شي جينپيڭ ۆيەتنام كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، ورتالىق كوميتەت شۋجيچۋىنىڭ ۇنەمىلىك ىستەرگە جاۋاپتى شۋجيى لياڭ چياڭمەن كەزدەستى

شينحۋا اگەنتتىگى، 10 - ايدىڭ 11 - كۇنى، بەيجيڭ. 10 - ايدىڭ 11 - كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ حالىق سارايىندا ۆيەتنام كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، ورتالىق كوميتەت شۋجيچۋىنىڭ ۇنەمىلىك ىستەرگە جاۋاپتى شۋجيى لياڭ چياڭمەن كەزدەستى.

شي جينپيڭ بىلاي دەپ اتاپ كورسەتتى: كوممۋنيستىك پارتيانىڭ باسشىلىعى مەن سوتسياليستىك تۇزىمگە تاباندى بولۋ − جۇڭگو مەن ۆيەتنام ەكى ەلدىڭ ەڭ ماندىك ەرەكشەلىگى، سونداي - اق جۇڭگو - ۆيەتنام قارىم - قاتىناسىن دامىتۋدىڭ ەڭ بەرىك ساياسي نەگىزى. جۇڭگو جاق ۆيەتنامدى توڭىرەكتىك ديپلوماتيانىڭ الدىمەن ەسكەرىلەتىن بەتالىسى دەپ قارايدى، ۆيەتناممەن بىرگە جوعارى دەڭگەيدەگى ءوزارا ءتيىمدى سەلبەستىكتى تەرەڭدەتۋدە الدىڭعى لەكتە ءجۇرىپ، حالىقارالىق ادىلدىكتى، تۋراشىلدىقتى قورعاۋدا الدىڭعى لەكتە ءجۇرىپ، ادامزاتتىڭ العا باسۋ ىستەرىن ىلگەرىلەتۋدە الدىڭعى لەكتە ءجۇرىپ، ستراتەگيالىق مانگە يە جۇڭگو - ۆيەتنام تاعدىرلاس ورتاق تۇلعاسىن قول ۇستاسا قۇرۋدى قالايدى.

شي جينپيڭ بىلاي دەپ باسا دارىپتەدى: دۇنيە جۇزىندە 100 جىلدىق وزگەرىس جەدەل قۇبىلىپ وتىرعان جاعدايدا جۇڭگو مەن ۆيەتنام ساياسي بەتالىستى ءدال يگەرىپ، جۇڭگو - ۆيەتنام قارىم - قاتىناسىن ستراتەگيالىق دەڭگەيدەن يگەرۋگە تاباندى بولىپ، ەكى جاقتى قارىم - قاتىناستىڭ دۇرىس ارنامەن ۇزدىكسىز العا دامۋىنا شىنايى كەپىلدىك ەتۋى كەرەك. يدەيالىق تانىم اۋىس - كۇيىسىن كۇشەيتىپ، نازاريالىق زەرتتەۋ - تالقى، كادرلاردى باۋلۋ سياقتى مەحانيزمدەنگەن تۇعىرلاردان ويداعىداي پايدالانىپ، پارتيانى باسقارۋ، مەملەكەتتى باسقارۋ تاجىريبەلەرىن اۋىستىرۋدى، ءوزارا ۇلگى الۋدى كۇشەيتىپ، بيلىك جۇرگىزۋ قابىلەتىن بىرگە جوعارىلاتىپ، بيلىك جۇرگىزۋدەگى قيىن ماسەلەلەردى شەشۋ كەرەك. تەڭ يگىلىككە كەنەلەتىن جاعداي قالىپتاستىرىپ، سەلبەستىكتىڭ كومەسكى كۇشىن اشىپ، دامۋ ستراتەگياسىن ۇشتاستىرۋدى جانە ۇلاستىرۋ - تۇتاستىرۋدى جاپپاي ىلگەرىلەتىپ، ناقتى سەلبەستىكتى جوعارى ساپالى دامىتۋ جاڭا نىساناسىن قۇلشىنا جۇزەگە اسىرۋ كەرەك. حالىقتىق دوستىقتى جەتىلدىرىپ، كەلەر جىلى جۇڭگو مەن ۆيەتنامنىڭ ديپلوماتيالىق قارىم - قاتىناس ورناتقاندىعىنىڭ 75 جىلدىعى مەن جۇڭگو - ۆيەتنام گۋمانيتارلىق اۋىس - كۇيىس جىلى ورايىنان ويداعىداي پايدالانىپ، ءداستۇرلى دوستىق تاربيەسى مەن قوعامدىق پىكىر جەتەكشىلىگىن كۇشەيتىپ، ەكى ەل قارىم - قاتىناسىنىڭ ۇزاق بولاشاقتىق دامۋىنىڭ حالىق رايى نەگىزىن بەكەمدەۋ كەرەك.

شي جينپيڭ مىنانى ءبىلدىردى: بيىل 7 – ايدا اشىلعان جۇڭگو كوممۋنيستىك پارتياسى 20 - كەزەكتى ورتالىق كوميتەتىنىڭ ءۇشىنشى جالپى ءماجىلىسى رەفورمانى ونان ارى جاپپاي تەرەڭدەتۋ، جۇڭگو ۇلگىسىندەگى وسىزامانداندىرۋدى ىلگەرىلەتۋ جونىندە جۇيەلى ورنالاستىرۋ جاسادى. جۇڭگو رەفورمانى ونان ارى جاپپاي تەرەڭدەتىپ، جوعارى دەڭگەيدە سىرتقا ەسىك اشۋدى ىلگەرىلەتىپ، وزىندىك دامۋعا كەڭ ءورىس اشىپ قانا قويماي، ۆيەتنامنىڭ، سونداي - اق دۇنيە جۇزىندەگى ءار ەلدىڭ دامۋىنا دا تىڭ قوزعاۋشى كۇش، تىڭ وراي اكەلەدى. جۇڭگو جاق ۆيەتنام جاقپەن اۋىس - كۇيىستى، سەلبەستىكتى كۇشەيتىپ، قول ۇستاسا وتىرىپ رەفورما جولىندا ساپارلاس، وسىزامانداندىرۋ جولىندا جاقسى سەرىك بولۋدى قالايدى. باس شۋجي سۋلين باستاعان ۆيەتنام كوممۋنيستىك پارتياسى ورتالىق كوميتەتىنىڭ باسشىلىعىندا ۆيەتنامنىڭ بۇكىل پارتياسىنىڭ، بۇكىل ارمياسىنىڭ، بۇكىل حالقىنىڭ ۆيەتنام كوممۋنيستىك پارتياسىنىڭ 13 - قۇرىلتايىندا بەلگىلەنگەن نىسانا - مىندەتتەردى ءساتتى ورىنداپ، پارتيا قۇرۋ، مەملەكەت قۇرۋدىڭ 100 جىلدىعى كۇرەس نىساناسىنا قاراي نىق قادام تاستايتىندىعىنا سەنەمىن.

لياڭ چياڭ جۇڭحۋا حالىق رەسپۋبليكاسى قۇرىلعان 75 جىلدان، اسىرەسە، جاڭا داۋىردەن بەرى شي جينپيڭ جولداستى ۇيىتقى ەتكەن جۇڭگو كوممۋنيستىك پارتياسى ورتالىق كوميتەتىنىڭ جۇڭگو حالقىن باستاپ قول جەتكىزگەن وراسان زور دامۋ جەتىستىكتەرىن قىزۋ قۇتتىقتاپ، مىنالاردى ءبىلدىردى: ۆيەتنام جاق جۇڭگونىڭ ەكىنشى 100 جىلدىق كۇرەس نىساناسىن، ءسوز جوق، ۋاعىندا جۇزەگە اسىرىپ، دۇنيە ءجۇزى مەن ءوڭىردىڭ بەيبىتشىلىگى، ورنىقتىلىعى جانە گۇلدەنۋى ءۇشىن اناعۇرلىم زور ۇلەس قوساتىندىعىنا كامىل سەنەدى. شي جينپيڭ جاڭا ءداۋىر جۇڭگوشا سوتسياليزم يدەياسى جۇڭگونىڭ سوتسياليزم ىستەرى جونىنەن ماڭىزدى جەتەكشى مانگە يە، ۆيەتنام سياقتى سوتسياليستىك ەلدەر مەن حالىقارالىق قوعام جونىنەن دە كەلەلى قۇنعا يە. ۆيەتنام مەن جۇڭگو − تاۋ - سۋى جالعاسقان سوتسياليستىك كورشى ەلدەر، ۆيەتنام جۇڭگونىڭ ۆيەتنامنىڭ ۇلت تاۋەلسىزدىگى مەن ازاتتىعى كەزىندە جانە سوتسياليستىك قۇرىلىسى بارىسىندا ۆيەتنامعا كورسەتكەن باعالى قولداۋىن ايرىقشا قاستەرلەيدى، جۇڭگومەن قارىم - قاتىناستى دامىتۋدى دايەكتى تۇردە ۆيەتنامنىڭ جالپى تۇلعالىق ديپلوماتياسىنىڭ وبيەكتيۆ قاجەتى، ستراتەگيالىق تالعامى جانە ماڭداي الدى ابزالدىعى ەتەدى. قازىر ەكى پارتيانىڭ، ەكى ەلدىڭ قارىم - قاتىناسىنىڭ دامۋى تەبىندى بولۋدا، ۆيەتنام جاق جۇڭگومەن بىرگە تاياۋ جىلداردان بەرى ەكى پارتيانىڭ، ەكى ەلدىڭ ەڭ جوعارى باسشىلارى كەلىسكەن ماڭىزدى ورتاق تانىمدى ويداعىداي تياناقتاندىرىپ، ەكى پارتيا، ەكى ەل قارىم - قاتىناسىن اناعۇرلىم كۇشەيتىپ، ءار سالاداعى، ءار جاقتاعى بارىس - كەلىستىڭ، سەلبەستىكتىڭ تەرەڭدەۋىن، ناقتىلانۋىن جەبەپ، الاۋىزدىقتاردى اناعۇرلىم ويداعىداي مەڭگەرىپ، شەشىپ، ”جولداس ۇستىنە باۋىرلاس بولۋ“ رۋحىن بەكەمدەپ جانە تەرەڭدەتىپ، ۆيەتنام مەن جۇڭگونىڭ جان - جاقتى ستراتەگيالىق سەلبەستىك سەرىكتەستىك قارىم - قاتىناسىندا جانە ۆيەتنام - جۇڭگو تاعدىرلاس ورتاق تۇلعاسى قۇرىلىسىندا ۇزدىكسىز تىڭ تابىستارعا قول جەتكىزۋدى ىلگەرىلەتەدى.

ساي چي، ۋاڭ ي كەزدەسۋدە بىرگە بولدى.