شي جينپيڭ جۇڭگونىڭ حالىقارالىق دوستىق جينالىسىنا جانە جۇڭگو حالقىنىڭ شەتەلدەرمەن دوستىق بايلانىس جاساۋ قوعامى قۇرىلعاندىعىنىڭ 70 جىلدىعىن ەسكە ءتۇسىرۋ قيمىلىنا قاتىناسقان شەتەلدىك سيلى قوناقتارمەن كەزدەستى

شينحۋا اگەنتتىگى، 10 - ايدىڭ 11 - كۇنى، بەيجيڭ. 10 - ايدىڭ 11 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگونىڭ حالىقارالىق دوستىق جينالىسىنا جانە جۇڭگو حالقىنىڭ شەتەلدەرمەن دوستىق بايلانىس جاساۋ قوعامى قۇرىلعاندىعىنىڭ 70 جىلدىعىن ەسكە ءتۇسىرۋ قيمىلىنا قاتىناسقان شەتەلدىك سيلى قوناقتارمەن توپتىق كەزدەستى.

شي جينپيڭ الدىمەن جۇڭگوعا كەلىپ جۇڭگونىڭ حالىقارالىق دوستىق جينالىسىنا جانە جۇڭگو حالقىنىڭ شەتەلدەرمەن دوستىق بايلانىس جاساۋ قوعامى قۇرىلعاندىعىنىڭ 70 جىلدىعىن ەسكە ءتۇسىرۋ قيمىلىنا قاتىناسقان ءبىر ءبولىم شەتەلدىك سيلى قوناقتارمەن توپتىق سۋرەتكە ءتۇسىپ، ەستەلىك قالدىردى، حالىقارالىق دوستاردىڭ ۇزاق ۋاقىتتان بەرى جۇڭگونىڭ دوستىق ىستەرىنە كۇش سالىپ كەلگەندىگىن ايرىقشا القادى.

شي جينپيڭ بىلاي دەپ اتاپ كورسەتتى: حالىقتار دوستىعى − حالىقارالىق قارىم - قاتىناستىڭ ورنىقتى قاداممەن الىسقا جەتۋىنىڭ نەگىزى، دۇنيە ءجۇزىنىڭ بەيبىتشىلىگى مەن دامۋىن جەبەۋدىڭ سارقىلماس قوزعاۋشى كۇشى. جۇڭحۋا حالىق رەسپۋبليكاسى قۇرىلعان 75 جىلدان بەرى جۇڭگو كوممۋنيستىك پارتياسى جۇڭگو حالقىن ىنتىماقتاستىرىپ جانە باستاپ، ءوزىن دامىتۋمەن بىرگە، دۇنيە جۇزىنە دە باقىت جاراتاتىن وسىزامانداندىرۋ جولىمەن ءجۇردى. وتكەن جولىمىزعا قايىرىلا قاراساق، جۇڭگونىڭ قول جەتكىزگەن ءار جاقتاعى جەتىستىكتەرى دۇنيە جۇزىندەگى ءار ەل حالقىنىڭ قولداۋىنان ايرىلا المايدى. زور توپتاعى حالىقارالىق دوستار جۇڭگو حالقىمەن بىرگە بولىپ، جاپا - ماشاقاتتى بىرگە وتكەردى، كوپتەگەن شەتەل كاسىپورىندارى، قۇرىلىمدارى، جەكەلەرى جۇڭگونىڭ سوتسياليستىك وسىزامانداندىرۋ قۇرىلىسىنا بەلسەنە ات سالىسىپ، ءار جاقتىڭ ءوزارا پايدا جەتكىزىپ، تەڭ يگىلىككە كەنەلۋىن جۇزەگە اسىرۋمەن بىرگە، جۇڭگو مەن شەتەلدىڭ دوستىق اۋىس - كۇيىسىن، سەلبەستىگىن جەبەۋگە دە ماڭىزدى ۇلەس قوستى. ءبىز كوپشىلىكتىڭ جۇڭگوعا قوسقان ماڭىزدى ۇلەسىن جانە جۇڭگو حالقىمەن بولعان شىنايى دوستىعىن باستان - اياق ەستە بەرىك ساقتايمىز.

شي جينپيڭ بىلاي دەپ باسا دارىپتەدى: بۇگىنگى دۇنيە ءجۇزى تاعى دا تاريحتىڭ جول ايىرىعىندا تۇر. عاسىرلىق وزگەرىس جاعدايىندا، بۇكىل دۇنيە ءجۇزىنىڭ قۋانىش - جۇبانىشتا بىرگە بولۋى، ادامزاتتىڭ تاعدىرلاس بولۋى، ادامزاتتىڭ تاعدىرلاس ورتاق تۇلعاسىن قۇرۋ − دۇنيە جۇزىندەگى ءار ەل حالقى بولاشاعىنىڭ تياناعى. جۇڭگو ءار ەلدەگى دوستارمەن دوستىق اۋىس - كۇيىستى كۇشەيتىپ، حالىقتىق ديپلوماتيانىڭ وزگەشە رولىن ساۋلەلەندىرىپ، ادامزاتتىڭ تاعدىرلاس ورتاق تۇلعاسىن قول ۇستاسا قۇرۋدى قالايدى.

ءبىرىنشى، ”ءبىر جەر شارىندا ءبىر جاعادان باس، ءبىر جەڭنەن قول شىعارۋ“ رۋحىمەن ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدىڭ كەڭ كولەمدى ورتاق تانىمىن ۇيىستىرۋ كەرەك. بەيبىتشىلىك، دامۋ، ادىلدىك، ادىلەتتىلىك، دەموكراتيا، ەركىندىك سىندى بۇكىل ادامزاتتىڭ ورتاق قۇنىن ساۋلەلەندىرىپ، دۇنيە ءجۇزىنىڭ بارابار، ءتارتىپتى كوپ ۇيەكتەنۋىن، ەكونوميكانىڭ جالپىعا ءتيىمدى، سيىسىمدى جاھاندانۋىن دارىپتەپ، ءوزىمىز بىرگە تۇرمىس كەشىرىپ جاتقان جەر شارىن بەيبىت، تاتۋ، جاراسىمدى ۇلى شاڭىراق ەتىپ قۇرىپ شىعۋىمىز كەرەك.

ەكىنشى، سەلبەسىپ تەڭ يگىلىككە كەنەلۋ ۇستانىمى ارقىلى ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدىڭ قۇدىرەتتى بىرىككەن كۇشىن ۇيىستىرۋ كەرەك. جۇڭگو ءوز باسىنىڭ قامىن عانا ويلايتىن وسىزاماندانۋعا تالپىنبايدى، ءتىپتى دە كوپ شەتەلدىك دوستاردىڭ جۇڭگو ۇلگىسىندەگى وسىزامانداندىرۋ اياق الىسىنا بەلسەنە ات سالىسۋىن قارسى الادى، جۇڭگو ۇلگىسىندەگى وسىزامانداندىرۋدىڭ جاڭا تابىستارى ارقىلى دۇنيە ءجۇزىنىڭ دامۋىنا ۇزدىكسىز جاڭا وراي جاراتىپ، بەيبىت داميتىن، ءوزارا ءتيىمدى سەلبەستىك جاسايتىن، بىرگە گۇلدەنىپ - كوركەيەتىن دۇنيە جۇزىلىك وسىزامانداندىرۋدى ىلگەرىلەتىپ، ءار ەل حالقىنا ءتىپتى دە زور باقىت جاراتۋدى قالايدى.

ءۇشىنشى، اشىق، سيىسىمدى پەيىلمەن ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدىڭ وركەنيەت كارتيناسىن كەسكىندەۋ كەرەك. جۇڭحۋا ۇلتى − اشىق، سيىسىمدى ۇلت، جۇڭگو حالقى − اق كوڭىل، دوسجار حالىق. جۇڭگو جاق ءار جاقپەن بىرگە دۇنيە جۇزىلىك وركەنيەت باستاماسىن امالياتتا ايگىلەپ، شىنايى كەڭەسۋ ارقىلى تۇسىنىستىكتى ارتتىرىپ، دوستىقتى تەرەڭدەتىپ، وركەنيەتتەردىڭ اۋىس - كۇيىسى ارقىلى وركەنيەتتەردىڭ كىربەڭدىگىن تەجەۋدى، وركەنيەتتەردىڭ ءوزارا ۇلگى الۋى ارقىلى وركەنيەتتەر قاقتىعىسىن تەجەۋدى قالايدى.

شي جينپيڭ بىلاي دەپ باسا دارىپتەدى: جۇڭگو كوممۋنيستىك پارتياسى − حالىق ءۇشىن قىزمەت ىستەيتىن پارتيا، جۇڭگو ۇكىمەتى − حالىقتىڭ ۇكىمەتى، جۇڭگونىڭ ديپلوماتياسى − حالىقتىڭ ديپلوماتياسى. جۇڭگو ۇكىمەتى جۇڭگو حالقىنىڭ شەتەلدەرمەن دوستىق بايلانىس جاساۋ قوعامىنىڭ جۇڭگو جانە شەتەل حالىقتارىنىڭ دوستىعىن دامىتۋ، حالىقارالىق ناقتى سەلبەستىكتى ىلگەرىلەتۋ سياقتى جاقتاردا وزگەشە رولىن ساۋلەلەندىرىپ، دوستىقتى كوپىر ەتىپ، تىلەكتەردى توعىستىرىپ، جۇڭگو مەن شەتەلدەردىڭ حالىقتار دوستىعىن ۇزدىكسىز تەرەڭدەتىپ، ءار ەلدەگى دوستارمەن ىنتىماقتاسىپ، ادامزاتتىڭ تاعدىرلاس ورتاق تۇلعاسىن بىرگە امالياتتا ايگىلەۋشى، جۇڭگو ۇلگىسىندەگى وسىزامانداندىرۋعا بىرگە ات سالىسۋشى، وركەنيەتتەن ءوزارا ۇلگى الۋ جانە حالىق تىلەگىن توعىستىرۋدىڭ ورتاق جەبەۋشىسى جانە حالىقتار دوستىعى ىستەرىنىڭ ورتاق جالعاستىرۋشىسى بولۋىن بۇرىنعىداي قولدايدى.

نيگەريانىڭ بۇرىنعى زۇڭتۇڭى وباسانجو، تايلاندتىڭ بۇرىنعى پارلامەنت ءتوراعاسى پوچين، امەريكا ”گۋليڭ دوستارىنىڭ“ قۇرۋشىسى ماكگيننيس ەرين جەكە - جەكە سىرت جاققا ۋاكىل بولىپ ءسوز سويلەدى. ولار جۇڭحۋا حالىق رەسپۋبليكاسى قۇرىلعاندىعىنىڭ 75 جىلدىعىن قىزۋ قۇتتىقتاپ، جۇڭگو حالقىنىڭ شەتەلدەرمەن دوستىق بايلانىس جاساۋ قوعامىنىڭ حالىقتىق ديپلوماتيانى ىلگەرىلەتۋ، ءار ەل حالقىنىڭ ءتۇسىنىسۋى مەن دوستىعىن نىعايتۋ جاقتارىندا اتقارعان وزگەشە رولىن جوعارى باعالاپ، مىنالاردى ءبىلدىردى: ءتوراعا شي جينپيڭنىڭ باسشىلىعىندا جۇڭگو كەدەيلىكتەن ءساتتى ارىلىپ، جەدەل دامۋدى جۇزەگە اسىرىپ، قالىڭ وركەندەپ كەلە جاتقان ەلدەرگە ءۇمىت شامىن جاقتى. ءتوراعا شي جينپيڭ ادامزاتتىڭ تاعدىرلاس ورتاق تۇلعاسىن قۇرۋ ۇستانىمى مەن ”ءبىر بەلدەۋ، ءبىر جولدى“ بىرگە قۇرۋ سياقتى باستامالاردى العا قويىپ، دۇنيە جۇزىلىك باسقارۋ جونىندەگى كورەگەندىگى مەن جاۋاپكەرشىلىگىن ايگىلەپ، دۇنيە جۇزىندەگى ءار ەلدىڭ تىعىز سەلبەسۋىنە، ءوزارا پايدا جەتكىزىپ، تەڭ يگىلىككە كەنەلۋىنە ايقىن بەتالىس كورسەتتى، جۇڭگونىڭ دامىپ، گۇلدەنۋى، ءسوز جوق، دۇنيە جۇزىنە ۇزدىكسىز باقىت اكەلەدى. جۇڭگو جاقپەن ءار سالاداعى دوستىق اۋىس - كۇيىستى، سەلبەستىكتى ۇزدىكسىز كۇشەيتىپ، حالىقتار دوستىعىن ۇرپاقتان - ۇرپاققا جالعاستىرىپ، ادامزاتتىڭ تاعدىرلاس ورتاق تۇلعاسىن قول ۇستاسا قۇرىپ، دۇنيە ءجۇزىنىڭ بەيبىتشىلىگىنە، دامۋىنا، گۇلدەنۋىنە اناعۇرلىم زور ۇلەس قوسۋدى ءۇمىت ەتەمىز.

شەتەلدەردىڭ بۇرىنعى ساياسي قايراتكەرلەرى، پاتشا اۋلەتىنىڭ مۇشەلەرى، حالىقارالىق دوستىق ۇيىمدارىنىڭ جاۋاپتىلارى، دوس قايراتكەرلەر قاتارلىلاردان 200 دەي ادام ماجىلىسكە قاتىناستى.

ساي چي، حان جىڭ، ۋاڭ ي قاتارلىلار كەزدەسۋدە بىرگە بولدى.