپ كەلەدى.
ءتىلشى: جۇڭگونىڭ سىرتقا ەسىك اشۋى بارعان سايىن كەڭەيەدى، ءسىز جۇڭگونىڭ شەتەل قارجىسىن باۋراۋ جانە يمپورتتى كەڭەيتۋ جاعىنداعى جەلىلەس شارالارىن قالاي باعالايسىز؟ ءسىز ەكى ەلدىڭ ەكونوميكا – ساۋدا سەلبەستىگىن قايتكەندە ونان ارى كەڭەيتۋىن ءۇمىت ەتەسىز؟ جۇڭگونىڭ اشىق، سيىمدى پوزيتسيامەن دۇنيە ءجۇزىنىڭ دامۋىن ىلگەرىلەتىپ، ورتاق پايداعا كەنەلۋىنە قالاي قارايسىز؟
نۇرىشەۆ: وتكەن 70 جىلدا، جۇڭگو ادامدى جالت قاراتقان كەرەمەت تابىستارعا قول جەتكىزدى. جۇڭگو ەكونوميكاسى جوعارى جىلدامدىقپەن دامۋدان ساپالى دامۋدىڭ جاڭا ساتىسىنا ءوتتى. جۇڭگو ەكونوميكاسىنىڭ دۇنيە ءجۇزى ەكونوميكاسىنىڭ اۋمالى – توكپەلى جاعدايىندا ورنىقتى دامىپ، دامۋدىڭ كەڭ كومەسكى كۇشىنە يە بولاتىنىنا سەنىمىمىز كامىل.
جۇرتقا ايان، ەكسپورت، قارجى قوسۋ جانە سەلبەستىك سالاسىندا، الىپ جۇڭگو بازارى دۇنيە جۇزىنە ءتىپتى دە كوپ وراي جاراتىپ بەردى. بولاشاقتاعى 15 جىلدا، جۇڭگو جالپى سوماسى 40 تريلليون امەريكا دوللارىندىق تاۋار جانە قىزمەت وتەۋدى يمپورت ەتەدى، مۇنىڭ دۇنيە ءجۇزى ەكونوميكاسىنىڭ ارتۋىنا تىڭ دا پارمەندى قوزعاۋشى كۇش اكەلەتىنىنە كۇمان جوق.
جاقىنعى بىرنەشە جىلدان بەرى، جۇڭگو ۇكىمەتىنىڭ قولدانعان جەلىلەس شارالارى جۇڭگونىڭ شەتەل قارجىسىن باۋراۋ جانە يمپورتتى كەڭەيتۋ جاعىندا تولىق دايىندىق جاساعانىن ايگىلەدى، مۇنىڭ جاندى مىسالى، شاڭحاي يمپورت كورمەسىن وتكىزۋى. جۇڭگونىڭ مەملەكەت ءتوراعاسى شي جينپيڭ 1 – كەزەكتى جۇڭگو حالىقارالىق يمپورت كورمەسىنىڭ اشىلۋ سالتىندا ايتقانىنداي: «جۇڭگونىڭ سىرتقا ەسىك اشۋى توقتامايدى، ونان ارى ايقارا اشا بەرەدى» يمپورت كورمەسىنىڭ وتكىزىلۋى جۇڭگونىڭ يمپورتتى كەڭەيتۋىنە، ساۋدا جانە قارجى قوسۋ سالاسىنداعى حالىقارالىق سەلبەستىكتى جەبەۋىنە ءتيىمدى بولىپ، دۇنيە جۇزىلىك ءمان الادى.
قازاقستان ءار جىلى وتكىزىلەتىن جۇڭگو يمپورت كورمەسىنە بەلسەندى قاتىناسادى. سونىمەن بىرگە، ءبىز دە جۇڭگوعا ەكسپورت ەتەتىن ونىمدەردىڭ ساپاسىنىڭ ۇزدىكسىز جوعارىلاۋىن ءۇمىت ەتەمىز، جۇڭگو بازارى قازاقستاننىڭ اۋىل شارۋاشىلىعى مەن قوسىمشا قۇنى جوعارى ونىمدەردى وندىرۋىنە، دامىتا تۇسۋىنە تۇرتكى بولادى. قازاقستان استىق، وسىمدىك مايى، كەندىر، سويا بۇرشاق جانە ەت سياقتى اۋىل شارۋاشىلىق، مال شارۋاشىلىق ونىمدەرىنىڭ جۇڭگوعا ەكسپورت ەتىلۋىن ارتتىرىپ، جۇڭگو اۋىل شارۋاشىلىق ونىمدەرى بازارىنىڭ پارمەندى ات سالىسۋشىسىنا اينالادى.
ءتىلشى: جۇڭگو «چاڭ – ى 4 – ءنومىرلى» مىندەتى تابىستى بولدى، ءسىز جاقىنعى جىلدان بەرگى جۇڭگونىڭ عىلىم – تەحنيكا جاعىنداعى جاسامپازدىق قۋاتىنا قالاي قارايسىز؟ بولاشاقتا ەكى ەل وسى سالادا قانداي سەلبەستىك جاسايدى؟
نۇرىشەۆ: جۇڭگو «چاڭ – ى 4 – ءنومىرلى» ايعا ءساتتى قوندى، بۇل ادامزاتتىڭ عارىش سالاسىن زەرتتەۋدەگى كەلەلى تابىسى. جاقىنعى جىلدان بەرى، جۇڭگو عىلىم – تەحنيكا جاعىنداعى جاسامپازدىق سالاسىندا ەرەسەن زور تابىستارعا قول جەتكىزىپ، بۇكىل دۇنيە ءجۇزىنىڭ مويىنداۋىنا يە بولدى. عارىشتا ىزدەنىس جاساۋدان سىرت، جۇڭگونىڭ ەلەكتروندى ساۋدا، جىلجىمالى تولەم، زات اينالىمى، جاسىل ەنەرگيا، جوعارى قارقىندى تەمىر جول تەحنيكاسى، سونداي – اق، بيولوگيالىق ەمدەۋ سياقتى سالالاردا قول جەتكىزگەن العا باسۋى دا دۇنيەنى جالت قاراتتى.
ەكى ەلدىڭ جوعارى عىلىم – تەحنيكا سالاسىنداعى سەلبەستىگى «نۇرلى جول» جاڭا ەكونوميكالىق ساياساتى مەن «ءبىر بەلدەۋ، ءبىر جول» دارىپتەمەسىن ۇشتاستىرۋدىڭ ماڭىزدى مازمۇنى بولىپ تابىلادى، ءبىز الدا عىلمي زەرتتەۋ قۇرىلىمدارى، جوعارى دارەجەلى وقۋ – اعارتۋ سياقتى سالالاردا سەلبەستىكتى قالاي ورىستەتۋدى تالقىلايمىز. «سيفىرلى قازاقستان» جوباسى، استانا قالاسى حالىقارالىق فينانس ورتالىعى اشقان FinTech ەكولوگيالىق جۇيەسى، عىلىم – تەحنيكادا جاڭالىق جاراتۋ باقشاسى سياقتى نەگىزدىك قۇرىلعىلار مەن نىسانداردىڭ بارلىعى دا ەكى ەلدىڭ عىلىم – تەحنيكا سەلبەستىگىن ورىستەتۋىنە تاماشا تۇعىر ازىرلەپ بەرەدى.
قورتىپ ايتقاندا، جۇڭگو مەن قازاقستاننىڭ وقۋ – اعارتۋ، قاتىناس- تاسىمالى، فينانستىق عىلىم – تەحنيكا، اۋىل شارۋاشىلىعى، ونەركاسىپ، گەولوگيا، ەلەكتروندى حابار – بايلانىس، بيوحيميا، عارىشتى بارلاۋ سياقتى سالالارداعى سەلبەستىگى نەداۋىر زور كومەسكى كۇشكە يە. اۋدارعان قاۋلا بەيسەن قىزى (پراكتيكانت)
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
وقىرمان نازارىنا
- 1.
جۇڭحۋا حالىق رەسپۋبليكاسىنىڭ قاتىستى زاڭ-ەرەجەلەرىنە بويسىنىپ، توراپتا ءمورالدى بولىڭىز، ءسىزدىڭ ارەكەتىڭىز سەبەبىنەن تىكەلەي نەمەسە جانامالاي تۋىنداعان زاڭدىق جاۋاپكەرشىلىكتى ءوزىڭىز ارقالايسىز.
2.
قالام اتىڭىز بەن جازعان لەبىزىڭىزدى باسقارۋدىڭ بارلىق ۇقىعى حالىق تورابىنا ءتان.
3. حالىق تورابىنىڭ ءسىزدىڭ حالىق تورابىنىڭ لەبىز جازۋ بەتىنە جازعان لەبىزىڭىزدى توراپ ىشىندە كوشىرۋ نەمەسە لەبىزىڭىزدەن سيتات كەلتىرۋ ۇقىعى بار.
4.
ەگەر باسقارۋ جاعىنا پىكىرىڭىز بولسا، لەبىز جازۋ بەتىنىڭ باسقارۋشىسىنا نەمەسە حالىق گازەتى مەكەمەسىنىڭ توراپ ورتالىعىنا اڭىس ەتىڭىز.
- ورتالىق
- ەل ءىشى
- شينجياڭ
- حالىقارا
مادەنيەت
ارناۋلى تاقىرىپ
تەلەفون: 67 /65368365-010 حات ساندىعى: kazakh@peopledaily.com.cn
بۇل بەتتىڭ مەنشىك ۇقىعى حالىق تورابىنا ءتان، كەلىسىمنەن وتپەگەندە كوشىرىپ پايدالانۋعا بولمايدى
Copyright © 1997-2012 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى 
بۇل حابارعا باعاڭىز
لەبىز جازۋ
