ليۆان مەن يزرايل قاقتىعىسى ءبىر جىلعا جۋىق جالعاسىپ، ليۆاندا 1540 ادام قازا بولدى

ليۆان ۇكىمەتىنە قاراستى اپات حاۋىپ ـ قاتەرىن باسقارۋ گرۋپپاسى 9 – ايدىڭ 26 - كۇنى مالىمدەمە جاريالاپ بىلاي دەدى: بىلتىر 10 ـ ايدىڭ باسىنان بەرى ليۆان قۇدايشىلدار پارتياسى مەن يزرايل اراسىنداعى قاقتىعىستان ليۆاندا 1540 ادام قازا بولىپ، 5410 ادام جارالاندى.

مالىمدەمەدە ليۆان الەۋمەتتىك دەنساۋلىق ساقتاۋ مينيسترلىگى جاريالاعان ساندى مالىمەتتەن سيتات كەلتىرىلىپ بىلاي دەلىنگەن: يزرايل 9 – ايدىڭ 26 - كۇنى ليۆاننىڭ كوپتەگەن رايونىنا 115 رەت شابۋىل جاساپ، 60 ادام قازا بولىپ، 81 ادام جارالاندى. وتكەن 24 ساعاتتا ەل ىشىندەگى 150 ورنالاستىرۋ ورتالىعىندا تىزىمگە الىنعان بوسقىن 33 مىڭ 500 ادام بولعان، قازىر بۇكىل ەلدەگى 565 ورنالاستىرۋ ورتالىعىندا 71 مىڭ 100 بوسقىن تىزىمگە الىنعان.

بۇدان سىرت، يزرايلدىڭ اۋە شابۋىلىنىڭ ىقپالىنان، وتكەن ەكى كۇندە سيريالىق 15 مىڭ 600 ادام جانە ليۆاندىق 16 مىڭ 100 ادام كورشى ەل سيرياعا جان ساۋعالاعان.

بىلتىر 10 - ايدىڭ 7 - كۇنى پالەستين يسلام قارسىلىق كورسەتۋ ۇيىمى (حاماس) يزرايلعا توسىننان شابۋىل جاساپ، پالەستين مەن يزرايل ورتاسىندا جاڭا ءبىر كەزەكتى قاقتىعىس باستالعان. ليۆان قۇدايشىلدار پارتياسى ىلە - شالا يزرايلدىڭ سولتۇستىك بولەگىنە قايتا - قايتا شابۋىل جاساعان، يزرايل ليۆاننىڭ وڭتۇستىك بولەگىن زەڭبىرەكپەن اتقىلاعان. ليۆان قۇدايشىلدار پارتياسى مەن يزرايل اراسىنداعى قاقتىعىس تاياۋدا ۇزدىكسىز كۇشەيىپ، الەم قاقتىعىستىڭ جالپى بەتتىك ۋشىعۋىنان الاڭدادى.

كەلۋ قاينارى: حالىق تورابى