لي شي بىرلەسكەن مەملەكەتتەر ۇيىمىنىڭ دۇنيە جۇزىلىك شىرىكتەسۋگە قارسى زاڭ اتقارۋ سەلبەستىك تورابىنىڭ جالپى ماجىلىسىنە قاتىناسقان ءبىر ءبولىم جوعارى دارەجەلى ۋاكىلدەرمەن كەزدەستى

«حالىق گازەتى»، 9 - ايدىڭ 25 - كۇنى، بەيجيڭ. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق ءتارتىپ تەكسەرۋ كوميتەتىنىڭ شۋجيى لي شي 9 - ايدىڭ 25 - كۇنى بەيجيڭدە بىرلەسكەن مەملەكەتتەر ۇيىمىنىڭ دۇنيە جۇزىلىك شىرىكتەسۋگە قارسى زاڭ اتقارۋ سەلبەستىك تورابىنىڭ جالپى ماجىلىسىنە قاتىناسقان ءبىر ءبولىم جوعارى دارەجەلى ۋاكىلدەرمەن كەزدەستى.

لي شي مىنانى ءبىلدىردى: جۇڭگو كوممۋنيستىك پارتياسى 18 - قۇرىلتايىنان بەرى شي جينپيڭ جولداستى ۇيىتقى ەتكەن جۇڭگو كوممۋنيستىك پارتياسى ورتالىق كوميتەتىنىڭ پارمەندى باسشىلىعىندا، جۇڭگو تاريحتا بولىپ كورمەگەن شىرىكتەسۋگە قارسى تۇرۋ كۇرەسىن ورىستەتىپ، تۇبەگەيلى جەڭىسكە قول جەتكىزدى ءارى جاپپاي بەكەمدەدى. جۇڭگو جاق شىرىكتەسۋگە قارسى تۇرۋداعى حالىقارالىق سەلبەستىككە ايرىقشا ءمان بەرىپ، «بىرلەسكەن مەملەكەتتەر ۇيىمىنىڭ شىرىكتەسۋگە قارسى تۇرۋ شارتىن» مۇقيات اتقارىپ، شىرىكتەسۋدەن ساقتانۋ سياقتى باستامالار مەن قۋاتتامالاردى العا قويىپ، شىرىكتەسۋگە قارسى تۇرۋ دۇنيە جۇزىلىك باسقارۋىنا ۇلەس قوستى. جۇڭگو جاق ءار ەلمەن بىرگە ءادىل، ادىلەتتى قۇن كوزقاراسىن قورعاپ، تىزە قوسا وتىرىپ شىرىكتەسۋگە قارسى تۇرۋداعى حالىقارالىق ورتاق تانىمدى كۇشەيتىپ، تەڭدىك، باۋىرمالدىق سەلبەستىك پرينسيبىن امالياتتا ايگىلەپ، شەكارا اتتاعان شىرىكتەسۋگە بىرگە سوققى بەرىپ، پاك، كىرشىكسىز دۇنيە ءجۇزىن بىرگە قۇرۋدى قالايدى.

بىرلەسكەن مەملەكەتتەر ۇيىمىنىڭ دۇنيە جۇزىلىك شىرىكتەسۋگە قارسى زاڭ اتقارۋ سەلبەستىك تورى _ دۇنيە ءجۇزى بويىنشا ۋاكىلدىك سيپاتقا يە شىرىكتەسۋگە قارسى زاڭ اتقارۋ سەلبەستىك تۇعىرى، جالپى ءماجىلىسى 9 - ايدىڭ 24 - كۇنىنەن 27 - كۇنىنە دەيىن بەيجيڭدە وتكىزىلدى.