شي جينپيڭ ۆەنگريانىڭ زۇڭليى وربانمەن كەزدەستى

7 - ايدىڭ 8 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى دياۋيۇيتاي مەملەكەتتىك قوناق ۇيىندە ۆەنگريانىڭ زۇڭليى وربانمەن كەزدەستى.

سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن

شينحۋا اگەنتتىگى، 7 - ايدىڭ 8 - كۇنى، بەيجيڭ (ءتىلشى جىڭ ميڭدا). 7 - ايدىڭ 8 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى دياۋيۇيتاي مەملەكەتتىك قوناق ۇيىندە ۆەنگريانىڭ زۇڭليى وربانمەن كەزدەستى.

شي جينپيڭ بىلاي دەپ اتاپ كورسەتتى: 2 ايدىڭ الدىندا مەن ۆەنگريادا ءساتتى مەملەكەتتىك ساپاردا بولدىم، ءبىز جۇڭگو - ۆەنگريا قارىم - قاتىناسىن جاڭا داۋىردەگى جالپى بەتتىك ستراتەگيالىق سەرىكتەستىك قارىم - قاتىناس دەڭگەيىنە كوتەرەتىنىمىزدى جاريالاپ، بيىلعى ەكى ەلدىڭ ديپلوماتيالىق قارىم - قاتىناس ورناتقانىنىڭ 75 جىلدىعىنا جاڭا تاريحي ءمان قوستىق، سونداي - اق جۇڭگو - ۆەنگريا قارىم - قاتىناسىنىڭ جوعارى دەڭگەيدە دامۋىنا قۋاتتى قوزعاۋشى كۇش ۇستەدىك. كەلەسى اپتادا جۇڭگو كوممۋنيستىك پارتياسى 20 - كەزەكتى ورتالىق كوميتەتىنىڭ ءۇشىنشى جالپى ءماجىلىسى بەيجيڭدە اشىلادى، جۇڭگو رەفورمانى ونان ارى جاپپاي تەرەڭدەتىپ، جوعارى ساپالى دامۋ مەن جوعارى دەڭگەيدەگى سىرتقا ەسىك اشۋدى ىلگەرىلەتەدى. بۇل جۇڭگو - ۆەنگريا سەلبەستىگىنە جاڭا وراي ازىرلەپ، جاڭا قوزعاۋشى كۇش قوسادى. ەكى جاق جوعارى جىكتەگىلەردىڭ بارىس - كەلىسىن ساقتاپ، ساياسي سەنىمدىلىكتى تەرەڭدەتىپ، ستراتەگيالىق پىكىرلەسۋدى، سەلبەسۋدى جيىلەتىپ، ءوزارا قولداۋدى ۇزدىكسىز بەكەمدەپ، ءار سالاداعى ناقتى سەلبەستىكتى كۇشەيتىپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرىپ، جۇڭگو مەن ۆەنگريا جاڭا داۋىردەگى بارلىق جاعدايدا بىردەي جان - جاقتى ستراتەگيالىق سەرىكتەستىك قارىم - قاتىناستىڭ مازمۇنىن ۇزدىكسىز بايىتىپ، حالىققا اناعۇرلىم جاقسى باقىت جاراتۋى كەرەك.

شي جينپيڭ ۆەنگريانىڭ ەۆروپا وداعىنىڭ كەزەكتى ءتوراعا ەلى بولعانىن قۇتتىقتادى. شي جينپيڭ بىلاي دەپ باسا دارىپتەدى: جۇڭگو مەن ەۆروپا وداعى اراسىندا وڭىرلىك ساياسي قايشىلىق جوق، ءتۇبىرلى مۇددە قاقتىعىسى جوق. جۇڭگو - ەۆروپا قارىم - قاتىناسى ستراتەگيالىق مانگە جانە دۇنيە جۇزىلىك ىقپالعا يە، ورنىقتى، اقاۋسىز دامۋدى ساقتاپ، دۇنيە جۇزىلىك سىن - سايىستارعا بىرگە توتەپ بەرۋ كەرەك. كەلەر جىلى − جۇڭگو مەن ەۆروپا وداعىنىڭ ديپلوماتيالىق قارىم - قاتىناس ورناتقانىنىڭ 50 جىلدىعى، ەكى جاق سەرىكتەستىكتىڭ دۇرىس ورنى مەن سەلبەستىك نەگىزگى اۋەنىنەن جازباي، قوس باعىتتا ەسىك اشۋدى ۇزدىكسىز ىلگەرىلەتىپ، حالىقارالىق سەلبەستىكتى كۇشەيتىپ، دۇنيە ءجۇزىنىڭ بەيبىتشىلىگى مەن ورنىقتىلىعىن جانە دامىپ، گۇلدەنۋىن جەبەۋگە ۇلەس قوسۋى كەرەك. ۆەنگريانىڭ ەۆروپا وداعىنىڭ كەزەكتى ءتوراعا ەلى رەتىندە جۇڭگو - ەۆروپا قارىم - قاتىناسىنىڭ اقاۋسىز، ورنىقتى دامۋىن ىلگەرىلەتۋدە، ءتيىمدى ىقپالداستىقتى جۇزەگە اسىرۋدا بەلسەندى رول اتقارۋىن ءۇمىت ەتەمىن.

وربان مىنالاردى ءبىلدىردى: 2 ايدىڭ الدىندا ءتوراعا شي جينپيڭ ۆەنگريادا تاريحي سيپاتتى ءساتتى ساپاردا بولدى. ەكى ايدان بەرى ەكى جاق وسى رەتكى ساپاردىڭ ماڭىزدى جەتىستىكتەرىن مۇقيات تياناقتاندىرىپ، دوستىق پەن ءوزارا سەنىمدىلىكتى اناعۇرلىم بەكەمدەپ، ۆەنگريا - جۇڭگو قارىم - قاتىناسىنىڭ بولاشاقتاعى دامۋىنا بەرىك نەگىز قالادى. قازىرگى اۋمالى - توكپەلى حالىقارالىق جاعداي الدىندا جۇڭگو بەيبىتشىلىكتى قىزۋ ءسۇيىپ قانا قويماي، ونىڭ ۇستىنە ءبىرقىدىرۋ سىندارلى ماڭىزدى باستامالاردى العا قويىپ، ءوزىنىڭ ءىس جۇزىندىك ارەكەتى ارقىلى جۇڭگونىڭ دۇنيە ءجۇزىنىڭ بەيبىتشىلىگىن جەبەيتىن ماڭىزدى ورنىقتىرعىش كۇش ەكەنىن دالەلدەدى. ۆەنگريا جاق جۇڭگو جاقتىڭ رولى مەن ىقپالىن ايرىقشا القايدى جانە وعان ءمان بەرەدى، جۇڭگو جاقپەن ستراتەگيالىق قارىم - قاتىناستى، سەلبەستىكتى جيىلەتۋدى قالايدى. ۆەنگريا جاق جۇڭگومەن سەلبەستىكتى كۇشەيتۋدى قۋاتتايدى، ”شاعىن شەڭبەرگە“ جانە توپقا ءبولىنىپ قارسىلاسۋعا قارسى تۇرادى، ەۆروپا وداعىنىڭ كەزەكتى ءتوراعا ەلى مىندەتىن ارقالاۋدى وراي ەتىپ، ەۆروپا - جۇڭگو قارىم - قاتىناسىنىڭ اقاۋسىز دامۋىن بەلسەنە ىلگەرىلەتۋدى قالايدى.

ەكى جاق ۋكراينا داعدارىسى جونىندە ءتۇيىندى تۇردە ىشكەرىلەي پىكىرلەستى. وربان جۋىردا ۋكرايناعا جانە رەسەيگە ساپارلاي بارۋىنا قاتىستى جاعدايلاردى حابارلاندىردى. شي جينپيڭ ورباننىڭ ۋكراينا داعدارىسىن ساياسي جولمەن شەشۋدى ىلگەرىلەتۋ جولىندا كورسەتكەن قۇلشىنىسىن القاپ، جۇڭگونىڭ قاتىستى كوزقاراس، دارىپتەمەلەرىن بايىمدادى.

شي جينپيڭ بىلاي دەپ باسا دارىپتەدى: ەرتەرەك ۇرىستى توقتاتىپ، سوعىستى اياقتاتىپ، ساياسي جولمەن شەشۋدى قاراستىرۋ ءار جاقتىڭ مۇددەسىنە ۇيلەسەدى. قازىرگى ماڭىزدى ءتۇيىن − ”سوعىستى سىرتقا كەڭەيتپەۋ، سوعىستىڭ دارەجەسىن جوعارىلاتپاۋ، ءارقايسى جاق وت قويماۋ“ ءۇش پرينسيبىنە بويسۇنىپ، اۋقىمنىڭ باسەڭدەۋىن تەزدەن ىلگەرىلەتۋ. حالىقارالىق قوعام ەكى جاقتىڭ تىكە تىلدەسۋىن، كەلىسسوزىن قالپىنا كەلتىرۋىنە شارت - جاعداي ازىرلەۋى، دەم بەرۋى كەرەك. تەك بارلىق ءىرى ەل تەرىس ەنەرگيا تاراتپاي، وڭ ەنەرگيالارىن ساۋلەلەندىرگەندە عانا، وسى قاقتىعىستا سوعىس توقتاتۋ شۇعىلاسىن ەرتەرەك قارسى الاتىن بولامىز. جۇڭگو جاق ەجەلدەن ءوز ءتاسىلى ارقىلى تاتۋلىققا ءناسيحاتتاپ، كەلىسسوزدى جەبەپ كەلەدى، داعدارىستى بەيبىت جولمەن شەشۋگە ءتيىمدى بارلىق قۇلشىنىستاردى ىنتالاندىرىپ جانە قولداپ كەلەدى. جۇڭگو مەن ۆەنگريانىڭ نەگىزگى قۋاتتاماسى مەن قۇلشىنۋ بەتالىسى بىردەي. جۇڭگو جاق ۆەنگريا جاقپەن جانە قاتىستى جاقتارمەن قارىم - قاتىناستى ۇزدىكسىز ساقتاۋدى قالايدى.

ۋاڭ ي كەزدەسۋدە بىرگە بولدى.

كەلۋ قاينارى: حالىق تورابى