لي چياڭ جاپونيانىڭ سىرتقى ىستەر ءۋازىرى يان ۋ - يمەن كەزدەستى

شينحۋا اگەنتتىگى، 12 - ايدىڭ 25 - كۇنى، بەيجيڭ. 12 - ايدىڭ 25 - كۇنى مەملەكەتتىك كەڭەستىڭ زۇڭليى لي چياڭ حالىق سارايىندا جۇڭگوعا ساپارلاي كەلگەن جاپونيانىڭ سىرتقى ىستەر ءۋازىرى يان ۋ - يمەن كەزدەستى.

لي چياڭ مىنالاردى ءبىلدىردى: قازىر جۇڭگو - جاپونيا قارىم - قاتىناسى جاقسارۋدىڭ، دامۋدىڭ شەشۋشى كەزەڭىندە تۇر. وتكەن ايدا ءتوراعا شي جينپيڭ جاپونيانىڭ باس ءۋازىرى شى پوماۋمەن پەرۋدە كەڭەس وتكىزدى، ەكى جاق جۇڭگو مەن جاپونيانىڭ ستراتەگيالىق ءوزارا ءتيىمدى قارىم - قاتىناسىن جاپپاي ىلگەرىلەتۋگە بىرگە قۇلشىنىپ، جاڭا ءداۋىردىڭ تالابىنا ۇيلەسەتىن سىندارلى، ورنىقتى جۇڭگو - جاپونيا قارىم - قاتىناسىن ورناتۋ ءۇشىن كۇش سالۋعا ءبىر اۋىزدان ماقۇل بولدى. جۇڭگو جاق جاپونيا جاقپەن بىرگە وسى دۇرىس بەتالىستى ويداعىداي يگەرىپ، ەكى ەل باسشىلارى كەلىسكەن ماڭىزدى ورتاق تانىمدى ويداعىداي تياناقتاندىرىپ، ەكى جاقتى قارىم - قاتىناستىڭ باياندى، اقاۋسىز دامۋىن ىلگەرىلەتىپ، ناقتى سەلبەستىكتە اناعۇرلىم كوپ جاڭا جەتىستىكتەرگە قول جەتكىزۋدى قالايدى.

لي چياڭ بىلاي دەپ اتاپ كورسەتتى: جۇڭگو مەن جاپونيا − ىرگەلەس كورشىلەر، كوشىپ كەتە المايتىن كورشىلەر، ”ءبىر - ءبىرىن سەلبەستىك سەرىگى ساناۋ، ءبىر - بىرىنە قاتەر توندىرمەۋ“ − ەكى ەلدىڭ بىرگە بەرگەن ايبىندى ۋادەسى. جاپونيا جاقتىڭ جۇڭگو جاقپەن ءبىر باعىتتا ىلگەرىلەپ، جۇڭگو مەن جاپونيانىڭ 4 ساياسي قۇجاتىندا تۇراقتاندىرىلعان ءتۇرلى پرينسيپتەرگە بويسۇنىپ، تاريحقا دۇرىس قاراپ، بولاشاقتى بەتكە الىپ، الاۋىزدىقتاردى سىندارلى دا ۇيلەسىمدى مەڭگەرىپ، جۇڭگو - جاپونيا قارىم - قاتىناسىنىڭ كەلەلى جاعدايىن قورعاۋىن ءۇمىت ەتەمىن. قازىر دۇنيە ءجۇزى دامۋىنىڭ ورنىقسىزدىعى، تۇراقسىزدىعى كۇشەيدى، ەكى جاق ەكونوميكا - ساۋدا قارىم - قاتىناسىن كەڭەيتىپ، ءوزارا ءتيىمدى سەلبەستىكتى تەرەڭدەتىپ، ەكى ەل كاسىپورىندارى مەن ەكى ەل حالىقتارىن اناعۇرلىم ويداعىداي يگىلىككە كەنەلتۋى كەرەك. مەملەكەتتەر قارىم - قاتىناسى حالىقتار سۇيىسپەنشىلىگىن نەگىز ەتەدى، ەكى جاق گۋمانيتارلىق اۋىس - كۇيىستى اناعۇرلىم كۇشەيتىپ، دوستىق نەگىزىن بەكەمدەۋى كەرەك.

يان ۋ - ي مىنالاردى ءبىلدىردى: جاپونيا مەن جۇڭگونىڭ 2000 جىلدان استام دوستىق بارىس - كەلىس تاريحى بار، قازىر وڭىرلىك جانە حالىقارالىق ىستەر جونىنەن ماڭىزدى جاۋاپكەرشىلىك ارقالاپ وتىر. جاپونيا جاق جۇڭگو جاقپەن بىرگە قۇلشىنىپ، ەكى ەل باسشىلارى تۇراقتاندىرعان بەتالىستى بويلاپ، ءار دارەجەلى بارىس - كەلىستى، اسىرەسە، حالىقتىق اۋىس - كۇيىستى كۇشەيتىپ، ءوزارا ءتيىمدى سەلبەستىكتى جانە حالىق رايى اۋانىن جاقسارتۋدى جەبەپ، ستراتەگيالىق ءوزارا ءتيىمدى قارىم - قاتىناستى جاپپاي ىلگەرىلەتىپ، سىندارلى دا ورنىقتى جاپونيا - جۇڭگو قارىم - قاتىناسىن ورناتۋدى قالايدى.

كەلۋ قاينارى: حالىق تورابى