جۋ گۋاڭيا جولداس دۇنيەگە كەلگەندىگىنىڭ 100 جىلدىعىن اتاپ ءوتۋ اڭگىمە ءماجىلىسى بەيجيڭدە وتكىزىلدى

«حالىق گازەتى»، 12 - ايدىڭ 25 - كۇنى، بەيجيڭ (ءتىلشى جاۋ چىڭ). جۋ گۋاڭيا جولداس دۇنيەگە كەلگەندىگىنىڭ 100 جىلدىعىن اتاپ ءوتۋ اڭگىمە ءماجىلىسى 12 - ايدىڭ 25 - كۇنى بەيجيڭدە وتكىزىلدى. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك ساياسي كەڭەستىڭ ءتوراعاسى ۋاڭ حۋنيڭ اڭگىمە ماجىلىسىنە قاتىناستى ءارى ءماجىلىستىڭ الدىندا جۋ گۋاڭيا جولداستىڭ تۋىس - تۋعاندارىمەن كەزدەستى.

جۋ گۋاڭيا جولداس − ەلىمىزدىڭ يادرو عىلىمى ىستەرىنىڭ نەگىزگى باستاماشىلارىنىڭ ءبىرى، جۇڭگو عىلىم اكادەمياسىنىڭ، جۇڭگو ينجەنەريا اكادەمياسىنىڭ ساقا اكادەميگى، جۇڭگو حالىق ساياسي ءماسليحات كەڭەسى 8 -، 9 - كەزەكتى مەملەكەتتىك كوميتەتتەرىنىڭ ورىنباسار ءتوراعاسى.

مەملەكەتتىك ساياسي كەڭەس ءتوراعاسىنىڭ ورىنباسارى حۋ چۇنحۋا اڭگىمە ماجىلىسىندە جۋ گۋاڭيا جولداستىڭ شۇعىلالى ءومىرىن ەسكە الدى؛ ونىڭ پارتياعا ادال بولۋ، ۋادەنى ءىس - ارەكەتى ارقىلى ورىنداۋ سىندى ساياسي قاسيەتىنەن، وتان ءۇمىتىن ادالدىقپەن اقتاۋ، العان بەتىنەن قايتپايتىن قالتقىسىز سۇيىسپەنشىلىگىنەن، قاتاڭ ۇيرەنۋ، ەرلىكپەن شىڭعا شىعۋ سىندى جاسامپازدىق رۋحىنان، ءمورالدى جوعارى قويىپ، وزگەلەرگە ۇستاز بولاتىن وسكەلەڭ ونەگەسىنەن ۇيرەنۋدى باسا دارىپتەدى؛ جاڭا جورىقتا ءبىز شي جينپيڭ جولداستى ۇيىتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتىڭ گۇلدەنۋى ۇلى ءىسىن جاپپاي ىلگەرىلەتۋ جولىندا ىنتىماقتاسا كۇرەس جۇرگىزۋىمىز كەرەكتىگىن ءبىلدىردى.

مەملەكەتتىك ساياسي كەڭەس ءتوراعاسىنىڭ ورىنباسارى، قوسىمشا باس حاتشىسى ۋاڭ دۇڭفىڭ اڭگىمە ءماجىلىسىن باسقاردى.

كەلۋ قاينارى: حالىق تورابى