لي چياڭ لاوس حالىق توڭكەرىستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى تۇڭلۇنمەن كەزدەستى

«حالىق گازەتى»، 10 - ايدىڭ 11 – كۇنى، ۆەنتيان. سول جەر ۋاقىتى 10 - ايدىڭ 11 - كۇنى مەملەكەتتىك كەڭەستىڭ زۇڭليى لي چياڭ لاوستىڭ ءتوراعا سارايىندا لاوس حالىق توڭكەرىستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى تۇڭلۇنمەن كەزدەستى.

لي چياڭ الدىمەن باس شۋجي، مەملەكەت ءتوراعاسى شي جينپيڭنىڭ باس شۋجي، مەملەكەت ءتوراعاسى تۇڭلۇنگە جولداعان ىقىلاستى سالەمىن جەتكىزدى ءارى لاوستىڭ شىعىس ازيا ەلدەرى سەلبەستىگى باسشىلارىنىڭ جەلىلەس ءماجىلىسىن ءساتتى وتكىزگەندىگىن قۇتتىقتادى. لي چياڭ مىنالاردى ءبىلدىردى: جۇڭگو مەن لاوس − سوتسياليستىك جولداس ءارى باۋىرلاس، ديپلوماتيالىق قارىم - قاتىناس ورناتقان 60 نەشە جىلدان بەرى ەكى پارتيا، ەكى ەل قارىم - قاتىناسى حالىقارالىق اۋمالى - توكپەلى جاعدايدىڭ سىنىنان ءوتىپ، تىڭ ومىرشەڭدىك كۇشىن ۇزدىكسىز تاسقىنداتتى. باس شۋجي شي جينپيڭ باس شۋجي تۇڭلۇنمەن تىعىز ستراتەگيالىق قارىم - قاتىناستى ساقتاپ، جاڭا داۋىردەگى جۇڭگو - لاوس تاعدىرلاس ورتاق تۇلعاسى قۇرىلىسىنا جول نۇسقادى. جۇڭگو جاق لاوسپەن قارىم - قاتىناستى دامىتۋدى باستان - اياق جۇڭگونىڭ توڭىرەكتىك ديپلوماتياسىنداعى ەرەكشە ماڭىزدى ورىنعا قويىپ كەلەدى، لاوس جاقپەن بىرگە ەكى پارتيانىڭ، ەكى ەلدىڭ ەڭ جوعارى باسشىلارىنىڭ ستراتەگيالىق جەتەكشىلىگىن باسشىلىققا الىپ، ساياسي ءوزارا سەنىمدىلىكتى تەرەڭدەتىپ، ءوزارا ءتيىمدى سەلبەستىكتى كۇشەيتىپ، جۇڭگو - لاوس تاعدىرلاس ورتاق تۇلعاسىن قول ۇستاسا بىرگە قۇرىپ، ەكى ەل حالىقتارىنا اناعۇرلىم كوپ ىرىس - قۇت اكەلۋدى قالايدى.

لي چياڭ بىلاي دەپ اتاپ كورسەتتى: جۇڭگو جاق لاوستىڭ ءوز ەلىنىڭ مەملەكەت جاعدايىنا ۇيلەسەتىن سوتسياليزم جولىمەن ءجۇرۋىن باتىل قولدايدى، لاوس جاقپەن ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ءبىرىن - ءبىرى ۇزدىكسىز تاباندىلىقپەن قولداۋدى قالايدى. ەكى جاق جۇڭگو - لاوس تاعدىرلاس ورتاق تۇلعاسىن قۇرۋدىڭ جاڭا ۇلگىدەگى ارەكەت جوسپارىن جەدەل تياناقتاندىرىپ، ”ءبىر بەلدەۋ، ءبىر جول“ باستاماسى مەن لاوستىڭ ”قۇرلىقتا تۇيىقتالعان ەلدەن قۇرلىقتى تۇتاستىراتىن ەلگە اينالۋ“ ستراتەگياسىن ۇشتاستىرۋدى ۇزدىكسىز ىلگەرىلەتىپ، ساۋدا، قارجى قوسۋ، ءوندىرىس قۋاتى، ەلەكتر قۋاتى، كەن ونىمدەرى سياقتى سالالارداعى ناقتى سەلبەستىكتى كەڭەيتىپ، كومەسكى كۇشتى ونان ارى اشىپ، جۇڭگو - لاوس تەمىر جولىنىڭ جەتەكتەۋ ونىمدىلىگىن ساۋلەلەندىرىپ، جۇڭگو مەن لاوستىڭ جان - جاقتى سەلبەستىگىنىڭ ءتىپتى دە كوپ، كوزگە كورىنەرلىك جەتىستىكتەرگە قول جەتكىزۋىن ىلگەرىلەتۋى كەرەك. جۇڭگو جاق لاوس جاقپەن مادەنيەت، ساياحات، وقۋ - اعارتۋ سياقتى گۋمانيتارلىق اۋىس - كۇيىس سەلبەستىگىن كەڭەيتىپ، ءوزارا ءتۇسىنىسۋ مەن دوستىقتى ۇزدىكسىز كۇشەيتىپ، ەكى ەلدىڭ سەلبەستىكتى تەرەڭدەتۋىنە اناعۇرلىم بەرىك حالىق رايى نەگىزىن قالاۋعا پەيىل.

تۇڭلۇن لي چياڭعا باس شۋجي، مەملەكەت ءتوراعاسى شي جينپيڭگە ىقىلاستى سالەمىن جەتكىزىپ قويۋدى تاپسىردى، جۇڭگو كوممۋنيستىك پارتياسى 20 - كەزەكتى ورتالىق كوميتەتى ءۇشىنشى جالپى ءماجىلىسىنىڭ جەڭىسپەن اشىلعاندىعىن قۇتتىقتادى، جۇڭحۋا حالىق رەسپۋبليكاسى قۇرىلعاندىعىنىڭ 75 جىلدىعىن قۇتتىقتادى. تۇڭلۇن مىنالاردى ءبىلدىردى: شي جينپيڭ جولداستى ۇيىتقى ەتكەن جۇڭگو كوممۋنيستىك پارتياسى ورتالىق كوميتەتىنىڭ پارمەندى باسشىلىعىندا جۇڭگو دۇنيەنى جالت قاراتقان تاريحي دامۋ جەتىستىكتەرىنە قول جەتكىزدى، حالىقارالىق ىقپالى ۇزدىكسىز جوعارىلادى، لاوس مۇنى جوعارى باعالايدى. لاوس پارتياسى، ۇكىمەتى جانە حالقى جۇڭگونى باستان - اياق ايىرىلماس جاقسى كورشى، جاقسى دوس، جاقسى جولداس، جاقسى سەرىك دەپ قارايدى، ءبىر جۇڭگو پرينسيبىن بەرىك ۇستانادى، جۇڭگونىڭ تايۋان، شينجياڭ، شياڭگاڭ سياقتى ماسەلەلەردە وزەكتى مۇددەسىن قورعاۋىن باتىل قولدايدى، ءۇش ۇلكەن دۇنيە جۇزىلىك باستامانى باتىل قولدايدى. لاوس جاق جۇڭگو جاقپەن جوعارى جىكتەگىلەردىڭ بارىس - كەلىسىن اناعۇرلىم جيىلەتىپ، لاوستىڭ مەملەكەتتى دامىتۋ ستراتەگياسىن ”ءبىر بەلدەۋ، ءبىر جولدى“ بىرگە قۇرۋ باستاماسىمەن ۇشتاستىرۋدى كۇشەيتىپ، لاوس - جۇڭگو تەمىر جولى سياقتى ءتۇيىندى سالالارداعى سەلبەستىكتى ىلگەرىلەتىپ، گۋمانيتارلىق اۋىس - كۇيىستى تەرەڭدەتىپ، لاوس - جۇڭگو تاعدىرلاس ورتاق تۇلعاسى قۇرىلىسىنىڭ اناعۇرلىم جوعارى دەڭگەيگە كوتەرىلۋىن ىلگەرىلەتىپ، ەكى ەل حالىقتارىن اناعۇرلىم باقىتقا كەنەلتۋدى قالايدى.