گۋاڭدۇڭ ولكەلىك حالىق قۇرىلتايى تۇراقتى كوميتەتى پارتگرۋپپاسىنىڭ بۇرىنعى مۇشەسى، ورىنباسار مەڭگەرۋشىسى چىن رۋگۇيدىڭ پارا الۋ دەلوسىنا ءبىرىنشى سوتتا ۇكىم جاريالاندى

شينحۋا اگەنتتىگىنىڭ 8 – ايدىڭ 7 – كۇنى ناننيڭنەن بەرگەن حابارى. 8 – ايدىڭ 7 - كۇنى تۇستەن بۇرىن، گۋاڭشي جۋاڭزۋ اۆتونوميالى رايونى ناننيڭ قالالىق ورتا دارەجەلى حالىق سوت مەكەمەسى گۋاڭدۇڭ ولكەلىك حالىق قۇرىلتايى تۇراقتى كوميتەتى پارتگرۋپپاسىنىڭ بۇرىنعى مۇشەسى، ورىنباسار مەڭگەرۋشىسى چىن رۋگۇيدىڭ پارا الۋ دەلوسىنا ءبىرىنشى سوتتا اشىق ۇكىم شىعارىپ، ايىپكەر چىن رۋگۇيدى پارا الۋ قىلمىسى بويىنشا مەرزىمسىز قاماۋ جازاسىنا ۇكىم ەتتى، ساياسي ۇقىعىنان ماڭگى ماقرۇم ەتىپ، وعان قوسا ونىڭ بارلىق مال – مۇلكىن ءمۇسادىرالادى؛ پارا الۋ ارقىلى تاپقان مال - مۇلكى مەن ءوسىمىن زاڭ بويىنشا قۋزاپ قايتارىپ الىپ، مەملەكەت قازىناسىنا تاپسىرادى.

تەكسەرۋ ارقىلى مىنالاردى انىقتالدى: 2003 - جىلدان 2022 - جىلعا دەيىن ايىپكەر چىن رۋگۇي گۋاڭجوۋ قالالىق قۇرىلىس كوميتەتىنىڭ مەڭگەرۋشىسى، قالالىق قۇرىلىس قىزمەتى كوميتەتىنىڭ شۋجيى، گۋاڭجوۋ قالالىق ۇكىمەت پارتگرۋپپاسىنىڭ مۇشەسى، باس حاتشىسى، گۋاڭجوۋ قالالىق پارتكومنىڭ تۇراقتى مۇشەسى، ورىنباسار قالا باستىعى، گۋاڭجوۋ قالالىق پارتكومنىڭ ورىنباسار شۋجيى، ساياسي - زاڭ كوميتەتىنىڭ شۋجيى، جۇڭشان قالالىق پارتكومنىڭ شۋجيى، شىنجىن قالالىق پارتكومنىڭ ورىنباسار شۋجيى، قالا باستىعى، گۋاڭدۇڭ ولكەلىك حالىق قۇرىلتايى تۇراقتى كوميتەتى پارتگرۋپپاسىنىڭ مۇشەسى، ورىنباسار مەڭگەرۋشىسى قاتارلى قىزمەتتەردى وتەگەن كەزىندە، قىزمەت قولايلىلىعى، سونداي - اق قىزمەت ۇقىعى، ورنى قالىپتاستىرعان قولايلى شارت – جاعدايدان پايدالانىپ، قاتىستى ورىندار مەن جەكەلەردىڭ قۇرىلىستى كوتەرەگە الۋ، نىساندى ىلگەرىلەتۋ، كاسىپورىن تيجاراتى سياقتى ىستەرىنە كومەكتەسىپ، تىكەلەي نەمەسە باسقالار ارقىلى زاڭسىز قابىلداعان مال - مۇلكى حالىق اقشاسىنا سىندىرعاندا جيىنى 108 ميلليون يۋاننان اسقان.

ناننيڭ قالالىق ورتا دارەجەلى حالىق سوت مەكەمەسى ايىپكەر چىن رۋگۇيدىڭ ارەكەتى پارا الۋ قىلمىسىن قالىپتاستىرادى دەپ قارادى. چىن رۋگۇيدىڭ العان پاراسىنىڭ سوماسى توتەنشە كوپ بولعاندىقتان، ونى زاڭ بويىنشا جازالاۋ كەرەك. ءبىر ءبولىم پارا الۋ ماقساتىنا جەتە الماعان، سوتقا كەلگەننەن كەيىن ءوزىنىڭ قىلمىسىن قاز - قالپىندا مويىنداپ، دەلونى ءبىر جاقتى ەتۋ ورگانى ءالى يگەرمەگەن ءبىر ءبولىم پارا الۋ جاعدايىن ىرىقتىلىقپەن تاپسىرىپ، قىلمىسىن تانىپ، وكىنگەن، ارام ولجانى بەلسەنە قايتارىپ، پارا الىپ تاپقان مال - مۇلىك پەن ءوسىمىن تۇگەلدەي قۋزاپ قايتارىپ العاندىقتان، زاڭ بويىنشا جەڭىل جازالاۋعا بولادى. سوت مەكەمەسى جوعارىداعىداي ۇكىم شىعاردى.

كەلۋ قاينارى: حالىق تورابى