جۇڭحۋا ۇلتى ورتاق تۇلعا تانىمىن سومداۋعا، نەگىزگى جەلىنى بەكەمدەۋگە تاباندى بولىپ، جۇڭگو ۇلگىسىندەگى وسىزامانداندىرۋ ۇردىسىندە كورىكتى شينجياڭدى اناعۇرلىم ويداعىداي قۇرۋ كەرەك

شينحۋا اگەنتتىگى، 10 - ايدىڭ 24 – كۇنى، ءۇرىمجى. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك ساياسي كەڭەستىڭ ءتوراعاسى ۋاڭ حۋنيڭ 10 - ايدىڭ 21 - كۇنىنەن 24 - كۇنىنە دەيىن شينجياڭنىڭ حوتان، قاشقارىندا تەكسەرۋ - زەرتتەۋ جۇرگىزدى. ول مىنالاردى ءبىلدىردى: شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتۋگە تاباندى بولىپ، پارتيا 20 - كەزەكتى ورتالىق كوميتەتى ءۇشىنشى جالپى ءماجىلىسىنىڭ رۋحىن ىشكەرىلەي دايەكتىلەندىرىپ، تياناقتاندىرىپ، جاڭا داۋىردەگى پارتيانىڭ شينجياڭدى باسقارۋ جالپى جوباسىن تولىق، دالمە - ءدال، جاپپاي دايەكتىلەندىرىپ، جۇڭحۋا ۇلتى ورتاق تۇلعا تانىمىن سومداۋعا، نەگىزگى جەلىگە تاباندى بولىپ، جۇڭگو ۇلگىسىندەگى وسىزامانداندىرۋ ۇردىسىندە كورىكتى شينجياڭدى اناعۇرلىم ويداعىداي قۇرۋ كەرەك.

ۋاڭ حۋنيڭ حوتان ايماقتىق حالىق شيپاحاناسىنا، حوتان قالالىق 12 - باستاۋىش مەكتەپكە، قاشقار جاڭاشار اۋدانى تازعۇن اۋىلىنىڭ تاتىر قىستاعىنا بارىپ، ۇلتتار ىنتىماعى قىزمەتى جاعدايىنا تەكسەرۋ - زەرتتەۋ جۇرگىزدى ءارى شينجياڭعا كومەككە كەلگەن ەمدەۋ اترەتىندەگىلەرمەن، مەكتەپتەردەگى وقىتۋشى - وقۋشىلارمەن اڭگىمەلەسىپ، از ۇلت بۇقاراسىنىڭ وتباسىلارىنا امانداسا باردى. ول مىنانى ءبىلدىردى: ۇلتتار ىنتىماعىن نەگىزگى ساتىنى باسقارۋدا، مەكتەپ تاربيەسىندە، بۇقارانىڭ كۇندەلىكتى تۇرمىسىندا تياناقتاندىرىپ، جۇڭحۋا ۇلتى ورتاق تۇلعا تانىمىن كىشكەنتايىنان بالالاردىڭ جۇرەگىنە ۇيالاتىپ، ۇلتتاردىڭ اناردىڭ دانىندەي تىعىز ۇيىسۋىن جەبەۋ كەرەك. حوتان ايماعى كۇنگاڭ ەكونوميكالىق، تەحنيكالىق اشۋ رايونىندا جانە قاتىستى كاسىپورىنداردا تەكسەرۋ - زەرتتەۋ جۇرگىزگەندە، ول مىنانى ءبىلدىردى: وڭتۇستىك شينجياڭ ەرەكشەلىگىندەگى وسىزاماندانعان كاسىپ سالاسى جۇيەسىن ورناتىپ، كاسىپ سالاسى تىزبەگى ۇزىن، جەتەكتەۋ قابىلەتى كۇشتى ءبىر توپ كاسىپورىندى جەتىلدىرىپ، حالىق تۇرمىسىن جاقسارتۋدى جەبەپ، دامۋ ومىرشەڭدىك كۇشىن ارتتىرۋ كەرەك. جۇڭگو (شينجياڭ) ەركىن ساۋدا سىناق رايونى قاشقار اۋماعى ساۋدا ىستەرى قىزمەت وتەۋ ورتالىعىنا، ورتا، باتىس ازيا حالىقارالىق ساۋدا بازارىنا بارىپ تەكسەرۋ - زەرتتەۋ جۇرگىزگەندە، ول مىنانى ءبىلدىردى: شينجياڭ ەرەكشەلىككە يە ەسىك اشۋدىڭ جاڭا جولىن اشىپ، ەلىمىزدىڭ باتىسقا ەسىك اشۋداعى قامالىن سومداۋى كەرەك. شينجياڭ حوتان شۋەيۋانىندا، شينجياڭ ونەركاسىپ شۋەيۋانىندا (دايىندىق)، قاشقار داشۋەسىنىڭ شينچۋان مەكتەپ رايونىندا تەكسەرۋ - زەرتتەۋ جۇرگىزگەندە، ول مىنانى ءبىلدىردى: شينجياڭنىڭ، اسىرەسە، وڭتۇستىك شينجياڭنىڭ جوعارى دارەجەلى وقۋ - اعارتۋىن ويداعىداي جۇرگىزىپ، ءتىپتى دە كوپ جوعارى ساپالى دارىندىلاردى تاربيەلەۋ كەرەك. ۋاڭ حۋنيڭ تاعى لوپ اۋدانىنداعى راۋاق بۇتحاناسىنىڭ ەسكى جۇرتىنا، قاشقار قالا جوباسى سارايىنا بارىپ، تاريحي مادەني ەسكەرتكىشتەر ەسكى جۇرتىن قورعاۋ، پايدالانۋ، قالاداعى مادەنيەت، دەنە تاربيە الاڭ - سارايلارىنىڭ قۇرىلعىلارىن جوبالاۋ قۇرىلىسى سياقتى جاعدايلارمەن تانىستى.

تەكسەرۋ - زەرتتەۋ كەزىندە ۋاڭ حۋنيڭ مىنالاردى ءبىلدىردى: شينجياڭ ۇيعۇر اۆتونوميالى رايوندىق پارتكوم باس شۋجي شي جينپيڭنىڭ شينجياڭ قىزمەتى جونىندەگى ماڭىزدى ءسوزىنىڭ رۋحىن ىشكەرىلەي دايەكتىلەندىرىپ، تياناقتاندىرىپ، شينجياڭنىڭ قوعامدىق جالپى جاعدايى ورنىقتى بولعان، حالىق تىنىش ءومىر، شات - شادىمان تىرشىلىك كەشىرگەن تاماشا جاعدايدى اناعۇرلىم بەكەمدەدى. شينجياڭ قىزمەتىن ويداعىداي ىستەۋدە قوعام ورنىقتىلىعىن قورعاۋدى باستان - اياق ماڭداي الدى ورىنعا قويىپ، شينجياڭنىڭ قوعامدىق جالپى جاعدايىنىڭ باياندى ورنىقتىلىعىن ساقتاۋ كەرەك. ۇلت، ءدىن قىزمەتىن تىڭعىلىقتى ويداعىداي ىستەپ، شينجياڭدى مادەنيەتپەن نارلەندىرۋدى ىشكەرىلەي ورىستەتىپ، ءار ۇلت بۇقاراسىن جۇڭحۋا ۇلتى ورتاق تۇلعا تانىمىن بەرىك ورناتۋعا، ”بەستى شىنايى مويىنداۋدى“ كۇشەيتۋگە جەتەكتەۋ كەرەك. شينجياڭنىڭ جوعارى ساپالى دامۋ ارناسىنا ءتۇسۋىن ىلگەرىلەتىپ، شينجياڭنىڭ قوعام ورنىقتىلىعى مەن باياندى تىنىشتىعىنىڭ زاتتىق نەگىزىن بەكەمدەۋ كەرەك. بيڭتۋان رۋحىن ساۋلەلەندىرىپ، بيڭتۋان مەن جەرگىلىكتى ورىننىڭ توعىسپالى دامۋىن تەرەڭدەتىپ، بيڭتۋاننىڭ جاڭا داۋىردەگى ورنىقتىلىقتى قورعاۋ، شەكارانى ساقتاۋ جاڭا ابزالدىعىن قالىپتاستىرۋ كەرەك.

ۋاڭ حۋنيڭ تاعى اۆتونوميالى رايوندىق ساياسي كەڭەستىڭ حوتان ايماقتىق قىزمەت كوميتەتىنە، قاشقار ايماقتىق قىزمەت كوميتەتىنە جانە قاراقاش اۋداندىق ساياسي كەڭەسكە بارىپ، ساياسي كەڭەس مۇشەلەرى مەن ورگان كادرلارىنا امانداستى. ول مىنانى ءبىلدىردى: باس شۋجي شي جينپيڭنىڭ جۇڭگو حالىق ساياسي ءماسليحات كەڭەسى قۇرىلعاندىعىنىڭ 75 جىلدىعىن قۇتتىقتاۋ جينالىسىندا سويلەگەن ماڭىزدى ءسوزىنىڭ رۋحىن ىشكەرىلەي ۇيرەنىپ، دايەكتىلەندىرىپ، جاڭا داۋىردەگى پارتيانىڭ شينجياڭدى باسقارۋ جالپى جوباسىن تولىق، دالمە - ءدال جاپپاي دايەكتىلەندىرۋدى ارقاۋ ەتىپ، ساياسي كەڭەسۋ، دەموكراتيالىق باقىلاۋ، ۇكىمەت ىسىنە ارالاسۋ، ۇكىمەت ءىسىن كەڭەسۋ قابىلەتىن جوعارىلاتىپ، شينجياڭ قىزمەتىنىڭ باس نىساناسىن جۇزەگە اسىرۋ ءۇشىن ورتاق تانىم ۇيىستىرىپ، كۇش - قۋات توپتاۋ كەرەك.

ما شيڭرۇي، شى تايفىڭ، ۋاڭ دۇڭفىڭ بىرگە تەكسەرۋ - زەرتتەۋ جۇرگىزدى.

كەلۋ قاينارى: حالىق تورابى