حالىق تورابىنىڭ «بىرگە تابىسقا كەنەلۋ» قۇجاتتى فيلمىن جاريالاۋ سالتى استانادا وتكىزىلدى 

حالىق تورابىنىڭ ءتىلشىسى شىڭ چۋ – ي، گى تاي – ي 6 – ايدىڭ 30 – كۇنى استانادان حابارلايدى. حالىق گازەتى مەن قازاقستان اقپارات قۇرالدارىنىڭ «ءبىر بەلدەۋ، ءبىر جولدى» جوعارى ساپالى بىرگە كوركەيتۋ جاعىنداعى بىرلەسكەن تىلشىلىك قيمىلىنىڭ ناتيجەسىن ءبولىسۋ ءماجىلىسى 6 – ايدىڭ 29 – كۇنى قازاقستاننىڭ استاناسى استانا قالاسىندا وتكىزىلدى. ماجىلىستە حالىق تورابىنىڭ «بىرگە تابىسقا كەنەلۋ» قۇجاتتى فيلمىن جاريالاۋ سالتى دا وتكىزىلدى.

سۋرەتتە: حالىق تورابىنىڭ باقىلاۋ القاسىنىڭ ءتوراعاسى تاڭ ۋەيحۇڭ جاريالاۋ سالتىندا ءسوز سويلەۋدە. حالىق تورابىنىڭ ءتىلشىسى رىن حاۋيۇي فوتوسى

حالىق تورابىنىڭ باقىلاۋ القاسىنىڭ ءتوراعاسى تاڭ ۋەيحۇڭ جاريالاۋ سالتىندا ءسوز سويلەگەندە مىنانى ءبىلدىردى: اقپارات قىزمەتكەرى رەتىندە، ءبىز جۇڭگو مەن قازاقستان ەكى ەلدىڭ ءوزارا تيىمدىلىك جەتكىزەتىن سەلبەستىگى مەن دوستىق قارىم – قاتىناسىنىڭ ەستەلىككە الۋشىسى، كۋاگەرى، ىلگەرىلەتۋشىسى بولدىق. 2014 – جىلى، حالىق تورابىنىڭ ”جاڭا جىبەك جولىنا ساپار“ كولەمدى جالپى مەديالى شەكارا اتتاعان تىلشىلىك قيمىلىنا قاتىناسقان تىلشىلەر قازاقستانعا كەلىپ، جۇڭگو مەن قازاقستاننىڭ ”ءبىر بەلدەۋ، ءبىر جول“ سەلبەستىگىنىڭ ناتيجەلەرىن جان – جاقتى حابارلاعان جانە ايگىلەگەن بولاتىن. جۋىردا عانا، حالىق تورابىنىڭ توعىسپالى مەديالى جاسامپازدىق ۇيىمى قازاقستانعا قايتالاي كەلىپ، «بىرگە تابىسقا كەنەلۋ» قۇجاتتى فيلمىن ءتۇسىرىپ، جۇڭگو مەن قازاقستان اراسىنداعى ىقىلاستى، سەزىمگە تولى اسەرلى ساتتەردى اپپاراتقا العان.

حالىق تورابىنىڭ «بىرگە تابىسقا كەنەلۋ» قۇجاتتى فيلمىن جاريالاۋ سالتى استانادا وتكزىلدى. حالىق تورابىنىڭ ءتىلشىسى شىڭ چۋ – ي فوتوسى

تاڭ ۋەيحۇڭ مىنانى ءبىلدىردى: قازاقستان حالقىندا: ”دوستىق — ماڭگى سارقىلماس بايلىق“ دەگەن ءسوز بار، شيان شيڭحاي مەن بايقاداموۆتىڭ اراسىنداعى مەملەكەت اتتاعان اسەرلى دوستىقتى ەكى ەل حالقى ماڭگى ەسىندە ساقتايدى؛ شانشي ولكەسىندە جاڭا تيپتى ايدارشا ۆيرۋس ىندەتىمەن كۇرەسۋگە كومەكتەسكەن قازاقستاندىق جىگىت ما ۋىنشۋاننىڭ: ”مەن شەتەلدىك بولعانىممەن، سىرت ادام ەمەسپىن“ دەگەن ءسوزى قازاقستان مەن جۇڭگو حالقىنىڭ ىزگى دوستىعىن ايگىلەدى ... وسىنداي تارتىمدى حيكايالار قۇجاتتى فيلمدە تۇگەلدەي كورسەتىلدى.

حالىق تورابى — حالىق گازەتى اشقان جۇڭگوداعى ەڭ ىقپالدى، كولەمدى، ۋنيۆەرسال اقپارات تورابى. جۇڭگو تىلىنەن سىرت، حالىق تورابى قازاق ءتىلىن (كريلليتسا) قامتىعان 15 شەتەل ءتىلى ارناسىن قۇرعان ءارى دۇنيە جۇزىندەگى 11 مەملەكەت پەن رايوندا 14 بولىمشە سەرىكتەستىگى مەن ۋاكىلدىك باسقارماسىن قۇرعان. حالىق تورابى ىسكە قوسقان شەتەلدەگى الەۋمەتتىك جەلىلەردەگى رەسمي تىركەلگىلەردىڭ سانى 64 كە جەتەدى، بۇل تىركەلگىلەردىڭ جالپى جانكۇيەرلەرىنىڭ سانى 190 ميلليون ادامعا جەتەدى. حالىق تورابى ىسكە قوسۋعا جاۋاپتى بولعان ”ءبىر بەلدەۋ، ءبىر جول“ اقپاراتتىق سەلبەستىك بىرلەسكەن تورابى مۇشە ەلدەردىڭ اقپارات قۇرالدارىنا ينفورماتسيا جولداۋ جاعىندا بەلسەندى قىزمەت وتەۋدە.

حالىق تورابىنىڭ قازاق تىلىندەگى (كريلليتسا) ارناسى 2021 – جىلى ينتەرنەتكە شىعارىلعان، ول جۇڭگوداعى تۇڭعىش رەت اشىلعان ءارى بىردەن – ءبىر قازاق تىلىندە (كريلليتسا) اقپارات تاراتاتىن توراپ، قازىر قازاقستان مەن ورتا ازيا وڭىرىندەگى توراپتاستاردىڭ جۇڭگونى تۇسىنۋىنە كومەكتەسەتىن ماڭىزدى ارناعا اينالدى.

كەلۋ قاينارى: حالىق تورابى