يزرايل ليۆانعا كەڭ كولەمدى اۋە شابۋىلىن جاساپ، 492 ادام قازا بولدى

شينحۋا اگەنتتىگىنىڭ 9 – ايدىڭ 23 – كۇنى بەيرۋتتان بەرگەن حابارى. ليۆان الەۋمەتتىك دەنساۋلىق ساقتاۋ مينيسترلىگى 9 – ايدىڭ 23 - كۇنى كەشتە مالىمدەمە جاريالاپ بىلاي دەدى: يزرايل سول كۇنى ليۆاننىڭ كوپ جەرىنە اۋەدەن شابۋىل جاساپ، 492 ادام قازا بولىپ، 1645 ادام جارالاندى.

مالىمدەمەدە بىلاي دەلىندى: اۋە شابۋىلى ليۆاننىڭ وڭتۇستىگى، ليۆاننىڭ شىعىسىنداعى بەكا جانە بالباك قاتارلى وڭىرلەردەگى قالا - قالاشىقتار مەن قىستاقتارعا شوعىرلانعان، قازا بولعانداردىڭ ىشىندە 35 بالا مەن 58 ايەل بار.

ليۆان اقپارات قۇرالدارىنىڭ 9 – ايدىڭ 23 – كۇنى بەرگەن حابارىنا قاراعاندا، ليۆاننىڭ استاناسى بەيرۋتتىڭ وڭتۇستىك قالا ماڭى سول كۇنى كەشتە يزرايلدىڭ شابۋىلىنا ۇشىراعان، مۇندا شابۋىلدىڭ كوزدەگەن ماقساتى ليۆان قۇدايشىلدار پارتياسىنىڭ جوعارى دارەجەلى قولباسشىسى بولعان. قۇدايشىلدار پارتياسى سول كۇنى مالىمدەمە جاريالاپ، يزرايلدىڭ شابۋىلداۋ نىساناسى الي كاراكي، ول قازىر امان - ەسەن حاۋىپسىز جەرگە جوتكەلدى دەگەندى ايتتى.

يزرايل مەملەكەت قورعانىس ارمياسىنىڭ بايانداماشىسى حاگاري 9 – ايدىڭ 23 – كۇنى كەشتە يزرايل ارمياسى وتكەن 24 ساعات ىشىندە ”ليۆان قۇدايشىلدار پارتياسى نىساناسىنا“ قاراتا كەڭ كولەمدە اۋا شابۋىلىن جاساپ، 1300 دەن ارتىق ”قۇدايشىلدار پارتياسىنىڭ نىساناسىنا“ سوققى بەردى دەدى.

كەلۋ قاينارى: حالىق تورابى