سايرام كولى كورىنىس رايونى: كورىنىس رايونى مەن ونىڭ ماڭىنداعى قاراستى ورمان – جايىلىمدا تەمەكى شەگۋگە، تۇزدە كاۋاپ قاقتاۋعا تيىم سالىنادى 

انار بۇلت \ شينجياڭ گازەتىنىڭ حابارى. 7 – ايدىڭ 31 – كۇنى سايرام كولى كورىنىس رايونىندا جان – جاقتى زاڭ اتقارۋ مەكەمەسى تيىم سالۋ بۇيرىعىن جاريالادى. ءار جىلى 4 – ايدىڭ 1 – كۇنىنەن 10 – ايدىڭ 31 – كۇنىنە دەيىن، سايرام كولى كورىنىس رايونى مەن ونىڭ ماڭىنداعى قاراستى ورمان – جايىلىمدا وت جاعۋعا تيىم سالىنادى.

وت جاعۋعا تيىم سالۋ بۇيرىعىندا مىنالار ايقىندالعان: وت جاعۋعا تيىم سالىناتىن اۋماقتا زاڭسىز تۇردە تۇزدە وتتان پايدالانۋعا جانە ورمانعا، جايىلىمعا ءورت كەتۋىن تۋدىراتىن ءارقانداي قيلىمعا، ارەكەتكە (مالشىلاردىڭ وندىرىستىك، تۇرمىستىق قيمىلدارى قامتىلمايدى) تيىم سالىنادى. وت جاعۋعا تيىم سالىناتىن اۋماقتا تەمەكى شەگۋ، وتپەن ويناۋ، اعاش كومىر جاعۋ، تۇزدە كاۋاپ قاقتاۋ، وتپەن جارىقتاندىرۋ، وت جاعىپ جىلىنۋ (كارتوچكالىق مەش، گاز تورسىق قاتارلىلاردى قامتيدى جانە مۇنىمەن عانا شەكتەلمەيدى)، جارقىلداق – تورسىلداق اتۋ، اڭ اۋلاۋ، سونداي – اق، ۇشپا شام قويا بەرۋ قاتارلى وتتان پايدالاناتىن بارلىق ارەكەتتەرگە تيىم سالىنادى. كورىنىس رايونىنىڭ توڭىرەگىندە ديقاندار (مالشىلار) ساياجايىن جۇرگىزۋدى جەلەۋ ەتىپ وتتان پايدالانۋعا تيىم سالىنادى. ىستىق بولۋ، قۋاڭشىلىق بولۋ، بوران سوعۋ قاتارلى ءورت كەتۋ حاۋپى بار اۋا رايى جونىندە مالىمەت بەرىلگەن كەزدە، ورتتەن ساقتانۋ تاراۋلارى، اۋا رايى تاراۋلارى، ءورت ءوشىرۋ تاراۋلارى قاتارلى ورتتەن ساقتانۋ جاۋاپكەرشىلىگىن ارقالايتىن تاراۋلار دەرەۋ جوعارى دارەجەلى حاۋىپ – قاتەر دابىلىن قاعۋى ءارى تۇزدە وتتان پايدالانۋعا ساياتىن ءارقانداي ارەكەتكە تيىم سالۋى كەرەك.

سونىمەن بىرگە مىنالار تالاپ ەتىلگەن: كورىنىس رايونىنداعى ورتتەن ساقتانۋ تاراۋلارى ورتتەن ساقتانۋ جاعىنداعى شارلاپ تەكسەرۋ جانە ورتتەن ساقتانۋ جاعىنداعى تەكسەرۋ جۇرگىزۋ بارىسىندا ءورت اپاتىنا قاتىستى بايقالعان حاۋىپ – قاتەرلەردى دەر كەزىندە الاستاۋى كەرەك؛ ورتتەن ساقتانۋ حاۋىپسىزدىگىنە كەپىلدىك ەتە المايتىن، الدا – جالدا ءورت كەتسە، جۇرتتىڭ باس – اماندىعىنا اۋىر حاۋىپ توندىرەتىن جاعدايدا، حاۋىپتى كاسىپ قالىبىن وندىرىستەن توقتاتىپ، رەتتەۋ جۇرگىزۋ – وزگەرتۋ كەرەك. ءارقانداي ورىن مەن جەكە وت جاعۋعا تيىم سالىناتىن اۋماقتان بەلگىلەمەگە قايشى تۇردە وتتان پايدالانۋ ارەكەتىن بايقاسا، دەرەۋ ەسكەرتۋ بەرۋى ءارى شەكتەۋى كەرەك، سونىمەن بىرگە، 12119 ءنومىرى ارقىلى ساقشىعا تەلەفون بەرىپ مالىمدەۋىنە بولادى.

تيىم سالۋ بۇيرىعىنداعى بەلگىلەمەلەرگە قايشى كەلگەن ورىندار مەن جەكەلەرگە زاڭ -تۇزىمدەرگە، ەرەجە – ساياساتتارعا ساي سايكەستى اكىمشىلىك جازا بەرىلەدى. قىلمىس قالىپتاستىرعاندار ءادىليا ورگاندارىنىڭ زاڭ بويىنشا جاۋاپكەرشىلىگىن قۋزاستىرۋىنا جوتكەپ بەرىلەدى.

اشكەرەلەۋ تەلەفونى: ورمان مەن جايىلىمدا ورتتەن ساقتانۋ ساقشىلارىنىڭ تەلەفونى (12119)؛ بۇراتالا وبلىستىق ورمان شارۋاشىلىعى جانە جايىلىم مەكەمەسى (0909 – 2310106)؛ سايرام كولى كورىنىس رايونىن باسقارۋ كوميتەتى (0909 – 7659990).

كەلۋ قاينارى: حالىق تورابى